1. Ki reto nos tur tin?

 HENTER dia nos ta tuma yen di desishon. Tin di nan no ta tuma hopi tempu pa disidí, por ehèmpel kiko bo ta bai kome òf ki ora bo ta bai drumi. Pero tin desishon ku sí bo tin ku pensa bon promé ku bo disidí. Dikon? Pasobra nan por tin efekto riba bo salú, bo felisidat, bo famia i bo adorashon na Yehova. Klaru ku bo ke pa bo desishonnan tin un bon efekto riba bo famia, pero mas importante ainda, bo ke pa bo desishonnan hasi Yehova kontentu.—Rom. 12:​1, 2.

2. Ki stapnan por yuda bo tuma desishonnan sabí?

² Lo bo tin mas chèns di tuma desishonnan sabí, si bo (1) buska informashon, (2) haña sa kiko Yehova ta pensa di e asuntu i (3) analisá e opshonnan. Den e artíkulo akí nos lo trata kada un di e stapnan ei i nos lo siña kon nos por train nos kapasidat di komprondé.—Pro. 2:11.

BUSKA INFORMASHON

3. Splika dikon ta importante pa bo buska informashon promé ku bo tuma un desishon.

³ E promé stap pa tuma un desishon sabí ta di buska informashon. Dikon esei ta importante? Imaginá ku un pashènt ta bai serka dòkter pa e haña yudansa ku un problema serio di salú. Bo ta kere ku un bon dòkter lo djis disidí  di dun’é remedi sin sikiera chèk e pashènt òf hasié algun pregunta tokante su kondishon? Sigur ku nò. Pa bo tambe tuma desishon sabí, bo mester purba di haña mas informashon tokante e situashon promé. Kon bo por hasi esei?

4. Ki bo tin ku hasi pa haña e informashon ku bo mester? (Proverbionan 18:13) (Wak e plachi.)

⁴ Suponé ku bo a haña invitashon pa un fiesta. Kiko por yuda bo disidí si bo ta bai òf nò? Wèl, si bo no konosé e persona ku ta organisando e fiesta bon òf bo no sa kiko e tin planiá, lo bo tin ku buska e informashon ei promé. P’esei lo ta bon pa bo puntra esun ku a invitá bo preguntanan manera: “Ki dia, ki ora i na unda presis e fiesta lo ta? Kuantu hende lo tin? Ken ta responsabel pa tur kos kana bon? Ken tur ta bai t’ei? Ki tin planiá? Lo tin alkohòl?” E kontesta pa e preguntanan ei lo yuda bo tuma desishon sabí.—Lesa Proverbionan 18:13.

5. Kiko bo tin ku hasi unabes ku bo tin e informashon?

⁵ Awor ku bo tin e informashon, bo por analisá henter e situashon. Por ehèmpel, kiko si bo haña sa ku algun di esnan ku lo t’ei no ta biba segun Yehova su normanan? Òf ku lo tin open bar pero no tin hende pa hasi sigur ku lo no tin bebementu di mas? Bo ta mira ku kos por sali for di man? (1 Ped. 4:3) Awor kiko si e fiesta ta  kai den bo oranan di reunion òf sirbishi? Ora bo analisá tur kos, esei lo yuda bo sa kon abo ta mira e situashon. Pero esei so lo no yuda bo tuma un desishon sabí. Bo tin ku puntra tambe: ‘Kiko Yehova ta pensa di e asuntu?’—Pro. 2:6.

HAÑA SA KIKO YEHOVA TA PENSA

6. Segun Santiago 1:​5, dikon nos mester pidi Yehova pa su yudansa?

⁶ Pidi Yehova yuda bo komprondé kon e ta mira e situashon. Yehova ta primintí ku lo e duna nos sabiduria i perspikasia pa nos por tuma desishonnan ku ta agrad’é. E ta duna nos e sabiduria ei “generosamente, sin tira na [nos] kara.”—Lesa Santiago 1:5.

