1. Kon nos mester mira e oportunidat di hasi orashon na Yehova?

 E KREADOR di shelu i tera a duna nos un regalo masha bunita mes. Nos por resa na dje. Djis para pensa un ratu: Bo por bisa Yehova delaster un kos, sin importá e ora òf idioma. Anto bo por hasi tur esei sin tin ku traha afsprak. Nos por tin sigur ku nos Tata, kende stima nos masha hopi, lo skucha nos. Anto no ta importá si nos ta den hospital òf den prizòn. Ki kontentu nos ta pa e regalo ei!

2. Kon Rei David a mustra ku el a balorá e privilegio di hasi orashon?

² Rei David a balorá e privilegio di hasi orashon. El a kanta na Yehova: “Aseptá mi orashon manera bo ta aseptá sensia bon prepará.” (Sal. 141:1, 2, NW) Den tempu di David, e sensia sagrado ku e saserdotenan tabata usa den adorashon berdadero tabata bon prepará. (Éks. 30:34, 35) Pues, e echo ku David a menshoná sensia ora e tabata papia tokante su orashonnan ta mustra ku e kier a tuma tempu pa prepará bon loke e tabata bai bisa Yehova den orashon. Nos tambe lo ke hasi meskos. Nos ke pa nos orashonnan agradá Yehova.

3. Ki aktitut nos mester tin ora nos ta resa na Yehova, i dikon?

³ Ora nos ta resa na Yehova, nos lo no ke falt’é rèspèt. Pensa riba e vishonnan impreshonante ku Isaías, Ezekiel, Daniel i Huan a haña. E vishonnan akí ta diferente for di otro, pero nan tin algu en komun. Nan tur ta deskribí Yehova komo un Rei magnífiko. Isaías a mira Yehova “sintá riba un trono, haltu i elevá.” (Isa. 6:1-3) Ezekiel a mira Yehova sintá den su garoshi selestial, rondoná pa  “un splendor . . . manera e aparensia di regenbog.” (Eze. 1:26-28) Daniel a mira “e Ansiano di Dianan” bistí na paña blanku i ku vlam di kandela ta sali for di Su trono. (Dan. 7:9, 10) Anto Huan a mira Yehova sintá riba un trono rondoná pa algu manera un regenbog ku brio manera esmeralda. (Rev. 4:2-4) Pues, ta bisto ku no tin un persona manera Yehova. Su gloria ta inkomparabel. E echo ku e ta permití nos resa na dje ta un privilegio inmenso, i nos lo ke hasi sigur ku nos orashonnan ta agrad’é. Pero kiko ta algun kos ku nos por resa tokante dje?

4. Kiko nos ta siña for di e manera ku Hesus a kuminsá e orashon di Nos Tata na Mateo 6:9 i 10?

⁴ Lesa Mateo 6:9, 10. Durante e Sermon Riba Seru, Hesus a siña su disipelnan kon pa hasi orashon na un manera ku ta agradá Dios. El a kuminsá ku e kosnan di mas importante. El a pidi pa santifiká Dios su nòmber; pa Su Reino bini, ku lo destruí tur Dios su enemigunan; i pa e bendishonnan ku Dios tin pa tera i pa hende obediente den futuro. Ora nos pidi e kosnan akí den nos orashonnan nos ta mustra Yehova ku su boluntat ta importante pa nos.

5. Ta malu pa resa pa kosnan personal?

⁵ Den e siguiente parti di e orashon, Hesus a mustra ku no tin nada malu pa pidi pa kosnan personal. Nos por pidi Yehova pa duna nos nos kuminda di kada dia, pa pordoná nos pikánan, pa protehá nos di tentashon i pa libra nos di Satanas. (Mat. 6:11-13) Ora nos pidi Yehova pa e kosnan akí, nos ta rekonosé ku nos mester di su yudansa i ku nos ègt ke agrad’é.

6. Ta solamente e kosnan menshoná den e orashon di Nos Tata nos por pidi p’e? Splika.

⁶ Hesus no tabata ke pa su siguidónan usa eksaktamente e mesun palabranan ku el a usa den e orashon di Nos Tata. Den e otro orashonnan ku Hesus a hasi, e no a papia tokante e mesun kosnan. El a menshoná e kosnan ku tabata importante p’e na e momento ei. (Mat. 26:39, 42; Huan 17:1-26) Di mes manera,  nos por hasi orashon tokante tur loke ta preokupá nos. Por ehèmpel, ora ku nos tin ku tuma un desishon, nos por pidi pa sabiduria i komprondementu. (Sal. 119:33, 34) I ora nos ta bai kuminsá ku un asignashon difísil, nos por pidi Yehova pa yuda nos sa kon pa kumpli ku e asignashon ei. (Pro. 2:6) Mayornan por resa pa nan yunan, i yunan por resa pa nan mayornan. Anto nos tur por i tin ku hasi orashon pa nos studiantenan i esnan ku nos ta prediká na dje. Klaru ku nos no mester pidi-pidi so den nos orashonnan.

