1. Kiko Pedro a bisa un grupo di hende?

UN GRUPO grandi di hende di diferente pais i ku tabata papia diferente idioma a biaha pa Herúsalèm. Pero, algu ekstraordinario a sosodé. Diripiente algun di e hudiunan ku tabata biba einan a kuminsá papia kada un di e hendenan ei su idioma. Esei a sorprendé nan mashá. Pero, loke Pedro a bisa nan a sorprendé nan mas ainda. El a bisa nan ku nan por ser salbá si nan pone fe den Hesukristu. E palabranan ei a yega na nan kurason, anto nan a puntra: “Kiko nos mester hasi?” El a bisa nan: “Kada un di boso batisá.”—Echo. 2:37, 38.

2. Kiko e artíkulo akí lo mustra nos? (Wak e plachi riba portada.)

² Kiko a pasa despues? Riba e dia ei 3.000 hende a batisá i a bira disipel di Hesus. Esei tabata komienso di e trabou ku Hesus a duna su siguidónan—hasi hende disipel. Anto, te awe nos tambe ta hasi e trabou ei. Pero, awe nos no por yuda hende yega na boutismo den djis un par di ora. Pa yuda un studiante yega na boutismo, kisas esei por dura un par di luna, por ta un aña òf kisas asta un poko mas ku un aña. No ta fásil pa hasi hende disipel di Hesus. Pero, e artíkulo akí lo mustra bo kiko pa hasi pa yuda bo studiante yega na boutismo.

3. Segun Mateo 28:19 i 20, kiko un studiante mester hasi pa e yega na boutismo?

³ Pa un studiante yega na boutismo, e mester apliká loke e ta siñando for di Beibel. (Lesa Mateo 28:19, 20.)  Ora e hasi esei, e ta bira meskos ku e “hòmber prudente” den Hesus su ilustrashon ku a koba un buraku hundu pa traha su kas riba baranka. (Mat. 7:24, 25; Luk. 6:47, 48) Tin tres kos ku nos por hasi pa yuda un studiante apliká loke e ta siñando.

4. Kon bo por yuda un studiante yega pokopoko na boutismo? (Wak tambe e kuadro “ Yuda Bo Studiante Pone Meta i Logra Nan.”)

⁴ Yuda bo studiante pone meta. Dikon ta importante pa bo hasi esei? Pensa riba e ilustrashon akí: Imaginá ku bo tin ku stür bai un kaminda hopi leu. Kisas bo ta plania pa stòp ratu ratu na sierto lugánan bunita. Hasiendo esei, e biahe lo no parse dje largu ei. Asina tambe, ora un studiante pone metanan chikitu i mira ku e ta logrando nan, lo e ripará ku e por logra e meta di boutismo tambe. Pa yuda bo studiante pone meta, na final di kada lès, usa e kuadro “Meta” den e buki Bo Por Disfrutá di Bida pa Semper! Anto, yud’é mira kon e meta ei lo yud’é apliká loke el a kaba di siña. Si bo tin un meta mas pa bo studiante, por skirbi esei bou di “Otro meta.” Usa e kuadronan ei regularmente pa papia ku bo studiante tokante tantu su metanan ku e por logra den un poko tempu komo esnan ku lo dura un poko mas pa e logra.

5. Segun e relato di Marko 10:17-22, kiko Hesus a bisa e hòmber riku pa hasi, i dikon?

⁵ Yuda bo studiante hasi kambio den su bida. (Lesa Marko 10:17-22.) Hesus tabata sa ku lo tabata difísil pa un hòmber riku bende tur loke e tabatin. (Mar. 10:23) Hesus tabata stima e hòmber ei mashá. Ta p’esei el a bis’é p’e hasi e kambio difísil ei den su bida. Tin biaha nos no ke bisa un studiante ku e tin ku apliká loke e ta siñando, pasobra nos ta pensa  ku e no ta kla ainda pa hasi kambio. Ta bèrdat ku tin biaha ta tuma tempu pa un hende hasi kambio den su bida i bisti e personalidat nobo. (Kol. 3:9, 10) Pero, mas lihé nos papia kuné tokante e kambionan ku e tin ku hasi, mas lihé e por kuminsá hasi nan. Ora bo papia kuné tokante eseinan, bo ta demostr’é ku bo ta stim’é.—Sal. 141:5; Pro. 27:17.

