1. Kiko nos tin ku hasi pa sobrebibí e dia di Yehova?

 KIKO Beibel ke men ora e ta papia tokante “e dia di Yehova”? Esei ta e tempu ku Yehova lo destruí su enemigunan i salba su pueblo. Den pasado el a hasi esei ora el a trese huisio riba algun nashon. (Isa. 13:1, 6; Eze. 13:5; Sof. 1:8) Den nos tempu, “e dia di Yehova” lo kuminsá ku destrukshon di Babilonia e Grandi i lo kaba ku e bataya di Armagedon. Pa sobrebibí e “dia” ei, nos mester prepará awor. Hesus mes a laga komprondé bon kla ku nos mester sigui “prepará” pa e “tribulashon grandi.”—Mat. 24:21; Luk. 12:40.

2. Ku kiko e karta di 1 Tesalonisensenan por yuda nos?

² Den e promé karta ku Pablo a skirbi na e kristiannan na Tesalónika, el a usa vários komparashon pa yuda nan sigui prepará pa e gran dia di huisio di Yehova. Pablo tabata sa ku e dia ei lo no a bini e tempu ei. (2 Tes. 2:1-3) Pero, tòg el a animá e rumannan pa prepará pa e dia ei komo si fuera ta mañan mes e tabata bai bini. Nos tambe tin ku apliká su konseho. Laga nos wak e splikashonnan ku el a duna tokante (1) kon e dia di Yehova lo yega, (2) ken lo no sobrebibí i (3) kon nos por prepará pa sobrebibí.

3. Den ki sentido e dia di Yehova ta bini manera ladron den anochi? (Wak e plachi.)

³ “Manera ladron den anochi.” (1 Tes. 5:2) Esaki ta un di e tres komparashonnan ku ta deskribí kon e dia di Yehova lo yega. Mayoria di biaha ladronnan ta traha lihé i ta hasi  esaki anochi ora ku ménos hende ta ferwagt. E dia di Yehova tambe lo bini diripiente; lo e kue hopi hende di sorpresa. Kisas asta kristiannan berdadero lo keda sorprendí kon lihé kosnan lo kana. Pero, kontrali na e malbadonan, nos lo no ser destruí.

4. Den ki sentido e dia di Yehova ta manera doló di parto?

⁴ “Meskos ku doló di parto.” (1 Tes. 5:3) Un hende muhé na estado, no por bisa presis na ki momento lo e duna lus. Pero e tin sigur ku lo e sosodé. I ora e momento yega, doló di parto ta kuminsá diripiente, lo ta fuerte i no por stòp e. Asina tambe, nos no sa e dia ni e ora ku Yehova su dia lo kuminsá. Pero, nos tin sigur ku lo e bini i ku e huisio di Yehova riba hende malbado lo ta diripiente i nan lo no por skapa.

5. Den ki sentido tribulashon grandi ta manera ora lus di dia presentá?

⁵ Manera ora lus di dia presentá. Den Pablo su di tres komparashon, e ta bolbe papia di ladron ku ta hòrta anochi. Pero ta parse ku e biaha akí e ta kompará e dia di Yehova ku ora solo kuminsá sali. (1 Tes. 5:4) Ladron ku ta hòrta anochi por ta asina bezig ku kisas nan ta pèrdè noshon di tempu i no ta ripará mes ku solo a kuminsá sali. Klaridat di dia ta saka na kla loke nan tabata hasi. Asina tambe, tribulashon grandi lo saka na kla echonan di hende ku, meskos ku ladron, ta keda den skuridat hasiendo kosnan ku Yehova no gusta. Kontrali na nan, nos ta keda leu di kosnan ku Yehova ta odia i ta hasi esfuerso pa sigui kana den “bondat, hustisia i bèrdat.” Hasiendo esei nos ta demostrá ku nos ta sigui prepará. (Efe. 5:8-12) Awor,  laga nos wak dos komparashon ku Pablo a usa pa deskribí hendenan ku lo no sobrebibí.

6. Den ki sentido mayoria di hende ta drumí? (1 Tesalonisensenan 5:6, 7)

⁶ “Esnan ku ta drumi.” (Lesa 1 Tesalonisensenan 5:6, 7.) Pablo a kompará esnan ku lo no sobrebibí e dia di Yehova ku hende ku ta na soño. Nan no sa mes kiko ta pasa rònt di nan ni kuantu tempu ta pasando. P’esei, nan no por kapta ora algu importante pasa ni reakshoná riba dje. Mayoria di hende awe ta na soño den sentido spiritual. (Rom. 11:8) Nan no ta kere ku nos ta bibando den “e último dianan” ni ku tribulashon grandi ta serka. Ora algu ku tin un impakto grandi riba mundu pasa, algun di nan ta lanta for di soño den sentido spiritual i ta mustra un tiki interes den nos mensahe di Reino. Pero no ta tarda mashá ku nan ta bolbe pega soño atrobe. Asta algun hende ku ta kere den un dia di huisio, ta pensa ku e no ta bin pa aworakí; ku e ta leu ainda. (2 Ped. 3:3, 4) Pero pa nos, kada dia ku pasa ta bira mas i mas importante pa nos keda lantá.

