E Demanda Creciente pa Medicina i Cirugia sin Sanger

“Tur esnan cu ta trata cu sanger i ta cuida pashentnan di cirugia tin cu considerá cirugia sin sanger.”—Dr. Joachim Boldt, profesor di anestesiologia, Ludwigshafen, Alemania.

E TRAGEDIA di AIDS a obligá científico i dokternan pa dal mas paso pa haci e sala di operacion un lugá mas safe. Ta obvio cu esaki a nificá screening mas estricto di sanger. Pero expertonan ta bisa cu asta e medidanan aki no ta garantisá un transfusion sin riesgo. Segun e revista Transfusion: “Maske sociedad ta gasta gran cantidad di recurso pa haci e suministro di sanger mas safe cu nunca, nos ta kere cu pashentnan lo sigui purba evitá transfusion [di donante] djis pasobra e suministro di sanger nunca no por ta completamente safe.”

No ta un sorpresa anto cu hopi dokter ta  birando cauteloso pa cu dunamentu di sanger. Segun dr. Alex Zapolanski di San Francisco, California: “Básicamente transfusion di sanger no ta nada bon, i nos ta masha enérgico den evit’é pa tur hende.”

E público en general tambe ta birando conciente dje peligernan di transfusion. Sí, un encuesta na 1996 a revelá cu 89 porciento di canades lo preferá un alternativa riba sanger di donante. “No ta tur pashent lo nenga transfusion di sanger di otro hende manera Testigonan di Jehova ta haci,” segun e revista Journal of Vascular Surgery. “No obstante, e rísico di transmití malesa i di alterá e funcion inmunológico ta duna evidencia cla cu nos tin cu haña alternativanan pa tur nos pashentnan.”

Un Método Preferí

Afortunadamente, tin un alternativa: medicina i cirugia sin sanger. Hopi pashent no ta mira esei como e último recurso, sino como un tratamentu preferí, i cu bon motibu. Stephen Geoffrey Pollard, ciruhano specialista británico, ta comentá cu e porcentahe di malesa i mortalidad entre esnan cu ricibí cirugia sin sanger ta “por lo ménos mes bon cu di pashentnan cu ricibí sanger, i den hopi caso e pashentnan ta keda di spar dje infeccion i complicacionnan despues di operacion cu hopi bes ta debí na sanger.”

Con tratamentu médico sin sanger a desaroyá? Den un sentido e pregunta ta straño, ya cu bon mirá, medicina sin sanger tabat’ei promé cu uso di sanger. Sí, tabata te na principio di siglo 20 numa cu tecnologia di transfusion a avansá te n’e punto caminda el a bira uso rutinario. No obstante, den décadanan recien algun dokter a duna popularidad n’e campo di cirugia sin sanger. Por ehempel, durante añanan ’60 e ciruhano renombrá Denton Cooley a efectuá algun dje promé operacionnan di curason habrí sin usa sanger.

 Debí n’e aumento di hepatítis entre hende cu a ricibí transfusion durante añanan ’70, hopi dokter a cuminsá busca alternativanan pa sanger. Pa añanan ’80 un cantidad grandi di tim médico tabata haci cirugia sin sanger. Anto, ora e epidemia di AIDS a surgi di ripiente, otro dokternan cu tabata ansioso pa adoptá e mésun técnicanan, bes tras bes tabata consultá e timnan aki. Durante añanan ’90 hopi hospital a desaroyá programanan cu ta ofrecé opcionnan sin sanger na nan pashentnan.

Awor dokternan a aplicá cu éxito técnicanan sin sanger durante operacion i proceduranan di emergencia cu tradicionalmente a rekerí transfusion. D. H. W. Wong a comentá den e revista Canadian Journal of Anaesthesia: “Por efectuá cirugia grandi sea ta cardíaco, vascular, ginecológico i di parto, ortopédico i urológico cu éxito sin usa sanger of productonan di sanger.”

Un bentaha di cirugia sin sanger ta cu e ta promové cuido di mihó calidad. Segun dr. Benjamin J. Reichstein, un director di cirugia na Cleveland, Ohio: “E abilidad dje ciruhano ta sumamente importante den prevení pérdida di sanger.” Un revista legal di Sur Africa ta bisa cu den cierto casonan cirugia sin sanger por ta “mas lihé, mas limpi i ménos costoso.” E revista ta agregá: “Sigur e cuido despues di operacion den hopi caso a resultá mas barata i ta kita ménos tempu.” Esakinan ta djis un par di motibu pakico un 180 hospital rond mundu tin awor programanan cu ta specialisá den medicina i cirugia sin sanger.

Sanger i Testigonan di Jehova

Pa motibunan basá riba Bijbel, Testigonan di Jehova ta nenga transfusion di sanger. * Pero sí nan ta aceptá—i cu vigor ta  purba haña—alternativanan médico pa sanger. Tempu cu dr. Richard K. Spence tabata director di cirugia na un hospital di New York el a bisa: “Testigonan di Jehova ta busca activamente lo mihó cu tin den tratamentu médico. Como grupo, nan ta e pashentnan mihó educá cu un ciruhano hamas lo topa.”

