1. Kiko tur Yehova a hasi pa bo?

PENSA un ratu riba tur e kosnan ku a pasa pa bo por a bira un Testigu di Yehova. Promé, bo a skucha e bon notisia—kisas for di bo mayornan, for di un kolega, un kompañero di skol òf kisas ora e Testigunan a prediká na bo kas. (Mar. 13:10) Djei, un hende a hinka hopi tempu i energia pa dirigí un estudio di Beibel ku bo. Segun ku bo tabata studia, bo a kuminsá stima Yehova i bo a bin haña sa ku e tambe stima bo. Ta Yehova a hala bo na e bèrdat, i awor komo disipel di Hesukristu bo tin e speransa di biba pa semper. (Huan 6:44) Sin duda bo ta super kontentu ku Yehova a usa un hende pa siña bo e bèrdat, i ku el a permití bo bira un di su sirbidónan.

2. Kiko nos lo wak den e artíkulo akí?

² Awor ku nos tin e bèrdat, nos tin e privilegio di yuda otro hende djòin nos riba e kaminda pa bida. Algun ruman gusta sirbishi, pero ora yega na e parti di puntra un hende si e ke studia òf di dirigí un estudio, nan ta haña esei difísil. Si esei ta bo kaso, den e artíkulo akí lo bo haña algun sugerensia ku lo yuda bo. Nos lo wak dikon nos ke yuda hende bira disipel. Tambe nos lo papia tokante kon pa dil ku e desafionan ku kisas por stroba nos di dirigí estudio di Beibel. Pero promé, laga nos wak pakiko no ta prediká so nos tin ku prediká, pero siña hende tokante e bon notisia tambe.

3. Dikon nos ta prediká?

³ Ora Hesus tabata riba tera, el a duna su disipelnan dos kos pa hasi. E promé tabata ku nan mester a prediká e bon  notisia di e Reino, i el a siña nan kon pa hasi esei. (Mat. 10:7; Luk. 8:1) Por ehèmpel, el a prepará nan pa sa ki pa hasi ora hende ke skucha òf nò. (Luk. 9:2-5) Anto pa yuda nan komprondé te kon leu nan trabou di prediká lo bai, el a bisa nan ku nan lo duna testimonio na “tur nashon.” (Mat. 24:14; Echo. 1:8) Pues, sin importá si hende ke skucha òf nò, e disipelnan mester a sigui prediká tokante e Reino di Dios i tokante loke e Reino lo logra.

4. Segun Mateo 28:18-20, kiko mas nos tin ku hasi fuera di prediká tokante e Reino?

⁴ Kiko tabata e di dos kos ku Hesus a manda su disipelnan hasi? El a bisa nan pa siña hende kumpli ku tur loke ku el a manda. Algun hende ta bisa ku e trabou di prediká i di siña hende ta konta pa e kristiannan di promé siglo so. Pero esei no ta bèrdat! Hesus mes a bisa ku e trabou importante akí lo sigui te den nos dia, “te na konklushon di e era akí.” (Lesa Mateo 28:18-20.) Ta parse ku ora Hesus a aparesé na mas ku 500 di su disipelnan, el a duna nan e trabou ei pa hasi. (1 Kor. 15:6) Anto den e vishon ku Hesus a duna Huan, el a mustra bon kla ku e ta ferwagt ku kada un di su disipelnan lo yuda hende siña tokante Yehova.—Rev. 22:17.

5. Ki komparashon Pablo a usa na 1 Korintionan 3:6-9 pa mustra e konekshon ku tin entre prediká i siña hende?

⁵ Apòstel Pablo a kompará e trabou di yuda hende bira disipel ku e trabou di kultivá mata. El a mustra ku nos mester hasi mas ku djis planta simia. El a bisa e rumannan na Korinto: “Ami a planta e simia, Apolo a muh’é . . . Boso ta e kunuku di Dios ku e ta kultivá.” (Lesa 1 Korintionan 3:6-9.) Nos ku ta traha den “e kunuku di Dios” no solamente ta planta simia, pero nos ta muha nan tambe. Anto regularmente nos ta tira bista pa wak kon ta bayendo ku e matanan. (Huan 4:35) Pero, nos sa ku ta Dios ta esun ku ta laga e simianan krese.