7. Den ki sentido esnan ku Yehova lo destruí ta manera hende burachi?

⁷ “Esnan . . . burachi.” Pablo a kompará hende ku Dios lo destruí, ku hende burachi. Hende burachi no ta reakshoná lihé ni ta tuma bon desishon. Asina tambe, hende malbado no ta reakshoná na e atvertensianan ku Dios ta duna. Nan ta skohe pa hiba un bida ku ta hiba na destrukshon. Pero Pablo a bisa e kristiannan pa mantené nan sano huisio, esta, pa pensa kla. (1 Tes. 5:6) Un eksperto di Beibel a splika ku un hende ku ta mantené su sano huisio tin “un estado mental trankil i stabil ku ta evaluá i kalkulá kosnan korektamente i di e manera ei ta hasi posibel ku [e] por tuma e desishon korekto.” Dikon nos mester keda trankil i stabil? Esei ta pa nos no enbolbé nos mes den asuntunan polítiko ni sosial. Segun e dia di Yehova ta yega mas serka, e preshon ku hende lo pone riba nos pa skohe un banda lo bira mas fuerte. Pero nos no mester preokupá tokante kon nos lo bai reakshoná. Yehova su spiritu santu lo yuda nos tin un estado mental trankil i stabil i pa tuma bon desishon.—Luk. 12:11, 12.

8. Kon 1 Tesalonisensenan 5:8 ta yuda nos mira ki kualidatnan nos mester pa keda lantá i mantené nos sano huisio? (Wak e plachi.)

⁸ “Bisti . . . un harnas di pechu, i . . . un hèlm.” Pablo a kompará nos ku sòldánan atento i ku tin nan armadura bistí. (Lesa 1 Tesalonisensenan 5:8.) Den tempu di guera, hende ta ferwagt pa un sòldá semper ta kla pa bataya. Meskos ta konta pa nos. Nos ta demostrá ku nos ta kla pa Yehova su dia ora nos bisti e harnas di fe i amor i e hèlm di speransa. E kualidatnan ei lo yuda nos masha hopi mes.

9. Kon nos fe ta protehá nos?

⁹ Meskos ku un harnas ta protehá un sòldá su kurason, asina tambe fe i amor ta protehá nos kurason figurativo. Nan ta yuda nos sigui sirbi Yehova i sigui Hesus. Ora nos tin fe, nos tin konfiansa ku Yehova lo rekompensá tur hende ku ta hasi esfuerso pa busk’é. (Heb. 11:6) Fe lo yuda nos keda leal na nos lider Hesus, asta ora nos enfrentá prueba. Ora nos lesa eksperensia di rumannan ku a keda fiel apesar  di persekushon i difikultat ekonómiko, nos ta fortalesé nos fe pa asina nos tambe por wanta prueba. Anto si nos imitá rumannan ku a simplifiká nan bida pa pone e Reino na promé lugá, nos lo evitá di kai den e trampa di materialismo. b

10. Kiko amor pa Dios i pa nos próhimo ta yuda nos kuné?

¹⁰ Amor tambe ta yuda nos keda lantá i mantené nos sano huisio. (Mat. 22:37-39) Amor pa Dios ta yuda nos sigui prediká maske esei por kousa problema. (2 Tim. 1:7, 8) Anto komo ku nos tin amor tambe pa hende ku no ta sirbi Yehova, nos ta sigui prediká i sigui traha den nos teritorio asta si ta via telefòn i karta. Nos no ta pèrdè speransa, nos ta spera ku un dia nan lo kambia i kuminsá hasi loke ta korekto.—Eze. 18:27, 28.

11. Dikon ta importante pa nos stima nos rumannan? (1 Tesalonisensenan 5:11)

¹¹ Pero nos ta stima nos rumannan tambe. Nos ta demostrá esei ora nos ta “animá [nan] i fortalesé [nan].” (Lesa 1 Tesalonisensenan 5:11.) Sòldánan ku ta den bataya ta animá otro. Pero sa pasa ku, meimei di bataya, un sòldá sin ku e por yuda, ta heridá su kompañero. Hamas lo e hasi esei pa malu. Asina tambe, nunka nos lo hasi algu èksprès pa hùrt nos rumannan ni paga malu ku malu. (1 Tes. 5:13, 15) Un otro manera ku nos ta demostrá amor ta ora nos ta respetá e ansianonan. (1 Tes. 5:12) Ora Pablo a skirbi e kongregashon di Tesalónika, e kongregashon no tabatin ni un aña ta eksistí. Pues probablemente e ansianonan no tabatin hopi eksperensia i kisas nan tabata hasi fout. Pero asina mes, nan tabata meresé rèspèt. Segun ku e tribulashon grandi ta aserká, nos lo mester dependé di nos ansianonan pa guia i instrukshon asta mas ku awor. Dikon? Pasobra por sosodé ku nos ta pèrdè kontakto ku sede mundial i sukursal. P’esei ta importante pa for di awor nos siña stima i respetá  nos ansianonan. Pase loke pase, laga nos mantené nos sano huisio i no focus riba nan imperfekshonnan. Mas bien, kòrda ku ta Yehova pa medio di Hesus ta guia e ruman hòmbernan fiel akí.

