M’a nase 19 di mei 1940 na Amioûn, Líbano. Un par di aña, despues nos famia a muda bai Tripoli. Nos famia tabata stima otro i tabata felis sirbiendo Yehova huntu. Nos tabata sinku ruman, i ami tabata esun di mas chikitu. Pa mi mayornan, ganamentu di plaka no tabata e kos di mas importante. P’esei, bida di nos famia tabata drei rònt di studia Beibel, bai reunion i prediká e bon notisia.

Den nos kongregashon tabatin vários ruman ungí. Un di nan tabata Michel Aboud, kende tabata dirigí loke nos tabata yama e tempu ei book study. El a haña e bèrdat na New York i a kuminsá ku e trabou di prediká na Líbano na 1921. Te ainda mi ta kòrda kon Ruman Aboud tabata yuda ruman Anne i Gwen Beavor, dos graduado di Galaad. Tur dos a bira nos bon amiganan. Vários aña despues mi tabata kontentu di a topa Anne na Merka. Poko tempu despues di esei, m’a topa ku Gwen, kende a kasa ku Wilfred Gooch, i nan dos tabata sirbi na Bètel di Lònden, Inglatera.

Aunke tempu ku mi tabata mucha no tabatin hopi Testigu di Yehova na Líbano, nos tabata gusta prediká. Nos tabata hasi esei apesar ku e lidernan religioso tabata oponé nos. Tin algun di susesonan ei ku ta difísil pa mi lubidá.

Un dia ami i mi ruman muhé Sana tabata prediká den un kompleho di apartamento. Miéntras ku nos tabata papia ku un di e habitantenan, diripiente un pastor a kana yega. Un hende mester a yam’é. E pastor a kuminsá zundra mi ruman muhé i a push’é fo’i trapi. Mi no sa ken a yama polis, pero nan a bini. Nan a hasi sigur ku mi ruman muhé tabata oké, i nan a bai ku e pastor warda. Na warda nan a bin haña sa ku e pastor tabatin arma riba dje. E polis ku tabata na mando a puntr’é: “Bon, bisa mi, kiko bo ta? Lider di un religion òf lider di un gang?”

Un di e okashonnan ku tampoko mi no por lubidá ta dia nos kongregashon a hür un bùs pa bai prediká na un pueblo leu for di stat. Nos tabata prediká masha dushi mes te ora ku e pastornan djei a tende ku nos tabata prediká, i nan a bini ku un grupo di hende armá ku piedra. Nan a tira nos ku piedra i un di e piedranan a dal mi tata. Mi ta kòrda kon su kabes tabata tur na sanger. Mi tata i mi mama a bai bèk den e bùs, i nos a bai nan tras. Segun ku mi mama tabata atendé e herida di mi tata, el a bisa: “Ai Yehova, pordoná nan. Nan no sa kiko nan ta hasi.” E palabranan ei semper a keda grabá den mi mente.

Un otro un biaha tabata ora nos a bai bishitá algun famia. Nos a yega haña un obispu na kas di nos abuelo. E obispu tabata sa ku mi mayornan tabata Testigu di Yehova. Aunke ta seis aña so mi tabatin, el a hala mi un banda i puntra mi: “Dikon bo no a batisá ainda?” El a purba di hinka mi den un huki, pero m’a kontest’é ku pa mi batisá mi mester sa mas tokante Beibel i tin un fe fuerte. Mi kontesta no a kai den bon tera serka dje, anto el a bisa mi abuelo ku mi ta masha fresku.

Pero, e tipo di eksperensianan ei no tabata pasa hopi. Generalmente libanes ta hende masha amabel i hospitalario. Pues, nos tabatin bon kòmbersashon ku nan tokante Beibel, i nos tabatin hopi estudio.

