1. Kiko bo a siña ora ku bo a kuminsá studia Beibel?

 BO TA kòrda tempu ku b’a kuminsá studia Beibel? Kisas bo no tabata sa ku Dios tin un nòmber. I kisas tabata un alivio pa sa ku Dios no ta kima hende den fièrnu. Anto bo no por a kere ku den futuro lo bo por mira bo sernan stimá ku a muri anto biba ku nan aki riba tera den Paradeis.

2. Ki progreso mas bo a hasi? (Efesionan 5:1, 2)

² Mas bo a studia Beibel, mas bo a stima Yehova. Esei a pone ku bo a apliká loke bo tabata siña. Bo a tuma mihó desishonnan ku ta basá riba prinsipio di Beibel. Ademas, bo a siña pa pensa i hasi loke ta korekto. Bo a hasi tur e kosnan ei pasobra bo kier a hasi Yehova kontentu i imit’é, meskos ku un yu ku ta stima su mayor ta hasi.—Lesa Efesionan 5:1, 2.

3. Kiko nos por puntra nos mes?

³ Ta bon pa nos puntra nos mes: ‘Mi ta stima Yehova mas tantu awor kompará ku tempu m’a batisá? Desde e tempu ei, e manera ku mi ta stima mi rumannan ta mustra ku mi ta birando mas manera Yehova?’ No sinti bo malu si “e amor ku bo tabatin na kuminsamentu” a fria un tiki. Algu asina a pasa ku e kristiannan di promé siglo. Pero Hesus a sigui animá nan, anto lo e sigui hasi esei ku nos tambe. (Rev. 2:4, 7) E sa ku nos por rebibá e amor ku nos tabatin na kuminsamentu.

4. Tokante kiko e artíkulo akí ta bai?

 ⁴ Den e artíkulo akí nos lo wak kon nos por stima Yehova i nos rumannan mas. Tambe nos lo wak ki ta algun bendishon ku nos lo haña ora nos hasi esei.  

5-6. Ki reto Pablo a hañ’é kuné, pero kiko a motiv’é pa sigui sirbi Yehova tòg?

⁵ Apòstel Pablo tabata kontentu pa sirbi Yehova, pero el a hañ’é ku vários reto. E tabatin ku biaha distansianan largu, anto esei no tabata niun tiki fásil e tempu ei. Durante algun di su biahenan e tabata “den peliger di riu” i “den peliger di atrakadó.” I tabatin biaha ku enemigunan a asta gòlpi’é. (2 Kor. 11:23-27) Anto apesar di tur e esfuersonan ku Pablo a hasi pa yuda su rumannan, algun di nan no tabata apresi’é.—2 Kor. 10:10; Flp. 4:15.

⁶ Pero di unda Pablo a saka e forsa pa sigui sirbi Yehova? Wèl, loke el a lesa for di e Skritura i e kosnan ku e mes a pasa aden a yud’é haña sa ki sorto di persona Yehova ta. Tur esei a konvens’é ku Yehova tabata stim’é. (Rom. 8:38, 39; Efe. 2:4, 5) Pablo su amor pa Yehova a sigui krese asta mas. Anto el a mustra e amor ei dor di ‘sirbi i sigui sirbi e santunan.’—Heb. 6:10.

7. Kiko por yuda nos stima Yehova mas?

⁷ Mas nos studia Beibel, mas nos ta stima Yehova. Durante bo lesamentu di Beibel, purba di saka afó kiko e relato ta siña bo di Yehova. Puntra bo mes: “Kon e relato akí ta laga mi mira ku Yehova ta stima mi? Kon e ta oumentá mi amor pa Yehova?”

8. Kon orashon por yuda nos haña mas amor pa Yehova?

⁸ Ta hopi importante pa nos resa tur dia na Yehova i bis’é tur loke nos tin den nos kurason. Dikon? Pasobra esei tambe lo yuda nos stima Yehova mas. (Sal. 25:4, 5) I Yehova, na su turno, lo kontestá nos orashonnan. (1 Huan 3:21, 22) Khanh, un ruman na Asia, a bisa: “Na promé instante mi amor pa Yehova tabata basá solamente riba konosementu. Pero ora m’a mira kon e tabata kontestá mi orashonnan, m’a stim’é hopi mas. Esei a pone ku mi kier a hasi loke ta hasié kontentu.” b

