1. Dikon ta importante pa nos rekordá Hesus su morto tur aña?

 E RESKATE ku Hesus a paga ku su bida sin duda ta un regalo masha presioso! (2 Kor. 9:15) Debí na loke el a hasi, kada un di nos por tin un amistat será ku Yehova Dios i e speransa di biba pa semper. Nos tin hopi motibu pa ta gradisidu pa e amor ku Yehova a mustra humanidat i pa e sakrifisio di reskate ku el a pèrkurá. (Rom. 5:8) Pa yuda nos keda mustra gratitut i nunka lubidá loke Yehova i Hesus a hasi pa nos, Hesus a bisa nos pa rekordá su morto tur aña.—Luk. 22:​19, 20.

2. Kiko nos lo trata den e artíkulo akí?

² E aña akí, Memorial ta kai riba djasabra 12 di aprel. Sin duda nos tur tin pensá di bai. Lo ta bon pa kada un di nos tuma tempu, tantu den e simannan promé komo despues di Memorial, pa meditá a riba loke Yehova i Hesus a hasi pa nos. Den e artíkulo akí nos lo mira loke e reskate ta siña nos tokante Yehova i Hesus. Anto den e siguiente artíkulo nos lo mira e bendishonnan ku nos ta haña for di e reskate i kon nos por mustra nos gratitut.

 LOKE E RESKATE TA SIÑA NOS TOKANTE YEHOVA

3. Kon bin morto di djis ún hende por salba miónes di hende? (Wak e plachi.)

³ E reskate ta siña nos ku Yehova stima hustisia. (Deu. 32:4) Kon asina? Pensa riba esaki: Ádam a desobedesé Dios i debí na esei nos tur a heredá piká i ta muri. (Rom. 5:12) Pa salba nos di piká i morto, Yehova a manda Hesus pa muri pa nos. Pero kon bin morto di djis ún hende perfekto por salba miónes di hende? Apòstel Pablo a splika: “Meskos ku mediante desobedensia di esun hende ei [Ádam] hopi a bira pekadó, asina tambe mediante obedensia di esun persona akí [Hesus] hopi lo bira hustu.” (Rom. 5:19; 1 Tim. 2:6) Ku otro palabra, desobedensia di ún hende perfekto a pone ku nos tur a bira pekadó. P’esei, obedensia di ún hende perfekto lo salba nos.

4. Dikon Yehova no por a djis laga e desendientenan obediente di Ádam biba pa semper?

⁴ Tabata ègt nesesario pa Hesus muri pa salba nos? Yehova no por a djis laga e desendientenan obediente di Ádam biba pa semper? Pa hende imperfekto, esei por parse un bon solushon. Pero nos tin ku kòrda ku Yehova su hustisia ta perfekto. Pues Yehova no por a ignorá e piká teribel ku Ádam a kometé i hasi manera nada no a pasa.

5. Dikon nos por ta konvensí ku Yehova semper lo hasi loke ta hustu?

⁵ Pero ban bisa ku Yehova a pone su normanan di hustisia un banda, ku e no a pèrkurá e reskate i ku el a laga Ádam su desendientenan imperfekto biba pa semper. Kiko lo por a pasa? Hende lo por a kuminsá preokupá i puntra nan mes: ‘Si el a ignorá su normanan di hustisia un biaha kaba, lo e no bolbe hasié atrobe? Mi por tin sigur ku lo e kumpli ku su promesanan?’ Ma, manera nos sa Yehova a hasi loke ta hustu, aunke esei a nifiká ku e mester a laga su Yu di mas stimá muri. Pues nos por ta konvensí ku semper Yehova lo hasi loke ta hustu.

6. Kon e reskate ta siña nos ku Yehova stima nos? (1 Huan 4:​9, 10)

⁶ Ta bèrdat ku e reskate ta siña nos ku Yehova ta hustu. Pero e reskate ta siña nos tambe ku Yehova tin un amor inmenso pa nos. (Huan 3:16; lesa 1 Huan 4:​9, 10.) El a pèrkurá e reskate pasobra e ke pa nos biba pa semper, pero tambe pasobra e ke pa nos forma parti di su famia. Kòrda ku ora Ádam a peka Yehova a  sak’é for di Su famia. Komo resultado, nos tur a nase pafó di Yehova su famia. Pero danki na e reskate, tur hende ku tin fe den Dios i ta obedes’é ku tempu lo forma parti di su famia. Asta for di awor Yehova por pordoná nos pikánan i nos por tin un amistat será kuné i ku nos rumannan. Di bèrdat Yehova stima nos masha tantu mes!—Rom. 5:​10, 11.

