1, 2. (a) Dikon ta sabí pa nos ta na banda di Yehova? (b) Kiko nos lo analisá den e artíkulo akí?

NOS tin tur motibu pa pega òf tene duru na Yehova, pasobra no tin niun persona mas poderoso, sabí òf amoroso ku nos Dios. Ta klaru ku nos tur ke ta na su banda! (Sal. 96:4-6) Tòg algun sirbidó di Yehova no a para firme ora nan mester a demostrá ku nan ta na Yehova su banda.

² Den e artíkulo akí, nos lo analisá algun ehèmpel di hende ku a pretendé di ta na banda di Yehova pero ku tòg tabata hasi kos ku Yehova ta odia. Nos lo siña algun lès masha importante ku por yuda nos keda semper leal na Yehova.

3. Dikon Yehova a purba di yuda Kain, i kiko el a bisa Kain?

³ Laga nos wak e kaso di Kain. E no tabata adorá niun otro dios ku no ta Yehova. Tòg Yehova no a aseptá su adorashon. Dikon nò? Pasobra Yehova a mira ku tabatin simia di maldat den Kain su kurason. (1 Huan 3:12) Yehova a purba di yuda Kain i a spièrt’é: “Si bo hasi bon, lo bo no wòrdu aseptá? I si bo no hasi bon, piká ta lur na porta. I su deseo ta pa bo, ma  abo mester domin’é.” (Gén. 4:6, 7) Tabata komo si fuera Yehova a bisa Kain: “Si bo arepentí i para firme na mi banda, ami tambe lo ta na bo banda.”

4. Kiko Kain a hasi ora el a haña chèns di skohe e banda di Yehova?

⁴ Si Kain lo a kambia su manera di pensa, lo el a haña Yehova su aprobashon. Ma Kain no a skucha e konseho di Dios. El a laga mal pensamentu i deseo egoista pon’é hasi malu. (Sant. 1:14, 15) Tempu ku Kain tabata yòn, kisas nunka e no a imaginá su mes ku un dia lo el a bai kontra di Yehova. Pero ku tempu, el a hasi nèt esei: el a rebeldiá kontra Yehova i a mata su propio ruman!

5. Ki tipo di pensamentu por pone nos pèrdè e aprobashon di Yehova?

⁵ Meskos ku Kain, awe tambe un kristian por bisa ku e ta adorá Dios, miéntras ku en realidat e ta hasi loke Yehova ta odia. (Hudas 11) Podisé e ta masha aktivo den e trabou di prediká i ta asistí na tur reunion. Sinembargo, na mesun tempu, e ta alimentá su mente ku fantasianan inmoral, ku pensamentunan kon pa hasi mas ganashi òf ku odio pa un ruman. (1 Huan 2:15-17; 3:15) E pensamentunan ei por pon’é kometé piká grave. Otro hende kisas no sa kiko nos ta pensa òf ta hasi, ma Yehova sí ta mira tur kos, i e sa si nos kurason ta kompletamente na su banda òf nò.—Lesa Yeremías 17:9, 10.

6. Kon Yehova ta yuda nos dominá nos inklinashonnan pekaminoso?

⁶ Pero asta ora nos kometé fayo, Yehova no ta lihé pa konsiderá nos komo un kaso pèrdí. Ora e mira nos ta bai den mal direkshon, e ta duna nos e siguiente invitashon: “Bolbe serka mi, i lo mi bolbe serka boso.” (Mal. 3:7) Yehova ke pa nos para firme kontra maldat, foral ora nos ta lucha kontra nos debilidatnan. (Isa. 55:7) Si nos hasi esei, lo e apoyá nos i duna nos e forsa spiritual, emoshonal i físiko ku nos tin mester pa por dominá nos inklinashonnan pekaminoso.—Gén. 4:7.

