1. Kiko ta e boluntat di Yehova pa e tempu akí?

 YEHOVA su boluntat den e tempu akí ta pa e bon notisia di Reino ser prediká rònt mundu. (Mar. 13:10; 1 Tim. 2:3, 4) E trabou akí ta hopi importante pa Yehova, i el a skohe su Yu stimá pa guia e trabou akí. Komo ku Hesus ta esun ku ta guia nos, nos por tin sigur ku nos lo logra kaba ku e trabou ei promé ku e fin yega i manera Yehova ke.—Mat. 24:14.

2. Kiko nos lo trata den e artíkulo akí?

² Den e artíkulo akí nos lo mira kon Hesus ta usa “e esklabo fiel i prudente” pa perkurá kuminda spiritual pa Su siguidónan. Tambe nos lo mira kon e esklabo ei ta organisá Hesus su siguidónan pa e kampaña di prediká di mas grandi den historia. (Mat. 24:45) Tambe nos lo mira kiko kada un di nos por hasi pa apoyá Hesus i e esklabo fiel.

3. Ki outoridat Hesus a risibí?

³ Kon nos sa ku Hesus ta guia e trabou di prediká? Djis promé ku el a bai shelu, el a reuní ku algun di su siguidónan riba un seru na Galilea. El a bisa nan: “Mi a risibí tur outoridat den shelu i riba tera.” Ripará kiko el a bisa despues: “P’esei bai, i hasi hende di tur nashon mi disipel.” (Mat. 28:18, 19) Pues, Hesus a risibí, entre otro, outoridat pa dirigí e trabou di prediká.

4. Dikon nos sa ku ketu bai Hesus ta guia e trabou di prediká?

⁴ Hesus a bisa ku e trabou di prediká i di hasi hende disipel  lo tuma lugá den “tur nashon” i ku lo e ta ku su siguidónan “tur e dianan, te na konklushon di e era akí.” (Mat. 28:20) Loke el a bisa ei a indiká ku te den nos tempu e trabou ei lo ta bou di su guia.

5. Kon nos ta yuda ku kumplimentu di Salmo 110:3?

⁵ Hesus tabatin sigur ku durante e tempu di fin lo tin sufisiente trahadó. Dikon? Pasobra e tabata sa ku e profesia na Salmo 110:3 lo a kumpli. Ei nos ta lesa: “Bo pueblo lo pone su mes disponibel den e dia di bo poder.” Si bo ta prediká e bon notisia, bo ta apoyá Hesus i e esklabo fiel i ta yuda ku kumplimentu di e profesia ei. Aunke e trabou ta kana, tin un par di reto.

6. Kiko ta un di e retonan ku nos ta haña nos kuné?

⁶ Un di e retonan ku nos komo predikadónan di Reino ta haña nos kuné ta oposishon. Hende apóstata, lider religioso i polítiko ta plama mentira tokante nos trabou. Anto si nos famia, konosí i koleganan kere e informashonnan falsu ei, nan por kuminsá preshoná nos pa stòp di sirbi Yehova i stòp di prediká. Den algun pais, nos enemigunan ta menasá, ataká, arestá i asta manda algun di nos rumannan prizòn. E tipo di kosnan ei no ta sorprendé nos. Pasobra Hesus a bisa: “Tur nashon lo odia boso pa motibu di mi nòmber.” (Mat. 24:9) Eigenlijk e odio akí ta proba ku nos tin Yehova su aprobashon. (Mat. 5:11, 12) Ta Satanas ta esun tras di tur e oposishonnan akí. Pero, nos no tin ku ansha pasó nos tin Hesus, kende ta mas poderoso ku Satanas. Ku yudansa di Hesus, e bon notisia ta yega na hende di tur nashon. Ban wak prueba di esei.

7. Ki evidensia tin ku Revelashon 14:6 i 7 ta kumpli?

⁷ Un otro reto ku nos ta haña nos kuné ta e kantidat di idiomanan ku tin. Den e revelashon ku Hesus a duna Apòstel Huan, el a bisa ku den nos tempu e bon notisia lo vense e opstákulo ei. (Lesa Revelashon 14:6, 7.) Kon esei ta sosodé? Nos ta hasi nos máksimo esfuerso pa tur hende haña chèns pa skucha e mensahe di Reino. Riba nos website, hende rònt mundu por lesa publikashonnan basá riba Beibel na mas ku 1.000 idioma. Kuerpo Gobernante a duna aprobashon pa tradusí nos buki prinsipal pa hasi disipel, Bo Por Disfrutá di Bida pa Semper!, na mas ku 700 idioma. Ademas, tin kuminda spiritual disponibel den forma di vidio pa hende surdu i braille pa hende siegu. Hende di “tur e nashonnan” ta siña papia e idioma puru, esta, e bèrdatnan di Beibel. Pues, nos ta mira kon e profesianan di Beibel ta kumpli. (Zak. 8:23; Sof. 3:9) Anto nos ta logra tur e kosnan akí bou di e guia di Hesukristu.

