1. Kiko Yehova a hasi poko despues ku Adam ku Eva a peka? (Génesis 3:15)

 DJIS despues ku Adam ku Eva a peka, Yehova a bisa e palabranan ku nos ta mira na Génesis 3:15. (Les’é.) E profesia ei a duna nan desendientenan un bunita speransa.

2. Dikon e profesia na Génesis 3:15 ta asina importante?

² Aunke nos ta haña e profesia ei den e promé buki di Beibel, tur otro buki di Beibel ta konektá kuné. Kon asina? Meskos ku leim ta tene òf pega tur e blachinan di un buki huntu, asina tambe loke Génesis 3:15 ta bisa ta pega tur e otro bukinan di Beibel huntu den un mensahe. Kiko e mensahe ei ta? Ku Dios lo manda un Salbador pa destruí Diabel i tur su kompinchinan. b Esei lo ta un gran bendishon pa esnan ku stima Yehova.

3. Kiko nos lo trata den e artíkulo akí?

³ Den e artíkulo akí nos lo kontestá e siguiente preguntanan tokante e profesia na Génesis 3:15: Ken ta ser menshoná den e profesia ei? Kiko Yehova a hasi kaba pa kumpli ku e profesia ei? I kiko e profesia ei ta nifiká pa nos?

4. Ken “e kolebra” ta, i kon nos sa esei?

⁴ Génesis 3:14 i 15 ta menshoná e “kolebra,” e “simia”  di e kolebra, e “muhé” i e “simia” di e muhé. Beibel ta yuda nos haña sa ken òf kiko kada un di nan ta. c Laga nos kuminsá ku “e kolebra.” Un kolebra literal lo no a komprondé kiko Yehova a bisa den Hòfi di Eden. Pues, Yehova lo mester tabata papia ku un persona inteligente. Ken esei ta? Wèl, Revelashon 12:9 ta splika ku “e kolebra original” ta Satanas, e Diabel. Awor, ken e simia, òf desendiente, di e kolebra ta?

5. Ken tur ta parti di e desendiente di e kolebra?

⁵ Tin biaha Beibel ta usa e palabra “simia,” òf desendiente, pa referí na esnan ku ta imitá un persona asina tantu ku bo por bisa ku nan ta yu di e persona ei. Pues desendiente di e kolebra, ta angel i hende ku, meskos ku Satanas, ta rebeldiá kontra Yehova i ta oponé Su pueblo. Esei ta inkluí e angelnan ku a bandoná nan puesto den shelu durante e dianan di Noe i tambe tur hende malbado ku ta komportá nan meskos ku nan tata e Diabel.—Gén. 6:1, 2; Huan 8:44; 1 Huan 5:19; Hudas 6.

6. Dikon “e muhé” no por ta Eva?

⁶ Awor, laga nos ban mira ken “e muhé” ta. E no por ta Eva. Dikon nò? Un motibu ta ku e profesia ta bisa ku e desendiente di e muhé lo “heridá,” òf plècha, e kabes di e kolebra. Pero, manera nos a mira na paragraf 4, e kolebra ta Satanas, un angel malbado. Anto nos sa kaba ku ta imposibel pa un hende imperfekto ku ta desendiente di Eva, plècha Satanas. Pues, ta ken lo destruí Satanas anto?

7. Segun Revelashon 12:1, 2, 5 i 10, ken e muhé na Génesis 3:15 ta?

 ⁷ E último buki di Beibel ta bisa nos ken “e muhé” menshoná na Génesis 3:15 ta. (Lesa Revelashon 12:1, 2, 5, 10.) Esaki no ta kualke muhé. E tin luna bou di su pia i un korona di 12 strea riba su kabes. Anto e ta duna lus na un yu masha pekuliar: e Reino di Dios. E Reino ei ta den shelu, pues ta di komprondé ku e muhé tambe mester ta den shelu. Pues anto, e muhé ta representá e parti selestial di Yehova su organisashon ku ta konsistí di tur su angelnan fiel.—Gal. 4:26.

