1. Kiko hopi hende ta hasi awendia?

 BO A ripará ku awendia hopi hende ta opseshoná ku nan mes? Por ehèmpel, riba ret sosial, hende ta hasi yen di kos pa hala atenshon na nan mes i pa broma ku loke nan tin i loke nan ta hasi. Pero ta masha poko hende ta duna onor na Yehova. Den e artíkulo akí nos lo trata kiko ke men duna onor na Yehova i dikon nos ta hasi esei. Tambe nos lo trata kon nos por duna Yehova e onor ku e meresé i kon un djis akí e mes lo onra su nòmber.

KI TA ENSERÁ DUNA ONOR NA YEHOVA?

2. Kiko Yehova a hasi na Seru Sinaí? (Wak e plachi.)

² Beibel ta mustra ku Yehova ta un Dios impreshonante. Por ehèmpel, djis un par di dia despues ku Yehova a libra e nashon di Israel for di Egipto, el a mustra nan ku e ta un Dios poderoso. Visualisá esaki: Miónes di israelita pará na pia di Seru Sinaí wardando pa skucha loke Dios tabatin di bisa nan. Un nubia skur a tapa e seru. Djei, diripiente rònt di henter e seru tabatin huma, tera a kuminsá sagudí masha duru mes, tabatin bos, welek i un zonido masha duru mes di kachu. (Éks. 19:​16-18; 24:17; Sal. 68:8) Ora Yehova a hasi tur e kosnan ei, sigur e israelitanan a keda hopi impreshoná di kon poderoso Yehova ta!

3. Kon nos por onra Yehova?

³ Yehova ta un Dios masha maravioso, i nos por yuda otro hende komprondé esei. Un manera ku nos por onra Yehova ta di konta hende tokante su inmenso poder i  bunita kualidatnan. Tambe, nos por onra Yehova dor di rekonosé ku ta danki na dje nos por logra hopi kos. (Isa. 26:12) Rei David a pone un bon ehèmpel den esei ora el a hasi un orashon dilanti henter e kongregashon di Israel. El a resa: “O Yehova, bo ta grandi, poderoso, magnífiko, mahestuoso i yen di splendor. Sí, tur loke tin den shelu i tur loke ku tin riba tera ta di bo.” Despues ku David a kaba di hasi su orashon, “henter e kongregashon a alabá Yehova.”—1 Kró. 29:​11, 20.

4. Kon Hesus a onra Yehova?

⁴ Ora Hesus tabata aki riba tera, e tambe a onra su Tata dor di bisa ku Yehova ta Esun ku a dun’é poder pa hasi tur milager. (Mar. 5:​18-20) E manera ku Hesus a papia tokante su Tata i e manera ku el a trata otro hende tambe a duna onor na Yehova. Un biaha Hesus tabata na e snoa ta siña e hendenan. Entre nan tabatin un muhé ku tabatin un demoño den dje pa 18 aña largu. E demoño ei a pone e muhé kana tur doblá i no por a stret su kurpa. E situashon ei tabata hopi tristu pa mira. Hesus a sinti duele di e muhé i ku hopi kariño el a bis’é: “Muhé, bo ta librá di bo malesa.” Hesus a pone su man riba dje, i mesora e muhé a stret su kurpa i a “kuminsá glorifiká Dios.” E tabata masha kontentu ku Yehova a kur’é! (Luk. 13:​10-13) E muhé ei tabatin bon motibu pa glorifiká, esta, onra, Dios, i nos tambe.

DIKON NOS TA ONRA YEHOVA?

5. Dikon nos tin rèspèt pa Yehova?

⁵ Pasobra nos tin rèspèt profundo pa Yehova. Tin hopi motibu dikon nos ta respetá Yehova. E ta todopoderoso; su poder no tin límite. (Sal. 96:​4-7) Su sabiduria ta inkomparabel, i esei ta bisto den tur e kosnan ku el a krea. El a duna nos bida i tur loke nos mester pa sigui biba. (Rev. 4:11) E ta fiel. (Rev. 15:4) Tur loke e hasi tin éksito, i semper e ta kumpli ku su promesanan. (Hos. 23:14) Ta di komprondé anto pakiko Yeremías a bisa esaki tokante Yehova: “Entre tur e hendenan sabí di e nashonnan i entre tur nan reinonan, no tin niun persona manera bo”! (Yer. 10:​6, 7) Pues, nos tin hopi motibu pa respetá nos Tata den shelu. Pero no ta rèspèt so nos tin pa Yehova. Su bunita kualidatnan ta pone nos stim’é masha hopi mes tambe.

6. Dikon nos stima Yehova?

⁶ Pasobra nos stima Yehova di henter nos kurason. Yehova su bunita kualidatnan ta pone ku nos ta stim’é. E ta yen di miserikòrdia i kompashon. (Sal. 103:13; Isa. 49:15) E ta pone su mes den sapatu di kada un di nos. Ora nos ta tristu, e tambe ta tristu. (Zak. 2:8) E ta yuda nos konos’é i bira su Amigu. (Sal. 25:14; Echo. 17:27) E ta humilde; “e ta sak abou pa wak e kosnan den shelu i riba tera. E ta lanta hende insignifikante for di suela.” (Sal. 113:​6, 7) Ken lo no ke onra un Dios asina maravioso?—Sal. 86:12.

