Mi tata tabata un ansiano den e iglesia United Church of Canada. Pues tur djadumingu e tabata manda ami ku mi ruman muhé bai e lèsnan pa mucha na e iglesia. Anto 11 or ora nos kaba, nos tabata djòin e den e servisio di misa. Ma atardi nos tabata bai Salòn di Reino ku mama. Tabata fásil pa mira e diferensia entre e dos religionnan.

Mama a kompartí loke e tabata siña ku su amigunan Bob i Marion Hutcheson, i ku tempu nan tambe a bira Testigu di Yehova. Na 1958 tabatin Asamblea Internashonal Boluntat Divino. E tabata na New York i a dura ocho dia. E famia Hutcheson a bai e asamblea ku nan tres yu hòmbernan i nan a invitá mi pa bai ku nan. Pensando bèk, mi ta realisá kuantu esfuerso nan a hasi pa bai ku mi. Pero e asamblea ei ta un di e mihó rekuerdonan di mi bida.

Tempu mi tabata tiner, nos tabata kria baka, porko, karné i galiña. Mi tabata gusta bestia i p’esei m’a pensa ku ora mi bira grandi mi ta bai bira un dòkter di bestia. Mi mama a menshoná esei na un ansiano anto e ansiano ei a bin papia ku mi. El a kòrda mi ku nos ta bibando den “e último dianan.” Anto el a puntra mi kiko mi ta kere lo pasa ku mi amistat ku Yehova si mi bai universidat. (2 Tim. 3:1) Despues  di esei, m’a disidí di no bai universidat mas.

Pero te ainda mi no tabata sa kiko lo mi hasi ora mi kaba skol. Maske mi tabata den sirbishi tur wikènt, mi no tabata gusta sirbishi mashá i mi no a mira mi mes komo pionero. Miéntras tantu, mi tata ku no tabata den bèrdat, huntu ku su ruman hòmber, tabata blo animá mi pa mi tuma un trabou na un kompania di seguro grandi na Toronto. Mi tio tabatin un puesto importante einan, pues m’a tuma e trabou.

Na Toronto, kasi tur ora mi tabata traha overtaim i mi tabata pasa hopi tempu ku hende ku no tabata den e bèrdat. Hopi biaha, esei a stroba mi di bai reunion i sirbishi. Na promé instante mi tabata biba ku mi opa ku no tabata testigu. Pero, ora el a muri mi mester a buska un otro lugá di biba.

E pareha Hutcheson ku a hiba mi na e kongreso na aña 1958, tabata manera tata i mama pa mi. Nan a laga mi biba den nan kas i a yuda mi drecha mi amistat ku Yehova. Na 1960 m’a batisá huntu ku nan yu, John. John a kuminsá traha pionero anto esei a animá mi pa partisipá den sirbishi mas tantu. Debí na esei, e rumannan den e kongregashon a ripará mi progreso i ku tempu nan a nombrá mi presidente di loke nos ta yama awor e reunion Nos Bida i Sirbishi Kristian.

Na 1966 m’a kasa ku Randi Berge. E tabata un pionero ku a deseá mashá pa sirbi kaminda tabatin mester di mas predikadó. Nos superintendente di sirkuito a mustra hopi interes den nos i el a animá nos pa bai yuda e kongregashon na Orillia, Ontario. Mesora nos a muda bai einan.

Manera nos a yega na Orillia, m’a kuminsá traha pionero huntu ku Randi. Su entusiasmo a kontagiá mi! Ora m’a kuminsá hasi mi esfuerso pa ta un bon pionero, e ora ei numa m’a kuminsá sinti e goso di usa mi Beibel i yuda hende komprondé e bèrdat. Anto, nos tabatin e privilegio di yuda un pareha hasi  kambio den nan bida i kuminsá sirbi Yehova. Esei tabata un gran bendishon.

Durante un bishita na Toronto, m’a sera konosí ku un ruman di Bètel ku yama Arnold MacNamara. El a puntra mi si nos lo ke bira pionero spesial. Mesora m’a bisa: “Sí, basta no ta na Quebek!” E tempu ei, Quebek, kaminda hende ta papia franses, kier a separá for di Canada. E restu di Canada ku ta papia ingles, no tabata niun tiki kontentu ku loke tabata pasando den Quebek. Pokopoko, mi tambe a kuminsá sinti meskos.

Arnold a kontestá mi: “Quebek ta e úniko kaminda ku nos ta mandando pioneronan spesial aworakí.” Mesora m’a bai di akuerdo pasobra mi tabata sa kaba ku Randi tabatin gana di bai sirbi einan. Mas despues m’a realisá ku esei tabata un di e mihó desishonnan di nos bida.

