1. Den ki sentido un kristian mester ta manera un palu? (Wak e plachi.)

 BO A yega di mira kiko un palu di koko ta hasi ora bientu ta supla duru? E ta dobla, pero e no ta kibra. Esei ta siña nos algu importante ku algun palu tin: fleksibilidat. Pa nos por bona den sentido spiritual, nos tambe mester por dobla, esta, nos mester ta fleksibel. Na ki momento? Esei ta ora nos tin ku adaptá na kambionan di sirkunstansia i ora di respetá opinion i desishon di otro hende.

2. Ki kualidatnan lo yuda nos adaptá na kambio, i kiko nos lo trata den e artíkulo akí?

² Komo sirbidónan di Yehova, nos ke ta rasonabel, humilde i kompasivo. Den e artíkulo akí nos lo mira kon e kualidatnan ei a yuda algun kristian trata ku kambio den bida i kon e kualidatnan ei por yuda nos tambe. Pero promé, laga nos siña for di Yehova i Hesus, e personanan di mas rasonabel ku ta eksistí.

3. Kon nos sa ku Yehova ta rasonabel?

³ Beibel ta yama Yehova “e Baranka” pasobra e ta firme i inmovibel. (Deu. 32:4) Sinembargo, e ta rasonabel tambe. Segun ku kosnan ta keda kambia den mundu, e ta keda adaptá pa asina kumpli ku su propósito. Debí ku Yehova Dios a krea nos segun su imágen, nos tambe por adaptá na kambio. Loke sea nos haña nos kuné den bida, Yehova ta duna nos prinsipio ku ta yuda nos tuma bon desishon. Su manera di hasi kosnan i e prinsipionan ku e  ta duna nos, ta laga nos mira ku “e Baranka” ta masha rasonabel.

4. Duna un ehèmpel ku ta mustra kon rasonabel Yehova ta. (Levítiko 5:7, 11)

⁴ E manera ku Yehova ta hasi kosnan ta mustra ku e ta perfekto i rasonabel. E no ta eksigente ni rígido. Wak kon rasonabel e tabata ku e israelitanan. Por ehèmpel, wak e kasonan ku Levítiko 5:7 i 11 ta menshoná. (Les’é.) Yehova a permití kada persona, sea riku òf pober, ofresé sakrifisio di akuerdo ku su sirkunstansia.

5. Duna ehèmpel ku ta mustra Yehova su humildat i kompashon.

⁵ Yehova ta rasonabel pasobra e ta humilde i ta mustra kompashon. Por ehèmpel, bo por mira kon humilde Yehova ta ora e tabata a punto di destruí e hendenan malbado di Sódoma. El a laga su angelnan bisa Lòt pa hui bai den e serunan. Pero Lòt tabatin miedu di bai einan. P’esei el a roga Yehova pa é i su famia bai Zoar, un stat chikitu ku tambe Yehova tabatin intenshon di destruí. Yehova por a insistí pa Lòt sigui su instrukshonnan al pie de la letra. Ma e no a hasi esei. El a laga Lòt bai Zoar i no a destruí e stat. (Gén. 19:18-22) Siglonan despues, Yehova a demostrá kompashon tambe na e habitantenan di Nínive. El a manda Profeta Yónas bisa ku e ta bai destruí tantu e stat komo e hendenan debí ku nan tabata malbado. Pero ora ku e hendenan a arepentí, Yehova a sinti duele di nan i no a destruí e stat.—Yon. 3:1, 10; 4:10, 11.

6. Kon Hesus a mustra ku e tabata rasonabel?

⁶ Hesus ta rasonabel meskos ku Yehova. Yehova a mand’é prediká “na e karnénan pèrdí di e kas di Israel.” Pero, Hesus a demostrá di ta fleksibel den esei. Na un okashon el a yuda un muhé ku no tabata israelita. E muhé su yu tabata “kruelmente poseí pa demoño,” pues el a roga Hesus pa kura su yu. Hesus a mustra kompashon i a kura e señora su yu. (Mat. 15:21-28) Wak un otro ehèmpel. Hesus a bisa anteriormente durante su sirbishi: “Ken ku nenga mi . . . mi tambe lo neng’é.” (Mat. 10:33) Pero ora Pedro a nenga Hesus tres biaha, Hesus no a neng’é. Dikon nò? Pasobra Hesus tabata sa ku Pedro a sinti hopi duele pa loke el a hasi i ku e tabata fiel. Despues ku Hesus a resusitá, el a aparesé na Pedro i muy probablemente el a sigur’é ku el a pordon’é i ku e tabata stim’é.—Luk. 24:33, 34.

