1. Dikon algun ruman tin biaha ta sinti nan nan so?

SOLEDAT. Kua di nos no a yega di sinti nos nos so? Tin biaha e sintimentu ei por kita mesora òf keda pa un tempu largu. Tin ruman por sinti nan asina apesar ku nan ta rondoná di hende. Algun di nan ta sinti asina pasobra nan ta den un kongregashon nobo i no konosé tur ruman ainda. Otronan ta hopi pegá ku nan famia, pero awor ku nan a muda nan ta sinti nan nan so. I tin ta sinti falta di nan ser stimá ku a muri. Algun ruman, spesialmente esnan nobo den e bèrdat, ta sinti nan nan so ora nan famia òf amigunan di ántes rechasá òf persiguí nan.

2. Ki pregunta nos lo kontestá?

² Yehova konosé i ta komprondé kada un di nos masha bon mes. P’esei, e sa ki ora bo ta sinti bo bo so i e ke yuda bo. Pero, kon e ta hasi esei? Tin algu ku bo mes por hasi? I kiko nos tur den kongregashon por hasi pa yuda e rumannan ku ta sinti nan asina?

3. Kon Yehova a mustra ku e tabata atento na Elías?

³ Yehova Dios ke pa tur su sirbidónan ta felis. E ta serka di kada un di nos i ta ripará ora nos ta sinti nos tristu òf desanimá. (Sal. 145:18, 19) Wak kon atento e tabata ku Profeta Elías, kende a biba den un periodo hopi difísil  den e historia di Israel. Hendenan poderoso tabata persiguí Yehova su fiel adoradónan, i nan tabata kier a mata spesialmente Elías. (1 Rei. 19:1, 2) Ademas, Elías a kere ku e tabata e úniko profeta ku te ainda tabata sirbi Yehova anto esei a desanim’é mashá. (1 Rei. 19:10) Yehova a mira ku Elías tabata sinti su mes asina, anto mesora el a yud’é. El a manda un angel pa laga Elías komprondé ku e no tabata su so. Pero, tabatin mas israelita ku tambe a keda fiel na Dios.—1 Rei. 19:5, 18.

4. Kon Yehova ta yuda su sirbidónan ku no tin sosten mas di nan famia òf amigunan? (Marko 10:29, 30)

⁴ Yehova sa ku nos a sakrifiká hopi kos pa por sirbié. Por ehèmpel, kisas nos a pèrdè sosten di nos famia i amigunan ku no ta sirbi Yehova. Apòstel Pedro tambe a sakrifiká hopi kos. Un biaha el a puntra Hesus: “Nos a laga tur kos i a sigui bo; kiko realmente nos lo haña?” (Mat. 19:27) Hesus a sigurá su disipelnan ku e kongregashon lo bira manera nan famia. (Lesa Marko 10:29, 30.) I Yehova, kabes di nos famia, a primintí ku lo e yuda tur esnan ku ta sirbié. (Sal. 9:10) Pero, ban wak kiko ta algun kos ku bo mes por hasi pa lucha kontra soledat.

5. Dikon ta bon pa pensa kon Yehova ta yudando bo?

⁵ Pensa kiko Yehova ta hasiendo pa bo aworakí. (Sal. 55:22) Esei lo yuda bo mira ku bo no ta bo so. Carol, * kende ta soltero i no tin niun famia den e bèrdat, a bisa: “Ora mi wak bèk i meditá riba kon Yehova a yuda mi durante tur e pruebanan ku mi a haña mi aden, esei ta yuda mi sinti ku mi no ta mi so. Esei ta konvensé mi ku Yehova semper lo t’ei pa mi.”

6. Kon 1 Pedro 5:9 i 10 por animá rumannan ku ta lucha ku soledat?

⁶ Pensa kiko Yehova ta hasiendo pa yuda bo rumannan ku ta sinti nan nan  so. (Lesa 1 Pedro 5:9, 10.) Hiroshi, un ruman ku pa hopi aña tabata e úniko Testigu den su famia, a bisa: “Tur ruman den kongregashon ta lucha òf pasa den algu. Apesar di esei, nos sa ku nos tur ta hasiendo nos esfuerso pa sirbi Yehova anto esei ta animá e rumannan ku ta nan so den e bèrdat.”

7. Kon orashon ta yuda bo?

⁷ Keda ku un bon rutina spiritual. Esei ta enserá bisa Yehova tur loke bo tin riba bo kurason. (1 Ped. 5:7) Massiel ta un ruman muhé hóben ku tabata sintié su so debí ku e tabata e úniko persona den su famia ku ta sirbi Yehova. El a bisa: “Un kos ku a yuda mi masha tantu mes pa dil ku soledat ta di hasi orashon di kurason na Yehova. E tabata ègt un Tata pa mi. Mi tabata papia kuné tur dia, vários biaha pa dia, i lag’é sa kiko mi ta sinti.”

