1. Kiko ta pasa ora hende kompetí ku otro?

AWENDIA unda ku bo bira hende ta kompetí ku otro, i nan no ta wòri kon esei ta afektá e otro persona. Por ehèmpel, algun komersiante ta hunga wega sushi pa nan bai dilanti. Un atleta ta lastimá e otro hungadónan pa malu djis p’e gana. Un studiante ta spik durante eksamen djis p’e por drenta un universidat renombrá. Komo kristian, nos sa ku e kosnan ei ta malu, ku nan ta “obranan di karni.” (Gal. 5:19-21) Pero, bo ta kere ku asta den e kongregashon lo tin algun ruman ku ta kompetiendo ku otro sin ku nan sa? Ta importante pa kontestá e pregunta ei pasobra si e rumannan ta kompetí ku otro, esei ta afektá e kongregashon i habrié for di otro.

2. Kiko nos ta bai mira den e artíkulo akí?

² Den e artíkulo akí, nos ta bai wak kua ta e kosnan ku por pone nos kompetí ku nos rumannan. Tambe nos ta bai wak kiko algun di Yehova su sirbidónan fiel den tempu di Beibel a hasi pa nan no kompetí ku otro. Pero promé, ta importante pa nos analisá dikon nos ke hasi mas den e kongregashon.

3. Ki pregunta nos tin ku hasi nos mes?

³ Tempu-tempu ta bon pa nos puntra nos mes: ‘Mi ta sinti mi bon solamente ora mi mira ku mi ta mas mihó ku otro hende? E echo ku mi ke hasi mas den kongregashon ta pa mi ta mas mihó ku e otro rumannan òf ku sierto  ruman? Òf, pasobra di bèrdat mi ke duna Yehova lo mihó?’ Dikon ta importante pa nos hasi nos mes e preguntanan ei? Wak loke Beibel ta bisa.

4. Segun Galationan 6:3 i 4, dikon no ta bon pa nos kompará nos mes ku otro ruman?

⁴ Beibel ta bisa nos pa no kompará nos mes ku otro. (Lesa Galationan 6:3, 4.) Dikon? Pasobra si nos kompará nos mes ku otro ruman i pensa ku nos ta mihó ku nan, esei por hasi nos orguyoso. Òf, si nos kompará nos mes ku otro ruman i pensa ku nan ta mas mihó ku nos, esei por desanimá nos. Niun di e dos pensamentunan ei no ta bon. (Rom. 12:3) Katerina, * ku ta biba na Gresia, a bisa: “Ántes, mi tabata kompará mi mes ku otro ruman ku pa ami tabata mas bunita, mihó den sirbishi i ku tur otro ruman tabata gusta. Esei a pone mi sinti ku mi no tabata bal nada.” Nos tin ku kòrda ku Yehova no a hala nos serka dje pasobra nos ta bunita, ta papia vlòt òf ta popular, sino pasobra nos ta dispuesto pa stim’é i skucha su Yu.—Huan 6:44; 1 Kor. 1:26-31.

5. Kiko bo ta siña for di loke a pasa ku Hyun?

⁵ Ta bon tambe pa nos puntra nos mes: ‘Mi ta konosí komo un ruman ku ta buska pas òf komo un ruman ku semper tin desakuerdo ku otro ruman?’ Wak loke a pasa ku un ruman hòmber ku yama Hyun, ku ta biba na Surkorea. Un tempu, siendo ansiano kaba, e tabata mira e otro rumannan ku tabatin privilegio den kongregashon komo su rival. El a bisa: “Mi tabata piki pieu riba kada un kos ku nan a bisa.” Kiko esei a hiba na dje? El a atmití: “Mi aktitut a pone ku e kongregashon tabata dividí.” Hyun su amigunan a yud’é ripará ku e tabatin un problema. El a hasi kambio, i awor e ta un ekselente ansiano. Si nos mira ku kada bes nos ke kompetí ku otro ruman en bes di buska pas, nos tin ku hasi kambio mesora.

6. Segun Galationan 5:26, kiko por pone nos kompetí ku nos rumannan?

⁶ Lesa Galationan 5:26. Algu ku por pone nos kompetí ku nos rumannan ta si nos ta pensa ku nos ta demasiado importante. Un persona ku ta pensa asina ta orguyoso i egoista. Anto un otro kos ku por pone nos kompetí ku nos rumannan ta envidia. Un persona ku ta envidiá otro hende no ke djis tin loke otro e hende tin, ma e ke kit’é fo’i dje tambe. Si bo ta envidiá un otro hende, eigenlijk bo ta odiando e. Pues, kueste loke kueste, nos lo ke keda leu for di e kosnan ei!