6. Ki tur nos tin ku hasi pa yuda un studiante bira disipel?

⁶ Nos ta buska hende ku ta “dispuesto pa aseptá e bèrdat ku ta hiba na bida eterno.” (Echo. 13:48) Pa yuda nan bira disipel, nos mester yuda nan (1) komprondé, (2) kere i (3) apliká e kosnan ku nan ta siña for di Beibel. (Huan 17:3; Kol. 2:6, 7; 1 Tes. 2:13) Anto ora nan bini reunion, nos tur den e kongregashon por mustra nan ku nos ta stima nan i ku nan ta bon biní. (Huan 13:35) E ruman ku ta dirigí e estudio kisas lo tin ku hinka hopi tempu i energia pa yuda e studiante tumba kreensia- i práktikanan ku e tin fuertemente ankrá. (2 Kor. 10:4, 5) Kisas lo dura vários luna pa yuda un studiante hasi e kambionan ei i yega na boutismo. Pero no wòri, e esfuersonan ta bale la pena.

7. Dikon nos ta prediká i ta siña hende e bon notisia?

⁷ Dikon nos ta prediká i ta siña hende e bon notisia? Pa di promé ta pasobra nos stima Yehova. Ora bo ta hasi bo esfuerso pa obedesé e mandamentu di prediká i di hasi hende disipel, bo ta demostrando Yehova ku bo ta stim’é. (1 Huan 5:3) Djis pensa riba esaki: E echo ku bo ta stima Yehova a pone ku ya bo ta prediká di kas pa kas. Tabata fásil pa bo hasi esei? Kisas nò. Por ta e promé biaha ku bo mester a  yama na un kas, bo tabata tur nèrvioso. Pero, bo a yama tòg pasobra bo tabata sa ku esei ta e trabou ku Hesus tabata ke pa bo hasi. Anto mas bo a prediká, mas fásil e trabou a bira. Pero awor, kiko di dirigí un estudio? Kisas pensando riba esei so bo ta bira tur anshá. Pero, si bo pidi Yehova yuda bo pa no ta asina nèrvioso i haña kurashi pa puntra un hende si e ke studia Beibel, Yehova lo duna bo e deseo pa yuda un hende bira disipel.

8. Segun Marko 6:34, kiko mas ta pone ku nos ke siña otro hende e bèrdat?

⁸ Di dos, nos ta prediká i ta siña hende e bon notisia pasobra nos ta stima nos próhimo. Tabatin un biaha ku Hesus i su disipelnan tabata morto kansá despues ku nan a prediká. Nan tabata ègt ke bai un kaminda ku nan por a sosegá un ratu. Pero ora nan a yega, un grupo masha grandi di hende tabata warda nan. Hesus a haña masha duele di nan, i el a “kuminsá siña nan hopi kos.” (Lesa Marko 6:34.) Dikon Hesus a hasi asina tantu esfuerso siendo ku e tabata morto kansá? Pasobra e tabata sa kon e hendenan ei tabata sinti. E tabata kier a yuda nan pasobra el a mira ku nan a sufri hopi i ku nan tabatin mester di speransa. Awendia, hende ta den e mesun situashon. Aunke por parse ku nan ta masha kontentu i ku nan bida ta masha felis, nan tin yen di problema i nan mester di speransa. Nan ta manera karné ku a dual i ku no tin un wardadó pa guia nan. Apòstel Pablo a bisa ku nan no tin Dios i no tin speransa. (Efe. 2:12) Nan ta riba “e kaminda ku ta hiba na destrukshon.” (Mat. 7:13) Ora nos pensa riba e hendenan den nos teritorio i nos mira ku nan no tin Dios, nos amor i kompashon ta pone ku nos ke yuda nan. I e mihó manera ku nos por yuda nan ta di puntra nan pa studia Beibel.