9. Kon nos sa ku Timoteo tabata stima e rumannan?

⁹ Algun aña despues ku Pablo a bira kristian, el a sera konosí ku Timoteo, un hóben ku tabatin amor pa Yehova i tambe pa hende. Pablo a bisa e kristiannan na Filipo: “Mi no tin ningun otro hende ku un disposishon manera esun di [Timoteo], ku di bèrdat lo sòru pa e kosnan ku tin di haber ku boso.” (Flp. 2:20) Timoteo tabata bon den organisá kosnan i duna diskurso. Pero aki Pablo a skohe pa papia di e amor ku Timoteo tabatin pa su rumannan. Nos tin sigur ku e kongregashonnan ku Timoteo mester a bishitá tabata ansioso pa su bishita.—1 Kor. 4:17.

10. Kon Anna i su kasá a mustra ku nan ta stima nan rumannan?

¹⁰ Nos tambe por buska manera pa yuda nos rumannan. (Heb. 13:16) Laga nos wak e eksperensia di Anna, kende  nos a papia di dje den e artíkulo anterior. Despues ku un tormenta a pasa, e ku su kasá a bai bishitá un famia Testigu i nan a haña sa ku dak di e famia a basha den otro. Debí na esei, e famia no tabatin paña limpi. Nan a bisa: “Nos a bai ku e pañanan, laba nan i hiba nan bèk striká i doblá. Pa nos, loke nos a hasi no tabata masha kos, pero e gesto chikitu ei a pone ku nos ta amigu te dia djawe.” Amor tabata loke a motivá Anna i su kasá pa yuda nan rumannan ku nan nesesidat.—1 Huan 3:17, 18.

11. (a) Kon nos rumannan ta sinti ora ku nos mustra ku nos stima nan? (b) Segun Proverbionan 19:17, kiko Yehova ta hasi ora nos mustra amor?

¹¹ Ora nos ta trata nos rumannan ku kariño i bondat, nan ta mira ku nos ta hasi esfuerso pa hasi meskos ku Yehova. Kisas nunka nos lo haña sa kuantu nan a apresiá loke nos a hasi pa nan. Khanh, ku nos a papia di dje na paragraf 8, ta kòrda kon e rumannan a yud’é tempu e tabata hóben. El a bisa: “Nunka mi por lubidá e rumannan ku tabata sali ku mi den sirbishi. Nan tabata pasa buska mi, duna mi algu di kome i baha mi na kas. Awor mi ta realisá kuantu esfuerso nan a hasi. I nan a hasi esei ku masha amor.” Klaru ku no ta tur hende lo tin e oportunidat di mustra nos nan gratitut pa loke nos a hasi pa nan. Khanh a bisa lo siguiente tokante e rumannan ku a yud’é: “Mara mi por a hasi algu bèk pa e rumannan ei. Pero mi no sa unda nan ta biba aworakí. Yehova sí sa, i mi ta pidié pa e rekompensá nan pa mi.” Anto Khanh tin rason. Yehova ta mira tur kos ku nos ta hasi pa otro, asta e kosnan di  mas chikitu. P’e, nan ta sakrifisionan masha balioso, i e ta mira nan komo debe ku e tin ku paga nos.—Lesa Proverbionan 19:17.

12. Kon un ruman hòmber por mustra ku e ta stima su rumannan den kongregashon? (Wak e plachi.)

¹² Si bo ta un ruman hòmber, kon bo por mustra ku bo ta stima bo rumannan? Esei ta di yuda nan. Un hóben ku yama Jordan a puntra un ansiano kiko mas e por hasi pa yuda den kongregashon. E ansiano a gradisié pa e kosnan ku ya kaba e ta hasi i a bis’é algun kos ku e por traha riba dje. Por ehèmpel, yega Salòn trempan, kumindá e rumannan, duna komentario na reunion, prediká mas regular ku su grupo di sirbishi i purba di saka afó kon e por yuda e rumannan. Ora Jordan a hasi esaki, no solamente el a siña hasi sierto kosnan pero tambe el a siña stima su rumannan mas. Algu tambe ku Jordan a siña ta ku ora un ruman bira un sirbidó ministerial, no ta e ora ei numa e ta kuminsá yuda su rumannan. Mas bien, e ta sigui yuda nan.—1 Tim. 3:8-10, 13.

