1. Kiko ta yuda nos sigui sirbi Yehova apesar di e problemanan ku nos por tin?

 BEIBEL ta bisa ku e tempu ku nos ta biba aden ta hopi difísil. (2 Tim. 3:1) Aparte di e problemanan ku tur hende ta haña nan kuné, nos komo Testigunan di Yehova ta haña nos ku oposishon tambe. Kiko ta yuda nos sigui sirbi Yehova apesar di tur e problemanan ei? E kos ku mas ta yuda nos ta ku nos a eksperensiá kon Yehova a yuda nos i debí na esei nos sa ku e ta “e Dios bibu!”—Yer. 10:10; 2 Tim. 1:12.

2. Dikon nos ta bisa ku Yehova ta e Dios bibu?

² Yehova no ta un persona fiktisio, e ta un Persona real ku ta mira delaster un kos ku nos ta pasa aden i semper ke yuda nos. (2 Kró. 16:9; Sal. 23:4) Ora nos kòrda ku nos Dios stima nos i ta semper kla pa yuda nos, esei ta duna nos forsa pa soportá kualke kos ku bin den nos kaminda. Ban wak kon esei a yuda Rei David.

3. Kiko David tabata ke men ora el a bisa “Yehova ta un Dios bibu”?

³ David tabata sa ku e por a konfia den Yehova i p’esei el a dependé riba dje. Ora David su enemigunan, inkluso Rei Saul, tabata persiguié, el a hasi orashon i a pidi Yehova yudansa. (Sal. 18:6) Despues ku Yehova a skucha su orashon i a salb’é, David a bisa: “Yehova ta un Dios bibu!” (Sal. 18:46) Kiko David tabata ke bisa ku e palabranan ei? E kier a ekspresá ku e tabata konvensí ku Yehova ta e Dios berdadero ku semper ta yuda su sirbidónan. David tabatin sigur ku Yehova tabata sa presis loke e tabata pasando aden i tabata kla pa yud’é. Esei a hasié determiná pa sirbi i alabá Yehova.—Sal. 18:​28, 29, 49.

4. Dikon nos mester ta konvensí ku Yehova ta e Dios bibu?

 ⁴ Ora nos ta konvensí ku Yehova ta e Dios bibu, esei lo yuda nos hasi tur nos esfuerso pa sirbié. Nos lo tin e forsa pa perseverá durante nos pruebanan i tambe e motivashon pa traha duru pa Yehova. Ademas, nos lo ta determiná pa mantené nos amistat será kuné.

E DIOS BIBU LO DUNA BO FORSA

5. Kiko ta sigurá nos ku Yehova lo yuda nos ku nos pruebanan? (Filipensenan 4:13)

⁵ Ni maske kon grandi òf chikitu un prueba ta, nos lo por soport’é si nos kòrda ku Yehova ta bibu i ku e t’ei pa yuda nos. Al fin i al kabo, no ta eksistí un problema ku Yehova no por solushoná. E ta Todopoderoso i e por duna nos poder pa perseverá. (Lesa Filipensenan 4:13.) Anto ta p’esei ora nos haña nos ku kualke prueba, nos tin tur motibu pa keda trankil. Ora nos mira kon Yehova ta yuda nos ku pruebanan chikitu, esei ta sigurá nos ku ora pruebanan grandi bini, e ta bai yuda nos ku eseinan tambe.

6. Kiko David a pasa aden ku a dun’é mas konfiansa den Yehova?

⁶ Ban wak dos kos ku David a pasa aden ku a dun’é mas konfiansa den Yehova. Tempu ku David tabata yòn i tabata kuida e karnénan di su tata, un biaha un ber anto un otro biaha un leon a kue un di e karnénan bai kuné. Tur dos biaha, ku kurashi David a kore nan tras i a salba e karnénan di su tata. Pero niun momento so el a hasi komo si fuera ta é a hasi esei ku su mes forsa. Mas bien e tabata sa ku ta Yehova a yud’é hasi esei. (1 Sám. 17:​34-37) David nunka a lubidá kon Yehova a yud’é. I ora el a keda kòrda riba esei, el a haña mas konfiansa ku Yehova lo yud’é den futuro.

7. Kiko David a enfoká riba dje, i kon esei a yud’é enfrentá Góliat?

⁷ Mas despues, ora ku David probablemente ainda tabata un tiner, el a bai na e kampamentu kaminda e sòldánan di Israel tabata. Ei el a topa ku e sòldánan tur spantá pasobra e gigante filisteo, Góliat, tabata “reta ehérsito di Israel.” (1 Sám. 17:​10, 11) E sòldánan tabatin miedu pasobra nan a enfoká riba kon grandi Góliat tabata i kiko e tabata bisando nan. (1 Sám. 17:​24, 25) Pero kontrali na esei, David a enfoká riba algu otro. Pa David, e gigante no tabata djis reta e ehérsito di Israel, sino e tabata “reta ehérsito di e Dios bibu.” (1 Sám. 17:26) Pues, David tabata enfoká riba Yehova. David tabata sa ku e mesun Dios ku a yud’é ora e tabata un wardadó lo yud’é awor tambe. P’esei, el a enfrentá Góliat ku e siguransa ku Yehova lo a yud’é. Anto klaru, David a gana!—1 Sám. 17:​45-51.

