M’a nase 22 di desèmber 1929 na Noville, un pueblito di nuebe boerderij ku ta keda serka di Bastogne, den e Ardennen di Bèlgika. Mi tabatin un dushi infansia na nos boerderij huntu ku mi mayornan. Tur dia, ami ku Raymond, mi ruman chikitu, tabata bai hala lechi for di nos bakanan i tabata yuda ku kosecha. Tur bisiña tabata yuda otro.

Mi mayornan, Emile ku Alice, tabata katóliko deboto. Tur djadumingu nan tabata bai misa. Pero rònt di 1939, algun pionero di Inglatera a bishitá nos pueblo i a ofresé mi tata abonamènt riba e revista Konsuelo (ku awor yama Spièrtá!). Mi tata a realisá mesora ku esei tabata e bèrdat i a kuminsá lesa Beibel. Ora el a stòp di bai misa, tur bisiña ku promé tabata masha amabel a bira kontra dje. Nan a purba di konvens’é pa keda katóliko anto esei a hiba na basta pleitamentu.

E preshon ku e bisiñanan tabata pone riba mi tata a hasi mi masha tristu. Anto ta esei ta loke a pone mi roga Dios pa yuda mi tata mané m’a menshoná na kuminsamentu. M’a sinti un alivio ora m’a mira ku tikitiki e bisiñanan tabata laga mi tata na pas. Esei a konvensé mi ku Yehova “ta skucha orashon.”

Dia 10 di mei 1940, nazinan a invadí Bèlgika. Esei a pone ku hopi hende a hui for di e pais. Nos famia a hui bai zùit di Fransia. Na kaminda pa einan nos a pasa dor di áreanan peligroso kaminda ehérsito aleman i ehérsito franses tabata bringa otro.

Ku tempu, nos a bolbe nos boerderij. E tabata tur di plùnder. Ta nos kachó, Bobbie, so tabata einan pa risibí nos. E situashonnan ei  a pone mi pensa: ‘Dikon tin tantu guera i sufrimentu?’

Den e tempu ei, nos a haña vários bishita animante di Ruman Emile Schrantz, a un ansiano ku tabata pionero. El a usa Beibel pa splika nos bon kla dikon hende ta sufri. El a duna mi kontesta tambe riba e otro preguntanan ku mi tabatin tokante bida. Mi amistat ku Yehova a bira mas será i a keda konvensí ku e ta un Dios di amor.

Nos por tabatin mas kontakto ku e rumannan. Esei tabata asta promé ku e guera a kaba. Na ougùstùs 1943, Ruman José-Nicolas Minet a bin nos boerderij pa duna un diskurso. El a puntra: “Ken ke batisá?” Ami i mi tata a hisa man. Nos a batisá den un riu serka di nos boerderij.

Na desèmber 1944 ehérsito aleman a lansa nan último atake grandi di Segundo Guera Mundial na ost Europa, mihó konosí komo Slag om de Ardennen. Nos tabata biba serka di kaminda esei tabata tumando lugá, i pa henter un luna largu nos mester a keda den bodega. Un dia ora m’a sali pa duna e bestianan kuminda, algun bòm a kai riba e boerderij i a destruí dak di e mangasina. Un sòldá merikano ku tabata den e stal band’i mi a grita mi: “Skonde!” M’a kore benta mi kurpa abou banda di dje, i el a pone su hèlm riba mi kabes pa protehá mi.

Despues di guera, nos tabatin kontakto regular ku un kongregashon na Liège, ku a keda mas o ménos 90 kilometer nort di nos. Ku tempu, nos tabatin un grupo chikitu di estudio na Bastogne. M’a kuminsá traha na ofisina di impuesto i a haña oportunidat di studia lei. Despues m’a traha na un ofisina di notario. Na 1951 nos a organisá un asamblea di sirkuito chikitu na Bastogne. Tabatin mas o ménos shen hende presente, inkluso Elly Reuter, un ruman pionero masha zeloso. El a kore 50 kilometer riba baiskel pa por a asistí. No a dura mashá ku nos a kuminsá namorá i a komprometé. Elly a haña  invitashon pa bai Skol di Galaad na Merka. El a skirbi e sede mundial splikando nan dikon e no por aseptá e invitashon. Ruman Knorr, kende e tempu ei tabata guia Yehova su pueblo, a kontestá di manera masha amabel bisando ku kisas un dia Elly por bin Galaad ku su esposo. Nos a kasa na febrüari 1953.