13. Kon amor a yuda Christian bolbe bira ansiano?

¹³ Bo tabata sirbidó ministerial òf ansiano un tempu? Yehova no a lubidá e trabou ku bo a hasi i ku kuantu amor bo a hasié. (1 Kor. 15:58) Anto ainda e ta mira e amor ku bo ta demostrá. Christian a sintié hopi malu ora ku e no tabata ansiano mas. Pero el a bisa: “Mi stima Yehova, p’esei asta si mi ta ansiano òf nò, lo mi sigui hasi tur loke mi por pa sirbié.” Ku tempu el a bira ansiano bèk. Christian a atmití: “Mi no tabatin sigur  ku mi tabata kla ainda. Pero m’a pensa, si Yehova ke pa mi bira ansiano atrobe, lo mi hasié pasobra mi stim’é i mi stima mi rumannan.”

14. Kiko nos ta siña di loke Elena a bisa?

¹⁴ Nos no ta stima Testigunan di Yehova so, pero otro hende tambe. (Mat. 22:37-39) Por ehèmpel Elena, un ruman di e pais Georgia, a bisa: “Promé mi tabata prediká pasobra mi tabata stima Yehova. Pero, mas amor m’a haña pa Yehova, mas amor m’a haña pa hende tambe. Mi tabata purba di imaginá e problemanan ku nan tabatin i tokante kiko nan lo kier a papia. Mas mi tabata pensa esei, mas gana mi tabata haña di yuda nan.”—Rom. 10:13-15.

15-16. Manera e plachi ta mustra, ki rekompensa nos ta haña ora nos ta mustra amor na nos rumannan?

¹⁵ Ora nos ta mustra amor na nos rumannan, otro hende tambe ta benefisiá. Durante e pandemia di COVID-19, Paolo i su kasá tabata siña rumannan di edat kon pa usa nan telefòn, tablet i kòmpiuter pa prediká. Un ruman muhé ku na promé instante tabatin difikultat, al final a siña i a logra invitá su famianan. Sesenta di nan a asistí na Memorial via un sistema di konferensia di vidio. E esfuersonan di Paolo i su kasá a yuda tantu e ruman komo e ruman su famianan.  Despues e ruman a manda bisa Paolo: “Masha danki pa usa boso tempu pa siña nos ku ta grandi akí. Nunka lo mi lubidá kuantu Yehova stima nos i kuantu esfuerso boso a hasi pa yuda nos.”

¹⁶ Eksperensianan asina a siña Paolo un lès importante. El a kòrda ku amor ta mas importante ku konosementu i abilidat natural. El a bisa: “Un tempu mi tabata sirkuito. Pero ta awor numa mi ta realisá ku aunke e rumannan no ta kòrda mi diskursonan mas, loke sí nan ta kòrda ta e yudansa ku mi a duna nan.”

17. Ken mas lo benefisiá ora ku nos mustra amor?

¹⁷ Tin biaha ora ku nos mustra amor, nos mes ta benefisiá. Jonathan ku ta biba na Nueva Zelandia a pasa den algu asina. Un djasabra atardi el a mira un pionero ta prediká kantu di kaminda den higra di solo. Jonathan a disidí ku e siguiente djasabranan lo e sali ku e pionero den sirbishi. E no por a imagin’é kuantu e mes lo a benefisiá. El a bisa: “E tempu ei mi no tabata gusta sirbishi niun tiki. Pero ora mi tabata skucha kon bon e pionero tabata siña e hendenan i kuantu éksito e tabatin den su sirbishi, m’a kuminsá haña amor pa e trabou ei. E ruman ei a bira un bon amigu di mi tambe, el a yuda mi gusta sirbishi i bira un mihó amigu di Yehova.”

18. Kiko Yehova ke pa nos hasi?

¹⁸ Yehova ke pa nos tur haña mas amor p’e i pa nos rumannan. Manera nos a mira den e artíkulo akí, pa nos haña mas amor pa Yehova, ta importante pa nos lesa Beibel, meditá riba loke nos ta lesa i papia regularmente ku Yehova. Pa nos haña mas amor pa nos rumannan, nos mester yuda nan ku nan nesesidatnan. Segun ku nos ta haña mas amor, nos ta bira mas será ku Yehova i ku nos rumannan. Anto e amistatnan ei lo dura pa semper.