7. Splika ki daño e pensamentu di ta demasiado importante i envidia por kousa.

⁷ Nos por kompará e pensamentu di ta demasiado importante i envidia ku komehein. Ni maske kon bunita un dak di un kas por parse di ta, si komehein drenta e dak, ku tempu lo e basha den otro. Asina tambe, un ruman ku ta pensa ku e ta demasiado importante i ku ta envidiá otro ruman por sirbi Yehova. Pero, ku tempu lo e basha den otro den sentido spiritual. (Pro. 16:18) Lo e stòp di sirbi Yehova i lo hasi su mes i otro hende doló. Kiko nos por hasi pa nos no pensa ku nos ta demasiado importante ni envidiá otro ruman?

8. Kon nos por lucha kontra e pensamentu di ta demasiado importante?

 ⁸ Nos por lucha kontra e pensamentu di ta demasiado importante si nos kòrda loke Apòstel Pablo a bisa: “No hasi nada ku gana di pleita òf ku e deseo di ke ta na promé lugá, ma ku humildat, konsiderá ku otro hende ta superior na boso.” (Flp. 2:3) Si nos konsiderá ku otro ruman ta superior na nos, nos lo no kompetí ku nan pasobra nos sa ku den un manera òf otro, nan ta hasi algu mihó ku nos. En bes di esei, nos lo ta kontentu pa nan. Spesialmente si nan ta usa loke nan ta bon den dje pa sirbi Yehova. Anto si e rumannan ei tambe ta sigui Pablo su konseho, nan, na nan turno, tambe lo buska e bon kualidatnan ku nan ta apresiá di nos. Komo resultado, lo tin union den kongregashon i pas lo brota.

9. Kiko nos por hasi pa no envidiá nos rumannan?

⁹ Kiko nos por hasi pa no envidiá nos rumannan? Esei ta di rekonosé nos limitashonnan. Si nos hasi esei, nos lo no purba di proba ku nos ta mas mihó ku tur otro hende. Mas bien, nos lo buska manera pa nos por siña for di esnan ku ta hasi kos mas mihó ku nos. Por ehèmpel, si tin un ruman ku ta duna bon diskurso, pidié mustra bo kon e ta hinka su diskursonan den otro. Si tin un ruman muhé ku ta kushiná dushi, pidié algun tep pa asina abo por mehorá den bo kushinamentu. Anto hóben, bo tin difikultat pa sera amistat? Pidi konseho serka un ruman ku ta sera amistat fásil.

10. Ki problema Gideon a hañ’é kuné?

¹⁰ Wak loke a sosodé entre Gideon, kende tabata di e tribu di Manases, i e hòmbernan di e tribu di Efraim. Ku Yehova su yudansa, Gideon i su 300 hòmbernan a gana un bataya. Esei sigur por a subi na nan kabes. Gideon a topa ku e hòmbernan di Efraim, pero nan no a  bini pa bis’é ku el a hasi un bon trabou; nan a bini pa pleita kuné. Ta parse ku nan a sinti nan ofendí pasobra Gideon no a pidi nan for di kuminsamentu pa bin bringa kontra Dios su enemigunan. Nan tabata asina opseshoná ku onor di nan tribu, ku nan a pèrdè for di bista e kos di mas importante: Gideon a kaba di onra Yehova su nòmber i defendé Su pueblo.—Hues. 8:1.

11. Kiko Gideon a bisa e hòmbernan di Efraim?

¹¹ Humildemente Gideon a kontestá e hòmbernan di Efraim: “Kiko mi a hasi kompará ku boso?” Djei el a kòrda nan kon Yehova spesífikamente a bendishoná nan. Komo resultado “nan rabia . . . a baha.” (Hues. 8:2, 3) Gideon tabata dispuesto pa pone su orguyo un banda pa mantené pas den e pueblo di Dios.

12. Ki lès nos por siña for di e tribu di Efraim i for di Gideon?

¹² Ki lès nos por saka for di e relato ei? For di e tribu di Efraim nos ta siña ku ta mas importante pa onra Yehova ku protehá nos reputashon. Anto kiko nos komo kabes di famia i ansiano por siña for di Gideon? Ku si un hende rabia pa un kos ku nos a hasi, nos tin ku purba di wak e asuntu for di e hende su punto di bista. Tambe, nos por elogiá e hende pa e kosnan bon ku el a hasi. Ta bèrdat ku esei ta eksigí humildat, foral si ta bisto ku ta e hende ta robes. Pero pas ta hopi mas importante ku proba ku nos tin rason.

13. Ki problema Ana a hañ’é kuné, i kon el a dil ku e problema ei?

¹³ Laga nos wak tambe loke a sosodé ku Ana. E tabata kasá ku un levita ku yama Elkana. Aunke e tabata stima Ana masha hopi mes, Ana no tabata su úniko kasá; e tabatin Penina tambe. Pero, “Penina tabatin yu, ma Ana no tabatin yu.” P’esei, Penina “tabata provok’é sin miserikòrdia pa hasié sinti su mes fastioso.” Esei a pone ku Ana “tabata yora i no tabata kome.” (1 Sam. 1:2, 6, 7) Asina mes, Beibel no ta bisa niun kaminda ku Ana a purba di hùrt Penina bèk. Mas bien, Ana a deshogá su kurason serka Yehova i a laga e asuntu den Su man. Aunke Beibel no ta bisa ku e manera ku Penina tabata trata Ana a kambia, loke sí nos sa ta ku el a haña su pas bèk i ku e “no tabata tristu mas.”—1 Sam. 1:10, 18.