9. Segun Filipensenan 2:13, kon Yehova por yuda bo?

⁹ Kisas e kos ku ta pone bo keda sin puntra un hende si e ke studia Beibel ku bo ta pasobra bo ta konsiente di kuantu tempu i energia esei lo eksigí di bo. Si esei ta e kaso, konta Yehova kon bo ta sinti bo i pidié yuda bo haña e deseo pa haña un estudio i dirigié. (Lesa Filipensenan 2:13.) Apòstel Huan ta sigurá nos ku Yehova ta kontestá orashon ku ta di akuerdo ku Su boluntat. (1 Huan 5:14, 15) Pues, bo por tin sigur ku lo e yuda bo haña e deseo pa yuda hende bira disipel.

10-11. Kiko por stroba nos di dirigí un estudio di Beibel?

¹⁰ Nos sa ku ta hopi importante pa nos hasi hende disipel, pero tin sierto desafio ku por stroba nos di hasi tur loke nos ke den e trabou ei. Laga nos wak algun di nan i kon nos por dil ku nan.

¹¹ Bo ta pensa ku bo no por dirigí un estudio di Beibel debí na bo sirkunstansia? Algun publikadó ta di edat avansá òf nan salú no ta masha bon. Si bo ta lucha ku un di e situashonnan ei, wak loke e pandemia di COVID-19 a siña nos. Nos a mira ku nos por dirigí un estudio di Beibel via di telefòn òf via kualke aparato elektróniko. Pues, bo por kuminsá i dirigí un estudio di Beibel trankil asina for di bo mes kas. Anto no esei so. Tin hende no por studia durante e oranan ku normalmente e rumannan ta prediká. Ma, nan por sí mainta trempan òf anochi mas lat. Abo lo por studia Beibel ku un hende na  e orarionan ei? Hesus mes a siña Nikodemo anochi pasobra Nikodemo a preferá e ora ei.—Huan 3:1, 2.

12. Kiko por duna nos e konfiansa ku nos por dirigí un estudio di Beibel?

¹² Bo ta sinti ku bo no por dirigí un estudio di Beibel? Kisas bo ta pensa ku pa bo por dirigí un estudio bo mester konosé bo Beibel bon òf ku bo mester ta un mihó maestro. Ban wak tres kos ku por duna bo mas konfiansa. Promé, bo mester sa ku pa Yehova, bo ta kapasitá pa siña otro hende. (2 Kor. 3:5) Di dos, Hesus, kende tin “tur outoridat den shelu i riba tera,” a manda bo siña otro hende. (Mat. 28:18) I di tres, bo por haña yudansa di Yehova i di bo rumannan. Yehova a yuda Hesus sa kiko pa bisa, bo por tin sigur ku lo e hasi meskos pa bo. (Huan 8:28; 12:49) Ademas, bo por pidi bo superintendente di grupo, un pionero òf un publikadó eksperensiá pa yuda bo kuminsá i dirigí un estudio. Algu ku por duna bo mas konfiansa ta di kompañá un di e rumannan ei na un di nan estudionan.

13. Dikon bo mester ta dispuesto pa adaptá?

¹³ Bo ta haña ku ta difísil pa usa e métodonan nobo i e hèrmèntnan nobo? Nos manera di dirigí estudio di Beibel a kambia. Awor ku nos ta studia hende for di e buki Bo Por Disfrutá di Bida pa Semper!, e manera ku nos ta prepará i dirigí e estudio ta kompletamente diferente for di ántes. Aworakí, nos ta lesa ménos paragraf i ta kòmbersá mas ku e studiante. Es mas, nos ta usa mas vidio i hèrmènt elektróniko manera JW Library^®. Si bo no sa bon bon kon pa usa nan, pidi un ruman yuda bo. Hende no gusta kambio, p’esei ora tin ku hasi algu na un manera diferente, esei no ta bai fásil. Pero, ku Yehova su yudansa i di bo rumannan lo ta mas fásil pa bo ahustá na e kambionan, i lo bo disfrutá mas pa dirigí un estudio di Beibel. Manera un pionero a bisa: “Tantu e studiante komo e maestro lo disfrutá di e método nobo akí.”

