Beibel no ta bisa. Pero sí e ta duna algun detaye interesante ku kisas ta splika dikon nan a skohe pa keda Bètlehèm e tempu ei.

Un angel a bisa Maria ku lo e sali na estado i duna lus. E tempu ei tantu Maria komo Hose tabata biba na Názarèt, un stat na Galilea. (Luk. 1:26-31; 2:4) Algun tempu despues, ora nan a sali for di Egipto, nan a regresá Názarèt. Komo ku Hesus a lanta einan, nos por bisa ku e ta un nazareno. (Mat. 2:19-23) P’esei semper nos ta konektá Názarèt ku Hesus, Hose i Maria.

Un detaye interesante ta ku Maria tabata konosé e área di Huda bon. Kon nos por sa esei? Pasobra e tabatin un famia ku tabata biba na Huda. Esei tabata Elisabèt, kende tabata kasá di Saserdote Zakarías i ku despues a bira mama di Huan Boutista. (Luk. 1:5, 9, 13, 36) Maria a bai bishitá Elisabèt i a keda serka dje tres luna i despues a regresá Názarèt.—Luk. 1:39, 40, 56.

Ku tempu a sali un dekreto pa tur hende “bai registrá nan mes.” Pa obedesé e dekreto ei, Hose mester a biaha di Názarèt pa Bètlehèm, ku tabata e “stat di David” i e lugá ku profesia a bisa ku e Mesías lo a nase. (Luk. 2:3, 4; 1 Sám. 17:15; 20:6; Mik. 5:2) Einan Hesus a nase i ta di komprondé ku Hose lo no a pidi Maria pa hasi e biahe largu pa Názarèt bèk ku un bebi resien nasí. Nan a keda na Bètlehèm, ku tabata serka di Herúsalèm, un 9 kilometer asina. Esei a sali nèt bon pasó asina ei nan por a bai ku nan yu na e tèmpel pa hasi e sakrifisio ku Lei tabata rekerí.—Lev. 12:2, 6-8; Luk. 2:22-24.

Kòrda tambe ku e angel a bisa Maria ku su yu lo haña “e trono di . . . David” i ku lo e ta un Rei. Kisas Hose i Maria a komprondé ku tabata importante pa Hesus nase na e stat di David. (Luk. 1:32, 33; 2:11, 17) Podisé nan a pensa ku e kos di mas sabí pa hasi ta di keda na Bètlehèm i warda te ora Dios duna nan mas instrukshon.

Tur kos ta indiká ku nan estadia na Bètlehèm a dura largu. Nos no sa kuantu tempu nan tabatin einan ora ku un par di astrólogo a bin bishitá nan. Pero, Hesus ya no tabata un bebi mas sino un mucha, i e famia tabata biba den un kas. (Mat. 2:11) Pues en bes di biaha bai bèk Názarèt, ta parse ku pa un tempu nan a hasi Bètlehèm nan kas.

Heródes “a manda mata tur mucha hòmber di dos aña di edat bai abou na Bètlehèm.” (Mat. 2:16) Un angel a avisá Hose tokante esaki. P’esei é ku Maria a hui pa Egipto ku Hesus i a keda einan te ora Heródes a muri. Despues, Hose a disidí di hiba su famia Názarèt. Dikon no Bètlehèm? Pasobra e tempu ei Arkelao, yu di Heródes, tabata goberná Hudea i e tabata masha kruel. Ademas, un angel a atvertí Hose di e peliger. Einan na Názarèt, Hesus tabata safe i Hose por a lant’é komo un bon sirbidó di Dios.—Mat. 2:19-22; 13:55; Luk. 2:39, 52.

Ta parse ku Hose a muri promé ku Hesus a hasi posibel pa hende por a bai shelu. Si esei ta e kaso, Hose lo ser resusitá aki riba tera. E ora ei, hopi hende por sera konosí kuné i haña sa tur detaye ku a motivá nan pa keda Bètlehèm despues ku Hesus a nase.