7. Ki motibu nos tin pa alabá Yehova den nos orashonnan?

⁷ Den nos orashonnan na Yehova, ta bon pa nos alab’é, esta, bis’é kon bon e ta. Niun hende no meresé esei mas ku Yehova. E ta “bon, i kla pa pordoná,” i “yen di kompashon i grasia.” E “no ta rabia lihé, i ta abundante den miserikòrdia i bèrdat.” (Sal. 86:5, 15) Ta bisto ku nos tin bon motibu pa alabá Yehova pa e persona ku e ta i pa e kosnan ku e ta hasi pa nos.

8. Ki ta algun kos ku nos por yama Yehova danki p’e? (Salmo 104:12-15, 24)

⁸ Ademas di alabá Yehova den nos orashonnan, nos ke yam’é danki tambe pa tur e kosnan maravioso ku e ta perkurá pa nos. Por ehèmpel, nos por yam’é danki pa tur e flornan bunita ku nos tin na diferente koló, pa e variedat grandi di kuminda dushi ku nos por kome i pa e goso di tin bon amistat. Yehova stima nos masha hopi mes, i e ta duna nos tur e kosnan akí i asta mas pasó e ke pa nos ta felis. (Lesa Salmo 104:12-15, 24.) I mas importante ainda, nos ta yama Yehova danki pa tur e kuminda spiritual ku e ta perkurá pa nos i pa e maravioso speransa ku nos tin pa futuro.

9. Kiko por yuda nos kòrda yama Yehova danki? (1 Tesalonisensenan 5:17, 18)

⁹ Tin biaha, kabes yen, nos por lubidá di yama Yehova danki pa tur e kosnan ku el a hasi pa nos. Kiko nos por hasi pa no lubidá di hasi esei? Nos por traha un lista di e kosnan ku nos a pidi Yehova, i ratu-ratu wak e lista i mira kon Yehova  a kontestá nan. Despues yama Yehova danki pa e yudansa ku el a duna nos. (Lesa 1 Tesalonisensenan 5:17, 18.) Pensa riba esaki: Nos ta keda masha kontentu i felis ora un hende gradisí nos pa algu ku nos a hasi p’e. Yehova tambe ta sinti meskos. Ora nos kòrda yam’é danki pa tur e kosnan ku el a hasi pa nos, esei ta hasié masha felis. (Kol. 3:15) Pero, tin un kos mas ku nos tin ku yama Yehova danki p’e.

10. Segun 1 Pedro 2:21, dikon nos mester yama Yehova danki ku el a manda Hesus na tera?

¹⁰ Lesa 1 Pedro 2:21. Yehova a manda su Yu stimá na tera pa siña nos. Nos mester ta gradisidu p’esei. Pasobra for di e manera ku Hesus a hiba su bida, nos ta siña hopi tokante Yehova i kon pa agrad’é. Anto si nos demostrá fe den e sakrifisio di Kristu, nos por tin un amistat será ku Yehova i por disfrutá di Su pas.—Rom. 5:1.

11. Ki ròl Hesus tin ora nos hasi orashon na Yehova?

¹¹ Nos ta masha gradisidu ku nos por hasi orashon na Yehova mediante su Yu. Yehova ta esun ku ta skucha i ta kontestá nos ora nos hasi orashon den nòmber di Hesus. I ora e disidí di duna nos e kos ku nos a pidi den orashon, e ta usa su Yu pa duna nos esei. I ta presis esei ta loke Hesus a splika: “Kiko ku boso pidi den mi nòmber, lo mi hasi, pa asina e Yu por glorifiká e Tata.”—Huan 14:13, 14.

12. Ki otro motibu nos tin pa gradisí Yehova ku el a manda su Yu?

¹² Yehova ta pordoná nos nos pikánan pa medio di e sakrifisio di reskate di Hesus. Beibel ta referí na Hesus komo nos ‘sumo saserdote sintá na man drechi di e trono di e Mahestat den shelu.’ (Heb. 8:1) Hesus ta nos “ayudante serka e Tata.” (1 Huan 2:1) Nos ta masha kontentu ku Yehova a duna nos un Sumo Saserdote ku ta komprondé nos imperfekshon- i debilidatnan i “ku ta boga pa nos.” (Rom. 8:34; Heb. 4:15) Si no ta pa e sakrifisio di Hesus, nos lo no por a komuniká ku Yehova den orashon. Sin duda, e sakrifisio di Dios su Yu stimá ta e regalo di mas bunita ku Yehova a duna nos. Nos no tin palabra pa yama Yehova danki pa esei!