14. Kiko nos tin ku kòrda ora nos ta traha den teritorio kaminda hende no ta interesá, i kon 1 Korintionan 3:6 i 7 ta animá nos?

¹⁴ Bo ta biba den un teritorio kaminda ta difísil pa kuminsá un estudio di Beibel? Tin hende no ta interesá den nos mensahe òf ta kontra dje. Kiko lo yuda nos keda karga speransa ku nan lo por skucha un dia? Nos tin ku keda kòrda ku den e mundu akí, di un dia pa otro, hende su sirkunstansia por kambia. Anto hende ku ántes no tabata interesá, awor ta realisá ku nan mester di Dios den nan bida. (Mat. 5:3) Algun hende ku nunka tabata tuma nos literatura, ku tempu a kuminsá studia. Ademas, nos sa ku ta Yehova ta e doño di e kosecha. (Mat. 9:38) Loke e ke ta pa nos sigui planta i muha, anto pa laga e kresementu den su man. (1 Kor. 3:6, 7) Asta si aktualmente nos no ta dirigiendo un estudio, ta masha animante i dushi pa sa ku Yehova ta rekompensá nos a base di nos esfuersonan, i no a base di nos resultadonan. *

15. Kon Yehova ta sinti ora un hende kuminsá studia Beibel i ta apliká loke e ta siña?

¹⁵ Yehova ta keda masha kontentu ora un hende ta aseptá e bèrdatnan di Beibel  i ta papia ku otro hende tokante nan. (Pro. 23:15, 16) Djis imaginá kon kontentu Yehova ta ora e ta mira tur loke ta sosodiendo awe. Por ehèmpel, wak kiko a pasa durante e aña di sirbishi 2020. Mei mei di un pandemia mundial, nos a dirigí 7.705.765 estudio di Beibel i a yuda 241.994 hende dediká nan mes na Yehova i batisá. Anto e disipelnan nobo ei lo bai dirigí estudio di Beibel i yuda mas hende bira disipel. (Luk. 6:40) Sin duda nos ta hasi Yehova kontentu ora nos ta partisipá den e trabou di yuda hende bira disipel.

16. Ki meta bo por pone?

¹⁶ Ta bèrdat ku e trabou di yuda hende bira disipel ta eksigí hopi esfuerso. Pero, ku Yehova su yudansa bo tambe por kontribuí den yuda un hende siña stima nos Tata selestial. Kiko bo ta pensa si bo purba di pone komo bo meta pa kuminsá i dirigí por lo ménos un estudio? Si un bon oportunidat presentá i bo hasi esfuerso pa puntra esnan ku bo topa si nan ke studia Beibel, lo bo keda sorprendí di e resultado. Nos por tin sigur ku Yehova lo bendishoná nos esfuerso.

17. Kiko nos lo sinti si nos logra dirigí un estudio di Beibel?

¹⁷ Pa prediká i siña hende e bèrdat, ta un gran privilegio! E trabou akí di bèrdat ta hasi bo kontentu. Apòstel Pablo, kende a yuda hopi hende na Tesalónika bira disipel, a bisa loke el a sinti: “Kiko ta nos speransa òf goso òf korona di alegria dilanti di nos Señor Hesus durante su presensia? No ta boso? Sí, boso ta nos gloria i nos goso.” (1 Tes. 2:19, 20; Echo. 17:1-4) Hopi ruman awe ta sinti mesun kos. Un ruman ku yama Stéphanie, kende huntu ku su esposo, a yuda hopi hende yega na boutismo, a bisa: “No tin un goso mas grandi ku yuda un hende dediká su mes na Yehova.”