7. Segun Filipensenan 4:5, ki reputashon nos lo ke tin?

⁷ Loke nos a siña te ku awor ta ku Yehova i Hesus ta rasonabel. Pero kiko di nos? Yehova ta ferwagt pa nos tambe ta rasonabel. (Lesa Filipensenan 4:5.) Nos por puntra nos mes: ‘Otro hende ta  pensa ku mi ta un hende rasonabel, tolerante i dispuesto pa adaptá na otro su opinion? Òf mi ta konosí pa ta un hende rígido i kabesura? Mi tin kustumber di keda insistí pa hasi kosnan manera ami ta kere ku mester hasi nan? Òf mi ta skucha opinion di otro hende i ta sede ora esei ta posibel?’ Mas rasonabel nos ta, mas nos lo ta manera Yehova i Hesus. Laga nos trata dos área den bida ku ta importante pa nos ta rasonabel. E promé ta ora nos sirkunstansia kambia i e di dos ta ora hende no tin mesun opinion ku nos i ta tuma otro desishon.

8. Kiko por yuda nos ta fleksibel ora nos sirkunstansia kambia? (Wak e nota na pia di página.)

⁸ Si nos ta rasonabel, nos lo ta fleksibel ora nos haña nos ku kambio di sirkunstansia. Di un dia pa otro nos por haña nos ku problema serio di salú. Òf nos bida por bruha por kompleto ora tin kambio diripiente den ekonomia òf situashon polítiko. (Ekl. 9:11; 1 Kor. 7:31) Asta kambio di asignashon den e organisashon por bira un reto pa nos. Pero, sea kual sea e kambio, nos por adaptá na e sirkunstansianan nobo si nos hasi e kuater kosnan akí: (1) aseptá realidat, (2) wak padilanti, (3) focus riba kosnan positivo i (4) hasi kos pa otro hende. b Laga nos wak kon algun di nos rumannan a hasi e kosnan ei i kon esei a yuda nan.

9. Kon un pareha misionero a trata ku pruebanan inesperá?

⁹ Aseptá realidat. Emanuel i Francesca ta misionero i a haña asignashon pa bai un pais estranhero. Nèt ora nan a kuminsá siña e idioma i a kuminsá sinti nan kómodo den nan kongregashon nobo, COVID-19 a dal aden i nan mester a isolá nan mes. Djei, diripiente Francesca su mama a muri. Francesca tabatin masha gana di ta huntu ku su famia, pero e no por a biaha debí na e pandemia. Kon Francesca a dil ku e situashon difísil ei? Promé, e ku Emanuel a hasi orashon huntu i a pidi Yehova sabiduria i forsa pa dil ku kada dia. Anto nèt na tempu, Yehova a kontestá nan orashon mediante su organisashon. Por ehèmpel, loke a animá nan mashá tabata loke un ruman a bisa den un vidio. El a bisa: “Mas lihé nos ta aseptá nos sirkunstansia nobo, mas lihé nos lo haña nos goso bèk i tambe e oportunidat pa sirbi Yehova i yuda otro den nos sirkunstansia nobo.” c Di dos, nan a disidí di hasi esfuerso pa mehorá nan predikashon via telefòn, i komo resultado nan a asta kuminsá un estudio di Beibel. Di tres, nan a aseptá yudansa di e rumannan ku man habrí. Un di e yudansanan ei a bini di un ruman ku, pa un aña largu, tur dia sin falta tabata manda nan un mensahe kòrtiku huntu ku un teksto. Kiko nos ta siña? Si nos aseptá nos sirkunstansia nobo, nos lo ta kontentu ku loke sí nos por hasi.

