1. Dikon ta sabí pa prepará pa kalamidat?

 BON preparashon ta salba bida. Ora un kalamidat sosodé, hende ku a prepará bon tin mas chèns di sobrebibí i di yuda otro hende. Un organisashon na Europa ku ta yuda hende a bisa: “Tur kos ta sintá den bon preparashon.”

2. Dikon nos mester prepará pa tribulashon grandi? (Mateo 24:44)

² “Tribulashon grandi” lo kuminsá diripiente. (Mat. 24:21) Pero kontrali na otro kalamidatnan, lo e no kue tur hende di sorpresa. Dikon nò? Pasobra mas o ménos 2.000 aña pasá, Hesus a spièrta su siguidónan pa ta prepará pa e dia ei. (Lesa Mateo 24:44.) Si nos sigui su konseho, lo ta mas fásil pa nos sobrebibí e periodo difísil ei i yuda otro hende hasi meskos.—Luk. 21:36.

3. Dikon nos mester tin perseveransia, kompashon i amor?

³ Perseveransia, kompashon i amor lo yuda nos ta prepará pa tribulashon grandi. Ki nos lo hasi si nos mester prediká e mensahe fuerte di huisio i nan oponé nos? (Rev. 16:21) Nos lo tin mester di perseveransia pa obedesé Yehova i konfia ku lo e protehá nos. Kiko nos lo hasi si nos rumannan pèrdè algun òf tur nan kosnan material? (Hab. 3:17, 18) Nos lo yuda nan pasobra nos ta sinti kompashon pa nan. I kiko lo pasa ora ku un grupo di nashon ataká nos? Kiko nos lo hasi si pa un tempu nos mester biba den un lugá chikitu huntu ku nos rumannan? (Eze. 38:10-12) Na e momentonan ei, e amor fuerte ku nos tin pa nan lo yuda nos.

4. Kon nos sa ku nos tin ku sigui traha riba nos perseveransia, kompashon i amor?

⁴ Beibel ta animá nos pa sigui traha riba nos perseveransia, kompashon i amor. Lukas 21:19 ta bisa: “Pa medio di boso perseveransia, boso lo gana boso alma.” Kolosensenan 3:12 ta bisa: “Bisti tierno kompashon.” I 1 Tesalonisensenan  4:9 i 10 ta bisa: “Dios mes a siña boso pa stima otro. . . . Pero nos ta urgi boso, rumannan, pa sigui hasi esei mas plenamente.” Tur e palabranan akí tabata dirigí na disipelnan ku ya kaba tabata mustra perseveransia, kompashon i amor. Pero, nan mester a sigui traha riba e kualidatnan ei. Meskos ta konta pa nos. Kiko lo yuda nos logra esei? Den e artíkulo akí nos ta bai wak kon e kristiannan di promé siglo a mustra kada un di e kualidatnan ei. Djei nos ta bai mira kon nos por hasi meskos pa asina nos ta prepará pa e tribulashon grandi.

5. Kiko a yuda e kristiannan di promé siglo perseverá?

⁵ E kristiannan di promé siglo mester a perseverá. (Heb. 10:36) Aparte di trata ku e problemanan normal di bida, nan mester a trata ku otro problemanan tambe debí ku nan tabata kristian. Hopi di nan a haña nan ku persekushon for di lidernan religioso hudiu, outoridatnan romano i asta for di nan mes famia. (Mat. 10:21) Tabatin biaha, den e kongregashon tambe nan mester a lucha kontra apóstata ku a purba di habri e kongregashon for di otro ku nan siñansanan falsu. (Echo. 20:29, 30) Pero apesar di tur e kosnan ei, nan a perseverá. (Rev. 2:3) Kon nan a logra esei? Nan tabata meditá riba hendenan den Skritura ku a perseverá, manera Yòb. (Sant. 5:10, 11) Nan a pidi Yehova forsa i a keda kòrda ku lo e rekompensá nan si nan perseverá.—Echo. 4:29-31; 5:41.

