1. Dikon Yehova a duna nos e regalo di matrimonio?

 YEHOVA ta “e Dios felis,” i e ke pa nos tambe ta felis. (1 Tim. 1:11) El a duna nos hopi regalo ku ta hasi nos felis. (Sant. 1:17) Un di e regalonan akí ta matrimonio. Ora un hòmber i un muhé kasa, nan ta primintí di stima, respetá i balorá otro. Tan ten ku nan dos stima otro for di profundidat di nan kurason, nan lo ta felis.—Pro. 5:18.

2. Kon hopi esposo ta trata nan kasá?

² Ta tristu pa bisa, pero mayoria di pareha no ta sigui stima i respetá otro manera nan a primintí dia nan a kasa. I ta di ferwagt ku nan lo no ta felis. Segun un informe resien di Organisashon Mundial di Salú, hopi esposo ta bati nan kasá, ta papia brutu i malu ku nan òf ta maltratá nan na otro manera. Algun di e esposonan akí ta trata nan kasá lif lif dilanti otro hende, pero na kas, ta un otro kos. Hopi esposo ta wak pornografia, a i esaki tambe ta laga nan kasá tristu, kibrá i malu.

3. Ki ta pone ku algun esposo ta trata nan kasá malu?

³ Ki ta pone ku algun esposo ta trata nan kasá malu? Kisas nan a lanta ta mira nan tata ta maltratá nan mama i p’esei nan ta pensa ku esei ta algu masha normal. Tin otro ku a lanta den un kultura kaminda “hòmber” tin ku laga su kasá sa ta ken ta manda. Algun nunka a siña dominá nan emoshonnan, inkluso rabia. Otronan regularmente ta wak pornografia i esei ta pone ku nan tin un punto di  bista robes di hende muhé i sèks. Ademas, un informashon a mustra ku mas esposo a kuminsá maltratá nan kasá durante e pandemia di COVID-19. Pero niun di e kosnan ei no ta hustifiká pakiko un esposo lo trata su kasá malu.

4. Kiko esposonan mester tene kuidou kuné, i dikon?

⁴ Esposonan mester tene kuidou pa nan no tin mundu su punto di bista tokante hende muhé. b Dikon? Pasobra mayoria di biaha e manera ku un hende ta pensa, ta asina e ta aktua. Apòstel Pablo a spièrta e rumannan ungí na Roma pa “stòp di laga e mundu akí forma” nan. (Rom. 12:​1, 2) Pa ora Pablo a skirbi e rumannan, e kongregashon ei ya tabatin un par di aña ta eksistí. Pero for di loke el a skirbi nan, nos por saka afó ku algun ruman tabata laga kustumber i pensamentu di mundu influensiá nan. Anto ta p’esei el a bisa nan pa kambia nan pensamentu i komportashon. E konseho ei ta konta pa esposonan awe tambe. Ta tristu pa bisa, pero algun di nan a laga mundu influensiá nan manera di mira hende muhé i a asta maltratá nan esposa. c Pero kon Yehova ke pa un esposo trata su kasá? E kontesta ta den nos teksto sentral.

5. Segun 1 Pedro 3:​7, kon un esposo mester trata su kasá?

⁵ Lesa 1 Pedro 3:7. Yehova ke pa esposonan duna nan kasá onor. Onor ta referí na e manera ku nos ta trata un hende ku nos ta respetá. Un esposo ku ta onra su kasá lo trat’é na un manera amabel i ku amor. Den e artíkulo akí, nos ta bai wak kon un esposo por mustra amor i rèspèt na su kasá. Pero promé, ban wak algun kos ku hamas i nunka un esposo mester hasi ku su kasá.

NO HASI NADA KU LO HÙRT BO ESPOSA

6. Ki Yehova ta pensa di esposonan ku ta maltratá nan kasá? (Kolosensenan 3:19)

⁶ No maltratá bo esposa. Yehova ta odia hende ku ta violento. (Sal. 11:5) E ta odia foral esposonan ku ta violento ku nan kasá. (Mal. 2:16; lesa Kolosensenan 3:19.) Segun nos teksto sentral, 1 Pedro 3:​7, si un esposo no trata su kasá bon, su amistat ku Yehova ta den peliger. Yehova por asta keda sin skucha su orashonnan.

7. Segun Efesionan 4:31 i 32, ki manera di papia esposonan mester evitá? (Wak “Splikashon.”)

⁷ No grita ni papia malu ku bo esposa. Algun esposo ta papia masha brutu mes ku nan kasá. Pero Yehova ta odia “rabia, furia, gritamentu i papiamentu di kos ofensivo.” d (Lesa Efesionan 4:​31, 32.) E ta skucha tur loke nos ta papia. Pues sea ku tin mas hende òf nò, e manera ku un esposo ta papia ku su kasá ta importante pa Yehova. Un esposo ku ta papia brutu ku su kasá no solamente ta hasi daño na su matrimonio pero tambe na su amistat ku Yehova.—Sant. 1:26.

