1. Kon nos por hasi Yehova masha kontentu?

 IMAGINÁ ku bo a duna bo amigu un regalo ku bo sa ku e gusta i ku e mester di dje. Kon lo bo sinti si e djis zuai e den kashi sin us’é nunka mas? Sigur lo bo sinti bo hopi malu. Di otro banda, lo bo ta kontentu si e ta hasi bon uso di dje i ta masha gradisidu p’e. Kiko ta e lès? Yehova a duna nos un regalo; el a manda su yu muri pa nos. Pues Yehova ta keda masha kontentu si nos ta mustra nos gratitut pa e regalo ei i tambe pa su amor, ku a motiv’é perkurá e reskate pa nos!—Huan 3:16; Rom. 5:​7, 8.

2. Kiko nos ta bai trata den e artíkulo akí?

² Pero kisas ku tempu, nos por pèrdè nos apresio pa e reskate i kuminsá mir’é komo algu ku no ta dje spesial ei. Ta komo si fuera nos ta zuai Yehova su regalo den kashi, leu fo’i bista i no ta pensa mas riba dje. Pa evitá ku esei ta pasa, konstantemente nos tin ku sigui pensa riba tur loke Dios i Kristu a hasi pa nos pa nos no pèrdè nos gratitut. Ta nèt esei e artíkulo akí ta bai yuda nos kuné. Nos lo trata kiko ta e bendishonnan ku nos ta haña for di e reskate awor i den futuro. Tambe, nos ta bai mira kon nos por mustra nos gratitut foral den e simannan rònt di Memorial.

E BENDISHONNAN KU NOS TA HAÑA AWOR

3. Kiko ta un di e bendishonnan ku nos ta haña for di awor?

³ Ya kaba nos ta hañando bendishonnan for di e reskate. Por ehèmpel, e reskate ta hasi posibel ku Yehova ta pordoná nos nos pikánan. Yehova no ta obligá di hasi esei, ma e ta hasi esei pasobra e ke. E salmista tabata masha gradisidu  ku Yehova a pordon’é. P’esei el a kanta: “O Yehova, bo ta bon i semper kla pa pordoná.”—Sal. 86:5; 103:​3, 10-13.

4. Pa ken Yehova a pèrkurá e reskate? (Lukas 5:32; 1 Timoteo 1:15)

⁴ Tin hende ta sinti ku nan no meresé Yehova su pordon. Eigenlijk, e bèrdat ta ku nos niun no meresé esei. Apòstel Pablo a komprondé ku e “no ta digno di ser yamá apòstel.” Pero djei el a bisa: “Pa medio di e bondat inmeresí di Dios, mi ta loke mi ta.” (1 Kor. 15:​9, 10) Ora nos arepentí di nos pikánan, Yehova ta pordoná nos. Dikon? No pasobra nos meresé esei, sino pasobra e ta stima nos. Pues, si ta difísil pa bo aseptá ku Yehova ta pordoná bo, kòrda ku e reskate no ta pa hende ku nunka no sa peka.—Lesa Lukas 5:32; 1 Timoteo 1:15.

5. Akaso nos tin ku pensa ku nos tin derecho riba Yehova su pordon? Splika.

⁵ Niun di nos no mester pensa ku nos tin derecho di haña Yehova su pordon pasobra nos tin hopi aña ta sirbié. Ta klaru ku e ta na altura di tur e añanan ku nos a sirbié fielmente i ta kontentu ku esei. (Heb. 6:10) Pero e reskate ta un regalo. E no ta un pago pa loke nos a hasi pa Yehova. Lo no ta bon pa kuminsá pensa ku komo ku nos a hasi hopi kos pa Yehova nos meresé su pordon. Dikon? Pasobra esei lo nifiká ku nos ta pensa ku no tabatin sentido pa Kristu muri pa nos.—Kompará ku Galationan 2:21.

6. Dikon Pablo a traha duru pa Yehova?

⁶ Pablo tabata sa ku e no por a gana Yehova su pordon. Pero dikon anto el a traha asina duru? El a hasi esei pasobra e kier a mustra su gratitut pa Yehova su bondat inmeresí. (Efe. 3:7) Nos tambe sa ku nos no por gana Yehova su pordon. Pero meskos ku Pablo, nos ta traha duru pa mustra Yehova nos gratitut.

7. Ki otro bendishon nos ta haña for di e reskate? (Romanonan 5:1; Santiago 2:23)

⁷ Un otro bendishon ku e reskate ta duna nos for di awor ta ku nos por tin un amistat será ku Yehova. a Manera nos a siña den e artíkulo anterior, nos niun no a nase ku un amistat ku Yehova. Pero danki na e reskate, nos por tin “pas ku Dios” i asina ei hala serka dje.—Lesa Romanonan 5:1; Santiago 2:23.