13. Kon Hesus a mustra ku e tabata stima su disipelnan e anochi promé ku el a muri?

¹³ Riba e anochi promé ku Hesus a muri, el a tuma hopi tempu pa hasi orashon pa su disipelnan. El a pidi su Tata pa “protehá nan pa motibu di e Malbado.” (Huan 17:15) Loke Hesus a hasi ei realmente a mustra kuantu e tabata stima su disipelnan. Aunke ku e tabata sa ku un bes akí e mes lo a pasa den un prueba masha difísil, e tabata preokupá pa su disipelnan.

14. Kon nos por mustra ku nos ta stima nos rumannan?

¹⁴ Meskos ku Hesus, nos no ke pensa riba nos so ora nos ta hasi orashon. Mas bien, nos ke hasi orashon tur ora bai pa nos rumannan. Ora nos hasi esei, nos ta obedesé Hesus su mandamentu di stima otro i nos ta mustra Yehova kuantu nos ta stima nos rumannan. (Huan 13:34) Ta bale la pena pa hasi orashon pa nos rumannan. Dikon? Pasobra Beibel ta bisa ku “súplika di un hende hustu tin hopi poder i ta masha efektivo.”—Sant. 5:16.

15. Dikon nos tin ku hasi orashon pa nos rumannan?

 ¹⁵ Nos tin ku hasi orashon pa nos rumannan pasó nan ta pasa den hopi prueba. Nos por pidi Yehova pa yuda esnan ku ta malu, ku ta pasa den desaster natural, guera, persekushon òf otro difikultat. Nos por hasi orashon tambe pa e rumannan ku ta traha duru pa yuda esnan den nesesidat. Si nos konosé un ruman ku ta pasa den un situashon difísil, menshoná esei den bo orashon usando e ruman su nòmber. Ora nos pidi Yehova pa yuda nos rumannan perseverá, nos ta mustra kuantu nos ta stima nan.

16. Dikon nos mester hasi orashon pa e ruman hòmbernan ku ta traha duru?

¹⁶ Ta bon tambe pa nos hasi orashon pa e ruman hòmbernan ku ta traha duru den e organisashon. Tipo di orashon asina ta hasi nan hopi kontentu i ta yuda nan tambe. Apòstel Pablo a pidi e rumannan pa hasi orashon p’e. El a bisa: “Resa . . . tambe pa mi, pa ora mi habri mi boka, mi por papia libremente pa duna di konosé e sekreto sagrado di e bon notisia.” (Efe. 6:18, 19) Awe tambe tin hopi ruman hòmber ku ta traha duru den kongregashon. Nos ta mustra kuantu nos ta stima nan ora nos pidi Yehova pa yuda nan den nan trabou.

17-18. Na ki okashon nos por ser pidí pa hasi orashon, i kiko nos tin ku keda kòrda?

¹⁷ Tin biaha nos por ser pidí pa hasi orashon. Por ehèmpel, un ruman muhé ku tin un estudio di Beibel por pidi e ruman muhé ku ta kompañ’é pa hasi orashon. E ruman muhé ku a kompañ’é no konosé e studiante masha bon, pues kisas lo e preferá pa hasi orashon na final di e estudio. Asina ei, e sa kiko e tin ku pidi pa e studiante den orashon.

¹⁸ Por pidi un ruman hòmber pa hasi orashon ora ku tin ku saka grupo di sirbishi òf na reunion di kongregashon. Ta bon pa e ruman hòmbernan keda kòrda ku nan orashon mester klòp ku e meta di e reunion. No por usa orashon pa duna konseho ni pa hasi anunsio. Pa mayoria di nos reunionnan, a apartá sinku minüt  pa e kantika i orashon. Pues, e ruman ku ta hasi orashon no mester “usa hopi palabra,” foral na kuminsamentu di e reunion.—Mat. 6:7.

19. Kiko lo yuda nos ta prepará pa Yehova su dia di huisio?

¹⁹ Segun ku Yehova su dia di huisio ta aserká, nos lo tin ku hasi mas i mas orashon. Ta p’esei Hesus a bisa: “Keda lantá, suplikando Dios tur ora bai pa boso por logra skapa di tur e kosnan akí ku sigur lo sosodé.” (Luk. 21:36) Si nos hasi orashon tur ora bai, nos fe lo bira mas fuerte i nos lo ta prepará ora Yehova su dia di huisio yega.

20. Kon nos orashonnan por ta manera sensia ku ta hole dushi?

²⁰ Den e artíkulo akí nos a mira ku orashon ta un privilegio masha importante. E kosnan di mas importante ku nos mester resa p’e ta relashoná ku Yehova su propósito. Tambe nos por yama danki pa e echo ku Yehova a manda su Yu i ku e ta nos Rei. I nos por resa pa nos rumannan tambe. Klaru ku nos por resa tambe pa nos nesesidatnan físiko i spiritual. Ora ku nos tuma tempu pa pensa kiko ta loke nos lo bai bisa den nos orashonnan, nos ta mustra ku nos ta balorá e privilegio bunita akí. Anto e ora ei, nos palabranan lo ta manera sensia ku ta hole dushi pa Yehova; un “delisia” p’e.—Pro. 15:8.