6. Dikon ta importante pa nos puntra nos studiante su opinion?

⁶ Ta masha importante pa bo puntra bo studiante su opinion tokante sierto tópiko. Preguntanan asina lo yuda bo mira si bo studiante di bèrdat ta komprondé loke e ta siñando i kiko di bèrdat e ta pensa. Anto si bo tin kustumber di hasi esei, lo ta mas fásil pa papia ku bo studiante tokante sierto kosnan ku kisas ta difísil p’e aseptá. Den e buki Bo Por Disfrutá di Bida pa Semper! tin hopi di e preguntanan ei. Por ehèmpel, lès 04 ta puntra: “Kon bo ta kere Yehova ta sintié ora bo usa su nòmber?” Anto lès 09 ta puntra: “Tokante kiko bo ke papia ku Yehova den orashon?” Na promé instante, kisas lo tuma tempu pa bo studiante sa kon pa kontestá e tipo di preguntanan ei. Pero, bo por yud’é siñand’é kon pa usa e tekstonan di Beibel i e plachinan ku tin den e buki pa kontestá e tipo di preguntanan ei.

7. Kon eksperensia di otro ruman por yuda bo studiante?

⁷ Eksperensia di otro ruman por yuda bo studiante apliká loke e ta siñando. Por ehèmpel, si e no ta bai reunion regularmente, mustr’é e vidio Yehova A Sòru pa Mi ku tin den e sekshon “Mas Informashon Interesante” di lès 14. Kasi tur lès di e buki Bo Por Disfrutá di Bida pa Semper! tin tipo di eksperensianan asina sea den e sekshon “Kiko Mas Nos Por Siña” òf “Mas Informashon Interesante.” * Ma, tene kuidou pa bo no kompará bo studiante ku otronan bisand’é: “Si e por a hasié, bo tambe mester por.” Laga e studiante mes yega na e konklushon ei. Loke sí ta bon pa bo hasi ta di menshoná puntonan spesífiko ku a yuda e ruman den e vidio apliká loke e tabata siñando for di Beibel, manera un teksto importante òf algu ku el a hasi. Anto ki ora ku ta posibel, hala atenshon na e manera ku Yehova a yuda e ruman ei.

8. Kon bo por yuda bo studiante stima Yehova?

⁸ Yuda bo studiante stima Yehova. Kon bo por hasi esei? Segun ku boso ta pasa den e lèsnan, buska oportunidat pa hala atenshon na Yehova su kualidatnan. Lag’é mira ku Yehova ta un Dios felis ku t’ei pa tur esnan ku ta stim’é. (1 Tim. 1:11; Heb. 11:6) Mustr’é kon su bida lo mehorá si e apliká loke Yehova ta siñand’é. Anto lag’é mira ku e echo ku su bida ta mehorando ta pasobra Yehova ta stim’é mashá. (Isa. 48:17, 18) Mas su amor pa Yehova krese, mas fásil lo ta pa e hasi kambio den su bida.—1 Huan 5:3.