7. Kon tur loke Hesus a sufri ta yuda nos komprondé kuantu Yehova stima nos?

⁷ Si nos para pensa riba kuantu doló Yehova mester a sinti pa mira su Yu sufri i muri, nos por komprondé mihó kuantu Yehova stima nos. Satanas ta bisa ku niun sirbidó di Dios lo no keda leal den situashonnan difísil. Pa mustra ku esei no ta bèrdat, Yehova a permití Hesus sufri promé ku el a muri. (Yòb 2:​1-5; 1 Ped. 2:21) Yehova a mira kon hende a hasi bofon di Hesus, kon sòldánan a sut’é ku zuip i klab’é na staka. Djei e mester a wak su Yu stimá sufri un morto doloroso. (Mat. 27:​28-31, 39) Yehova tabatin poder pa stòp nan na kualke momento. Por ehèmpel, e por a hasi algu ora algun enemigu di Hesus a bisa: “Si Dios tin plaser den dje, laga Dios libr’é.” (Mat. 27:​42, 43) Pero, si Yehova a hasi esei, e preis di reskate lo no por a wòrdu pagá i nos lo a keda sin speransa. P’esei, Yehova a permití su Yu sufri te ora el a hala su último rosea.

8. Dikon nos por tin sigur ku Yehova lo a sinti hopi doló i tristesa ora el a mira kon su Yu tabata sufri? (Wak e plachi.)

⁸ Nos no mester pensa ku pasobra Yehova ta todopoderoso e no tin sintimentu! Kon nos por sa ku e tin sintimentu? Nos ta trahá den su imágen, anto si nos tin sintimentu e tambe mester tin sintimentu. Beibel mes ta bisa ku tin biaha Yehova a sintié “ofendí” i “tristu.” (Sal. 78:​40, 41) Bo ta kòrda e relato di Ábraham i Ísak? Yehova a bisa Ábraham ku e mester a ofresé su úniko yu komo sakrifisio. (Gén. 22:​9-12; Heb. 11:​17-19) Bo por imaginá tur e emoshonnan ku Ábraham a sinti ora e tabata preparando pa mata su mes yu? Awèl, sin duda Yehova su doló i tristesa lo tabata hopi mas grandi segun ku e tabata mira kon hende tabata torturá su Yu kruelmente.—Wak e vidio Imitá Nan Fe—Ábraham, Parti 2 riba jw.org.

9. Kiko nos por siña for di Romanonan 8:​32, 38 i 39 tokante Yehova su amor?

⁹ E reskate ta siña nos ku no tin niun hende ku stima nos mas tantu ku Yehova, ni sikiera nos famia di mas stimá ni  nos mihó amigu. (Lesa Romanonan 8:​32, 38, 39.) Yehova stima nos asta mas ku nos mes. Djis pensa riba esaki: Abo tin gana di biba pa semper? Wèl, Yehova tin hopi mas gana pa abo biba pa semper. Bo ke pa bo pikánan ta pordoná? Yehova ke esei mas ainda. E úniko kos ku Yehova ta pidi nos ta di mustra ku nos ta gradisidu pa e regalo balioso di e reskate, tin fe den djE i obedes’é. Sin duda, e reskate ta mustra bon kla kuantu Yehova stima nos. I den e mundu nobo nos lo siña muchu mas tokante Yehova su amor.—Ekl. 3:11.

LOKE E RESKATE TA SIÑA NOS TOKANTE HESUS

10. (a) Dikon Hesus tabata agitá promé ku su morto? (b) Kon Hesus a mustra ku Satanas ta un gañadó? (Wak e kuadro “ E Lealtat di Hesus A Proba Ku Satanas Ta un Gañadó.”)

¹⁰ Hesus tabata masha preokupá tokante loke hende por a pensa di su Tata. (Huan 14:31) Promé ku Hesus su morto, su enemigunan a akus’é di a falta Dios rèspèt i di ta un kriminal. E akusashonnan ei a agitá Hesus pasobra nan por a laga hende pensa malu di su Tata. Ta p’esei el a resa: “Mi Tata, si ta posibel, kita e kopa akí for di mi.” (Mat. 26:39) Pero komo ku Hesus a keda fiel na Yehova te na su morto, el a proba ku e mentiranan ku Satanas a bisa tokante su Tata no ta bèrdat.

11. Kon Hesus a mustra kuantu e stima hende? (Huan 13:1)

¹¹ E reskate tambe ta siña nos ku Hesus di kurason tabata preokupá pa hende, foral pa su disipelnan. (Pro. 8:31; lesa Huan 13:1.) Por ehèmpel, Hesus tabata sa ku durante su sirbishi riba tera lo tabatin  algun kos difísil ku lo e mester a pasa aden i ku e mester a sufri i muri. Pero e no a mira su sirbishi riba tera komo djis un obligashon. Mas bien, el a duna tur di su mes ora e tabata prediká, siña i yuda otro hende. Te asta riba e dia di su morto, el a tuma tempu pa laba pia di su apòstelnan, pa siña nan, animá nan i konsolá nan. (Huan 13:​12-15) Anto ora e tabata yen di doló na e staka, el a duna speransa na un kriminal ku tabata kologá banda di dje i a regla kuido di su mama. (Luk. 23:​42, 43; Huan 19:​26, 27) Pues no ta ku Hesus su morto so el a demostrá kuantu e tabata stima hende, el a demostrá esei tambe durante henter su sirbishi aki riba tera.