7. Kon bini Sálomon a pèrdè su amistat ku Yehova?

⁷ Nos por siña hopi for di e ehèmpel di Rei Sálomon. Tempu ku Sálomon tabata yòn, semper e tabata buska Yehova su guia. Pues, Dios a dun’é gran sabiduria i tambe e privilegio di traha un bunita tèmpel na Herúsalèm. Pero ku tempu, Sálomon a pèrdè su amistat ku Yehova. (1 Rei. 3:12; 11:1, 2) Kon bini? Wèl, e Lei di Dios a bisa spesífikamente ku un rei hebreo no tabatin mag di kasa ku hopi hende muhé, “pa su kurason no desviá.” (Deu. 17:17) Pero Sálomon a desobedesé e lei ei; el a kasa ku 700 hende muhé i a trese 300 konkubina mas den su kas. (1 Rei. 11:3) Hopi di e hende muhénan ei no tabata israelita i tabata adorá dios falsu. Pues, Sálomon a desobedesé tambe e lei ku a prohibí e israelitanan di kasa ku hende muhé estranhero.—Deu. 7:3, 4.

8. Ki piká grave Sálomon a kometé?

⁸ Pokopoko Sálomon a pèrdè e amor ku e tabatin pa e leinan di Yehova, i finalmente el a kometé vários piká hopi grave. Sálomon a traha altar pa diosnan falsu, manera Astoret i Kemos. Na e altarnan ei, el a partisipá den adorashon di dios falsu huntu ku su esposanan. Sálomon a tribi di traha e altarnan akí riba un seru nèt dilanti di Herúsalèm, kaminda el a traha e tèmpel di Yehova. (1 Rei. 11:5-8; 2 Rei. 23:13) Podisé Sálomon a gaña su mes pensando ku Yehova lo pasa  por haltu di su desobedensia tanten ku e sigui ofresé sakrifisio na e tèmpel.

9. Kiko a pasa ora Sálomon no a hasi kaso di e spièrtamentunan di Dios?

⁹ Pero Yehova nunka ta pasa piká por haltu. Beibel ta bisa: “SEÑOR tabata rabiá ku Sálomon, pasobra su kurason a desviá for di SEÑOR.” Yehova a purba di yuda Sálomon; el a “aparesé na dje dos biaha,” i a spièrt’é “tokante di e asuntu akí, pa e no sigui tras di otro diosnan; ma e no a kumpli ku loke SEÑOR a ordená.” Komo resultado, Sálomon a pèrdè Yehova su apoyo i aprobashon. Su desendientenan no por a reina mas riba henter e nashon di Israel, i nan a sufri hopi kalamidat durante vários generashon.—1 Rei. 11:9-13.

10. Kiko por pone nos amistat ku Yehova na peliger?

¹⁰ Meskos ku den e kaso di Sálomon, amistat ku hende ku no ta komprondé òf respetá e normanan di Yehova por pone nos amistat ku Yehova na peliger. Algun di e personanan ei por ta rumannan di kongregashon ku ta spiritualmente suak. Otronan por ta famia, bisiña, kolega di trabou òf kompañero di skol ku no ta sirbi Yehova. Sea kual sea e kaso, si nos amigunan no ta respetá e normanan di Yehova, nan influensia ku tempu lo por pone nos pèrdè nos amistat ku Yehova.

11. Kiko por yuda nos disidí si nos tin ku kibra un amistat?

¹¹ Lesa 1 Korintionan 15:33. Mayoria di hende tin algun bon kualidat, i esnan ku no ta sirbi Yehova kisas no ta hasi malu tur ora. Podisé bo konosé algun hende asina. Pero esei ke men ku nan ta bon kompania? Wèl, puntra bo mes ki efekto nan amistat lo tin riba bo relashon ku Yehova. Nan lo hasié mihó? Kiko tin den nan kurason? Por ehèmpel, tokante kiko nan ta papia? Nan kòmbersashonnan ta drei rònt di moda, plaka, kos elektróniko, dibertishon òf otro kos material? Nan ta gusta kritiká otro hende òf papia kos di dòbel sintí? Hesus a spièrta: “Loke kurason ta yen di dje, boka ta papia.” (Mat. 12:34) Pues, si bo realisá ku bo amigunan ta un peliger pa bo amistat ku Yehova, bo mester dal paso desididu! Limitá e tempu ku bo ta pasa ku nan òf si ta nesesario kibra e amistat.—Pro. 13:20.

12. (a) Kiko Yehova a bisa e israelitanan poko despues ku nan a sali for di Egipto? (b) Kon e israelitanan a reakshoná na e okashon ei?