14. Ki lès bo ta siña for di loke a pasa ku Ana?

¹⁴ Kiko nos por siña for di Ana? Si un hende purba di laga bo sinti ku bo ta ménos kuné, kòrda ku abo no tin ku proba ku bo ta mihó kuné. No kai den e trampa di kompetí ku otro. Na lugá di paga malu ku malu, purba di hasi pas  ku e persona. (Rom. 12:17-21) Asta si e persona no ke kambia, por lo ménos abo lo keda ku bo pas i keda kontentu.

15. Kiko Apolo i Pablo tabatin en komun?

¹⁵ Por último, laga nos wak ki lès nos por siña for di loke a pasa ku Disipel Apolo i Apòstel Pablo. Nan tur dos tabata konosé e Skrituranan bon. I tur dos tabata bon konosí i ekselente maestro. Tur dos a yuda hopi hende bira disipel. Pero, niun di nan dos a mira otro komo rival.

16. Ki tipo di hende Apolo tabata?

¹⁶ Apolo tabata “un nativo di e stat Aleksandria,” ku den promé siglo tabata e sentro di enseñansa. Ta parse ku e tabata un ekselente oradó i e tabata “bon vèrsá den e Skritura.” (Echo. 18:24) Tempu Apolo tabata na Korinto, algun ruman den e kongregashon ei a laga sa ku nan tabata gusta Apolo mas ku e otro ruman hòmbernan, inkluso Pablo. (1 Kor. 1:12, 13) Akaso Apolo tabata eens ku e rumannan ei? Muy probablemente ku nò. Pasobra algun tempu despues, Pablo mes a pidié p’e bai bèk na Korinto. (1 Kor. 16:12) Awor, nunka Pablo lo a hasi esei si e tabata pensa ku Apolo tabata tresiendo desunion den e kongregashon. Ta mas ku klaru ku Apolo tabata usa su talentonan pa algu bon, esta, pa prediká e bon notisia i pa fortalesé su rumannan. Anto, nos por tin sigur ku Apolo tabata masha humilde mes. Por ehèmpel, niun kaminda den Beibel nos no ta lesa ku el a rabia ora ku Akila ku Priskila a “splik’é e kaminda di Dios na un manera mas eksakto.”—Echo. 18:24-28.

17. Kon Pablo a buska pas?

 ¹⁷ Apòstel Pablo tabata sa di tur e bon trabounan ku Apolo a hasi; e no a wòri ku algun ruman tabata haña ku Apolo tabata mihó kuné. Ora nos wak loke el a skirbi pa e kongregashon na Korinto, nos ta mira kon humilde i rasonabel Pablo tabata. Tabatin algun ruman ku tabata bisa: “Ami ta sigui Pablo.” Ma en bes di laga e elogio ei subi na su kabes, el a dirigí tur atenshon na Yehova i Hesus.—1 Kor. 3:3-6.

18. Di akuerdo ku 1 Korintionan 4:6 i 7, kiko nos por siña for di Apolo i Pablo?

¹⁸ Ki lès nos por siña for di Apolo i Pablo? Kisas nos a traha duru pa Yehova i nos a logra yuda hopi hende yega na boutismo. Ma loke nos tin ku kòrda ta ku nos a logra tur esei pasobra Yehova ta esun ku a bendishoná nos. Pero, tin un otro lès: Mas responsabilidat nos tin den e kongregashon, mas chèns nos tin pa buska pas. Ansiano i sirbidó ministerial por yuda e kongregashon keda na pas i uní. Kon nan por hasi esei? Esei ta ora nan ta basa nan konseho for di Beibel i ta hala atenshon na Hesukristu i no na nan mes.—Lesa 1 Korintionan 4:6, 7.

19. Kiko kada un di nos por hasi? (Wak e kuadro “ No Kompetí ku Otro.”)

¹⁹ Yehova Dios a duna kada un di nos talento i nos por usa nan “pa sirbi otro.” (1 Ped. 4:10) Kisas nos tin e impreshon ku loke nos ta hasi den kongregashon no ta mashá. Pero, tur e kosnan chikitu ku tur hende ta hasi ta manera e steknan chikitu ku ta wanta un pida tela huntu. P’esei, laga kada un di nos hasi nos bèst pa nunka kompetí ku nos rumannan. En bes di esei, nos lo ke ta determiná pa buska pas i perkurá pa tin union den kongregashon.—Efe. 4:3.