1. Di kiko nos tin sigur, i dikon?

 ORA bo mira kiko ta pasa rònt mundu, kisas ta difísil pa kere ku kos lo bai drecha. Famianan no ta stima otro manera ántes mas. Hende a bira mas i mas violento, egoista i agresivo. I hopi hende ta haña ku ta difísil pa konfia esnan ku tin outoridat. Pero eigenlijk, ta nèt e kosnan ei ta proba nos ku kosnan lo bai drecha. Dikon? Pasobra hende ta hasi presis manera un profesia tokante “e último dianan” a bisa. (2 Tim. 3:1-5) Kualke hende ku para analisá tur loke ta pasa rònt mundu lo rekonosé ku e profesia ei ta kumpliendo. E kumplimentu ei ta proba ku Kristu Hesus a bira Rei di Dios su Reino. Pero, tin hopi profesia mas ku ta papia tokante Dios su Reino. Pa nos fe bira mas fuerte, lo ta hopi bon pa nos analisá algun di nan i mira kon nan a kumpli den e último añanan.

2. Kiko nos ta lo trata den e artíkulo akí, i ku ki meta? (Usa e plachi riba portada den bo komentario.)

² Den e artíkulo akí nos lo trata (1) un profesia ku lo yuda nos sa ki ora Dios su Reino a kuminsá goberná, (2) profesianan ku lo yuda nos komprondé ku Hesus a bira Rei di Dios su Reino den shelu i (3) profesianan ku ta yuda nos komprondé kon e enemigunan di Dios su Reino lo wòrdu destruí. Ora nos analisá e profesianan akí, nos lo mira kon nan ta pega na otro meskos ku pidanan di un pùzel. I nos lo mira bon kla ku e fin no ta leu, ma ku e ta na kaminda manera Yehova a primintí.

3. Di kiko e profesia na Daniel 7:13 i 14 ta sigurá nos?

³ E profesia na Daniel 7:13 i 14 ta sigurá nos ku Kristu Hesus lo ta e Rei ideal di Dios su Reino. Hende di tur nashon lo ta kontentu pa sirbié, i niun gobernante lo remplas’é. Un otro profesia den e buki di Daniel ta bisa ku shete periodo di tempu lo pasa promé ku Hesus kuminsá goberná. Kon nos por sa na ki aña el a bira Rei?

4. Kon Daniel 4:10-17 ta yuda nos haña sa na ki aña Hesus lo a bira Rei? (Wak e nota tambe.)

⁴  Lesa Daniel 4:10-17. E “shete periodo di tempu” ta representá 2.520 aña. E periodo ei a kuminsá na 607 P.K. ora ku e babilonionan a kita e último rei fo’i Yehova su trono na Herúsalèm. E 2.520 aña a kaba na 1914 ora Yehova a hasi Hesus, kende “tin derecho” pa goberná, Rei di Dios su Reino. b—Eze. 21:25-27.

5. Ku kiko e profesia tokante e “shete periodo di tempu” ta yuda nos?

⁵ Ku kiko e profesia akí ta yuda nos? Ora nos komprondé e profesia tokante e “shete periodo di tempu,” nos lo ta mas konvensí ku Yehova semper ta kumpli ku su promesanan nèt na tempu. Yehova a stipulá na ki aña lo el a hasi Hesus Rei. Anto ora e tempu ei a yega, el a hasi esei tambe. Pues, nos tin sigur ku e otro profesianan tambe lo kumpli na e tempu ku el a stipulá. Sí, Yehova su dia lo “no tarda”!—Hab. 2:3.

6. (a) Kiko nos ta mira aki riba tera ku ta indiká ku Hesus a kuminsá goberná den shelu? (b) Kon Revelashon 6:2-8 ta konfirmá esei?

⁶ Un poko promé ku Hesus a kaba ku su sirbishi aki riba tera, el a konta su siguidónan tokante algun kos ku lo pasa rònt mundu i ku lo indiká ku el a kuminsá goberná den shelu. Algun di e kosnan ku el a menshoná tabata guera, hamber i temblor. Tambe el a profetisá ku lo tin pèst “den un lugá tras di otro,” i e pandemia di COVID-19 ta un ehèmpel di esei. Tur e susesonan ei ta parti di loke Beibel ta yama “e señal” di Kristu su presensia, esta, ku el a bira Rei. (Mat. 24:3, 7; Luk. 21:7, 10, 11) Mas ku 60 aña despues ku Hesus a muri i a bai bèk shelu, el a konfirmá Apòstel Huan ku e kosnan akí lo sosodé. (Lesa Revelashon 6:2-8.) I desde ku Hesus a bira Rei na 1914, nos ta mira tur eseinan.