¹² Nos por siña tambe vários lès for di loke a pasa ku e israelitanan poko despues ku Yehova a libra nan for di Egipto. Ora ku e pueblo a reuní dilanti di Seru Sinaí, Yehova a demostrá su presensia na  un manera dramátiko. E israelitanan a mira un nubia skur, werlek (lamper) i huma, i nan a tende bos (strena) i un zonido duru manera di tròmpèt. (Éks. 19:16-19) Anto nan a tende Yehova anunsiá ku e “ta un Dios yalurs [òf, “ku e no ta tolerá ningun otro Dios,” BPK].” Yehova tabata ke pa nan adorá é so i a sigurá nan ku lo e ta leal na esnan ku ta stim’é i ku ta obedesé su mandamentunan. (Lesa Éksodo 20:1-6.) Tabata komo si fuera Yehova a bisa su pueblo: “Si boso keda na mi banda, ami lo keda na boso banda.” Si abo tabata einan, kon lo bo a reakshoná ora bo a tende e promesa ei di Yehova? Kasi sigur meskos ku e israelitanan. Nan “a kontestá unánimamente i a bisa: ‘Tur e palabranan ku SEÑOR a papia nos lo hasi!’” (Éks. 24:3) Ma poko tempu despues, algu inesperá a pone e lealtat di e israelitanan na prueba.

13. Kiko a pone e lealtat di e israelitanan na prueba?

¹³ E israelitanan a spanta ora nan a mira e nubia skur, werlek i e otro demostrashonnan di poder di Yehova. P’esei, nan a pidi Moises p’e bira nan bosero i pa é papia ku Yehova pa nan riba Seru Sinaí. (Éks. 20:18-21) Ma Moises a tarda pa baha for di e seru. Akaso e israelitanan a keda desampará awor den desierto sin nan lider di konfiansa? Parse ku nan tabatin fe tanten ku nan tabata mira Moises nan dilanti. Di manera ku nan a pèrdè pasenshi i a bisa Aron: “Traha pa nos un dios ku lo bai nos dilanti, pasobra e Moises akí, e hòmber ku a saka nos for di tera di Egipto, nos no sa kiko a para di dje.”—Éks. 32:1, 2.

14. Kon e israelitanan a gaña nan mes, i kon Yehova a reakshoná?

¹⁴ E pueblo tabata sa ku adorashon di imágen tabata un piká grave kontra Yehova. (Éks. 20:3-5) Ma no a tarda mashá ku nan a kuminsá adorá un bisé di oro! Nan tabata sa bon bon ku nan tabata desobedesiendo Dios, pero di un manera òf otro nan a gaña nan mes ku ainda nan tabata na banda di Yehova. Aron a asta yama nan adorashon di bisé ‘un fiesta na Yehova’! Kon Yehova a reakshoná? El a sintié traishoná. El a bisa Moises ku e pueblo “a korumpí su mes” i a desviá for di e kaminda ku el a ordená nan pa sigui. Yehova tabata asina rabiá ku asta el a pensa di kaba ku henter e nashon di Israel ku el a kaba di forma.—Éks. 32:5-10.

15, 16. Kon Moises i Aron a demostrá ku nan a para firme na banda di Yehova? (Wak e promé plachi.)

¹⁵ Komo ku Yehova ta miserikòrdioso, el a disidí di no kaba ku e israelitanan. El a duna esnan ku tabata leal na dje e oportunidat di para firme na su banda. (Éks. 32:14) Ora Moises a mira e komportashon deskontrolá di e pueblo—nan tabata baila, kanta i grita dilanti di un imágen—el a garna e bisé di oro te ora el a bira stòf. Kaba el a bisa: “Ken ku ta pa SEÑOR, bin serka mi!” Anto “tur e yu hòmbernan di Levi a reuní serka” Moises.—Éks. 32:17-20, 26.

¹⁶ Aunke Aron tabata esun ku a traha e imágen, el a arepentí despues i a djòin e otro levitanan na e banda di Yehova. E hòmbernan leal ei no a djis skohe e banda di Yehova, sino tambe nan a separá nan mes for di esnan ku a kometé e piká. Esei tabata un desishon sabí, pasobra riba e dia ei míles di hende ku a adorá e bisé di oro a muri. Ma Yehova a primintí di bendishoná esnan ku a skohe pa ta na su banda.—Éks. 32:27-29.

