1. Kiko Yehova a hasi pa kada un di nos?

YEHOVA a hala kada un di nos serka dje. (Huan 6:44) Djis imaginá bo kiko esei ke men. Yehova a wak entre e míles di miónes di hende riba tera, i el a mira abo. El a mira den bo kurason ku bo tin e ingredientenan nesesario pa stim’é. (1 Kró. 28:9) Ta dushi pa sa ku Yehova konosé bo, ku e ta komprondé ken bo ta i ku e ta stima bo.

2. Kon Hesus ta yuda nos komprondé kuantu Yehova ta stima nos?

² Yehova stima abo i tur e rumannan den kongregashon tambe. Pa yuda bo komprondé esei, Hesus a kompará Yehova ku un wardadó. Si un wardadó tin 100 karné i un di nan pèrdè, bo sa kiko lo e hasi? Lo e “laga e 99 karnénan riba seru i bai buska esun ku a dual.” Ora e haña e karné, lo e no zundr’é ni rabia kuné. Nò, lo e bira masha kontentu ku el a hañ’é. Yehova ta hasi meskos ku e wardadó ei. Kada ruman den kongregashon ta importante p’e. Hesus mes a bisa: “Mi Tata ku ta den shelu no ta deseá pa ni ún di e chikitunan akí bai pèrdí.”—Mat. 18:12-14.

3. Kiko nos ta bai papia di dje den e artíkulo akí?

³ Hamas nos lo ke hùrt nos rumannan. Pero, kiko nos por hasi pa evitá ku esei ta sosodé? I kiko nos tin ku hasi si ta un otro ruman a hùrt nos? Laga nos kontestá e preguntanan ei. Pero, promé laga nos wak ken ta “e chikitunan” menshoná na Mateo kapítulo 18.

4. Ken “e chikitunan” ta?

⁴ “E chikitunan” ta referí na tur Hesus su disipelnan. Sin importá nan edat, nan tur ta “manera mucha” pasobra  nan ke pa Hesus siña nan. (Mat. 18:3) Aunke nan ta di diferente background i kultura i kada un tin nan personalidat, nan tur tin fe den Hesus. I Hesus ta stima nan tur.—Mat. 18:6; Huan 1:12.

5. Kon Yehova ta sinti ora un hende hùrt un di su “chikitunan”?

⁵ Pa nos por komprondé kuantu Yehova ta stima kada un di “e chikitunan,” pensa kon abo ta sinti tokante mucha. Kua di nos no stima mucha? Debí ku nos ta stima nan, nos ke protehá nan pasobra nan no tin e mesun forsa, eksperensia ni sabiduria ku hende grandi tin. Ta bèrdat ku nos no ke mira niun hende hasi otro daño, pero ora ta trata di mucha, nos ta rabia pisá. Di mes manera, Yehova ke protehá nos. I e ta rabia pisá ora un hende hùrt un di su chikitunan!—Isa. 63:9; Mar. 9:42.

6. Segun 1 Korintionan 1:26-29, kon mundu ta mira Hesus su disipelnan?

⁶ Kiko mas ta pone ku Hesus su disipelnan ta manera “e chikitunan”? Puntra bo mes: ‘Ken mundu ta mira komo importante?’ No ta e rikunan, esnan famoso i esnan ku outoridat? Pero di otro banda, mundu ta mira Hesus su disipelnan komo hende no importante i insignifikante, ku otro palabra, komo ‘chikitu.’ (Lesa 1 Korintionan 1:26-29.) Ma, Yehova no ta mira nan asina.

7. Kon Yehova ke pa nos trata nos rumannan?

⁷ Yehova ta stima tur su sirbidónan. Tur ta importante p’e, sea ku nan tin hopi tempu den bèrdat òf nan ta resien den e bèrdat. Pa e motibu ei, nos tambe mester stima nan meskos. Beibel ta bisa ku nos ke “stima henter e hermandat,” no djis algun di nos rumannan. (1 Ped. 2:17) Nos mester hasi nos bèst pa protehá i stima nan. P’esei, si nos haña sa ku nos a hasi algu ku a hùrt òf ofendé un di nos rumannan, nos no mester hasi manera nada no a pasa i pensa ku e mester pordoná i lubidá. Pero, dikon un ruman por sintié ofendí? Tin ruman ku, debí na loke a pasa ku nan den pasado, nan ta pensa ku tur otro hende ta mihó ku nan. Pa otro ruman, kisas ta pasobra nan ta resien den e bèrdat i te ainda no sa kon pa trata ku e imperfekshonnan di otro hende. Sin importá e motibu, loke nos tin ku hasi ta hasi nos esfuerso pa drecha e asuntu. Di otro banda, si un ruman ta sinti ku kada bes otronan ta ofend’é, e mester rekonosé ku esei no ta bon i ku e tin ku traha riba su karakter. Si e hasi esei, lo e ripará ku lo e ta mas felis, mas trankil i su amistat ku su rumannan lo mehorá.