Nos a bai un kurso di sinku siman pa siña franses. Despues di esei, ami ku Randi, huntu ku un otro pareha, a bai Rimouski ku ta keda 540 kilometer nortost di Montreal. Nos tabata kurú ainda den e idioma. Esei a bira bisto ora ku mi mester a lesa algun anunsio na reunion. Na lugá di bisa ku na nos siguiente kongreso nos ta bai haña “delegadonan di Austria,” m’a bisa ku nos ta bai haña “delegadonan di abestrus.”

Na Rimouski, famia Huberdeau a hür un kas grandi ku shete kamber. Nos tabata yama e kas ei White House debí na e koló di e kas i su pilánan. Den e kas tabatin ami ku Randi i e otro pareha huntu ku kuater ruman muhé soltera i tambe famia Huberdeau i nan dos yu muhénan. Generalmente nos tabata un 12 pa 14 hende ta biba den e kas. Pero nos tur tabata yuda paga hür. Komo ku ami ku Randi tabata pionero spesial, nos tabata prediká mainta, atardi i anochi. Pues, nos tabata hopi kontentu di tin hende pa bai prediká huntu ku nos, foral anochi durante e temporada di wenter.

Nos tabata asina será ku e pioneronan ei, ku nan a bira manera nos famia. Tin biaha nos tabata sinta rònt di un kampvür òf nos tabata pone un dia pa nos kushiná huntu. Un di e ruman hòmbernan tabata músiko, pues hopi biaha riba djasabra anochi nos tabata kanta i baila.

E teritorio di Rimouski tabata produktivo. Denter di sinku aña nos tabatin e goso di mira vários studiante di Beibel yega na boutismo. E kongregashon a krese te ku mas o ménos 35 publikadó.

Ora nos tabata na Quebek nos a ègt haña bon training. Nos a mira kon Yehova a yuda nos den sirbishi i tambe ku nos nesesidatnan. Ademas, nos a siña stima e hendenan di abla franses. Nos a kuminsá gusta nan idioma i nan kultura. Tur esei a siña nos kon pa stima otro kultura tambe.—2 Kor. 6:13.

Pero diripiente, sukursal a pidi nos pa muda bai Tracadie, ku ta keda na parti ost di New Brunswick. Esei no tabata fásil pasobra nos a kaba di firma un kontrakt pa hür un apartamento. Ademas, mi tabatin un kontrakt pa duna lès na skol un par di ora pa siman. I riba tur esei, algun di nos studiantenan di Beibel a kaba di bira publikadó i nos tabata drùk-drùk ku konstrukshon di un Salòn di Reino.

 Nos a hasi orashon henter wikènt tokante e asignashon na Tracadie, pasobra kompará ku Rimouski, esei lo ta un kambio hopi grandi. Pero nos a disidí ku si ta esaki ta loke Yehova ke, nos ta bai p’e. Nos a laga tur kos den Yehova su man i nos a mira kon el a kita kada un di e opstákulonan. (Mal. 3:10) Komo ku Randi ta un persona positivo, ta stima Yehova masha hopi i semper ta pon’É na promé lugá, e kambio ei tabata mas fásil.

Den nos kongregashon nobo tabatin un ansiano so, Ruman Robert Ross. E ku su kasá, Linda, a bai einan pa traha pionero i a disidí di keda einan despues ku nan promé yu hòmber a nase. Maske nan tabatin nan man yen kuidando un mucha chikitu, nan tabata un gran animashon pa ami ku Randi. E rumannan ei tabata masha hospitalario i tabata traha duru den sirbishi.

Despues di dos aña trahando pionero na Tracadie, nos a bolbe haña un sorpresa: un invitashon pa traha den e trabou di sirkuito. Pa shete aña nos a traha den e sirkuito ingles i despues nos a ser asigná na e sirkuito franses na Quebek. Ruman Léonce Crépeault, nos superintendente di distrito, semper tabata elogiá mi diskursonan. Ma despues e ta puntra mi: “Kon bo por a hasi bo diskurso mas práktiko?” a E pregunta ei a yuda mi pa hasi sigur ku mi diskursonan semper ta fásil pa komprondé.