17. Kiko nos por siña for di loke Pablo a skirbi tokante e bisé di oro?

 ¹⁷ Apòstel Pablo a hala atenshon na loke a pasa ku e israelitanan i e bisé di oro i a duna e spièrtamentu akí: “E kosnan akí a bira ehèmpel pa nos, ya nos no ta . . . bira adoradó di dios falsu, meskos ku algun di nan a bira.” I el a agregá ku e ehèmpelnan akí “a ser skirbí komo spièrtamentu pa nos ku ta biba na final di e tempu akí. P’esei, laga esun ku ta kere ku e ta pará, tene kuidou pa e no kai.” (1 Kor. 10:6, 7, 11, 12) Manera Pablo a indiká, asta hende ku ta adorá Yehova por kuminsá hasi loke ta malu. Esnan ku kai den tentashon kisas ta pensa ku ainda nan tin un amistat ku Dios. Pero djis pasobra un hende ke ta amigu di Yehova òf ta bisa ku e ta leal na dje, no ta nifiká ku di bèrdat e tin Yehova su aprobashon.—1 Kor. 10:1-5.

18. Kiko por pone nos drif bai for di Yehova, i ku ki konsekuensia?

¹⁸ Meskos ku e israelitanan a pèrdè pasenshi ora Moises a tarda pa baha for di Seru Sinaí, asina tambe por pasa ku kristiannan awe. Kisas nos por pèrdè pasenshi pasobra por parse ku e dia di huisio di Yehova òf e mundu nobo a tarda. Nos lo por kuminsá pensa ku ainda falta hopi tempu pa e promesanan ei kumpli òf ku nan ta parse muchu bon pa ta bèrdat. Si nos no tene kuidou, e manera di pensa ei por laga nos kuminsá konsentrá riba metanan karnal en bes di riba e boluntat di Yehova. Ku tempu, nos por drif bai for di Yehova i hasi algu ku nunka nos a pensa di hasi tempu nos tabata den bon kondishon spiritual.

19. Ki bèrdat fundamental nos mester kòrda semper, i dikon?

¹⁹ Kòrda semper ku Yehova ke pa nos adorá é so i pa nos obedes’é di kurason. (Éks. 20:5) Dikon Yehova ta eksigí esaki di nos? Pasobra e ta stima nos. Si nos no ta hasiendo su boluntat, e ora ei nos ta hasiendo e boluntat di Satanas, i esei lo hiba na desaster so. P’esei Pablo a bisa: “Boso no por ta bebe di e kopa di Yehova i di e kopa di demoño; boso no por ta kome na ‘e mesa di Yehova’ i na e mesa di demoño.”—1 Kor. 10:21.

20. Kon Yehova por yuda nos asta ora nos a kometé un fayo?

²⁰ E relatonan bíbliko di Kain, Sálomon i e israelitanan na Seru Sinaí tin algu importante en komun: Tur e hendenan akí a haña chèns di arepentí i kambia. (Echo. 3:19) Ta bisto ku Yehova no ta lihé pa konsiderá un hende ku dal un paso robes komo un kaso pèrdí. Kòrda kon el a pordoná Aron. Awe, Yehova por spièrta nos mediante relato di Beibel, publikashonnan basá riba Beibel òf konseho amabel di un ruman. Ora nos hasi kaso di e spièrtamentunan ei, nos por tin sigur ku Yehova lo tene miserikòrdia ku nos.

21. Kiko nos mester ta desididu pa hasi ora nos lealtat na Yehova ser poné na prueba?

²¹ Yehova su bondat inmeresí tin un propósito. (2 Kor. 6:1) E ta duna nos chèns di “rechasá tur loke ta kontra boluntat di Dios i tambe deseonan mundano.” (Lesa Tito 2:11-14.) Miéntras nos ta na bida “den e tempu akí,” nos lo haña nos ku diferente situashon ku lo pone nos lealtat na Yehova na prueba. P’esei, sea semper desididu pa keda para firme na Yehova Dios su banda, pasobra ta é nos mester teme, sirbi i pega na dje!—Deu. 10:20.