8. Kiko nos a logra te asina leu ku nos trabou di prediká?

⁸ Aktualmente tin mas ku 8.000.000 hende den 240 pais ta forma parti di Yehova su organisashon. I tur aña míles di hende nobo ta batisá. Pero, e sifranan ei no ta e kos di mas importante. Loke ta mas importante ta e kualidatnan kristian, esta, “e personalidat nobo,” ku e hendenan ei a bisti. (Kol. 3:8-10) Nan a stòp di ta inmoral, violento, patriótiko i di deskriminá. E profesia skirbí na Isaías  2:4 ta kumpli, pasobra nan no ta “train pa guera” mas. Ora nos hasi esfuerso pa bisti e personalidat nobo, esei ta hala hende na Yehova su organisashon i nos ta proba ku nos ta sigui nos lider Kristu Hesus. (Huan 13:35; 1 Ped. 2:12) Niun di e kosnan akí no ta sosodé pa kasualidat. Nan tur ta sosodé pasó Hesus ta duna nos e yudansa ku nos mester.

9. Segun Mateo 24:45-47, kiko Hesus a bisa ku lo pasa durante e tempu di fin?

⁹ Lesa Mateo 24:45-47. Hesus a bisa ku durante e tempu di fin, lo e nombra un “esklabo fiel i prudente” pa perkurá kuminda spiritual. Pues, ta di ferwagt ku den nos tempu e esklabo ei lo tin hopi trabou. I esei ta e kaso tambe. Hesus a usa un grupo chikitu di kristian ungí pa perkurá “kuminda na e debido tempu” pa Dios su pueblo i hende interesá. E rumannan akí sa ku nan no tin outoridat pa manda riba fe di Hesus su siguidónan. (2 Kor. 1:24) Mas bien, nan ta rekonosé ku Hesukristu ta e “lider i komandante” di su siguidónan.—Isa. 55:4.

10. Kua di e bukinan riba e plachi a yuda bo bini den e bèrdat?

¹⁰ Desde 1919, e esklabo fiel a prepará diferente buki ku a yuda hende interesá siña e bèrdatnan di Beibel. Na 1921 nan a saka, na ingles, e buki E Arpa di Dios ku a yuda hende interesá siña e bèrdatnan básiko di Beibel. Ku tempu, nan a saka mas publikashon. Por ehèmpel, “Sea Dios Veraz,” E berdad cu ta hiba na bida eterna, Bo por biba pa semper den Paradijs riba tera, Conocimentu cu Ta Hiba na Bida Eterno, Kiko Beibel Ta Siña Realmente?, ¿Que nos enseña la Biblia? i Bo Por Disfrutá di Bida pa Semper!, nos publikashon  nobo. Kua di e bukinan ei a yuda bo siña konosé i stima Yehova? Sin duda tur e bukinan akí a yuda nos siña hende e bèrdat i nan tabata nèt loke hende tabatin mester e tempu ku nan a sali.

11. Dikon ta importante pa nos tur siña mas tokante Yehova i Beibel?

¹¹ No ta hende interesá so mester siña mas tokante Yehova i Beibel, ma pa nos tur. Apòstel Pablo a skirbi: “Kuminda sólido ta pa hende madurá.” Pablo a agregá ku ora nos apliká loke nos ta siña for di Beibel, esei lo yuda nos “distinguí loke ta bon for di loke ta malu.” (Heb. 5:14) Debí ku tin asina tantu inmoralidat den mundu, no ta fásil pa pega na Yehova su normanan. Pero, Hesus ta hasi sigur ku nos ta haña e kuminda nesesario pa nos keda ku un fe fuerte. E ta usa e esklabo fiel pa prepará i parti e kuminda ei ku ta basá riba Beibel.