10. Kon un ruman muhé a adaptá na un kambio grandi den su bida?

¹⁰ Wak padilanti i focus riba kosnan positivo. Kristina, un ruman di Rumania ku ta biba na Hapon a bira tristu ora ku e kongregashon ingles ku e tabata pertenesé na dje a stòp di eksistí. Pero e no a  laga esei tene atras. El a bai na un kongregashon hapones i a hasi tur su esfuerso pa prediká na hapones. El a pidi un eks-kolega pa yud’é mehorá den e idioma. E señora a bai di akuerdo pa usa Beibel i e foyeto Bo Por Disfrutá di Bida pa Semper! pa siña Kristina papia hapones mihó. Pero, e kos di mas importante ta ku e señora a haña gana di sa mas tokante Beibel. Kiko nos ta siña? Wèl, si nos wak padilanti i keda positivo, kambionan ku nos no a spera por duna nos bendishonnan ku nos no a ferwagt.

11. Kon un pareha kasá a trata ku problema finansiero?

¹¹ Hasi kos pa otro hende. Un pareha kasá ku ta biba na un pais kaminda nos obra ta prohibí a pèrdè trabou ora ku ekonomia di e pais ei a kai den otro. Kiko nan a hasi? Promé, nan a baha nan gastunan. Di dos, nan a focus pa yuda otro hende na lugá di focus riba nan mes problemanan. Pues, nan a pasa mas tantu tempu posibel den sirbishi. (Echo. 20:35) E esposo a bisa: “Debí ku nos tabata asina drùk den sirbishi, nos tabatin mas tempu pa hasi e boluntat di Yehova i no a sobra tempu pa pensa riba nos mes problemanan. Kiko ta e lès? Si nos sirkunstansia kambia, nos tin ku kòrda ku ta importante pa sigui yuda otro hende, foral den nos trabou di prediká.

12. Ki nos ta siña for di Pablo?

¹² Ta importante tambe pa nos ta fleksibel ora di prediká. Nos ta papia ku hende ku tin diferente idea tokante Dios i ku ta bini di diferente pais i kultura. Nos por siña hopi for di Apòstel Pablo pasobra e tabata fleksibel. Hesus a nombra Pablo komo “apòstel . . . di e nashonnan.” (Rom. 11:13) P’esei, el a prediká na hudiu, griego, hende bon siñá, hende di kunuku i hende den gobièrnu. Anto pa e mensahe ei por a yega na kurason di e diferente hendenan ei, Pablo “a bira tur kos pa tur sorto di hende.” (1 Kor. 9:19-23) El a tene kuenta ku background, kultura i pensamentu di e hendenan ei. Kiko ta e lès? Nos tambe lo tin bon resultado ora di prediká, si nos ta fleksibel i ta pensa kon ta e mihó manera pa yuda kada hende.

13. Segun 1 Korintionan 8:9, dikon ta importante pa nos respetá opinion di otro hende?

¹³ Ora nos ta rasonabel, lo ta fásil pa respetá opinion di otro hende. Por ehèmpel, algun di nos ruman muhénan gusta usa make-up, pero tin otronan nò. Algun ruman no ta mira niun problema den bebe un tiki alkohòl, pero tin otronan ta preferá di no bebe mes. Tur kristian ke tin bon salú pero nan ta skohe maneranan diferente pa kuida nan salú. Si nos ta pensa ku semper nos tin rason i ta purba di konvensé nos rumannan pa pensa i hasi meskos ku nos, nos por pone nos rumannan trompeká i habri e kongregashon for di otro. Hamas nos lo ke hasi esei. (Lesa 1 Korintionan 8:9; 10:23, 24) Prinsipio di Beibel por yuda nos keda balansá i mantené pas den e kongregashon. Laga nos wak kon nos por hasi esei den dos área.