8. Dikon ta importante pa bo lesa bo Beibel i meditá riba dje?

⁸ Bo rutina spiritual mester inkluí tambe lesa Beibel regularmente i meditá riba relatonan ku ta mustra bo kuantu Yehova ta stima bo. Bianca, un ruman kende su famia tabata bis’é yen di kos pa desanim’é, a bisa: “Algu ku realmente a yuda mi ta di lesa i meditá riba e relatonan den Beibel i tambe e historianan di bida di rumannan ku a pasa den mesun kos ku ami a pasa aden.” Algun ruman ta siña tekstonan ku ta animá nan for di kabes, manera Salmo 27:10 i Isaías 41:10. Tin ruman, pa nan no sinti nan nan so, ta skucha grabashon di e material ku nan tin ku prepará pa reunion òf ta skucha e lesamentu di Beibel.

9. Dikon bo tin ku hasi esfuerso pa bai reunion?

⁹ Pa bo keda ku bo rutina spiritual, bo tin ku hasi tur bo esfuerso pa bai reunion. Einan lo bo haña animashon i lo bo siña konosé bo rumannan. (Heb. 10:24, 25) Massiel, menshoná anteriormente, a bisa: “Aunke mi ta un hende masha tímido, mi tabata determiná pa bai tur reunion i duna un komentario. Esei a yuda mi sinti ku mi ta parti di e kongregashon.”

10. Dikon ta importante pa bo sera amistat ku rumannan fiel?

¹⁰ Sera amistat ku rumannan fiel. Nan por ta di tur edat i di diferente kultura. Beibel ta bisa ku nos por haña sabiduria serka e rumannan di edat. (Yòb 12:12) Pero nan tambe por siña for di e rumannan  mas yòn. Por ehèmpel, David tabata hopi mas yòn ku Jonatan, pero esei no a stroba nan di tin un amistat ku otro. (1 Sam. 18:1) David i Jonatan a yuda otro sigui sirbi Yehova apesar di difikultatnan ku nan a haña nan kuné. (1 Sam. 23:16-18) Irina, kende aktualmente ta e úniko den su famia ku ta sirbi Yehova, a bisa: “Yehova por usa nos rumannan den kongregashon pa bira e famia ku nos tin mester.”

11. Kiko bo tin ku hasi si bo ke tin bon amigu?

¹¹ Sera amistat no ta fásil, spesialmente si bo ta tímido. Ratna, un ruman ku a bini den bèrdat apesar di oposishon, a bisa: “Mi mester a rekonosé ku mi tabatin mester di yudansa di mi rumannan den kongregashon.” Kisas no ta fásil pa papia ku otro hende tokante bo sintimentunan, pero bo tin ku hasi esei si bo ke tin bon amigu. Ta ora bo habri bo mes ku e rumannan den bo kongregashon, nan por haña sa kon pa yuda bo i animá bo.

12. Kon sirbishi por yuda bo sera amistat?

¹² Un di e mihó maneranan pa sera amistat ta di sali den sirbishi ku bo rumannan. Carol, menshoná anteriormente, a bisa: “Mi a sera hopi bon amistat debí ku mi tabata sali ku e rumannan den sirbishi i partisipá ku nan den otro aktividatnan teokrátiko. Durante e añanan, Yehova a usa e amigunan ei pa yuda mi.” Pues, ta bale la pena pa bo hasi esfuerso pa sera amistat ku e rumannan den kongregashon. Yehova por usa e amigunan ei pa yuda bo lucha kontra sintimentunan negativo, manera soledat.—Pro. 17:17.

13. Kiko nos tur tin ku hasi?

¹³ Nos tur tin ku hasi nos parti pa den e kongregashon tin pas i amor. P’esei, den kongregashon niun ruman lo no tin ku sinti nan nan so. (Huan 13:35) Nos palabra- i akshonnan por animá otro ruman. Un ruman a bisa: “Ora mi a bini den bèrdat, e kongregashon a bira mi famia. Sin nan yudansa, mi no por a bira un Testigu di Yehova.” Kon nos por yuda e rumannan ku ta nan so den bèrdat sinti ku nan ta parti di e kongregashon?

14. Si bo mira un kara nobo den kongregashon, kiko bo tin ku hasi pa sera amistat kuné?

¹⁴ Dal e promé paso pa sera amistat. Bo a mira un kara nobo na bo kongregashon? Yam’é bon biní! (Rom. 15:7) Pero, nos ke hasi mas ku djis kumindá nan; ku tempu nos ke bira nan amigu. P’esei, mustra interes den nan. Sin mete muchu den nan bida, purba di komprondé kiko ta e kosnan ku nan ta pasando aden. Pa algun ta difísil pa papia ku otro hende tokante nan sintimentunan, p’esei tene kuidou pa no fòrs’é pa papia. Mas bien, nos mester ta amabel i hasié pregunta ku ta lag’é sintié kómodo i skuch’é ku pasenshi ora e ta kontestá. Por ehèmpel, bo por puntr’é: “Kon bo a haña e bèrdat?”