7. Kon bo por haña sa ki Yehova ta pensa? Splika.

⁷ Awor ku bo a pidi Yehova su guia den orashon, kiko bo tin ku hasi? Bo tin ku presta bon atenshon na su kontesta. Por ehèmpel, imaginá ku bo ta ku fakansi anto bo a ripará ku bo a pèrdè. Muy probablemente bo ta bai puntra un hende ku ta biba einan pa yuda bo. Awor, akaso lo bo kana bai promé ku e haña chèns pa kontestá? Klaru ku nò. Lo bo presta bon atenshon na e instrukshonnan ku e ta duna bo. Asina tambe, despues ku bo pidi Yehova sabiduria, presta bon atenshon i purba di komprondé kiko ta Yehova su kontesta dor di buska kua leinan òf prinsipionan ta apliká den bo situashon.  Tuma por ehèmpel e fiesta ku nos a menshoná anteriormente. Promé ku bo disidí si bo ta bai òf nò, buska pa sa kiko Beibel ta bisa tokante fiesta, buracheria, mal kompania i tokante pone e Reino di Dios na promé lugá en bes di loke nos ke.—Mat. 6:33; Rom. 13:13; 1 Kor. 15:33.

8. Kiko bo por hasi si bo mester di yudansa pa haña e informashon ku bo ta buska? (Wak e plachi.)

⁸ Pero, tin ora bo mester di yudansa pa haña informashon ku lo yuda bo sa kon Yehova ta pensa tokante un asuntu. Den un kaso asina, bo por pidi konseho serka rumannan ku eksperensia. Ma lo bo benefisiá tambe si bo mes hasi investigashon. Tin masha hopi informashon den nos publikashonnan, manera den nos Guia pa Buska Informashon den Publikashonnan di Testigunan di Yehova i Prinsipio di Beibel Ku Ta Yuda Nos. Kòrda ku tur esfuerso ku bo ta hasi ta pa yuda bo tuma un desishon ku ta agradá Yehova.

9. Kon bo por tin sigur ku bo desishon lo agradá Yehova? (Efesionan 5:17)

⁹ Pero, kon bo por tin sigur ku bo desishon lo agradá Yehova? Proverbionan 9:10 ta bisa: “Si bo ke haña perspikasia, siña konosé Dios, e Persona santísimo.” Pues, bo tin ku konosé Yehova bon. Pa bo logra esei bo tin ku siña konosé Yehova su kualidatnan, su propósito, loke e ta stima i loke e ta odia. Puntra bo mes: ‘Di loke mi sa di Yehova, ki desishon lo agrad’é?’—Lesa Efesionan 5:17.

10. Dikon prinsipionan bíbliko ta mas importante ku famia, tradishon i kultura?

¹⁰ Pa nos agradá Yehova, tin biaha e desishon ku nos tuma por desapuntá hende ku nos ta será kuné. Por ehèmpel, kisas ku tur bon intenshon algun mayor por preshoná nan yu muhé pa kasa ku un ruman ku ta bon pará aunke ku e ruman no tin amistat fuerte ku Yehova. Ta di komprondé ku nan ke pa nan yu muhé tin un bida kómodo. Pero e yu muhé tin ku puntra su mes: “E ruman akí lo yuda mi sigui mantené mi amistat será ku Yehova? Kiko Yehova ta pensa di e asuntu?” Mateo 6:33 ta duna nos e kontesta. Einan, Hesus a siña kristiannan pa ‘buska promé e Reino.’ Maske nos ke onra nos mayornan i respetá e hendenan ku ta será ku nos, e kos di mas importante pa nos ta di hasi Yehova kontentu.

ANALISÁ BO OPSHONNAN

11. Ki kualidat menshoná na Filipensenan 1:9 i 10 lo yuda nos analisá nos opshonnan?

¹¹ Awor ku bo tin e prinsipionan bíbliko ku lo yuda bo disidí, bo tin ku analisá bo opshonnan. (Lesa Filipensenan 1:​9, 10) Disernimentu lo yuda bo pensa i evaluá e posibel resultado di kada opshon. Tin biaha ta fásil pa tuma un desishon, pero no semper ta asina. Disernimentu lo yuda bo tuma un desishon sabí asta ora e situashon ta kompliká.

12-13. Kon disernimentu por yuda bo tuma un desishon sabí tokante trabou?