8. Kiko ta algun kos ku por fortalesé nos konfiansa ku Yehova lo yuda nos enfrentá kualke prueba? (Wak e plachi.)

⁸ Nos tambe por enfrentá kualke prueba si nos keda kòrda ku e Dios bibu semper ta kla pa yuda nos. (Sal. 118:6) Anto ora nos kòrda tur loke el a hasi pa nos den pasado, esei lo fortalesé nos konfiansa ku lo e yuda nos. Algu mas ku por yuda nos ta si nos lesa e relatonan den Beibel ku ta konta kon Yehova a salba su sirbidónan. (Isa. 37:​17, 33-37) Ademas, riba nos website jw.org, nos ta haña diferente relato ku ta konta kon Yehova ta  yuda nos rumannan awe. Anto no lubidá e biahanan ku Yehova a yuda abo mes. Pero, no preokupá si bo no a pasa den un eksperensia espektakular manera bringa kontra un ber òf un leon. Dikon nò? Pasobra Yehova a yuda bo ku masha hopi kos. Por ehèmpel, el a invitá bo pa bira su amigu. (Huan 6:44) Anto bon mirá, si no ta pa Yehova, lo bo no ta den bèrdat aworakí. Kisas bo por pidié yuda bo kòrda e biahanan ku el a kontestá bo orashonnan, a duna bo loke bo tin mester nèt na ora òf a yuda bo dil ku un situashon difísil. E eksperensianan ei lo konvensé bo asta mas ku Yehova semper lo t’ei pa yuda bo.

9. Kon nos tin ku mira nos pruebanan? (Proverbionan 27:11)

⁹ Ora nos keda kòrda ku Yehova ta un Persona bibu, esei lo yuda nos mira nos pruebanan di un otro manera. Kon asina? Wèl, nos lo mira ku nos pruebanan ta parti di un asuntu hopi mas grandi entre Yehova i Satanas. Segun Diabel, nos lo bandoná Yehova ora nos ta pasa den difikultat. (Yòb 1:​10, 11; lesa Proverbionan 27:11.) Pero si nos keda fiel na Yehova, nos ta mustra ku nos ta stim’é i ku Diabel ta un gañadó. Awor, ki prueba abo ta pasando den dje? Oposishon di gobièrnu? Difikultat finansiero? Hende den bo teritorio no ta interesá? Òf algu otro? Sea kual sea e kaso, kòrda ku bo pruebanan ta duna bo oportunidat pa hasi Yehova su kurason kontentu. I no lubidá ku Yehova semper lo hasi sigur ku bo por soportá kualke prueba. (1 Kor. 10:13) E lo duna bo e forsa pa perseverá.

E DIOS BIBU LO REKOMPENSÁ BO

10. Kiko e Dios bibu lo hasi pa hende ku ta ador’é?

¹⁰ Yehova semper ta rekompensá hende ku ta ador’é. (Heb. 11:6) For di awor  e ta duna nos trankilidat i pas mental, i den futuro lo e duna nos bida eterno. Nos por ta konvensí ku Yehova tin tantu e poder komo e deseo pa rekompensá nos. Anto e siguransa ei ta motivá nos pa sigui hasi tur nos esfuerso pa ador’é meskos ku su sirbidónan di pasado. Ta esei ta loke Timoteo a hasi.—Heb. 6:​10-12.

11. Kiko a motivá Timoteo pa hasi tur su esfuerso den kongregashon? (1 Timoteo 4:10)

¹¹ Lesa 1 Timoteo 4:10. Timoteo tabata konvensí ku Yehova ta esun ku lo rekompens’é. Ta p’esei e tabata traha duru pa Yehova i pa su rumannan. Pero kon e tabata hasi esei? Apòstel Pablo a anim’é pa bira un mihó maestro den sirbishi i den kongregashon. Pablo a bis’é tambe pa pone un bon ehèmpel pa su rumannan den kongregashon, tantu esnan yòn komo esnan di edat. Ademas, e tabatin algun asignashon difísil ku a enserá duna konsehonan firme pero na un manera amoroso na e rumannan ku tabatin mester di esei. (1 Tim. 4:​11-16; 2 Tim. 4:​1-5) Timoteo por tabatin sigur ku asta si otronan no a mira òf a apresiá su trabou, Yehova sí lo a rekompens’é.—Rom. 2:​6, 7.

12. Kiko ta e motibu ku ansianonan ta traha asina duru den kongregashon? (Wak e plachi.)

¹² Ansianonan awe tambe por tin sigur ku Yehova ta mira tur loke nan ta hasi i ta balorá nan trabounan. Nan tin e trabou di pastoriá, prediká i duna siñansa. Aparte di tur esei, algun ansiano ta yuda tambe den konstrukshon òf ora di desaster. Otro ta forma parti di e Grupo di Bishitá Pashènt òf di e Komité di Kontakto ku Hospital. Kiko ta motivá nan pa hasi nan mes disponibel pa yuda ku e kosnan ei? Nan ta mira tur loke nan  ta hasi ei komo algu pa Yehova i no pa hende. P’esei, nan ta hasi tur nan esfuerso pa kumpli ku nan asignashon i ta konvensí ku Yehova lo rekompensá nan pa tur loke nan ta hasi.—Kol. 3:​23, 24.