6. Kiko bo ta siña for di Merita?

⁶ Nos tambe por perseverá si regularmente nos ta studia i meditá riba ehèmpelnan di perseveransia ku tin den Beibel i den nos publikashonnan. Esei ta loke Merita, un ruman di Albania a hasi pa e por a soportá e oposishon violento di su famia. El a bisa: “E relato di Yòb a animá mi masha tantu mes. Yòb a sufri hopi sin sa ta ken tabata tras di tur esei, pero asina mes el a bisa: ‘Lo mi keda leal na Dios te na mi morto!’ (Yòb 27:5) Kompará ku Yòb, loke ami ta pasa aden ta nada. I ami sí sa ta ken ta tras di mi pruebanan.”

7. Asta si nos no ta pasando den un prueba difísil aworakí, kiko ta bon pa nos siña hasi for di awor?

⁷ Un otro manera ku nos por haña mas perseveransia ta si nos ta papia ku Yehova regularmente tokante nos sintimentunan. (Flp. 4:6; 1 Tes. 5:17) Kisas aworakí bo no ta pasando den un prueba hopi difísil. Pero, puntra bo mes: ‘Mi sa pidi Yehova yuda mi ora mi ta rabiá, konfundí òf ora mi no sa kiko pa hasi?’ Si for di awor bo tin e kustumber di pidi Yehova yudansa pa bo kosnan di tur dia, e ora ei lo bo no duda pa hasi esei ora bo haña bo ku problemanan mas grandi den futuro. Lo bo ta kompletamente konvensí ku e sa presis ki ora i kon pa yuda bo.—Sal. 27:1, 3.

8. Kiko nos ta siña for di Myra? (Santiago 1:2-4) (Wak e plachi.)

⁸ Si nos siña soportá nos pruebanan for di aworakí, chèns lo ta hopi mas grandi ku nos lo perseverá durante tribulashon grandi. (Rom. 5:3) Dikon nos por bisa esei? Hopi ruman ta sinti ku kada prueba ku nan soportá, nan ta bira mas fuerte pa e siguiente. Ora nan perseverá ku Yehova su yudansa, nan ta haña mas fe ku Yehova lo yuda nan. Anto e fe ei, na su turno, ta yuda nan soportá e siguiente prueba. (Lesa Santiago 1:2-4.)  Un pionero na Albania ku yama Myra, ta haña ku e pruebanan ku el a wanta den pasado a yud’é sigui perseverá. El a rekonosé ku tin biaha e ta sinti ku ta e so tin tantu problema asina. Pero djei e ta kòrda kuantu Yehova a yud’é durante e último 20 añanan. Anto e ta bisa su mes: “Awor no ta ora pa stòp di sirbi Yehova. Wak kuantu biaha Yehova a yuda bo sigui lucha. Sigui perseverá.” Bo tambe por hasi meskos. Kòrda riba tur e biahanan ku Yehova a yuda abo perseverá. Bo por tin sigur ku kada biaha ku bo soportá un prueba, Yehova ta tuma nota di esei i lo rekompensá bo. (Mat. 5:10-12) Anto ora tribulashon grandi kuminsá, ya bo sa kaba kon pa perseverá i lo bo ta determiná pa no entregá.

9. Kon e kongregashon di Antiokia a mustra kompashon?

⁹ Ripará kiko a pasa ora ku e kristiannan na Hudea a eksperensiá un hamber grandi. Ora e kongregashon di Antiokia na Siria a tende tokante esei, nan a sinti kompashon pa nan rumannan na Hudea. Pero no ta sinti so nan a sinti pa nan rumannan, nan a hasi algu tambe pa nan. “Kada un a kontribuí segun su forsa” i a manda yudansa pa e rumannan na Hudea. (Echo. 11:27-30) Aunke Hudea tabata basta leu, e kristiannan na Antiokia tabata determiná pa yuda.—1 Huan 3:17, 18.