¹² Suponé ku bo ta buskando trabou anto bo ta haña dos oferta. Bo ta repasá e informashon ku bo tin di e trabounan, manera e tipo di trabou, e oranan di trabou, kuantu tempu lo tuma bo pa bai trabou i bin kas i otro kos. Niun di e dos trabounan no ta bai kontra prinsipio di Beibel. Pero kisas bo ta preferá un mas ku e otro pasobra e trabou ta mas leuk òf pasobra e pago ta hopi bon. Ma tin mas kos ku bo mester pensa ariba promé ku bo tuma un desishon.

¹³ Por ehèmpel, bo a paga tinu riba e  oranan di trabou? Lo e stroba bo di bai bo reunionnan? Lo e kita e tempu ku bo mester pa yuda bo famia sinti nan protehá, felis i mas serka di Yehova? Preguntanan asina lo yuda bo pa no focus riba trahamentu di mas plaka sino riba “e kosnan mas importante,” esta, bo adorashon na Yehova i e nesesidatnan di bo famia. E ora ei lo bo por tuma un desishon ku Yehova lo bendishoná.

14. Kon disernimentu i amor lo yuda nos evitá di pone otronan trompeká?

¹⁴ Disernimentu tambe lo yuda nos pensa riba kon nos desishonnan lo afektá otro hende i asina evitá di “pone otronan trompeká.” (Flp. 1:10) Ta importante pa nos hasi esei ora nos tin ku tuma desishon personal tokante nos paña i aparensia. Kisas den e áreanan akí tin un sierto stail ku nos gusta. Pero kiko si esei  ta ofendé rumannan den kongregashon òf hende pafó dje kongregashon? Disernimentu lo yuda nos respetá nan sintimentunan. I amor lo motivá nos pa ta modesto i pa “sigui buska, no [nos] mes benefisio, sino esun di e otro persona.” (1 Kor. 10:​23, 24, 32; 1 Tim. 2:​9, 10) Tur esei, lo yuda nos tuma un desishon ku ta demostrá ku nos ta stima i respetá otro hende.

15. Kiko bo tin ku hasi promé ku bo tuma un desishon hopi importante?

¹⁵ Si bo tin ku tuma un desishon hopi importante, bo tin ku para pensa kiko tur bo desishon ta impliká. Hesus a siña nos pa “kalkulá e gastu promé.” (Luk. 14:28) Pa apliká e konseho ei, pensa riba kuantu tempu, plaka i energia lo bo tin ku usa pa bo desishon por tin éksito. Den algun kaso, ta bon pa papia ku bo famia pa asina kada un por pensa kiko nan por hasi pa apoyá e desishon. Dikon ta bon pa sinta papia ku bo famia? Pasobra esei por laga bo realisá ku kisas bo tin ku hasi algun ahuste òf ku kisas tin un mihó opshon. Ora bo inkluí bo famia i skucha loke nan tin di bisa, nan lo haña mas gana di apoyá bo desishon.—Pro. 15:22.

TUMA UN DESISHON KU LO SALI BON

16. Kua ta e stapnan ku bo tin ku tuma pa bo desishon sali bon? (Wak e kuadro “ Kon pa Tuma Desishonnan Sabí.”)

¹⁶ Si bo a sigui tur e stapnan menshoná ariba, bo ta kla pa tuma un desishon sabí. Bo a buska mas informashon i bo a analisá e prinsipionan di Beibel ku lo yuda bo tuma un desishon ku ta agradá Yehova. Awor bo por puntra Yehova pa yuda bo pa tur kos sali bon.

17. Kiko ta e kos di mas importante ku lo yuda bo tuma desishon sabí?

¹⁷ Asta si bo a yega di tuma desishonnan sabí den pasado, asina mes ta importante pa kòrda ku bo tin ku konfia den Yehova su sabiduria i no riba bo inteligensia ni eksperensia. Ta Yehova so por duna bo berdadero konosementu, komprondementu i disernimentu, ku ta e komponentenan prinsipal di sabiduria. (Pro. 2:​1-5) Sí, Yehova lo yuda bo tuma desishon ku ta agrad’é.—Sal. 23:​2, 3.