E mesun aña ei, nos a bai e asamblea Sosiedat di Mundu Nobo na Yankee Stadium, New York. Einan m’a topa un ruman hòmber ku a ofresé mi un bon trabou i a pidi mi pa emigrá pa Merka. Nos a hasi orashon tokante e asuntu i a disidí di no aseptá e oferta. Nos a bai bèk Bèlgika pa apoyá e grupo chikitu di 10 publikadó na Bastogne. E siguiente aña, nos a haña un bunita bendishon: un yuchi ku nos a yama Serge. Lamentablemente, shete luna despues, Serge a bira malu i a muri. Nos a keda hopi kibrá i a deshogá nos kurason den orashon, i Yehova a fortalesé nos ku e speransa di resurekshon.

Na òktober 1961, m’a haña un trabou partaim ku lo a yuda mi traha pionero. Pero, e mesun dia ei m’a haña un yamada di e sirbidó di sukursal na Bèlgika. El a puntra mi si mi tabata por a kuminsá sirbi komo sirbidó di sirkuito (awor, superintendente di sirkuito). M’a puntr’é: “Nos por sirbi komo pionero promé ku nos aseptá e asignashon akí?” El a bai di akuerdo. Despues ku nos a traha pionero pa ocho luna, nos a kuminsá den trabou di sirkuito na sèptèmber 1962.

Despues di dos aña den e trabou di sirkuito, nos a haña invitashon pa sirbi na Bètel na Brussel. Nos a kuminsá sirbi einan na òktober 1964. Den nos asignashon nobo, nos a haña hopi bendishon. Djis despues ku Ruman Knorr a bishitá nos Bètel na 1965, pa mi sorpresa, m’a ser nombrá komo sirbidó di sukursal. Despues, ami ku Elly a haña invitashon pa bai e di 41 klas di Skol di Galaad. A dura 13 aña pa Ruman Knorr su palabranan bira realidat! Despues ku nos a gradua, nos a bai bèk Bètel na Bèlgika.

Durante añanan, mi tabatin e privilegio di usa mi konosementu komo abogado pa yuda defendé nos derecho di adorá Yehova libremente tantu na Europa komo na otro pais. (Flp. 1:7) Esei a pone mi den kontakto ku outoridatnan di mas ku 55 pais kaminda nos obra ta restringí òf prohibí. En bes di resaltá mi eksperensia den área hurídiko, mi tabata introdusí mi mes komo “un hòmber di Dios.” Mi tabata keda pidi Yehova yudansa, pasó mi tabata sa ku “kurason di rei [òf hues] ta manera korida di awa den man di Yehova ku e por dirigí den kualke direkshon.”—Pro. 21:1.

Ainda mi ta kòrda un kòmbersashon ku mi tabatin ku un miembro di Parlamento  Europeo. Vários biaha m’a manda petishon pa papia kuné i por fin el a bai di akuerdo pa topa ku mi. El a bisa mi: “Sinku minüt so bo tin, ni un minüt mas.” M’a baha mi kabes i kuminsá hasi orashon. Tur nèrvioso e parlamentario a puntra mi ta kiko mi tabata hasiendo. M’a hisa mi kabes i bis’é: “M’a gradisí Dios pasó bo ta un di su sirbidónan.” E di: “Ki bo ke men?” M’a mustr’é Romanonan 13:4. E tabata protestant, pues e teksto a kapta su atenshon. Komo resultado, el a duna mi mei ora i e reunion tabata un éksito. El a asta bisa ku e tabatin rèspèt pa e trabou ku Testigunan di Yehova ta hasi.

Durante añanan, Testigunan di Yehova a bringa hopi bataya legal na Europa tokante neutralidat, kustodia di yu, belasting i mas kos. Tabata un oportunidat masha maravioso pa mi mes por a mira kon Yehova a duna nos éksito i viktoria. Testigunan di Yehova a gana mas ku 140 kaso den Korte Europeo di Derechonan Humano!