8. Ken e parti prinsipal di e desendiente di e muhé ta, i ki ora el a bira esei? (Génesis 22:15-18)

⁸ Beibel tambe ta yuda nos komprondé ku e parti prinsipal di e desendiente di e muhé mester ta un desendiente di Abraham. (Lesa Génesis 22:15-18.) I manera a ser profetisá, Hesus tabata desendiente di e hòmber fiel ei. (Luk. 3:23, 34) Pero, e desendiente ei mester ta mas ku un simpel hende pasobra e mester destruí Satanas e Diabel. Pues, ora Hesus tabatin 30 aña, el a ser ungí ku spiritu santu i a bira e Yu ungí di Dios. Anto, ta na e momento ei el a bira e parti prinsipal di e desendiente di e muhé. (Gal. 3:16) Despues ku el a muri i resusitá, Dios a “koron’é ku gloria i onor,” a dun’é “tur outoridat den shelu i riba tera,” asta outoridat “pa destruí e obranan di Diabel.”—Heb. 2:7; Mat. 28:18; 1 Huan 3:8.

9-10. (a) Ken mas ta forma parti di e desendiente di e muhé, i ki ora nan ta bira esei? (b) Kiko nos ta bai trata awor?

⁹ Pero, no ta Hesus so ta forma parti di e desendiente di e muhé. Apòstel Pablo a identifiká e otro parti ei ora el a bisa e kristiannan ungí hudiu i esnan no hudiu: “Si boso ta pertenesé na Kristu, boso realmente ta desendiente di Abraham, heredero relashoná ku un promesa.” (Gal. 3:28, 29) Un kristian ta bira parti di e desendiente di e muhé ora Yehova ungié ku spiritu santu. Pues, e desendiente di e muhé ta Hesus ku su 144.000 ko-gobernantenan. (Rev. 14:1) Nan tur ta imitá nan Tata, Yehova Dios.

¹⁰ Awor ku nos sa ken tur esnan menshoná den Génesis 3:15 ta, laga nos wak kiko Yehova a hasi kaba pa kumpli ku e profesia ei i kiko e profesia ei ta nifiká pa nos.

11. Den ki sentido e kolebra a heridá hilchi di e desendiente di e muhé?

¹¹ Segun e profesia na Génesis 3:15, e kolebra lo mester a heridá “hilchi” di e desendiente di e muhé. E parti di e profesia ei a kumpli ora Satanas a usa e hudiunan i e romanonan pa mata e Yu di Dios. (Luk. 23:13, 20-24) Ora un hende heridá su hilchi, pa un tempu e no por hasi e kosnan ku normalmente e sa hasi. Asina tambe Hesus no por a hasi nada tempu ku e tabata den graf.—Mat. 16:21.

12. Kon lo plècha kabes di e kolebra, i ki ora esei lo sosodé?

¹² Pa e profesia na Génesis 3:15 kumpli, Hesus no por a keda morto. Dikon nò? Pasobra segun e profesia, e desendiente di e muhé lo plècha kabes di e  kolebra. Esei ke men ku mester a resusitá Hesus. I ta esei mes a pasa. Riba e di tres dia despues di su morto, Hesus a resusitá komo spiritu i a haña bida inmortal. Na Dios su debido tempu, Hesus lo plècha Satanas i kaba kuné. (Heb. 2:14) Kristu, huntu ku su 144.000 ko-gobernantenan lo destruí tur e enemigunan di Dios, esta, desendiente di e kolebra.—Rev. 17:14; 20:4, 10. d

13. Kon kumplimentu di e profesia akí ta benefisiá nos?

¹³ Si bo ta un sirbidó dediká di Dios, kumplimentu di e profesia ei ta benefisiá bo. Kon asina? Ora Hesus a bini na tera komo hende, el a imitá personalidat di su Tata perfektamente. (Huan 14:9) Pues ora nos siña tokante Hesus, nos ta bin konosé i stima Yehova. Tambe Hesus su siñansanan i e manera ku e ta guia e kongregashon ta benefisiá nos. Nos ta siña biba na un manera ku Yehova ta aprobá. Pero, no ta esei so. Asta ora ku a heridá Hesus su hilchi, esta, ora el a muri, nos a benefisiá. Kon asina? Despues ku Hesus a ser resusitá, el a ofresé un sakrifisio perfekto, e reskate, i su sanger “ta limpia nos di tur piká.”—1 Huan 1:7.