14. Kua prinsipionan di Beibel por yuda nos ora di tuma desishon tokante nos manera di bisti i aparensia?

¹⁴ Manera di bisti i kuido di aparensia. Yehova no ta bisa nos kiko nos tin ku bisti, pero e ta duna nos prinsipio di  Beibel sí. Nos manera di bisti mester onra Yehova i laga hende mira ku nos ta rasonabel i ku nos tin “sano huisio.” (1 Tim. 2:9, 10; 1 Ped. 3:3) P’esei, nos lo no bisti di tal manera ku tur atenshon ta kai riba nos. Prinsipio di Beibel lo yuda ansianonan tambe pa no traha nan mes leinan tokante manera di bisti i kuido di aparensia. Por ehèmpel, ansianonan den un kongregashon kier a yuda algun hóben ku a kuminsá imitá un manera di pela ku tabata na moda. E stail di kabei tabata kòrtiku pero deskuidá. Kon e ansianonan por a yuda nan sin traha lei? E superintendente di sirkuito a konsehá nan pa bisa e hóbennan lo siguiente: “Si bo ta subi plataforma anto tur hende ta keda wak bo i ta presta mas atenshon na abo en bes di loke bo ta bisa, e ora ei tin un problema ku bo manera di bisti òf bo aparensia.” Esei so tabata sufisiente pa yuda e hóbennan, sin tin nodi di traha lei. d

15. Ki lei- i prinsipionan di Beibel lo yuda nos ora di tuma desishon tokante nos salú? (Romanonan 14:5)

¹⁵ Kuido di salú. Kada kristian mester disidí kon e ta kuida su salú. (Gal. 6:5) Pero loke sí un kristian tin ku tene kuenta kuné ta ku Beibel ta bisa pa apstené di sanger i di spiritismo. (Echo. 15:20; Gal. 5:19, 20) Fuera di esei, e por disidí ki tratamentu e ta skohe. Tin ruman ta tuma tratamentu di dòkter i tin algun ta skohe pa tuma otro tipo di tratamentu. Ni maske kon konvensí nos ta di un sierto tratamentu, respetá e derecho di nos rumannan pa tuma nan mes desishon. Tene e kuater puntonan akí semper  na mente: (1) Ta e Reino di Dios so lo trese un fin na tur malesa i problema di salú. (Isa. 33:24) (2) Kada kristian mester ta plenamente konvensí di loke ta bon p’e. (Lesa Romanonan 14:5.) (3) Nos no ta husga niun hende ni hasi nada ku lo pone nan fe na peliger. (Rom. 14:13) (4) Kristiannan ta stima nan rumannan i sa ku union di e kongregashon ta mas importante ku nan mes opinion. (Rom. 14:15, 19, 20) Si nos tene kuenta ku e puntonan ei, nos lo keda uní ku nos rumannan i lo promové pas den e kongregashon.

16. Kon un ansiano por mustra ku e ta rasonabel i fleksibel ku su otro ansianonan? (Wak e plachi.)

¹⁶ Ansianonan mester pone un bon ehèmpel di ta rasonabel i fleksibel. (1 Tim. 3:2, 3) Por ehèmpel, un ansiano no mester spera ku semper e kuerpo tin ku aseptá su opinion djis pasobra e tin mas edat òf mas eksperensia ku e otronan. E sa ku Yehova por usa spiritu santu pa motivá kualke otro ansiano pa bisa algu ku ta yuda henter e kuerpo pa tuma bon desishon. I si algu no ta bai kontra prinsipio di Beibel, un ansiano rasonabel i fleksibel lo bai di akuerdo ku e desishon di e mayoria, aunke ku e ta mira e kos di otro manera.

17. Ki bendishon nos ta haña si nos ta rasonabel i fleksibel?

¹⁷ Si nos ta rasonabel i fleksibel, nos lo haña hopi bendishon. Por ehèmpel, nos lo ta uní ku nos rumannan i lo tin pas den kongregashon. Tambe nos lo tin e goso di konosé ruman di diferente kultura i personalidat. I ta dushi pa sa ku aunke nos tur ta diferente, tòg nos ta uní pasobra nos ta adorá Yehova. Anto mas importante ainda, nos ta felis pasobra nos ta meskos ku Yehova, kende ta un Dios rasonabel.