10. Kon nos por mustra kompashon na nos rumannan ku a pasa den un kalamidat? (Wak e plachi.)

¹⁰ Nos tambe por mustra kompashon ora nos tende ku nos rumannan a pasa den un kalamidat òf kualke otro situashon difísil. Mesora nos ta ofresé yudansa, kisas na e siguiente maneranan: Bo por puntra e ansianonan ku kiko bo por yuda, hasi donashon na e obra mundial òf resa pa esnan ku ta sufri debí na e kalamidat. b (Pro. 17:17) Por ehèmpel, na 2020 a nombra mas ku 950 Komité di Ousilio rònt mundu pa kuida esnan ku a ser afektá pa COVID-19. Nos ta apresiá tur loke e rumannan ei ta hasi pa yuda. Kompashon pa nan rumannan ta motivá nan pa kompartí kosnan material na nan rumannan i yuda nan pa sigui sirbi Yehova. I den algun kaso esei a enserá yuda drecha òf rekonstruí kas i lugánan di adorashon.—Kompará ku 2 Korintionan 8:1-4.

11. Kon nos ta onra nos Tata den shelu ora nos mustra kompashon?

¹¹ Ora nos mustra kompashon na nos rumannan despues di un kalamidat, hende ta mira esei. Por ehèmpel, na 2019, Orkan Dorian a destruí un Salòn di Reino na Bahamas. Ora nos rumannan tabata bezig ta rekonstruí e Salòn, nan a pidi un kontratista ku no tabata Testigu, pa duna nan preis pa algun trabou ku mester a hasi. El a bisa nan: “Mi ke hasi un donashon . . . Mi ke kubri e gastunan pa e ekipo, e trahadónan i e material. . . . Gewon mi tin gana di hasi esaki pa boso organisashon. Kada bes mi ta keda impreshoná ora mi mira kon boso ta yuda boso amigunan.” Mayoria di hende no konosé Yehova, pero nan ta mira kiko Testigunan di Yehova ta hasi pa otro hende sí.  Nos ta keda hopi kontentu ora nos ripará ku nos kompashon por duna hende gana di sa mas tokante Yehova, kende “ta riku den miserikòrdia”!—Efe. 2:4.

12. Dikon nos mester siña mustra kompashon for di aworakí? (Revelashon 13:16, 17)

¹² Dikon nos lo tin ku mustra kompashon durante tribulashon grandi? Pasobra Beibel ta mustra ku hende, ku no ta apoyá gobièrnu, lo haña nan ku problema awor i durante e tribulashon grandi. (Lesa Revelashon 13:16, 17.) Nos rumannan kisas lo tin mester di yudansa pa haña nan kosnan básiko. Pues, laga nos mustra kompashon ya asina ora ku Kristu Hesus, nos Rei, bini pa husga hende, e mira esei i invitá nos pa “risibí e Reino.”—Mat. 25:34-40.

13. Segun Romanonan 15:7, kiko e kristiannan di promé siglo a hasi pa stima otro mas ainda?

¹³ Amor tabata e kualidat prinsipal ku tur kristian di promé siglo mester a mustra. Pero, no tabata fásil pa nan hasi esei. Por ehèmpel, e kongregashon na Roma tabatin rumannan di diferente background. Tabatin ruman hudiu ku a siña pa obedesé e Lei di Moises. Pero tabatin otro ruman ku tabata di e nashonnan i ku a lanta ku kustumbernan diferente. Probablemente algun kristian tabata katibu i otronan nò. Kisas algun di nan asta tabata doño di katibu. Kiko a yuda e kristiannan ei stima otro mas ainda apesar ku nan tabatin tantu diferensia? Wèl, Pablo a animá nan pa “risibí otro gustosamente.” (Lesa Romanonan 15:7.) “Risibí otro gustosamente” ta nifiká trata un hende na un manera amabel, por ehèmpel invit’é na bo kas òf den bo sírkulo di amigu. Por ehèmpel, Pablo a bisa Filemon kon e tin ku risibí su katibu Onésimo ku a hui. El a bis’é: “Risibié amablemente.” (Flm. 17) Meskos tambe Priskila i Akila a sera ku Apolo i “a bai nan kas kuné” maske nan tabata sa hopi mas tokante kristianismo ku Apolo. (Echo. 18:26) Aunke tur e rumannan den e kongregashon tabata diferente for di otro, nan no a laga esei habri nan for di otro. Mas bien, nan a bira mas será.