8. Ki aktitut hopi hudiu den Hesus su tempu tabatin, i ki influensia esei tabatin riba Hesus su disipelnan?

⁸ Kiko a pone ku Hesus a kuminsá papia tokante “e chikitunan”? Wèl, su disipelnan a puntr’é: “Ken realmente ta esun di mas grandi den e Reino di shelu?” (Mat. 18:1) Den e tempu ei, hopi hudiu tabata biba pa posishon i pa hende mira nan komo importante. Un eksperto a yega di bisa ku pa hudiunan, “haña onor di hende i sea famoso tabata e kos di mas importante den nan bida.”

9. Kiko Hesus su disipelnan mester a hasi?

⁹ Hesus tabata sa ku e tendensia di hopi hudiu e tempu ei tabata di kompetí ku otro i di ta mihó ku otro. Anto  e tabata sa ku esei tabata algu ku su disipelnan mester a lucha duru kontra dje. P’esei el a bisa nan: “Laga esun ku ta grandi meimei di boso bira manera esun di mas yòn, i laga esun ku ta aktua komo hefe bira manera esun ku ta sirbi.” (Luk. 22:26) Den un sentido, nos por bira manera esun di mas yòn ora nos “konsiderá ku otro hende ta superior” na nos. (Flp. 2:3) Mas nos lucha pa nos tin e punto di bista ei, ménos chèns lo tin ku nos lo hùrt nos rumannan.

10. Ki konseho Pablo a duna, i kon nos por aplik’é?

¹⁰ Den un manera òf otro, tur nos rumannan ta superior na nos. Ora nos meditá riba nan bon kualidatnan, ta fásil pa mira esei. Kòrda bon kiko Apòstel Pablo a bisa e korintionan: “Kiko ta hasi bo mas ku un otro? Sí, kiko bo tin ku bo no a risibí? Awor, si di bèrdat bo a risibí tur loke bo tin, pakiko bo ta broma komo si fuera bo no a risibí nan?” (1 Kor. 4:7) Pues, nunka nos lo no ke hala atenshon na nos mes ni pensa ku nos ta mas ku otro. Si tin un ruman ku ta duna bon diskurso òf un otro ku fásil ta kuminsá estudio di Beibel, semper nan tin ku duna tur gloria i onor na Yehova.

11. Kiko tabata e lès di Hesus su ilustrashon tokante e rei i e esklabo?

¹¹ Despues ku Hesus a spièrta su siguidónan pa nan no hùrt otro, el a duna nan un ilustrashon tokante un rei ku su esklabo. E rei a kanselá e debe grandi ku e esklabo tabatin i ku nunka lo e no por a paga bèk. Despues, e mesun esklabo ei no tabata kier a kanselá e debe mas chikitu di un kompañero esklabo. Al final, e rei a tira e esklabo ku no a mustra miserikòrdia ei den prizòn. Kiko e lès ta? Hesus a bisa: “Asina tambe mi Tata selestial lo trata ku boso, si kada un di boso no pordoná su ruman di kurason.”—Mat. 18:21-35.

12. Kon nos por hùrt otro ruman si nos ta nenga di pordoná?

¹² Loke e esklabo a hasi no a djis afektá e so. Pa di promé, el a hùrt su kompañero esklabo. El a laga nan tir’é den prizòn te ora ku el a paga loke e tabata debe. Pa di dos, el a hùrt e otro esklabonan tambe. “Ora e otro esklabonan a mira loke a sosodé, nan a bira masha tristu.” Meskos tambe, loke nos ta hasi tin efekto riba otro. Si un ruman a hùrt nos i nos ta nenga di pordon’é, kiko ta pasa? Pa di promé, nos ta hùrt e dor ku nos no ta pordon’é. Kisas nos ta te asta ignor’é i nos no ta demostrá ku nos ta stim’é. Anto di dos, nos ta hasi e otro rumannan den kongregashon inkómodo pasobra nan ta ripará ku tin algu entre nos.