8. Ki Yehova ta pensa di pornografia, i dikon?

⁸ No wak pornografia. Ki Yehova ta pensa di pornografia? E ta odi’é. Pues, un esposo ku ta wak kosnan impuru ta daña  su amistat ku Yehova i ta falta su kasá rèspèt. e Yehova ta ferwagt pa un esposo keda leal na su kasá. Un esposo ku ta leal lo no hasi algu inmoral ku un otro muhé, ni sikiera fantasiá tokante esei. Hesus a bisa ku un hòmber ku wak un otro muhé ku pashon, ya kaba a kometé adulterio kuné “den su kurason.” f—Mat. 5:​28, 29.

9. Dikon Yehova ta odia ora un esposo ta fòrsa su kasá pa hasi algu ku e no ke durante sèks?

⁹ No fòrsa bo esposa pa hasi algu ku e no ke durante sèks. Tin esposo ta preshoná nan kasá pa hasi aktonan seksual ku ta laga e kasá ku un mal konsenshi òf ku ta lag’é sintié usá òf rebahá. Yehova ta odia e aktitut friu i egoista ei. E ke pa un esposo stima su kasá, trat’é amabel i respetá su konsenshi. (Efe. 5:​28, 29) Pero kiko si un esposo ya tin e kustumber di rebahá òf maltratá su kasá òf di wak pornografia? Kon e por kambia su pensamentu i komportashon?

KON UN ESPOSO POR STÒP DI HASI LOKE TA HÙRT SU KASÁ

10. Kon Hesus su ehèmpel por yuda esposonan?

¹⁰ Kiko un esposo por hasi pa stòp di maltratá òf rebahá su kasá? Loke e por hasi ta di imitá Hesus. Bèrdat ku Hesus nunka a kasa, pero for di e manera ku el a trata su disipelnan un esposo por siña kon pa trata su kasá. (Efe. 5:25) Ban wak kon Hesus a trata su apòstelnan i e manera ku el a papia ku nan.

11. Kon Hesus a trata su apòstelnan?

¹¹ Hesus semper a trata su apòstelnan amabel i ku rèspèt. Nunka e tabata kruel ni dominante. Aunke e tabata nan Señor i Shon, e no a usa su poder pa mustra nan ken ta manda. Mas bien, e tabata humilde i tabata sirbi nan. (Huan 13:​12-17) El a bisa su disipelnan: “Siña di mi, pasobra mi tin un genio suave i un kurason humilde, i boso alma lo keda refreská.” (Mat. 11:​28-30) Ripará ku Hesus tabatin un genio suave, esta, e tabata un hende trankil. Esei no ke men ku e tabata débil òf kèns. Mas bien, e tabatin forsa pa dominá su emoshonnan. Asta ora e tabata bou di preshon, el a keda kalmu i a kontrolá su emoshonnan.

12. Kon Hesus a papia ku otro hende?

¹² Hesus semper a konsolá i animá otro hende. E no a papia brutu ku su siguidónan. (Luk. 8:​47, 48) Asta ora su enemigunan a insult’é i a purba di pon’é rabia, “e no a insultá bèk.” (1 Ped. 2:​21-23) Anto tin biaha, na lugá di kontestá brutu el a preferá di no bisa ni un pia di palabra. (Mat. 27:​12-14) Esei ta un bunita ehèmpel pa esposonan!

13. Segun Mateo 19:​4-6, kon un esposo por “pega na su esposa”? (Wak e plachi.)

¹³ Hesus a duna esposonan instrukshon pa keda leal na nan kasá. El a ripití e mesun palabranan ku su Tata a usa, kende a bisa ku un esposo mester “pega na su esposa.” (Lesa Mateo 19:​4-6.) E palabra griego ku a usa den e teksto ei pa “pega na” literalmente ta nifiká “leim, òf plak, na otro.” Pues e union entre un esposo i su esposa mester ta asina fuerte ku ta komo si fuera nan ta di leim, òf di plak, na otro. Si un di nan hasi algu ku lo hùrt e otro, nan tur dos ta sufri. Un esposo ku di bèrdat stima su kasá lo rechasá tur sorto di pornografia. Mesora lo e kita su bista  for di kualke “kos ku no ta sirbi pa nada.” (Sal. 119:37) Meskos ku Yòb, el a traha un pakto ku su wowonan pa no wak niun otro muhé, ku no ta su kasá, ku deseo.—Yòb 31:1.