12. Den ki sentido Hesus ta sigui hasi sakrifisio pa nos?

¹² Ta bèrdat ku Kristu a muri “ún biaha i pa semper,” pero ainda e ta hasiendo hopi sakrifisio pa nos. (Rom. 6:10) Kon asina? E ta trahando duru pa for di awor nos tin bendishonnan ku ta posibel debí na e reskate. Pensa riba tur e kosnan ku e ta hasi komo Rei, Sumo Saserdote i kabes di e kongregashon. (1 Kor. 15:25; Efe. 5:23; Heb. 2:17) E ta na enkargo di e trabou di reuní e ungínan i e multitut grandi, un trabou ku lo kaba promé ku tribulashon grandi terminá. b (Mat. 25:32; Mar. 13:27) E ta sòru tambe pa su sirbidónan fiel tin sufisiente kuminda spiritual durante e último dianan akí. (Mat. 24:45) Anto durante su Reinado di Mil Aña, lo e sigui traha pa yuda nos. Manera nos por mira, ora Yehova a duna su Yu, E no a djis dun’é pa muri pa nos sino tambe pa hasi hopi mas kos pa nos.

NUNKA STÒP DI SIÑA

13. Kiko por yuda bo sigui siña tokante kuantu Yehova i Hesus stima bo?

¹³ Loke lo yuda bo sigui siña tokante kuantu Yehova i Hesus stima bo ta di meditá riba loke nan a hasi pa bo. E aña akí, tantu den e simannan promé komo despues di Memorial, lesa un òf mas Evangelio. No purba di lesa demasiado kapítulo den un tiru. Mas bien, tuma tempu i purba di haña mas motibu pa stima Yehova i Hesus. I no lubidá di konta otronan loke bo a siña.

14. Segun Salmo 119:97 i nota, kon investigashon por yuda nos sigui siña tokante e reskate i otro siñansanan? (Wak e plachi.)

 ¹⁴ Si bo tin hopi aña den e bèrdat, kisas bo ta puntra bo mes ta kuantu kos nobo bo por siña tokante tópikonan konosí manera Yehova su hustisia, su amor i e reskate. E bèrdat ta ku semper lo tin kosnan nobo pa siña tokante e tópikonan ei. Kon bo por haña nan? Hasi uso di nos publikashonnan. Si bo haña un teksto ku bo no ta komprondé bon, hasi investigashon. I despues durante dia, meditá riba loke bo a deskubrí i riba loke esei ta siña bo di Yehova, su Yu i kuantu nan stima bo.—Lesa Salmo 119:97 i nota.

15. Dikon nos mester sigui buska tesoronan den Beibel?

¹⁵ No desanimá si no ta tur biaha bo ta siña algu nobo òf emoshonante ora bo lesa Beibel òf hasi investigashon. Studiamentu di Beibel, den un sentido, ta meskos ku buskamentu di oro. Buskadó di oro ta pasa oranan, te asta dianan, ta buska oro. Nan tin pasenshi i no ta entregá pasobra pa nan e pipita di mas chikitu tin balor. E tesoronan ku nos ta haña den Beibel ta muchu mas balioso ku oro. (Sal. 119:127; Pro. 8:10) Pues tene pasenshi i no stòp di lesa bo Beibel tur dia.—Sal. 1:2.

16. Kon nos por imitá Yehova i Hesus?

¹⁶ Segun ku bo ta studia, purba di wak kon bo por apliká loke bo a siña. Por ehèmpel, bo por imitá Yehova su hustisia dor di no hasi distinshon di hende. I bo por imitá e amor ku Hesus tin pa su Tata i pa otro hende dor di ta dispuesto pa hasi loke Yehova ke i yuda bo rumannan asta si bo tin ku hasi sakrifisio tin biaha. Tambe meskos ku Hesus, lo bo prediká na otro hende pa nan tambe haña oportunidat di haña sa tur e kosnan maravioso ku Yehova a bin ta hasi pa hende i pa nan por mustra fe den e reskate.

17. Kiko nos lo siña den e siguiente artíkulo?

¹⁷ Mas nos siña tokante e reskate, mas nos lo stima Yehova i Hesus. E ora ei, nan tambe lo stima nos mas. (Huan 14:21; Sant. 4:8) P’esei hasi bon uso di tur loke Yehova ta duna nos pa sigui siña mas tokante e reskate. Den e siguiente artíkulo nos lo siña mas tokante e bendishonnan ku nos ta haña for di e reskate i kon nos por mustra nos gratitut pa Yehova su amor.