13. Kiko bo ta siña for di loke a pasa ku Crystal?

¹³ Si nos pordoná nos rumannan, nos mes lo sinti nos bon i nos rumannan tambe di mes lo sinti nan bon. Esei ta loke a pasa un biaha ku un pionero. Laga nos yam’é Crystal. Loke un ruman tabata hasi tabata hùrt e. Crystal a bisa: “E manera ku e ruman tabata papia tabata manera ta hinka e tabata hinka mi ku kuchú. Mi no tabata ke ni traha kuné den sirbishi, ni pa traha den mesun grupo kuné. Mi no tabatin ni smak pa bai sirbishi mas.” Crystal a sinti ku e tabatin tur su rason pa ta rabiá ku e ruman. Pero en bes di karga renkor i pensa riba su mes so, e tabata humilde i a sigui e konseho den e artíkulo “Pordoná di Kurason” den E Toren di Vigilansia di 15 di òktober di  1999. Crystal a bisa: “Awor mi ta komprondé ku nos tur ta hasi nos bèst pa bisti e personalidat nobo i ku Yehova ta kla pa pordoná nos tur dia. Mi ta sinti manera un peso a kita for di mi lomba. Anto mi a haña mi goso bèk.”

14. (a) Segun Mateo 18:21 i 22, kiko kisas tabata difísil pa Apòstel Pedro hasi? (b) Kiko nos por hasi si ta difísil pa nos pordoná otro?

¹⁴ Aunke nos tur sa ku e kos korekto pa hasi ta pa pordoná, no ta tur ora esei ta bai fásil. Kisas Apòstel Pedro tambe a sinti asina. (Lesa Mateo 18:21, 22.) Kiko por yuda nos pa semper nos pordoná? Promé, kòrda riba kuantu biaha Yehova a pordoná abo. (Mat. 18:32, 33) Nos no meresé su pordon, pero tòg e ta pordoná nos tur dia libremente. (Sal. 103:8-10) Na mes momento nos tin ku kòrda tambe ku nos “ta obligá di stima otro.” Pues, nos mester pordoná nos rumannan, no tin opshon. (1 Huan 4:11) Di dos, pensa riba loke lo pasa ora bo pordoná. Ora nos pordoná un ruman, e ta sintié hopi mas mihó, e kongregashon ta mas uní, nos ta protehá nos amistat ku Yehova anto un peso ta kita for di nos lomba. (2 Kor. 2:7; Kol. 3:14) Por último, hasi orashon na Yehova, kende ta pidi bo pa pordoná. No laga Satanas kibra e amistat entre abo ku bo rumannan. (Efe. 4:26, 27) Pidi Yehova pa e yudansa ku bo tin mester pa evitá di kai den Satanas su trampa.

15. Di akuerdo ku Kolosensenan 3:13, kiko nos tin ku hasi si un ruman hùrt nos?

¹⁵ Kiko bo tin ku hasi si un ruman a hùrt bo? Hasi bo esfuerso pa mantené pas. Papia ku Yehova. Pidié bendishoná e ruman ku a hùrt bo. Pidi Yehova tambe yuda bo mira ki kualidatnan bunita  e ruman akí tin ku a pone Yehova stim’é asina tantu. (Luk. 6:28) Si bo no por pasa por alto di loke e ruman akí a hasi, e ora ei kisas ta mihó bo bai papia kuné. Pero promé ku bo bai hasi esei, bo tin ku keda kòrda ku e ruman no a hasié pa malu. (Mat. 5:23, 24; 1 Kor. 13:7) Segun ku e ta papia, no duda den su palabranan. Pero, kiko awor si e no ke hasi pas? “Sigui soportá” e ruman. Sigui tene pasenshi kuné. (Lesa Kolosensenan 3:13.) Pero mas importante ainda, no karga renkor, pasobra esei por daña bo amistat ku Yehova. Di e manera ei, bo ta demostrá ku bo ta stima Yehova mas ku tur kos.—Sal. 119:165.

16. Kiko nos tur tin ku hasi?

¹⁶ Nos ta masha kontentu ku nos por sirbi Yehova huntu ku nos rumannan komo “ún tou bou di ún wardadó.” (Huan 10:16) E buki Organisá pa Hasi Boluntat di Yehova na página 165 ta bisa: “Huntu ku e benefisio ku e union ei ta trese pa bo ta bini tambe e responsabilidat di yuda manten’é.” Pues, nos tin ku “entrená nos mes pa mira nos rumannan manera Yehova ta mira nan.” Pa Yehova, nos tur ta su “chikitunan” i nos ta presioso p’e. Pero, abo tambe ta mira bo rumannan asina? Yehova ta mira tur loke nos ta hasi pa yuda nan i kuida nan, anto e ta keda masha kontentu ku esei.—Mat. 10:42.

17. Despues di a pasa den e lès akí, kiko abo ta determiná pa hasi?

¹⁷ Debí ku nos ta stima nos rumannan, nunka nos lo no ke hùrt nan. (Rom. 14:13) Nos ke kòrda ku di un manera òf otro nos rumannan ta superior na nos i nos ke pordoná nan di kurason. En bes di laga loke nos rumannan hasi kibra nos amistat ku nan òf ku Yehova, “laga nos hasi esfuerso pa buska e kosnan ku ta promové pas i ku ta yuda edifiká otro.”—Rom. 14:19.