7. Dikon ora Hesus a bira Rei kos a bira pió aki riba tera?

⁷ Dikon ora Hesus a bira Rei kos a bira pió aki riba tera? Revelashon 6:2 ta splika e motibu. E promé kos ku Hesus a hasi ora el a bira Rei tabata di bringa un guera kontra Diabel i su demoñonan. I segun Revelashon kapítulo 12, Satanas a pèrdè e bataya. Satanas huntu ku su demoñonan a wòrdu bentá aki riba tera. Tur hostiná Satanas ta baha su rabia riba humanidat, ku ta resultá den e “ai di tera.”—Rev. 12:7-12.

8. Ora nos mira profesianan tokante e Reino kumpli, ku kiko esei ta yuda nos?

⁸ Ku kiko e profesianan akí ta yuda nos? Loke ta pasa den mundu i kambio den hende su aktitut lo yuda nos sa  ku Hesus a bira Rei. Pues, en bes di preokupá pasobra hende a bira egoista i kruel, nos mester kòrda ku nan komportashon ta kumpli ku profesianan di Beibel. E Reino a kuminsá goberná! (Sal. 37:1) Anto nos por ferwagt ku kos lo bira pió segun ku Armagedon ta yega mas serka. (Mar. 13:8; 2 Tim. 3:13) Bo no ta kontentu ku nos Tata den shelu ku ta stima nos asina tantu ta yuda nos komprondé dikon tin asina tantu problema den mundu?

9. Kon e profesia na Daniel 2:28, 31-35 ta deskribí e último potensia mundial, i ki tempu el a kuminsá eksistí?

⁹ Lesa Daniel 2:28, 31-35. Nos ta mira ku e profesia akí ta kumpliendo. E soño ku Nabukodonosor a haña ta yuda nos mira kiko lo sosodé “den e último dianan,” esta, despues ku Kristu kuminsá goberná. E último potensia mundial ku Beibel ta papia di dje ta un di e enemigunan ku Hesus tin aki riba tera. E potensia akí ta ser representá pa e “pianan un parti di heru i un parti di klei.” E potensia ei t’ei kaba. El a kuminsá eksistí durante Promé Guera Mundial, ora ku Gran Bretaña i Merka a forma un aliansa, e aliansa Angloamerikano. E estatua den Nabukodonosor su soño ta mustra nos tambe ku tin dos kos ku lo hasi e último potensia mundial akí otro for di tur esnan promé kuné.

10. (a) Kon nos ta mira ku e aliansa Angloamerikano ta kumpli ku loke Daniel su profesia a bisa? (b) Ki peliger nos mester evitá? (Wak e kuadro “ Bo Ta Mira e Peliger?”)

¹⁰ E promé kos ku ta hasi e aliansa Angloamerikano diferente for di tur e potensianan  menshoná promé den e vishon ta ku e no ta representá pa un metal so, manera oro òf plata, sino pa un meskla di heru i klei. E klei ta representá e pueblo, esta, hende komun i koriente. (Dan. 2:43) Awe nos ta mira e influensia ku e pueblo tin den elekshon, kampaña di derecho sivil, manifestashon grandi i sindikatonan. Loke e pueblo ta hasi ei ta pone ku ta difísil pa e gobernantenan di e potensia mundial akí hasi loke nan ke.

11. Dikon nos por tin sigur ku nos ta biba den e último dianan?

¹¹ E di dos kos ku ta hasi e aliansa Angloamerikano diferente, ta ku e ta ser representá pa e pianan di e estatua grandi. Pues, lo e ta e último potensia mundial; niun otro gobièrnu humano lo no bini despues di dje. Dios su Reino lo destruyé huntu ku tur sobrá gobièrnu humano durante Armagedon. c—Rev. 16:13, 14, 16; 19:19, 20.

12. Kiko mas Daniel su profesia ta bisa ku ta duna nos konsuelo i speransa?

¹² Ku kiko e profesia akí ta yuda nos? E profesia di Daniel ta duna nos mas prueba ku nos ta biba den e último dianan. Mas ku 2.500 aña pasá Daniel a bisa ku despues di Babilonia lo tin kuater otro potensia mundial ku lo persiguí Dios su pueblo. Ademas, el a bisa ku e Potensia Mundial Angloamerikano lo ta e último di nan. Esei ta duna nos konsuelo i speransa pasobra nos sa ku pronto Dios su Reino lo destruí tur gobièrnu humano i lo goberná riba henter e tera.—Dan. 2:44.