14. Kon Anna i su kasá a mustra amor?

¹⁴ Nos tambe por mustra ku nos ta stima nos rumannan dor di bira nan amigu i pasa tempu ku nan. I nan, na nan turno, lo trata nos ku amor. (2 Kor. 6:11-13) Wak por ehèmpel kiko a pasa ku Anna i su esposo. Ora nan a kaba di yega na nan asignashon nobo komo misionero na Wèst Afrika, COVID-19 a dal aden. Debí na esei, nan no por a bai Salòn pa konosé e rumannan. Kon Anna i su kasá por a mustra amor na e rumannan? Nan a usa un sistema di konferensia di vidio pa papia ku e rumannan i pa bisa nan kuantu gana nan tabatin pa konosé nan mihó. E rumannan tabata asina kontentu pa loke e misioneronan a hasi, ku nan a kuminsá yama nan i manda mensahe pa nan regularmente. Dikon e misioneronan kier a hasi tantu esfuerso asina pa konosé nan rumannan den e kongregashon nobo? Anna a bisa: “Nunka lo mi lubidá e amor ku e rumannan a mustra na ami i mi famia den tempunan bon i malu. Nan ehèmpel ta motivá ami tambe pa mustra amor na otro ruman.”

15. Kiko nos ta siña di Vanessa tokante stima tur nos rumannan? (Wak e plachi.)

¹⁵ Hopi di nos ta forma parti di un  kongregashon ku rumannan di diferente background i personalidat. Nos lo por stima nan asta mas si nos focus riba nan bon kualidatnan. Un ruman ku yama Vanessa, kende ta sirbi na Nueva Zelandia, no tabata bai bon ku algun ruman den su kongregashon. Pero na lugá di keda leu for di e rumannan ku tabata traha riba su nèrvio, el a disidí ku e ta bai pasa mas tempu ku nan. Esei a yud’é mira kiko Yehova gusta di nan. El a bisa: “Desde ku mi kasá a bira un superintendente di sirkuito, nos ta haña nos ta pasa mas tempu ku diferente ruman i kada un tin nan personalidat. Pero awor mi ta haña ku ta mas fásil pa mi bai bon ku e rumannan i mi gusta e variedat. Ademas, ta opvio ku Yehova tambe gusta esei pasobra el a hala tur e diferente hendenan akí pa bin ador’é.” Pues, nos ta mustra ku nos ta stima nos rumannan ora nos siña mira nan manera Yehova ta mira nan.—2 Kor. 8:24.

16. Dikon amor pa nos rumannan lo ta importante durante tribulashon grandi? (Wak e plachi.)

¹⁶ Kiko Yehova a instruí su pueblo pa hasi ora e babilonionan a ser ataká? El a bisa nan: “Mi pueblo, bai den boso kambernan di mas paden i sera porta boso tras. Skonde un ratu te ora Dios su furia pasa.” (Isa. 26:20) Ta parse ku e palabranan ei lo konta pa nos tambe durante tribulashon grandi. E “kambernan di mas paden” kisas ta referí na nos kongregashonnan. Si nos sigui sirbi Yehova huntu ku nos rumannan, Yehova ta primintí ku lo e protehá nos durante e tribulashon grandi. Pues, amor pa nos rumannan ta hopi importante durante e tempu ei. P’esei, nos no por djis soportá nos rumannan; nos tin ku ègt stima nan tambe. Nos bida lo dependé di esei!

17. Kiko nos lo por hasi durante tribulashon grandi si nos prepará for di awor?

¹⁷ “E gran dia di Yehova” lo ta un periodo hopi difísil pa henter humanidat. (Sof. 1:14, 15) Nos komo sirbidónan di Yehova tambe lo haña nos ku difikultat. Pero si nos prepará for di awor, nos lo por keda kalmu i yuda otro hende. Perseveransia lo yuda nos soportá kualke problema ku presentá. Kompashon lo motivá nos pa hasi loke ta nesesario pa yuda nos rumannan ora nan haña nan den difikultat òf pa yuda nan ku nan nesesidatnan básiko. I si nos siña stima nos rumannan awor, den futuro lo ta mas fásil pa nos sigui mustra amor. Anto finalmente, Yehova lo rekompensá nos ku bida eterno den un mundu kaminda nos lo no kòrda mes riba kalamidat i problema.—Isa. 65:17.