8. Dikon nos ta gradisidu na Yehova pa e privilegio di orashon?

⁸ Debí ku nos tin un amistat será ku Yehova, nos tin un privilegio masha spesial; nos por papia kuné den orashon. Yehova ta skucha tur nos orashonnan, tantu esnan na reunion komo esnan ku nos ta hasi ora nos ta nos so. Orashon ta kalma i trankilisá nos ora nos ta anshá. Pero mas ku esei, e ta hasi nos amistat ku Yehova mas fuerte. (Sal. 65:2; Sant. 4:8; 1 Huan 5:14) Ora Hesus mes tabata aki riba tera, regularmente el a papia ku Yehova. E tabatin sigur ku su Tata tabata skuch’é i ku orashon lo a tene su amistat ku Yehova fuerte. (Luk. 5:16) Nos ta hopi gradisidu ku, debí na Hesus su sakrifisio, nos por ta amigu di Yehova i asta papia kuné!

E BENDISHONNAN KU NOS TA HAÑA DEN FUTURO

9. Ki bendishon sirbidónan fiel lo haña for di e reskate den futuro?

⁹ Ki bendishon nos lo haña for di e reskate den futuro? Bida eterno! Pa hopi  hende esei ta difísil pa kere pasobra semper hende a muri. Semper tabata Yehova su propósito pa hende biba pa semper. Si Ádam no a peka, tur hende lo ta bibando pa semper i nos niun lo no a pensa ku bida eterno lo ta algu imposibel. Pero komo ku Ádam a peka, bida eterno ta zona straño. Ma nos por tin sigur ku esei lo bira un realidat pasobra Yehova a hasi esei posibel dor di paga un preis haltu—ku bida di su mes Yu.—Rom. 8:32.

10. Kiko e ungínan i e otro karnénan ta spera riba dje?

¹⁰ Aunke bida eterno ta un bendishon pa den futuro, Yehova ke pa nos tiné bibu den nos mente. E ungínan no por warda pa bai shelu pa reina huntu ku Kristu. (Rev. 20:6) Anto e otro karnénan tampoko no por warda p’e dia yega ku nan por biba pa semper den un paradeis aki riba tera sin tristesa, doló ni sufrimentu. (Rev. 21:​3, 4) Abo tin e speransa di biba pa semper aki riba tera? Kòrda ku e rekompensa ei no ta bal ménos ku esun di bai shelu komo si fuera e ta un premio di konsuelo. Eigenlijk, ta pa esei hende a ser trahá; pa biba akí riba tera pa semper. Pues, bo por tin sigur ku lo bo ta super felis den Paradeis.

11-12. Kiko ta algun bendishon ku nos ta spera den Paradeis? (Wak e plachi.)

¹¹ Imaginá bo kon bida lo ta den Paradeis aki riba tera. Lo bo no bira malu ni muri. (Isa. 25:8; 33:24) Yehova lo duna bo tur e kosnan bon ku bo ta deseá. Tambe, lo bo tin tempu pa siña hasi e kosnan ku semper bo tabata ke hasi. Por ehèmpel siña mas tokante nos planeta, pinta, toka òf kanta. Klaru, den Paradeis nos ta bai tin mester di hende pa diseñá i traha kas. Tambe lo mester di hende pa planta, prepará kuminda, traha hèrmènt i pa kuida hardin. (Isa. 35:1; 65:21) Ku bida eterno, lo bo tin tempu pa hasi tur e kosnan ei i muchu mas.

¹² Anto no lubidá riba e goso ku bo ta  bai sinti ora bo topa bo sernan kerí ku resusitá! (Echo. 24:15) Es mas, imaginá kon dushi lo ta pa tuma bo tempu i opservá loke Yehova a traha i asina siña mas di dje. (Sal. 104:24; Isa. 11:9) I mas mihó ainda, komo ku bo ta perfekto lo bo por sirbi Yehova sin tin sintimentu di kulpa pasobra bo a hasi un kos malu. Siguramente lo bo no ke bai tras di “e plasernan pasahero di piká” i pèrdè bo chèns di disfrutá di tur e futuro bendishonnan ei. (Heb. 11:25) Bida den Paradeis lo ta muchu mas mihó ku kualke kos ku mundu por ofresé nos aworakí. Ta bèrdat ku na e momento akí Paradeis ta algu ku nos ta spera riba dje. Pero pronto lo e bira realidat. Esei ta posibel pasobra Yehova a stima nos asina tantu ku el a duna nos e reskate!