Durante añanan 90, m’a traha huntu ku Ruman Philip Brumley, di sede mundial, i Ruman Valter Farneti, di Italia. Nos a traha huntu pa yuda nos rumannan na Cuba haña mas libertat di adorá Yehova ya ku nos obra tabata restringí einan. M’a skirbi un karta pa e embahada di Cuba na Bèlgika i despues m’a topa ku e trahadó di embahada ku tabata enkargá pa trata nos petishon. Durante nos promé reunionnan, nos no tabatin niun progreso den resolvé e malkomprondementu ku tabatin i ku a hiba na restrikshon di nos trabou na Cuba.

Apesar di esei, nos a hasi orashon na Yehova i a logra haña pèrmit pa manda 5.000 Beibel Cuba ku barku. E karga a yega bon i a parti tur e Beibelnan pa e rumannan, pues nos a komprondé ku Yehova tabata bendishoná nos esfuersonan. P’esei nos a pidi pèrmit pa manda 27.500 Beibel mas i atrobe e gobièrnu a bai di akuerdo. M’a keda masha kontentu di por a yuda nos rumannan stimá haña nan propio ehemplar di Beibel.

M’a bishitá Cuba hopi biaha pa yuda mehorá e situashon legal di nos trabou einan. Durante e proseso, m’a logra traha bon relashon ku hopi trahadó di gobièrnu.

Na 1994 algu hopi kruel a pasa na Ruanda. Mas ku 1.000.000 hende a ser matá na un  forma hopi kruel. Lamentablemente, algun di nan tabata nos rumannan. Djis despues di esei, algun ruman a haña e asignashon di duna ousilio na e rumannan den e pais ei.

Ora nos grupo a yega e kapital, Kigali, nos a mira ku a sefta e ofisina di tradukshon i e mangasina di literatura ku bala. Nos a tende hopi relato kruel tokante rumannan ku a ser matá ku machete. Pero tambe nos a tende di hopi relato tokante rumannan ku a mustra amor kristian. Por ehèmpel, nos a konosé un ruman tutsi ku a skonde 28 dia den un buraku bou di kas di un famia di rumannan hutu ku a proteh’é. Durante un reunion na Kigali, nos por a duna mas ku 900 ruman apoyo i konsuelo spiritual.

Despues di esei, nos a krusa frontera drenta Zaire (ku awor ta Repúblika Demokrátiko di Congo). Nos tabata en buska di un grupo grandi di ruman di Ruanda ku a hui bai un kampo di refugiado serka di e stat Goma. Nos no por a haña nan, pues nos a pidi Yehova pa guia nos na nan. E ora ei nos a mira un hende ta kana bin den nos direkshon. Nos a puntr’é si e konosé kualke hende ku ta Testigu di Yehova. El a bisa: “Sí, ami mes ta un, i lo ta un plaser pa mi hiba boso serka e komité di ousilio.” Despues di un reunion animante ku e komité di ousilio, nos a reuní ku mas o ménos 1.600 refugiado pa duna nan apoyo, konsuelo i animashon. Tambe nos a lesa pa nan un karta di Kuerpo Gobernante. E rumannan tabata kontentu pa tende e siguiente palabranan: “Boso ta konstantemente den nos orashonnan. Nos sa ku Yehova lo no bandoná boso.” I e palabranan ei di e Kuerpo Gobernante tabata bèrdat. Awe tin mas ku 30.000 Testigu ta sirbi Yehova felis na Ruanda!

Despues di ta 58 aña kasá, m’a pèrdè mi kerida Elly na 2011. Yehova a konsolá mi segun ku mi tabata deshogá mi tristesa na dje den orashon. E trabou di prediká bon notisia di Reino na otro hende tambe a duna mi konsuelo.

Aunke mi tin 90 i piku aña, ainda mi ta bai prediká tur siman. Tambe mi ta kontentu di por yuda Departamento Legal aki na Bètel di Bèlgika. Anto tambe mi gusta kompartí mi eksperensianan ku otro ruman i pastoriá e hóbennan den e famia di Bètel.

Mas o ménos 84 aña pasá m’a resa na Yehova pa promé biaha. Esei tabata kuminsamentu di un amistat será ku Yehova ku a sigui krese durante henter mi bida. Mi ta masha gradisidu ku durante henter mi bida, Yehova semper a skucha mi orashonnan.—Sal. 66:19. b