9. Kiko Marko 10:29 i 30 ta primintí, i kon esei lo yuda e studiante hasi e sakrifisionan nesesario pa yega na boutismo?

⁹ Pa un studiante yega na boutismo, e tin ku hasi sakrifisio. Meskos ku e hòmber  riku menshoná anteriormente, kisas algun studiante mester sakrifiká kosnan material. Por ehèmpel, nan lo tin ku buska un otro trabou si esun ku nan tin aworakí ta bai kontra prinsipionan di Beibel. Anto tin hopi studiante ku lo tin ku kibra amistat ku nan amigunan ku no ta sirbi Yehova. Tin otro ku nan famia no ta atendé ku nan mas pasobra nan no ta gusta Testigunan di Yehova. Hesus tabata sa ku pa algun no ta fásil pa hasi e tipo di sakrifisionan ei. Pero, el a primintí ku Yehova lo bendishoná esnan ku skohe pa bira su disipel. Sí, Yehova lo duna nan famia den e kongregashon ku ta stima nan masha hopi mes. (Lesa Marko 10:29, 30.) Kon bo por yuda bo studiante haña esei?

10. Kiko bo ta siña for di loke Manuel a bisa?

¹⁰ Bira amigu di bo studiante. Mustr’é ku bo ta stim’é masha hopi mes. Dikon esei ta asina importante? Ban wak e ehèmpel di Manuel, kende ta biba na México. Tempu e tabata un studiante di Beibel el a bisa: “Promé ku kada estudio, e ruman ku tabata studia ku mi tabata puntra mi kon ta ku mi. Anto esei a yuda mi relahá, i mi por tabata mas habrí pa papia kuné tokante tur kos. Mi por a mira ku di bèrdat e tabata interesá den mi.”

11. Dikon ta bon pa nos pasa tempu ku nos studiantenan?

¹¹ Meskos ku Hesus a pasa tempu ku su siguidónan, nos tambe mester pasa tempu ku nos studiantenan. (Huan 3:22) Si bo studiante ta hasi kambio den su bida, bo por invit’é na bo kas pa sea bebe kòfi, te òf pa kome algu òf pa wak Broadcasting. Bo studiante lo keda hopi kontentu, spesialmente si bo invit’é durante e dianan di fiesta ora ku kisas e ta sintié su so. Kazibwe, ku ta biba na Uganda, a bisa: “Mi ta pensa ku pasando  tempu ku mi maestro, m’a siña mes tantu tokante Yehova ku ora nos ta studia. M’a mira ku Yehova ta stima su pueblo masha hopi mes i ku nan ta hende masha felis. Ta esei mi tabata ke den mi bida.”

12. Dikon ta bon pa bai ku diferente ruman na un estudio?

¹² Bai ku diferente ruman na e estudio. Tin biaha nos ta pensa ku ta mas fásil pa nos so bai e estudio òf pa bai ku e mesun ruman. Aunke ku esei di bèrdat lo ta mas fásil, si bo bai ku diferente ruman na e estudio, esei lo yuda e studiante mas. Wak kiko Dmitrii, kende ta biba na Moldavia, a bisa tokante e rumannan ku su maestro a bini kuné na su estudio: “Kada ruman ta usa nan mes método pa splika e informashon. Esei a yuda mi mira diferente manera pa apliká loke mi ta siñando. Debí ku mi tabata konosé vários di e rumannan kaba, mi no tabata dje nèrvioso ei ora m’a bai reunion pa promé biaha.”

13. Dikon nos mester yuda nos studiante bai reunion?

¹³ Yuda bo studiante bai reunion. Dikon? Pasobra Yehova a bisa ku tur su sirbidónan mester reuní huntu. Esei ta parti di nos adorashon. (Heb. 10:24, 25) Un otro motibu ta ku nos rumannan ta manera nos famia den sentido spiritual. Anto ora nos reuní huntu ku nan, ta manera nos tur ta sintá na mesa ta kome un kuminda dushi. Ora bo yuda bo studiante bai reunion, bo ta yudand’é dal un stap masha importante pa e por yega na boutismo. Pero, kisas no ta fásil pa e kuminsá bai reunion. Kon e buki Bo Por Disfrutá di Bida pa Semper! por yuda bo studiante den esei?