12. Meskos ku Hesus, kon nos a duna Dios su nòmber e debido onor?

¹² Meskos ku Hesus, nos a duna Dios su nòmber e debido onor ku e meresé. (Huan 17:6, 26) Por ehèmpel, na 1931, nos a kuminsá usa e nòmber Testigunan di Yehova, ku ta basá riba Beibel. Ora nos a hasi esei, nos a mustra ku Dios su nòmber ta importante pa nos i ku nos ke pa hende konosé nos na e nòmber ei. (Isa. 43:10-12) For di òktober di e aña ei, e nòmber di Dios a aparesé riba e parti dilanti di kada edishon di e revista akí. Ademas, e Tradukshon di Mundu Nobo di e Santu Skritura a restorá Dios su nòmber na e kamindanan ku e mester ta. Esei ta kompletamente diferente for di loke e iglesianan di kristiandat a bini ta hasi; nan a kita e nòmber di Yehova for di hopi di nan tradukshonnan di Beibel.

13. Kiko ta konvensé bo ku Hesus ta usa “e esklabo fiel i prudente”? (Huan 6:68)

¹³ Hesus a usa “e esklabo fiel i prudente” pa forma un organisashon aki riba tera ku ta promové adorashon puru. Kiko e organisashon ei ta nifiká pa bo? Kisas bo ta pensa meskos ku Apòstel Pedro, kende a bisa Hesus: “Serka ken nos lo bai? Abo tin e palabranan ku ta hiba na bida eterno.” (Huan 6:68) Puntra bo mes: ‘Unda lo mi ta si mi no a konosé Yehova su organisashon?’ Via e organisashon ei, Hesus ta perkurá pa nos ta bon alimentá den sentido spiritual i ta entrená nos pa prediká diligentemente. Ademas, e ta yuda nos “bisti e personalidat nobo” ya asina nos por sigui hasi Yehova kontentu.—Efe. 4:24.

14. Kon abo a benefisiá di ta parti di Yehova su organisashon durante e pandemia di COVID-19?

¹⁴ Hesus ta perkurá bon instrukshonnan den tempu di krísis. Nos a benefisiá di esei ora ku e pandemia di COVID-19 a dal aden. Miéntras ku mundu no tabata sa kiko pa hasi, Hesus a duna nos instrukshon bon kla via e organisashon. Nos a haña animashon pa bisti tapaboka den públiko i pa mantené distansia físiko. Ansianonan a haña rekordatorio pa regularmente keda den kontakto ku e rumannan di kongregashon pa asina hasi sigur ku nan tin tur loke nan mester pa keda safe, salú i serka di Yehova. (Isa. 32:1, 2) Nos a risibí mas instrukshon i animashon via di e informenan di Kuerpo Gobernante.

15. Ki instrukshon nos a haña durante e pandemia enkuanto reunion i sirbishi, i kiko tabata e resultado?

¹⁵ Durante e pandemia tambe nos a  haña instrukshon bon kla enkuanto nos reunion i sirbishi. Kasi di un dia pa otro, nos a kuminsá bai reunion, asamblea i kongreso via Internet. I tambe gran parti di nos sirbishi ta via karta i telefòn. Yehova a bendishoná nos esfuerso. Informenan di hopi sukursal ta mustra ku tin un oumento di publikadó. De echo, hopi ruman tin eksperensianan masha bunita mes durante e tempu akí.—Wak e kuadro “ Yehova A Bendishoná Nos Sirbishi.”

16. Di kiko nos por tin sigur?

¹⁶ Kisas algun hende a sinti ku e instrukshonnan ku e organisashon a duna durante e pandemia tabata un tiki eksagerá. Pero, bes tras bes a bira bisto ku e instrukshonnan ei tabata na lugá. (Mat. 11:19) Ora nos meditá ku kuantu amor Hesus ta guia su siguidónan, nos tin sigur ku sin importá kiko pasa mañan, Yehova i su Yu stimá lo ta ku nos.—Lesa Hebreonan 13:5, 6.

17. Kon bo ta sinti pa traha bou di guia di Hesus?

¹⁷ Nos ta masha kontentu ku Hesus ta guia nos. Nos ta parti di un organisashon uní ku ni idioma, ni kultura ni nashonalidat no por kibra. Pa loke ta trata kuminda spiritual, nos no falta nada. I nos tin tur loke nos mester pa prediká e bon notisia. Kada un di nos ta siña kon pa bisti e personalidat nobo i kon pa stima otro. Nos tin tur motibu pa gaba Hesus nos lider.