13. Kiko e “di ocho rei” i e “dies rei” menshoná na Revelashon 17:9-12 ta representá, i kon e profesia ei a kumpli?

¹³ Lesa Revelashon 17:9-12. E destrukshon ku Promé Guera Mundial a kousa a hiba na kumplimentu di un otro profesia di Beibel tokante e último dianan. Diferente gobernante kier a hasi sigur ku lo tin pas rònt mundu. Pues, na yanüari 1920, nan a forma Liga di Nashonnan. Mas despues, na òktober 1945, e organisashon ei a bira Nashonnan Uní. Beibel ta yam’é “un di ocho rei.” Pero, e no ta un potensia mundial. E tin poder solamente pasobra gobièrnunan ta dun’é esei. Beibel ta referí na e gobièrnunan ku ta apoy’é komo “dies rei.”

14-15. (a) Kiko Revelashon 17:3-5 ta bisa tokante “Babilonia e Grandi”? (b) Kiko hopi miembro di religion falsu ta hasi?

¹⁴ Lesa Revelashon 17:3-5. Apòstel Huan a haña un vishon unda el a mira un prostituta, esta, “Babilonia e Grandi,” ku ta representá tur religion falsu rònt mundu. Kon e vishon akí a kumpli? Pa hopi tempu, religion falsu ta kooperá i sostené gobièrnunan di mundu. Pero pronto, Yehova ta bai hinka den kurason di e gobièrnunan ei “pa kumpli ku Su pensamentu.” Ku ki resultado? E gobièrnunan ei, esta, e “dies rei,” lo ataká tur religion falsu i kaba ku nan.—Rev. 17:1, 2, 16, 17.

¹⁵ Kon nos sa ku fin di Babilonia e Grandi ta serka? Pa kontestá e pregunta ei, ta bon pa nos kòrda ku Babilonia di antigwedat tabata un stat ku entre otro tabata haña protekshon for di e awanan di Riu Eufrátes. Revelashon ta kompará e miónes di miembronan di Babilonia  e Grandi ku “awanan” ku ta proteh’é. (Rev. 17:15) Pero, e ta bisa tambe ku e awanan ei lo seka. Esei ta indiká ku “Babilonia e Grandi” lo pèrdè masha hopi di su miembronan. (Rev. 16:12) Awe nos ta mira e profesia ei kumpli pasobra hopi hende ta bandoná religion falsu, i ta kuminsá buska solushon pa nan problemanan otro kaminda.

16. Dikon ta bon pa komprondé e profesianan tokante e formashon di Nashonnan Uní i tokante fin di Babilonia e Grandi?

¹⁶ Ku kiko e profesianan akí ta yuda nos? E formashon di Nashonnan Uní i e echo ku hopi hende awe ta bandoná religion falsu ta proba ku nos ta biba den e último dianan. Ta bèrdat ku hopi hende no ta sostené Babilonia e Grandi mas, pero no ta esei lo kaba kuné. Manera nos a mira na paragraf 14, Yehova mes lo pone den kurason di e “dies rei,” esta, e gobièrnunan ku ta sostené Nashonnan Uní, “pa kumpli ku Su pensamentu.” Fin di religion falsu lo bin diripiente i lo kue tur hende di sorpresa. d (Rev. 18:8-10) Destrukshon di Babilonia  e Grandi lo sagudí henter mundu i esei por kousa algun difikultat. Pero nos, komo Dios su pueblo, lo tin por lo ménos dos motibu pa alegrá. E promé ta ku religion falsu, ku tabata un enemigu di Yehova pa hopi tempu, lo no eksistí mas. I di dos, fin di e mundu malbado akí ta serka.—Luk. 21:28.

17-18. (a) Kon nos por sigui fortalesé nos fe? (b) Kiko nos lo trata den e siguiente artíkulo?

¹⁷ Daniel a profetisá ku berdadero “konosementu lo oumentá.” I ta esei mes a sosodé. Awor nos ta komprondé e profesianan tokante nos tempu hopi mas mihó. (Dan. 12:4, 9, 10) Anto e manera presis ku e profesianan akí ta kumpli ta impreshoná nos i ta laga nos haña hopi mas rèspèt pa Yehova i su Palabra. (Isa. 46:10; 55:11) P’esei, sigui fortalesé bo fe dor di studia Beibel bon i yuda otro hende haña un amistat será ku Yehova. Yehova lo protehá tur hende ku konfi’é kompletamente i lo duna nan pas.—Isa. 26:3.

¹⁸ Den e siguiente artíkulo, nos lo trata e profesianan tokante e kongregashon kristian den tempu di fin. Anto manera nos lo siña, e profesianan akí tambe ta mustra ku nos ta biba den e último dianan. Tambe nos lo mira mas prueba ku Hesus nos Rei ta guia su siguidónan.