14. Kon nos por yuda nos studiante haña gana di bai reunion?

¹⁴ Usa lès 10 di e buki Bo Por Disfrutá di Bida pa Semper! pa yuda bo studiante haña gana di bai reunion. Promé ku e buki ei a sali, a pidi algun publikadó ku eksperensia pa usa e lès ei ku nan studiante i esei a yuda nan studiante bai reunion. Pero, di mes bo no tin ku warda te ora bo yega lès 10 pa invitá bo studiante na reunion. Manera e kuminsá studia, invit’é bini reunion i no stòp di invit’é. Kada studiante tin nan mes reto. Pues, wak kiko bo studiante tin mester anto yud’é ku esei. No desanimá si e no bini reunion mesora. Tene pasenshi, pero sigui invit’é.

15. Ki miedu bo studiante lo por tin?

¹⁵ Abo tabatin miedu pa bira un Testigu di Yehova? Kisas bo tabata pensa ku nunka lo bo por prediká di kas pa kas. Òf kisas bo tabatin miedu ku bo famia òf amigunan lo a bira lomba pa bo. Si tabata asina, bo por hinka bo mes den sapatu di bo studiante. Hesus tabata sa ku algun hende lo tin e tipo di miedunan ei. Pero, el a bisa su siguidónan pa no laga miedu stòp nan di sirbi Yehova. (Mat. 10:16, 17, 27, 28) Kon Hesus a yuda su siguidónan vense nan miedu? I kon abo por yuda bo studiante vense su miedu?

16. Kon bo por train bo studiante pa e prediká?

¹⁶ Tiki tiki train bo studiante pa prediká. Kasi sigur Hesus su disipelnan tabata nèrvioso ora el a manda nan bai prediká. Pero, el a yuda nan bisando nan na ken nan mester a prediká i kiko nan mester a bisa. (Mat. 10:5-7) Kon bo por imitá Hesus?  Yuda bo studiante mira na ken e por prediká. Por ehèmpel, puntr’é: “Ken lo bo kier konta loke b’a siña akí?” Djei, yud’é prepará loke e por bisa i mustr’é un manera fásil ku e por usa Beibel pa konta loke el a siña. Pa train ku bo studiante, usa e sekshon “Loke Hende Sa Bisa” i “Si un Hende Puntra” den e buki Bo Por Disfrutá di Bida pa Semper! Ora bo hasi esei, hasi esfuerso pa siñ’é usa Beibel pa duna kontesta simpel i ku takto.

17. Kon nos por usa Mateo 10:19, 20 i 29-31 pa yuda nos studiante konfia den Yehova?

¹⁷ Yuda bo studiante konfia den Yehova. Hesus a bisa su disipelnan ku Yehova lo yuda nan pasobra e ta stima nan. (Lesa Mateo 10:19, 20, 29-31.) Kòrda bo studiante ku Yehova lo yud’é tambe. Bo por yuda bo studiante konfia den Yehova ora bo hasi orashon kuné tokante su metanan. Franciszek, ku ta biba na Polonia, a bisa: “E ruman ku tabata studia mi tur ora bai tabata menshoná mi metanan den su orashon. Anto ora m’a mira ku Yehova a kontestá su orashonnan, mesora mi tambe a kuminsá hasi orashon. Por ehèmpel, m’a mira kon Yehova a yuda mi ora m’a kaba di kuminsá un trabou nobo i mi tabatin mester di algun dia liber pa bai reunion i kongreso.”

18. Kon Yehova ta sinti tokante e trabou ku e rumannan ta hasi pa yuda hende hala serka dje?

¹⁸ Yehova ta ègt stima nos studiantenan. E sa kon duru e rumannan ta traha pa yuda hende hala serka dje, i e ta stima e rumannan ei mashá pa tur loke nan ta hasi. (Isa. 52:7) Si na e momento akí bo no tin un estudio di Beibel, tòg bo por yuda un studiante yega na boutismo. Kon? Kompañando un ruman na su estudio.