Tempu ku mi tabata bai skol ainda, un ruman hòmber di Venezuela a bini Líbano. El a gusta mi ruman muhé Wafa. Ku tempu nan a kasa i a bai biba na Venezuela. Wafa tabata sinti nos falta masha tantu mes. P’esei den tur su kartanan e tabata purba di konvensé mi tata pa nos tur bin biba na  Venezuela. El a logra su meta i ku tempu nos a bai biba na Venezuela.

Na 1953 nos a yega Venezuela i a bai biba na Caracas, serka di e palasio di e presidente. Mi tabata gusta mira e presidente pasa den su outo luhoso ku su shofùr. Pero mi mayornan sí no por a kustumbrá mesora ku e kambio di pais, idioma, kultura, kuminda i klima. Anto nèt ora nan a kuminsá kustumbrá, algu masha èrg a pasa.

Mi tata semper tabata un hende fuerte i bon di salú. P’esei, tabata straño ora el a kuminsá sinti malu. Dòkter a diagnostiká ku e tabatin kanser, i el a operá. Pero, lamentablemente un siman despues el a fayesé.

Mi no sa kon pa splika kon duru e situashon ei tabata. Mi tabatin 13 aña. Nos tur tabata den shòk i tabata manera henter nos mundu a kai den otro. Pa un tempu, mi mama no por a aseptá ku su kasá no tabat’ei mas. Pero, nos a realisá ku bida ta sigui. Anto ku Yehova su yudansa, nos a logra. Ku 16 aña m’a kaba skol sekundario i tabatin masha gana di yuda mi famia.

Durante e tempu ei, Rubén Araujo, kende a gradua for di Galaad i a bini bèk Venezuela. El a kasá ku mi ruman Sana, i nan a bai biba na New York. Mi famia a skohe pa mi bai universidat na New York ya ku mi por a keda serka nan. Mi ruman muhé ku mi sua a yuda mi krese masha hopi bon mes den sentido spiritual. Anto den e kongregashon Brooklyn Spanish tabatin hopi ruman spiritualmente maduro. Dos di nan ku mi tabata masha kontentu mes pa konosé tabata Milton Henschel i Frederick Franz. Nan tur dos tabata sirbi na Bètel di Brooklyn.

Ora mi tabata yegando na fin di mi promé aña na universidat, m’a bin realisá ku mi no tabata sa kiko mi tabata ke hasi ku mi bida. Algun artíkulo ku m’a lesa den E Toren di Vigilansia tokante metanan spiritual a laga mi pensa hopi. Mi por a mira kon kontentu e pionero- i bètelitanan den nos kongregashon tabata, i mi tambe kier tabata asina. Pero, mi no tabata ni batisá. Mi sa ku mi mester a dediká mi bida na Yehova, i m’a hasi esei. Anto 30 di mart 1957 m’a batisá.

Despues ku m’a batisá, m’a pensa ku un otro kos ku mi kier a hasi tabata bira pionero. Aunke mi gana pa bira pionero tabata bira mas i mas fuerte, mi no por a mira kon mi por a bai universidat i traha pionero. Karta tabata keda bai bini entre New York i Venezuela, segun ku mi tabata purba di splika mi mama i mi rumannan dikon  mi kier a stòp di studia, bai bèk Venezuela i traha pionero.

Ora m’a yega Caracas na yüni 1967, mi por a mira ku mi famia tabatin mester di yudansa finansiero. Kon mi por a yuda nan? M’a haña trabou na banko, pero ketu bai mi tabata kier a bira pionero. Ta p’esei m’a bolbe bèk Venezuela, tòg? Pues, m’a disidí di hasi tur dos. Pa vários aña m’a traha fultaim na banko plùs traha pionero. E temporada ei mi tabata hopi drùk. Pero mi tabata hopi felis tambe.

Algu ku a hasi mi mas kontentu ainda tabata ora m’a topa Sylvia, un nèchi ruman muhé di Alemania ku tabata stima Yehova. E ku su mayornan a bin biba na Venezuela. Nos a kasa, i ku tempu nos a haña dos yu, Michel (Mike) i Samira. Ademas, mi mama a bin biba huntu ku nos i mi mester a kuid’é. Debí na tur mi obligashonnan di famia, mi no por a sigui traha pionero mas. Pero, m’a keda ku e mesun entusiasmo pa sirbishi. Durante fakansi, ami ku Sylvia tabata traha pionero ousiliar.