MUSTRA GRATITUT PA YEHOVA SU AMOR

13. Kon nos por mustra gratitut pa Yehova su amor? (2 Korintionan 6:1)

¹³ Un manera ku nos por mustra gratitut na Yehova pa e reskate ta di hasi sigur ku su trabou ta na promé lugá den nos bida. (Mat. 6:33) Dikon? Pasobra Hesus a muri “pa esnan ku ta biba no biba mas pa nan mes, ma pa esun ku a muri pa nan i a ser lantá for di morto.” (2 Kor. 5:15) Yehova ta hopi bondadoso ku nos i ta pordoná nos. Pues ora nos hasi tur loke nos por pa sirbié, nos ta demostrá ku nos ta gradisidu pa tur loke el a hasi pa nos.—Lesa 2 Korintionan 6:1.

14. Kon nos por mustra ku nos ta konfia Yehova i ta obedesé su guia?

¹⁴ Un otro manera ku nos por mustra gratitut na Yehova pa e reskate ta dor di konfia Yehova i obedesé su guia. Nos por hasi esei ku nos desishonnan. Por ehèmpel, kisas bo ta hungando ku e idea di sigui enseñansa superior. Òf kisas bo tin ku skohe ki trabou bo ta bai hasi. Den tur kaso bo mester buska pa sa kiko Yehova ke pa bo hasi. (1 Kor. 10:31; 2 Kor. 5:7) Ora nos tuma un desishon ku ta demostrá ku nos ta konfia Yehova, algu masha bunita ta sosodé. Nos fe den Yehova i nos amistat kuné ta krese i esei ta hasi nos speransa di bida eterno asta mas fuerte.—Rom. 5:​3-5; Sant. 2:​21, 22.

15. Durante e tempu di Memorial, kon nos por mustra ku nos ta gradisidu pa e reskate?

¹⁵ Den ki otro manera mas nos por mustra gratitut pa Yehova su amor? Esei ta ora nos ta usa e temporada di Memorial pa mustra Yehova kon gradisidu nos ta pa e reskate. Kon nos por hasi esei? Wèl, pa di promé nos por sòru pa nos t’ei presente na Memorial. Ademas, nos por hasi tur nos esfuerso pa invitá mas tantu hende posibel pa bini. (1 Tim. 2:4) Lo ta bon pa splika nan kiko presis ta tuma lugá na Memorial. E vidionan Dikon Hesus A Muri?  i Laga Nos Rekordá Hesus Su Morto riba jw.org por yuda nos ku esei. Ansianonan mester hasi sigur di invitá e rumannan inaktivo. Nos ta sigur ku lo tin gran goso den shelu i riba tera si algun di Yehova su karnénan pèrdí bolbe serka dje! (Luk. 15:​4-7) Laga nos hasi esfuerso na Memorial pa kumindá spesialmente e bishitantenan nobo i esnan ku no a asistí na reunion masha tempu. Nos ke pa nan tur sinti nan mes na kas!—Rom. 12:13.

16. Dikon nos mester hasi esfuerso pa hasi mas den sirbishi durante e temporada di Memorial?

¹⁶ Bo ta kere ku bo por hasi mas den sirbishi durante e temporada di Memorial? Esei lo ta un bon manera pa bo mustra bo gratitut pa tur loke Yehova i Hesus a hasi pa abo. Mas aktivo bo ta den sirbishi, mas bo ta sinti Yehova su yudansa i esei lo hasi bo konfiansa den dje mas fuerte. (1 Kor. 3:9) Tambe no lubidá di hasi bo bèst pa keda pareu ku e lesamentu di Beibel pa Memorial ku ta aparesé den nos Analisá e Skritura Tur Dia òf den nos Material i Tarea pa Reunion. Anto si bo ke, hasi mas investigashon riba loke bo a lesa e dia ei den bo estudio personal.

17. Kiko ta hasi Yehova kontentu? (Wak e kuadro “ Kon Nos Por Mustra Gratitut na Yehova.”)

¹⁷ Awor kiko si ya bo ta hasiendo tur loke bo por, pero bo sirkunstansia no ta permití bo hasi tur loke nos a menshoná den e artíkulo akí. Kòrda, Yehova no ta kompará loke abo ta hasi ku loke otro ruman ta hasi. E ta mira den bo kurason kuantu bo ta stim’é. Anto e ta kontentu ku esei pasobra e sa ku bo ta apresiá e reskate.—1 Sám. 16:7; Mar. 12:​41-44.

18. Dikon nos ta gradisidu na Yehova i Hesus?

¹⁸ Si no ta pa e reskate, nos lo no tin pordon pa nos pikánan ni un bon amistat ku Yehova ni tampoko e speransa di biba pa semper. P’esei laga nos semper mustra nos gratitut na Yehova pa su gran amor ku a motiv’é pa duna nos e bendishonnan ei. (1 Huan 4:19) Tambe laga nos mustra gratitut na Hesus, kende a entregá su bida pa nos!—Huan 15:13.