7. Ki oportunidat nos tin?

⁷ Pasobra nos ke pa otro hende siña konosé Yehova. Mayoria di hende tin un idea robes tokante Yehova. Esei ta pasobra Satanas a siega nan mente dor di plama mentira tokante Yehova. (2 Kor. 4:4) Satanas a konvensé hopi hende ku  Yehova ta un Dios ku ta tuma vengansa, ku no tin kunes ku nos i ku ta pa su falta nos ta sufri asina hopi. Pero, nos sa ku esei no ta bèrdat! Nos tin e oportunidat pa yuda hende sa ken Yehova realmente ta pa asina nan tambe onr’é. (Isa. 43:10) Salmo 96 ta papia tokante onra Yehova. Den e salmo ei nos lo mira kon nos por duna Yehova e onor ku e meresé.

MAS MANERA DI DUNA YEHOVA E ONOR KU E MERESÉ

8. Kon nos por onra Yehova ku nos abla? (Sal. 96:​1-3)

⁸ Lesa Salmo 96:​1-3. Ku nos abla. E versíkulonan ei ta bisa nos pa “kanta pa Yehova,” “alabá su nòmber,” “anunsiá kon e ta salba hende” i “proklamá su grandesa na tur nashon.” Tur eseinan ta maneranan ku nos por onra nos Tata den shelu. Yehova su sirbidónan den pasado a probechá di tur oportunidat pa konta otro hende tokante Yehova su bunita kualidatnan i tur e bon kosnan el a hasi pa nan. (Dán. 3:​16-18; Echo. 4:29) Kon nos por hasi meskos?

9-10. Kiko abo a siña di Angelena? (Wak e plachi.)

⁹ Ban wak loke a pasa ku Angelena, a un ruman ku ta biba na Merka. Ku kurashi el a papia tokante Yehova na trabou. Na su trabou nobo, nan tabatin e kustumber di laga tur empleado ku ta nobo konta algu di nan mes den un reunion. Angelena a prepará pa pasa algun potrèt pa mustra kon dushi ta pa ta un Testigu di Yehova. Pero, e kolega ku a introdusí su mes promé kuné a bisa ku el a lanta komo Testigu di Yehova. Ma el a kuminsá papia malu tokante Testigunan. Angelena a bisa: “Mi kurason tabata bati te den mi garganta. Pero m’a puntra mi mes: ‘Mi ta bai lag’é papia asina tokante Yehova? Òf mi ta bai defendé mi Tata?’”

¹⁰ Ora su kolega a kaba, Angelena a hasi un orashon den su mes. Djei, na un manera masha amabel el a bisa e kolega: “Nos tin algu en komun. Mi tambe a lanta komo un Testigu di Yehova, i te ainda mi ta un.” Bo por a sinti e tenshon den e sala! Pero, Angelena a keda kalmu i a  mustra su koleganan su kompilashon di potrèt di e ku su amigunan sirbiendo Yehova ku goso. Ku rèspèt el a splika su kreensianan na su koleganan. (1 Ped. 3:15) Pa ora ku Angelena a kaba su presentashon, e kolega a kalma i a asta atmití ku e tin dushi rekuerdo di e tempu ku el a lanta komo Testigu. Angelena a bisa: “Yehova meresé pa nos defend’é. Ta un onor pa papia e bèrdat tokante dje.” Pa nos tambe ta un privilegio pa onra i alabá Yehova ora otro hende falt’é rèspèt.

11. Atraves di historia, kon Yehova su sirbidónan a sigui e prinsipio na Salmo 96:8?

¹¹ Lesa Salmo 96:8. Ku nos kosnan material. Semper Yehova su sirbidónan a onr’é ku nan kosnan material. (Pro. 3:9) Por ehèmpel, e israelitanan a duna kontribushon pa traha i mantené e tèmpel. (2 Rei. 12:​4, 5; 1 Kró. 29:​3-9) Algun di Hesus su disipelnan “tabata usa nan pertenensianan” pa asina Hesus i su apòstelnan tabatin loke nan mester. (Luk. 8:​1-3) Anto Beibel ta bisa ku ora algun kristian tabata sufri debí na un periodo di hamber, nan rumannan ku tabata biba na otro lugá a manda plaka pa nan. (Echo. 11:​27-29) Awe, nos tambe por onra Yehova ku nos kontribushonnan boluntario.