Loke ku m’a konta na komienso di mi historia di bida a pasa miéntras ku e muchanan tabata bai skol ainda. Mi tin ku atmití ku mi tabatin un dushi bida, i den mundu bankario mi tabata masha respetá. Henter dia mi no por a stòp di pensa kiko mi por a hasi pa hende mira mi komo Testigu di Yehova. Ami ku mi kasá a sinta huntu pa wak si e sèn ku lo mi haña ora mi kita for di banko lo tabata sufisiente pa nos lora kuné. Komo ku nos no tabatin debe, nos a realisá ku si nos simplifiká nos bida, e sèn ei lo dura nos pa hopi tempu.

No tabata fásil pa tuma e desishon ei. Pero debí ku mi esposa i mi mama tabata pará ful mi tras, mi por a bolbe kuminsá traha pionero atrobe. Esta kontentu mi tabata! A parse ku tur kos a kuminsá kana pa mi por a traha pionero. Pero no a tarda mashá ku nos a haña nos ku un sorpresa.

Pa nos sorpresa, dòkter a konfirmá ku Sylvia tabata na estado. Nos tabata mashá kontentu. No a tarda muchu ku nos a kuminsá anhelá e yegada di nos yu. Pero, kon lo para ku mi plan di traha pionero?

 Despues ku nos a sinta kòmbersá riba nos metanan, nos a disidí di sigui ku e plan original. Gabriel a nase na aprel 1985. M’a kita for di banko i kuminsá traha pionero yüni di mesun aña. Algun tempu despues m’a bira miembro di e Komité di Sukursal. Dos pa tres biaha pa siman mi tabata bai sukursal, ku tabata keda mas o ménos 80 kilometer leu for di Caracas.

E sukursal tabata keda na La Victoria, pues nos a disidí di muda pa ta mas serka. Esei tabata un kambio hopi grandi pa nos tur. Mi ta masha gradisidu pa tur e yudansa ku m’a haña di mi famia. Mi ruman muhé Baha a tuma mama serka dje. Mike tabata kasá, pero Samira i Gabriel te ainda tabata na kas. Esei a enserá ku nan a laga nan amigunan di Caracas atras ora nos a muda pa La Victoria. Anto mi dushi Sylvia mester a kustumbrá biba den un pueblito na lugá di biba den un stat drùk. Nos tur mester a kustumbrá biba den un kas hopi mas chikitu. Sí, e mudansa di Caracas pa La Victoria a enbolbí hopi kos.

Pero, kosnan a bolbe kambia. Gabriel a kasa i Samira a bai biba riba su mes. Anto na 2007, ami ku Sylvia a bai biba na Bètel i te awe nos ta einan. Mike, nos yu mayó, ta un ansiano i ta traha pionero huntu ku su kasá, Monica. Gabriel tambe ta un ansiano, anto e ku su kasá, Ambra, ta biba na Italia. Samira ta pionero, anto e ta traha for di kas pa Bètel.

Den mi bida mi mester a tuma yen di desishon importante. Mi no ta lamentá niun di nan, i lo mi tuma e mesun desishonnan atrobe. Mi ta masha gradisidu pa tur e kosnan ku mi por a hasi pa Yehova. Durante e añanan, m’a mira ku ta masha importante pa bo tin un amistat será ku Yehova. Sea ku nos tin ku tuma desishonnan grandi òf chikitu, Yehova ta duna nos e pas ku ta “surpasá tur komprondementu.” (Flp. 4:6, 7) Ami ku Sylvia ta gusta nos trabou na Bètel. Nos ta sinti ku Yehova a bendishoná nos desishonnan pasobra semper nos a keda tene Yehova na mente ora di tuma desishon.