12. Den ki sentido nos speransa ta protehá nos pensamentunan?

¹² Meskos ku un hèlm ta protehá kabes di un sòldá, nos speransa pa salbashon ta protehá nos pensamentunan. Ora nos speransa ta fuerte, nos ta realisá ku loke mundu ta ofresé no ta sirbi pa nada. (Flp. 3:8) Nos speransa lo yuda nos keda kalmu i no pèrdè kabes. Esei ta loke Wallace i Laurinda, ku ta biba na Afrika, a eksperensiá. Denter di tres siman, un a pèrdè su tata i e otro a pèrdè su mama. Anto debí na e pandemia di COVID-19, nan no por a bai kas pa ta huntu ku nan famianan. Wallace a skirbi: “E speransa di resurekshon ta yuda mi pa no pensa riba kon nan tabata durante nan último dianan, mas bien kon nan lo ta e promé dianan den mundu nobo. E speransa ei ta kalma mi ora e doló i tristesa di a pèrdè nan dal mi.”

13. Kiko nos por hasi pa haña spiritu santu?

¹³ “No paga e kandela di spiritu santu.” (1 Tes. 5:19) Pablo a kompará spiritu santu ku un kandela ku ta den nos. Ora nos tin Dios su spiritu santu, nos lo tin hopi smak i entusiasmo pa hasi loke ta korekto i lo tin e forsa pa traha duru pa Yehova. (Rom. 12:11) Pero kiko nos tin ku hasi pa haña spiritu santu? Nos tin ku pidi Yehova p’e, studia su Palabra i keda forma parti di su organisashon ku ta dirigí pa spiritu santu. Di e manera ei nos lo por kultivá e “fruta di spiritu.”—Gal. 5:22, 23.

14. Si nos ke haña Dios su spiritu santu, kiko nos tin ku evitá? (Wak e plachi.)

¹⁴ Ora Yehova duna nos su spiritu santu, nos tin ku tene kuidou pa nos “no paga e kandela di spiritu santu.” Yehova ta sigui duna nos su spiritu santu solamente si nos kondukta i nos pensamentunan ta limpi. Si nos keda pensa riba deseo  robes i kumpli ku nan, nos lo pèrdè Yehova su spiritu santu. (1 Tes. 4:7, 8) Loke nos mester tene kuidou kuné tambe ta pa “no trata profesia ku despresio.” (1 Tes. 5:20) Ei, e palabra “profesia” ta referí na e mensahenan ku Yehova ta duna nos mediante su spiritu santu. Entre nan tin e mensahe di e dia di Yehova i kon serka e ta. Nos lo no pensa ku Armagedon lo no bin pa aworakí. Na lugá di esei, semper nos ta konsiente di e binida di e dia ei. P’esei, ta masha importante pa tur dia nos kondukta “demostrá deboshon na Dios.”—2 Ped. 3:11, 12.

15. Kiko nos tin ku hasi pa niun hende engañá nos? (1 Tesalonisensenan 5:21)

¹⁵ Muy pronto Dios su enemigunan, di un manera òf otro, lo deklará: “Pas i siguridat!” (1 Tes. 5:3) Mensahenan inspirá pa demoño lo plama tur kaminda i lo engañá mayoria di hende. (Rev. 16:13, 14) Esei lo pasa ku nos tambe? Nò. Nos lo no kai den e trampa si nos “hasi sigur di tur kos.” (Lesa 1 Tesalonisensenan 5:21.) E palabra griego tradusí aki komo “hasi sigur” tabata ser usá pa deskribí e manera ku tabata tèst outentisidat di un material presioso, manera oro i plata. Pues, nos tambe lo tin ku tèst loke nos ta skucha òf lesa i determiná si e ta bèrdat òf korekto. Esei tabata algu importante ku e rumannan na Tesalónika mester a hasi, i pa nos e ta mas importante ainda segun ku tribulashon grandi ta yega serka. Na lugá di bai tras di tur loke hende bisa, nos tin ku usa nos kapasidat di pensa pa kompará loke nos ta lesa òf skucha ku loke Beibel i e organisashon di Yehova ta bisa. Asina ei, mensahenan inspirá pa demoño lo no engañá nos.—Pro. 14:15; 1 Tim. 4:1.

16. Ki maravioso speransa nos tin, i kiko nos tin ku hasi awor?

¹⁶ Nos sa ku komo grupo, sirbidónan di Yehova lo sobrebibí tribulashon grandi. Pero, nos no sa kiko e dia di mañan ta trese pa kada un di nos. (Sant. 4:14) Sinembargo, sea ku nos sobrebibí tribulashon grandi òf nos muri promé kuné, Yehova lo rekompensá nos ku bida eterno si nos keda fiel. E kristiannan ungí lo ta ku Kristu den shelu i e otro karnénan lo biba den Paradeis aki riba tera. Laga nos tur focus riba nos maravioso speransa i sigui prepará pa e dia di Yehova.