12. Kon nos por onra Yehova ku nos donashonnan? (Wak e plachi.)

¹² Wak un ehèmpel ku ta mustra kon nos ta onra Yehova ku nos donashonnan. Na 2020, Zimbabwe tabatin un sekura ku a dura hopi largu. Miónes di hende tabata kore peliger di muri di hamber, inkluso nos ruman ku yama Prisca. Apesar di e sekura, Prisca a sigui ku su kustumber di prediká tur djárason i djabièrnè, asta durante e temporada di plug. Komo ku Prisca tabata bai prediká en bes di traha den su kunuku, su bisiñanan a pensa ku su kabes no ta bon. Nan tabata bis’é: “Bo ta bai muri di hamber.” Ku konfiansa, e tabata kontestá nan: “Yehova nunka a bandoná su sirbidónan.” Poko despues, danki na nos donashonnan, nos organisashon a manda kuminda i otro kosnan ku Prisca tabatin mester pa sobrebibí. Prisca su bisiñanan a keda impreshoná i a bis’é: “Dios nunka a bandoná bo; nos  ke sa mas tokante dje.” Shete di nan a kuminsá asistí na reunion.

13. Kon nos por onra Yehova ku nos kondukta? (Salmo 96:9)

¹³ Lesa Salmo 96:9. Ku nos kondukta. E saserdotenan mester tabata limpi ora nan tabata sirbi na Yehova su tèmpel; nan mester a laba nan man ku nan pia. (Éks. 40:​30-32) Nos tambe mester ta limpi den sentido físiko, pero loke ta mas importante ta ku nos ta hiba un bida limpi den bista di Dios. (Sal. 24:​3, 4; 1 Ped. 1:​15, 16) Beibel ta bisa ku nos mester “kita e personalidat bieu” i “bisti e personalidat nobo.” Esei ke men ku nos ta evitá di pensa kosnan robes i evitá di hasi kosnan ku Yehova ta odia. Na lugá di esei, nos ta pensa i aktua na un manera ku ta demostrá e bunita kualidatnan di Yehova. (Kol. 3:​9, 10) Ku Yehova su yudansa, asta e hendenan di mas inmoral i violento por kambia i bisti e personalidat nobo.

14. Kiko bo ta siña di Jack? (Wak e plachi.)

¹⁴ Jack tabata masha peligroso i violento. Hende tabata yam’é: “Demoño.” Debí na e grado di su krímennan, el a haña sentensia di morto. Segun ku e tabata warda e fecha di su ehekushon, el a aseptá pa studia Beibel ku un ruman ku tabata bishitá e prizòn. Apesar di tur e kosnan horibel ku Jack a hasi den pasado, el a kita e personalidat bieu i ku tempu el a batisá. Jack a kambia asina hopi ku ora e fecha a yega pa ehekut’é, ku awa na wowo e wardadónan di prezu a yam’é ayó. Un komandante na e prizòn a bisa: “Un tempu, Jack tabata un dje pió prizoneronan, awor e ta un di e mihónan.” E siman despues ku a ehekutá Jack, e rumannan ku tabata bai prizòn pa dirigí reunion tur siman a ripará ku tabatin un prizonero ku a bini pa promé biaha. Nan a puntr’é: ‘Kiko a pone ku b’a bin?’ E tabata impreshoná ku e kambionan ku Jack a hasi i kier a sa kiko e mester hasi pa adorá Yehova. Ta bisto anto ku nos por onra Yehova ku nos kondukta!—1 Ped. 2:12.

 KON YEHOVA LO ONRA SU NÒMBER UN DJIS AKÍ?

15. Kon Yehova lo onra su nòmber pa semper? (Salmo 96:​10-13)

¹⁵ Lesa Salmo 96:​10-13. E último versíkulonan di Salmo 96 ta deskribí Yehova komo un Rei i Hues hustu. Kon lo e onra su nòmber un djis akí? Lo e hasi esei pa medio di su huisionan. Pronto lo e destruí Babilonia e Grandi pasobra religionnan falsu a hasi hopi kos kruel i a gaña riba dje. (Rev. 17:​5, 16; 19:​1, 2) Ora Babilonia e Grandi stòp di eksistí, algun hende kisas lo disidí di djòin nos i sirbi Yehova. Finalmente, na Armagedon, Yehova ta bai destruí Satanas su mundu malbado i tur hende ku ta oponé Yehova i gaña riba dje. Pero lo e salba tur hende ku ta stim’é, obedes’é i ke dun’é onor. (Mar. 8:38; 2 Tes. 1:​6-10) Despues di e prueba final ku lo bini despues di Kristu su Reinado di Mil Aña, Yehova lo a santifiká su nòmber pa semper. (Rev. 20:​7-10) E tempu ei, “manera awa ta kubri fondo di laman, henter tera lo haña sa kon glorioso Yehova ta.”—Hab. 2:14.

16. Kiko bo ta determiná pa hasi? (Wak e plachi.)

¹⁶ Nos ta anhelá e dia ku tur hende lo duna Yehova e onor ku su nòmber meresé! Pero turesten, nos ta probechá di tur oportunidat ku nos haña pa onra Yehova. Pa yuda nos kòrda e importansia di esei, Kuerpo Gobernante a skohe Salmo 96:8 komo nos teksto di aña pa 2025: “Duna Yehova e onor ku su nòmber meresé.”