Un di mi asignashonnan ku nunka m’a lubidá tabata esun ku mi tabatin na 1978 na Kongreso Internashonal “Fe Viktorioso.” M’a traha den e departamento ku tabata atendé ku kuminda. Nos mester a kushiná pa 80 mil hende i e aña ei hopi kos a kambia. Tur kos tabata nobo, e aparatonan, e menú i e manera ku nos mester a prepará e kuminda. Nos tabatin 20 frishidèr grandi i ratu-ratu nan tabata gewon daña. Tabatin un evento deportivo den e stadion e anochi promé ku kongreso. P’esei, nos mester a warda te mei anochi pa drenta e stadion pa drecha e lugá. I pa nos por a prepará desayuno, nos mester a sende e fòrnunan promé ku dia habri. Nos tabata hopi kansá, pero m’a siña hopi for di e otro boluntarionan. Nan tabata traha duru, tabatin bon kualidatnan i tabata positivo.  Nos a keda bon amigu te awe. Mi ta hopi kontentu ku mi por a bai e kongreso remarkabel ei na Quebek. Dikon? Pasobra esei ta e mesun provinsia kaminda tabatin persekushon pisá entre aña 1940 i 1960.

Durante e kongresonan grandi na Montreal, m’a siña hopi for di e otro superintendentenan. Tabatin un aña ku Ruman David Splane, ku aworakí ta miembro di Kuerpo Gobernante, tabata presidente di kongreso. Pero mas despues, na un otro kongreso, ami a haña e asignashon ei i Ruman David a yuda mi masha hopi mes.

Nos a disfrutá di 36 aña den e trabou di sirkuito. Na 2011 m’a haña invitashon pa sirbi komo instruktor di Skol pa Ansiano di Kongregashon. Denter di dos aña nos a drumi riba 75 diferente kama, pero e sakrifisio ei tabata bale la pena. Na fin di kada siman, e ansianonan tabata masha gradisidu di mira kon bon Kuerpo Gobernante tabata yuda nan kuida nan amistat ku Yehova.

Mas despues m’a duna lès na Skol pa Predikadó di Reino. Debí na e programa, hopi biaha e studiantenan tabata anshá i kansá. Nan mester a sinta den klas pa shete ora, traha riba nan tareanan durante anochi pa tres ora i tin biaha nan mester a prepará kuater pa sinku asignashon tur siman. Ami ku e otro instruktornan tabata splika e studiantenan ku nan no por hasi esaki sin yudansa di Yehova. Nunka lo mi lubidá kon sorprendí nan a keda. Nan a ripará ku, ora nan a dependé riba Yehova, nan por a logra hopi mas di loke nan a kere.

Mi mama semper tabata mustra interes den otro hende. Esei a yuda ku su studiantenan a progresá i tambe ku aktitut di mi tata tokante e bèrdat a kambia. Pa nos sorpresa, tres dia despues ku mama a muri, tata a bin salòn pa skucha un diskurso. Anto el a sigui bai reunion pa e siguiente 26 aña. Aunke ku tata nunka a batisá, e ansianonan tabata bisa mi ku semper e tabata e promé pa yega salòn.

Mama a pone un bon ehèmpel pa nos tur. Mi tres ruman muhénan i nan kasá ta den e bèrdat. Dos di nan ta traha na Bètel, un na Portugal i e otro na Haiti.

Awor ami ku Randi ta pionero spesial na Hamilton, Ontario. Tempu ku nos tabata den e trabou di sirkuito, nos tabata gusta kompañá e rumannan na nan rebishitanan i estudionan di Beibel. Pero awor nos tin e goso di mira nos mes studiantenan siña stima Yehova. I segun ku nos ta bira amigu di e rumannan den nos kongregashon nobo, nos ta sinti nos masha animá pa mira kon Yehova ta yuda nan den tempunan bon i tempunan malu.

Pensando bèk, nos ta apresiá tur e rumannan ku a mustra interes den nos. Esei a yuda nos hasi esfuerso pa mustra “interes sinsero” den otro ruman i animá nan pa duna Yehova lo mihó ku nan por. (2 Kor. 7:6, 7) Por ehèmpel, den un famia tabatin un esposa, un yu hòmber i un yu muhé ta traha pionero. M’a puntra e esposo si e tambe a yega di pensa pa traha pionero. El a bisa mi ku e tabata perkurando pa tres pionero kaba. Pues m’a bira puntr’é: “Abo por perkurá pa nan mihó ku Yehova?” Anto m’a anim’é pa e tambe disfrutá di e trabou ei. Seis luna despues, e tambe a bira pionero.

Ami ku Randi lo sigui “konta e siguiente generashon” tokante Yehova su obranan maravioso. Anto nos ta deseá ku nan lo disfrutá di sirbi Yehova meskos ku nos a disfrutá.—Sal. 71:17, 18.