14. Kon nos sa ku e profesia ku Yehova a duna den Hòfi di Eden no a kumpli mesora? Splika.

¹⁴ Loke Yehova a bisa den Hòfi di Eden ta mustra ku e palabranan ei lo no a kumpli mesora. E muhé mester a produsí e desendiente, Diabel mester a reuní su siguidónan i mester surgi enemistat (òf, odio) entre e dos gruponan ei. Pa tur e kosnan ei sosodé lo a tuma tempu. Dikon ta bon pa nos komprondé e profesia akí? Pasobra e ta spièrta nos ku e mundu akí bou di kontrol di Satanas lo odia nos. Mas despues, Hesus a duna su disipelnan un spièrtamentu similar. (Mar. 13:13; Huan 17:14) No tin duda, foral den e último 100 añanan nos a mira ku parti di e profesia a kumpli. Kon asina?

15. Dikon mundu su odio pa Dios su sirbidónan a oumentá asina tantu, i dikon nos no mester tin miedu di Satanas?

¹⁵ Poko despues ku Hesus a bira e Rei Mesiániko na 1914, Satanas a wòrdu bentá for di shelu aki riba tera. Miéntras e ta warda su destrukshon, e no por bai niun otro kaminda. (Rev. 12:9, 12) Pero e no ta sinta ketu. E ta desesperá, rabiá i ta sigui ataká Dios su pueblo. (Rev. 12:13, 17) P’esei, e odio i rabia ku mundu tin pa Dios su pueblo a oumentá asina tantu. Pero, nos no mester tin miedu di Satanas i su kompinchinan. Al kontrario, nos por ta mesun konvensí ku Apòstel Pablo ku a bisa: “Si Dios ta ku nos, ken por ta kontra nos?” (Rom. 8:31) Nos por tin pleno konfiansa den Yehova. Pasobra manera nos a mira kaba, kasi ful e profesia di Génesis 3:15 a kumpli.

16-18. Kon e profesia na Génesis 3:15 a yuda Curtis, Ursula i Jessica?

¹⁶ E profesia na Génesis 3:15 por duna nos forsa pa trata ku prueba. Curtis, un misionero na Guam a bisa: “Tin kos ku a pasa den mi bida ku a pone mi lealtat na Yehova na prueba. Pero ora m’a para ketu i pensa riba e profesia na  Génesis 3:15, esei a yuda mi sigui konfia den Yehova.” Sin duda Curtis ta anhelá pa e dia yega ku Yehova lo kaba ku tur nos pruebanan.

¹⁷ Un ruman na Bavaria ku yama Ursula a bisa ku ora el a komprondé Génesis 3:15, esei a konvens’é ku Beibel ta inspirá pa Dios. El a mira kon tur otro profesia ta konektá ku esun akí, anto esei a impreshon’é. El a bisa tambe: “Ora m’a siña ku Yehova mesora a hasi algu pa asina nos por tin speransa, esei a pone mi stim’é asta mas.”

¹⁸ Jessica, un ruman di Mikronesia, a bisa: “Ainda mi ta kòrda kon m’a sinti ora m’a realisá ku esaki ta e bèrdat. E profesia na Génesis 3:15 tabata kumpliendo. E profesia ei a yuda mi kòrda ku nunka tabata Yehova su propósito pa nos pasa den e kosnan ku nos ta pasa aden aworakí. Tambe el a konvensé mi mas ainda ku sirbi Yehova semper ta duna bo e mihó bida posibel. Pero no djis aworakí, ma tambe unu asta mas mihó den futuro.”

19. Dikon nos por tin sigur ku e último parti di e profesia tambe lo kumpli?

¹⁹ Manera nos a mira, Génesis 3:15 ta kumpliendo. Nos sa ken e desendiente di e muhé i e desendiente di e kolebra ta. Hesus, e parti prinsipal di e desendiente di e muhé, a kura di su herida na su hilchi i e ta un Rei poderoso i inmortal. Yehova falta pa skohe djis un par di hende mas pa reina huntu ku su Yu den shelu. Nos a mira kaba ku e promé parti di e profesia a kumpli, i p’esei nos por tin sigur ku e último parti, esta, e plèchamentu di e kabes di e kolebra, tambe lo kumpli. Bo por imaginá bo kon dushi bida lo ta ora Satanas wòrdu destruí? No falta muchu. P’esei, no entregá! Konfia Yehova kompletamente. Mediante e desendiente di e muhé, Yehova lo hasi hopi kos bon pa “tur e nashonnan di e tera.”—Gén. 22:18.