Dokternan a perfeccioná hopi técnica di cirugia sin sanger riba Testigonan di Jehova. Considerá e experencia dje ciruhano cardiovascular, Denton Cooley. Durante un periodo di 27 aña, su tim a efectuá cirugia di curason habrí sin sanger riba 663 Testigo di Jehova. E resultadonan ta demostrá bon cla cu por haci operacion di curason cu éxito sin usa sanger.

Ta berdad cu hopi hende a criticá Testigonan di Jehova pasobra nan ta nenga sanger. Pero un guia publicá dor dje Asociacion di Anestetista di Gran Bretania i Irlanda ta yama e posicion dje Testigonan “un señal di respet pa bida.” Di berdad e posicion riguroso dje Testigonan tabata un forsa principal tras dje echo cu tratamentu médico mas safe a bira disponibel pa tur hende. Profesor Stein A. Evensen, dje Hospital Nacional di Norwega, ta skirbi: “Testigonan di Jehova cu tabatin mester di cirugia a mustra e caminda i a pone preshon pa bini cu mehoracion den un sector importante dje servicio di salubridad di Norwega.”

Pa yuda dokternan percurá tratamentu sin usa sanger, Testigonan di Jehova a desaroyá un servicio di contacto útil. Actualmente tin mas cu 1.400 Comité di Contacto cu Hospital rond mundu cu ta ekipá pa duna dokter i investigadónan literatura médico for di un banco di dato di mas cu 3.000 artículo relacioná cu medicina i cirugia sin sanger. Dr. Charles Baron, profesor na Boston College Law School, ta comentá: “Awendia no ta Testigonan di Jehova so, sino pashentnan en general tambe, tin ménos chens di haña transfusion di sanger innecesario. I esei ta debí n’e trabou dje Testigonan su Comiténan di Contacto cu Hospital.” *

E informacion riba medicina i cirugia sin sanger cu Testigonan di Jehova a compilá tabata di beneficio pa hopi hende den e campo médico. Por ehempel, ora di prepará informacion pa un buki titulá Autotransfusion: Therapeutic Principles and Trends, e autornan a pidi Testigonan di Jehova informacion riba alternativanan pa transfusion di sanger. Gustosamente e Testigonan a cumpli cu nan peticion. Despues e autornan a declará cu gratitud: “Den tur loke nos a lesa riba e tópico aki, nunca nos no a mira un lista asina corticu i completo di estrategianan pa evitá transfusion di sanger di donante.”

Progreso den e campo médico a pone hopi hende pensa riba medicina sin sanger. Ki desaroyonan nos por spera den futuro? Profesor Luc Montagnier, descubridó dje vírus di AIDS, ta bisa: “E desaroyo di nos comprendimentu den e campo aki ta mustra cu un dia transfusion di sanger tin cu pasa pa historia.” Miéntras tantu, alternativanan pa sanger ya ta salbando bida caba.

[Nota]

[Kuadro/Plachinan na página 7]

Loke Algun Dokter Ta Bisa

‘Cirugia sin sanger no ta pa Testigonan di Jehova so, sino pa tur pashent. Ami ta haña cu tur dokter mester ta enbolbí den dje.’​—⁠Dr. Joachim Boldt, profesor di anestesiologia, Ludwigshafen, Alemania.

“Aunke transfusion di sanger ta mas safe awe cu den pasado, tog e tin riesgo cuné, entre otro, reac­cionnan dje sistema inmuno i di haña hepatítis of malesanan transmití sexualmente.”​—⁠Dr. Terrence J. Sacchi, asistent profesor clínico di medicina.

“Mayoria dokter ta duna transfusion automáticamente i gewoon ta duna esaki liberalmente i pa loco. Ami no.”​—⁠Dr. Alex Zapolanski, director di cirugia cardíaco na e Instituto di Curason di San Francisco.

“Ami no sa di ningun operacion convencional di barica cu, den caso di un pashent normal, rutinariamente ta rekerí transfusion di sanger.”​—Dr. Johannes Scheele, profesor di cirugia, Jena, Alemania.

[Plachinan]

Dr. Terrence J. Sacchi

Dr. Joachim Boldt

[Kuadro/Plachinan na página 8]

Medicina i Cirugia sin Sanger

Algun dje Métodonan

Líkido: Ta usa lactato di Ringer, dextran, hidroxietílico di zetmeel, i otro líkidonan pa mantené e volúmen di sanger, loke ta prevení shok debí na demasiado pérdida di sanger. Awor nan ta test algun líkido cu por transportá oxígeno.

Remedi: Proteinanan manipulá genéticamente por stimulá produccion di cel corá (eritropoyetin), plaketa di sanger (interleukina-11) i vários tipo di cel blancu (GM-CSF, G-CSF). Otro remedinan ta reducí pérdida di sanger considerablemente durante cirugia (aprotinin, antifibrinolítico) of ta yuda reducí sangramentu di ripiente (desmopresina).