14. Ki pasonan un esposo abusivo mester dal pa drecha su amistat ku su kasá i ku Yehova?

¹⁴ Tin vários paso ku un esposo ku ta maltratá su kasá òf ku ta grit’é i papia malu kuné mester dal pa drecha su amistat ku su kasá i ku Yehova. Promé, e tin ku rekonosé ku e tin un problema serio. E no por skonde esei for di Yehova. (Sal. 44:21; Ekl. 12:14; Heb. 4:13) Di dos, e tin ku stòp di hasi e kosnan ku e ta hasiendo ei. (Pro. 28:13) Di tres, e tin ku pidi tantu su kasá komo Yehova despensa i pordon. (Echo. 3:19) Tambe e tin ku roga Yehova pa dun’é tantu e deseo di kambia komo e yudansa pa dominá su pensamentunan, abla i akshon. (Sal. 51:​10-12; 2 Kor. 10:5; Flp. 2:13) Di kuater, e tin ku traha di akuerdo ku loke el a pidi den orashon i train su mes pa odia tur tipo di maltrato, violensia i abla ofensivo. (Sal. 97:10) Di sinku, e tin ku bai serka ansianonan mas lihé posibel pa haña yudansa. (Sant. 5:​14-16) Di seis, e tin ku plania kon e ta bai reakshoná pa den futuro e no bolbe maltratá, grita ni papia malu ku su kasá. Un esposo ku ta wak pornografia mester dal e mesun seis pasonan akí. Yehova lo dun’é e yudansa ku e mester pa kambia su komportashon. (Sal. 37:5) Pero djis stòp di hasi loke ta hùrt su kasá so no ta sufisiente. E tin ku siña mustra su kasá ku e ta stim’é i ta respet’é. Ban wak kon e por hasi esei.

KON PA MUSTRA AMOR I RÈSPÈT NA BO ESPOSA

15. Kon un esposo por mustra su kasá ku e stim’é?

¹⁵ Mustra bo esposa ku bo stim’é. Algun esposo ku tin matrimonio felis tin e kustumber di hasi algu tur dia pa mustra nan kasá ku nan stim’é. (1 Huan 3:18) Tin kosnan  chikitu ku un esposo por hasi pa mustra esei, manera tene man di su kasá òf dun’é un brasa. Tambe e por mand’é un mensahe i bis’é: “Mi ta sinti bo falta” òf puntr’é: “Kon bo dia ta bayendo?” Ratu ratu e por skirbié un karchi pa bis’é kuantu e stim’é. Ora un esposo ta hasi e tipo di kosnan ei, e ta mustra amor i rèspèt pa su kasá i ta fortalesé nan matrimonio.

16. Dikon un esposo mester bisa su kasá ku e ta apresi’é?

¹⁶ Bisa bo esposa ku bo ta apresi’é. Un esposo ku ta stima i respetá su kasá ta balor’é i ta lag’é sintié bon di su mes. Un manera ku e ta hasi esei ta di yama su esposa danki pa tur loke e ta hasi pa yud’é. (Kol. 3:15) Ora un esposo hasi esei, su esposa lo sintié safe, stimá i respetá.—Pro. 31:28.

17. Kon un esposo por mustra ku e ta respetá su kasá?

¹⁷ Sea amabel i respetuoso. Un esposo ku ta stima su kasá ta balor’é. E ta mir’é komo un regalo bunita i presioso di Yehova. (Pro. 18:22; 31:10) P’esei, e ta trat’é amabel i ku rèspèt inkluso durante sèks. Lo e no preshoná su esposa pa hasi aktonan seksual ku ta lag’é ku un mal konsenshi òf ku ta lag’é sintié usá òf rebahá. g Ademas e mes lo ke hasi esfuerso pa tene su konsenshi limpi dilanti Yehova.—Echo. 24:16.

18. Kiko un esposo mester ta determiná pa hasi? (Wak e kuadro “ Kuater Manera pa Trata Bo Esposa ku Rèspèt.”)

¹⁸ Esposo, Yehova ta keda kontentu ora e mira bo ta hasi tur bo esfuerso pa stima i respetá bo kasá den tur loke bo ta bisa i hasi. Sea determiná pa no hasi nada ku lo hùrt bo esposa i sea amabel, respetuoso i kariñoso kuné. Ora bo hasi esei, lo bo mustra bo kasá ku bo ta stim’é i balor’é. Ora bo ta stima i respetá bo esposa, lo bo ta protehando e amistat di mas presioso ku bo tin, bo amistat ku Yehova.—Sal. 25:14.