15. Kon e rumannan spiritualmente maduro por yuda otro ruman den kongregashon?

¹⁵ Ora tur ruman ku ta spiritualmente maduro, foral e ansianonan, tin interes den esnan ku ta asistí na e reunionnan, henter e kongregashon lo bira spiritualmente fuerte. Melissa, kende su mama a  lant’é den e bèrdat, a bisa: “Mi ta masha kontentu ku e rumannan ku a bira manera mi tatanan spiritual. Ki ora ku mi tabatin gana di papia, nan tabat’ei pa mi.” Mauricio, un hóben ku a sintié su so ora ku e ruman ku a studi’é a bandoná e bèrdat, a bisa: “E echo ku e ansianonan a mustra interes den mi a hasi un gran diferensia. Nan tabata papia ku mi tur ora, traha ku mi den sirbishi, kompartí hoyanan ku nan a haña den nan lesamentu di Beibel i asta tabata hunga bala ku mi.” Tantu Melissa komo Mauricio ta sirbi den sirbishi di tempu kompleto.

16-17. Kiko mas nos por hasi pa yuda otro ruman?

¹⁶ Mas kos ku nos por hasi. (Gal. 6:10) Leo, kende ta sirbi komo un misionero den un pais leu for di su famia, a bisa: “Tin biaha, loke bo mester ta pa un hende hasi algu bon pa bo nèt na e momento korekto. Mi ta kòrda un dia ku mi a haña aksidente ku outo. Pa ora ku mi a yega kas, mi tabata yen yen di strès. Pero, un pareha a invitá mi bin kome na nan kas. I pa ta franko, mi no ta kòrda mes kiko mi a kome. Pero, mi ta kòrda ku nan a tuma nan tempu i skucha mi. I al final, mi a sinti mi mas mihó.”

¹⁷ Ta kua di nos no gusta ora tin asamblea i kongreso? Einan nos ta pasa tempu ku otro ruman i kòmbersá tokante loke nos a skucha. Sinembargo Carol, menshoná anteriormente, a bisa: “Ora tin asamblea i kongreso, mi ta sinti mi mi so. Pasobra aunke mi ta mei mei di hopi ruman, mayoria di biaha mi ta mira nan huntu ku nan famia. I esei ta hasi e sintimentu di soledat mas fuerte.” Kisas e promé biaha ku un ruman tin ku bai un asamblea su so despues ku su kasá a muri por ta hopi duru p’e. Bo sa di un ruman ku ta pasando den un di e situashonnan ei? Dikon no bis’é bin sinta huntu ku bo i bo famia e siguiente biaha ku tin asamblea òf kongreso?

18. Kon nos por apliká 2 Korintionan 6:11-13?

¹⁸ Purba pasa tempu ku diferente ruman, foral esnan ku ta sinti nan nan so.  Nos lo ke habri nos “kurason hanchu” pa nan. (Lesa 2 Korintionan 6:11-13.) Melissa, menshoná anteriormente, a bisa: “Semper nos ta keda masha kontentu ora rumannan invitá nos pa bin pasa tempu huntu ku nan famia òf pa bai keiru huntu ku nan.” Tin un ruman den bo kongregashon ku ainda bo no a pasa tempu kuné?

19. Na ki momento spesífiko ta importante pa pasa tempu ku nos rumannan?

¹⁹ Tin momentonan spesífiko ku algun ruman lo apresiá masha tantu si bo pasa tempu ku nan. Por ehèmpel, algun di nan no por bai serka nan famia ku no ta Testigu durante dianan di fiesta. Tin di nan ta hopi tristu riba sierto fecha, manera e fecha ku nan a pèrdè un ser stimá. Dor ku bo sa esei, pasa tempu ku e rumannan ei i asina demostrá nan ku di bèrdat bo ta stima nan.—Flp. 2:20.

20. Kon Hesus su palabranan na Mateo 12:48-50 por yuda nos ora nos ta sinti nos nos so?

²⁰ Un ruman por sintié su so pa vários motibu. Pero, Yehova sa ki ora nos ta sinti nos nos so, nunka lubidá esei. E ta usa nos rumannan pa duna nos e yudansa ku nos tin mester. (Lesa Mateo 12:48-50.) Nos, na nos turno, ta mustra Yehova ku nos ta kontentu ku loke ku el a hasi ora nos ta hasi nos esfuerso pa yuda nos rumannan. Ni maske kon nos por sinti nos, nos tin ku keda kòrda ku si nos tin Yehova, nunka nos lo no ta nos so!