13. Kon Yehova ta sinti ora e mira nos ta hasi nos esfuerso p’e?

¹³ Ta klaru ku no ta tur hende por ta ansiano. Pero, nos tur tin algu ku nos por duna Yehova. E ta keda hopi kontentu ora nos hasi nos bèst pa sirbié. Por ehèmpel, e ta apresiá nos kontribushonnan pa obra mundial asta si nos pensa ku esei ta tiki. Ademas e ta gusta mira nos hasi esfuerso pa duna komentario na reunion maske nos ta tímido. Anto e ta keda masha kontentu ora e mira nos pordoná hende ku a ofendé nos. Asta si bo ta sinti ku bo no por hasi mashá pa Yehova, bo por ta sigur ku e ta balorá loke bo por hasi. E ta stima bo pa esei i lo rekompensá bo.—Luk. 21:​1-4.

KEDA AMIGU DI E DIOS BIBU

14. Kon un bon amistat ku Yehova lo yuda nos keda fiel na dje? (Wak e plachi.)

¹⁴ Si nos tin un bon amistat ku Yehova, lo ta mas fásil pa nos keda fiel na dje. Ta esei ta loke Yósef a hasi. El a nenga redondamente di kometé inmoralidat. P’e, Yehova tabata un Dios bibu i e no kier a faya kuné. (Gén. 39:9) Si nos ke ta bon amigu di Yehova, nos mester papia kuné den orashon i studia su Palabra. Asina ei nos amistat kuné lo krese. Si meskos ku Yósef, nos tin un bon amistat ku Yehova, nos tampoko lo no ke faya kuné.—Sant. 4:8.

15. Ki lès nos por siña for di loke a pasa ku e israelitanan den desierto? (Hebreonan 3:12)

¹⁵ Si nos lubidá ku Yehova ta e Dios bibu, masha fásil mes nos por kuminsá duda den dje. Ta esei a pasa ku e israelitanan den desierto. Maske ku Yehova tabata nan Dios, nan a kuminsá duda ku  e por a kuida nan. Asta nan a puntra: “Yehova ta ku nos òf nò?” (Éks. 17:​2, 7) I despues di esei, nan a rebeldiá kontra Dios. Nos lo no ke ta manera nan i desobedesé Dios.—Lesa Hebreonan 3:12.

16. Kiko por pone nos fe na prueba?

¹⁶ E manera ku mundu ta aworakí no ta niun tiki fásil pa keda amigu di Yehova. Hopi hende no ta kere ku Dios ta eksistí. Anto ta parse ku mayoria di hende ku ta djis biba pa biba tin un bida dushi i ta bai dilanti. Ora nos mira esei, esei por pone nos fe na prueba. Aunke nos ta kere ku Dios ta eksistí, nos por kuminsá duda i puntra nos mes si di bèrdat lo e yuda nos. E eskritor di Salmo 73 a puntra su mes esei. El a mira ku hende rònt di dje no ta preokupá mes ku Dios su leinan i tòg kos tabata bai bon pa nan. Anto esei a pone ku el a sinti ku ta pòrnada e tabata sirbi Dios.—Sal. 73:​11-13.

17. Kiko por yuda nos keda amigu di Yehova?

¹⁷ Kiko a yuda e salmista kambia su manera di pensa? El a para pensa riba loke lo pasa ku hende ku stòp di konfia Yehova. (Sal. 73:​18, 19, 27) El a tuma tempu pa pensa riba tur e benefisionan ku tin ora un hende ta sirbi Yehova. (Sal. 73:24) Nos tambe por pensa riba tur e bendishonnan ku Yehova a duna nos. Imaginá kon nos bida lo tabata si nos no tabata sirbi Yehova. Hasiendo esei lo yuda nos mira dikon ta bale la pena pa sirbi Yehova i nos lo bisa meskos ku e salmista: “Den mi kaso, ta bon pa mi hala mas serka Dios.”—Sal. 73:28.

18. Dikon nos no mester tin miedu di loke ta bin den futuro?

¹⁸ Nos por enfrentá kualke prueba ku nos haña nos kuné durante e último dianan akí pasobra nos ta “esklabo di un Dios bibu i berdadero.” (1 Tes. 1:9) Nos Dios stima nos i semper lo yuda nos. El a demostrá esei den pasado i nos por konta ku lo e hasi meskos ku nos awe. Un djis tribulashon grandi lo kuminsá. Pero no tene miedu, bo no ta bo so. (Isa. 41:10) P’esei, yen di ánimo laga nos bisa: “Yehova ta mi ayudante; lo mi no tin miedu.”—Heb. 13:​5, 6.