Artículonan biológico pa para sangramentu: Ta usa gasa di fibranan di colágen i celulosa pa stop sangramentu dor di aplicá nan direct riba e herida. Lijm i seyadornan di fribina por plug herida causá dor di perforacion of por tapa áreanan grandi di tehido cu ta sangra.

Reciclahe di sanger: Mashinnan di reciclahe ta recuperá sanger cu ta bai perdí durante cirugia of dor di lesion. E mashin ta limpia e sanger i por mand’é bek p’e pashent via un circuito sin interupcion. Den casonan extremo, por recuperá liternan di sanger usando un sistema asina.

Hermentnan kirúrgico: Tin algun aparato cu ta corta i seya e adernan mesora. Otro aparatonan por seya sangramentu riba áreanan grandi di tehido. Instrumentonan di laparoscopí i esnan cu ta haci cortá mínimo ta permití dokternan haci cirugia sin e pérdida di sanger cu ta compañá cortánan grandi.

Técnicanan kirúrgico: Planeamentu cabal promé cu operacion, incluso consultá cu dokternan clínico experenciá, ta yuda e tim kirúrgico evitá complicacionnan. Accion inmediato pa para ­sangramentu ta esencial. Tardansanan di mas cu 24 ora por ­aumentá mashá e chens cu e pashent ta muri. Parti cirugia grandi den vários cirugia chikitu ta reducí e pérdida total di sanger.

 [Kuadro/Plachinan na página 10]

Medicina sin Sanger​—⁠‘E Norma Nobo pa Cuido’?

SPIERTA! a considerá e beneficionan di medicina i cirugia sin sanger cu cuater experto riba e tereno aki.

Fuera di pashentnan cu pa motibunan religioso ta nenga transfusion di sanger, ken mas ta mustra interes den medicina sin sanger?

Dr. Spahn: Esnan cu ta pidi medicina sin sanger na nos centro por lo general ta pashentnan sumamente bon informá.

Dr. Shander: Na 1998 e cantidad di pashent cu a nenga sanger pa motibunan personal a surpasá e cantidad di pashent cu a nenga sanger pa motibunan religioso.

Dr. Boyd: Pashentnan cu cancer ta un ehempel. A keda demostrá hopi biaha cu si nan no haña sanger, nan ta progresá mihó i no tin asina hopi caso caminda e malesa ta bini bek.

Dr. Spahn: Hopi bes nos ta trata profesornan di universidad i nan famianan sin usa sanger. Asta ciruhanonan ta pidi nos pa evitá transfusion! Por ehempel, un ciruhano a bin cerca nos pa su casá cu mester a haci un operacion. E ciruhano di: “Djis haci sigur di un cos: cu e no ta haña un transfusion di sanger!”

Dr. Shander: Miembronan di mi departamento di anestesia a bisa: ‘E pashentnan aki cu no ta haña sanger ta bai mes bon i kisas asta mihó. Pakico nos mester tin dos norma di cuido? Si esaki ta e mihó cuido, nos mester aplik’é na tur hende.’ P’esei awor nos ta tratando pa haci medicina sin sanger e norma di cuido.

Sr. Earnshaw: Ta cierto cu cirugia sin sanger ta relevante foral pa Testigonan di Jehova. Sin embargo, esei ta e manera cu nos kier trata tur hende.

E método sin sanger ta mas caru of ménos caru?

Sr. Earnshaw: E ta scapa gastu.

Dr. Shander: Cu medicina sin sanger tin un reduccion di gastu di 25 porciento.

Dr. Boyd: Pa e motibu ei so caba, nos mester us’é.

Con leu nos a avansá den e uso di maneho médico sin sanger?

Dr. Boyd: Ami ta pensa cu e ta masha progresivo. Sigur nos no ta na fin dje caminda. Cada bes cu nos bira wak, nos ta haña un motibu nobo válido pa no usa sanger.

[Plachinan]

Dr. Donat R. Spahn profesor di anestesiologia, Zurich, Suisa

Dr. Aryeh Shander asistent profesor clínico di anestesiologia, Merca

Sr. Peter Earnshaw, FRCS, ciruhano ortopédico specialista, Londen, Inglatera

Dr. Mark E. Boyd profesor di parto i ginecologia, Cánada

[Kuadro na página 11]

E Papel dje Pashent

▪ Papia cu bo dokter tocante alternativanan sin sanger promé cu surgi necesidad di tratamentu. Esaki ta importante foral pa hende muher na estado, mayornan cu yu chikitu i hende di edad.

▪ Pone bo deseonan riba papel, foral si tin un documento legal disponibel pa tal propósito.

▪ Si bo dokter no ta dispuesto pa trata bo sin usa sanger, busca un dokter cu sí lo cumpli cu bo deseo.

▪ Como cu cierto alternativanan pa sanger mester di tempu pa ta eficas, no tarda pa busca tratamentu si bo sa cu bo mester haci un operacion.