Pablo a skirbi: “Pa medio di lei . . . mi a muri en konekshon ku lei pa mi por haña bida pa sirbi Dios.”—Gal. 2:19.

E palabranan ei di Pablo tabata parti di su argumentonan na e kongregashon den e provinsia romano na Galasia. Tabatin algun maestro falsu ku tabata purba di siña e kongregashon ku, pa haña salbashon, nan mester a sigui e Lei di Moises, spesialmente e parti di sirkunsishon. Pablo tabata sa bon bon ku Dios su sirbidónan no mester a sirkunsidá mas. Pues, el a usa rasonamentu lógiko pa proba ku e siñansanan ei tabata falsu i pa fortalesé fe di e rumannan den e sakrifisio di Hesukristu.—Gal. 2:4; 5:2.

Beibel a bisa bon kla ku unabes ku un hende muri, e no ta konsiente di nada i nada rònt di dje tin influensia riba dje. (Ekl. 9:5) Pues, ora Pablo a bisa ku “mi a muri en konekshon ku lei,” e tabata ke men ku Lei di Moises no tabatin influensia mas riba su bida. Mas bien, Pablo tabatin sigur ku su fe den e reskate a habri kaminda pa e por a “haña bida pa sirbi Dios.”

Pablo a bisa ku tur esaki a tuma lugá “pa medio di lei.” Kiko e tabata ke men? Djis promé, el a splika: “Dios no ta deklará hende hustu pa medio di obra di lei, sino solamente pa medio di fe den Kristu Hesus.” (Gal. 2:16) Klaru, Lei a kumpli ku un ròl importante. Pablo a splika tokante Lei: “A agreg’é pa saka na kla kibramentu di lei, te ora e desendiente lo a yega na ken e promesa a ser hasí.” (Gal. 3:19) Pues, Lei a saka na kla ku hende imperfekto no por kumpli ku Lei perfektamente, i ku nan tabatin mester di un sakrifisio perfekto ku lo a ser ofresé unabes i pa semper. Lei a yuda hende mira ku Hesus tabata “e desendiente.” Pues, Dios por a deklará un hende hustu si e hende ei a pone fe den Hesukristu. (Gal. 3:24) Anto ta asina Pablo por a ser deklará hustu, pasobra mediante Lei el a aseptá Hesus i a pone fe den dje. Di e manera ei, Pablo a “muri en konekshon ku lei,” pero a “haña bida pa sirbi Dios.” Pues, awor Dios tabatin influensia riba su bida i no Lei.

Pablo a bisa algu paresido ora el a skirbi e kristiannan na Roma. El a bisa: “Mi rumannan, boso tambe a muri pa loke ta Lei mediante e kurpa ku Kristu a sakrifiká . . . Nos a ser librá di Lei, pasobra nos a muri pa ku loke tabatin nos mará.” (Rom. 7:4, 6) Tantu e teksto ei komo esun di Galationan 2:19 ta mustra ku Pablo no tabata referí na muri komo pekadó kondená pa Lei. Mas bien, e tabata papia di ser librá di Lei den e sentido ku Lei no tabatin influensia mas riba su bida ni riba bida di otro kristian ku, manera e, a ser librá di Lei mediante fe den Kristu su reskate.