For di Nos Lectornan

Vasco da Gama Mi a disfrutá masha hopi dje artículo “E Biahe Extraordinario di Vasco da Gama.” (8 di april 1999) E tabata informativo i cu bunita plachi. Boso ta bisa den e artículo cu e tabatin tres barcu chikitu riba su biahe, pero eigenlijk nan tabata cuater. Tambe, boso ta bisa cu da Gama a regresá Lisboa dia 8 di september 1499. Sin embargo, el a yega banda di fin di augustus.

P. N., Kenya

Ta berdad cu da Gama su biahe a cuminsá cu cuater barcu. Sin embargo, e parti dje biahe describí den e introduccion a tuma lugá despues cu e di cuater barcu a ser destruí. Pa loke ta e fecha di su yegada na Lisboa, mayoria fuente ta pon’é na principio di september. Ta interesante cu e buki “Portugal and the Discoveries” (Portugal i e Descubrimentunan) ta declará: “Vasco da Gama a yega dia 29 di augustus of cerca dje fecha ei, i a ser ricibí pa Rey cu tur debido ceremonia dia 8 di september.” Esaki lo por reconciliá e aparente discrepancia.—RED.

Puzelnan Mi kier skirbi boso tocante e puzelnan den Spierta! Mi gusta nan pasobra nan ta tene mi celebro activo, i na edad di 78 aña, bo tin cu tene e mente activo. Ora nos lesa Bijbel, por lo general nos mente no ta warda tal informacion detayá manera esnan presentá den e puzelnan. P’esei mi ta tuma tempu pa busca tur e textonan bíblico citá. Danki pa e rasgo aki.

J. W., Merca

Cincu Yu Homber Mi a haña e artículo “Mi Ta Gradicidu na Jehova pa Mi Cincu Yunan” (8 di april 1999) interesante, ya cu tabatin vários cos similar entre Helen Saulsbery i mi mama. Nan tur dos a bautisá e mésun aña. Mescos cu Helen, mi mama a keda cas i a cuida nos ora nos famia tabata den pertá financiero como cu mi tata su compania a bati bankrut. Mi mama tambe a sirbi como pionero, un predicadó di tempu completo, i semper el a conta nos experencianan di veld interesante. Esaki a haci e sirbishi di pionero algu masha atractivo pa mi. Awor cu mi mes tin dos yu muher, mi por comprendé cuantu esfuerso mi mama a haci pa nos.

M. S., Hapon

Un danki special pa e artículo. Como tata, mi ta purba sigui e conseho bíblico, pero hopi bes mi ta sinti mi inadecuá. E experencia di famia Saulsbery a fortalecé mi pa sigui padilanti.

R. M. R., Brazil

Kier Cos Mi ta un mucha muher di 12 aña. Mi kier yama boso danki pa e artículo “Hóbennan Sa Puntra . . . Di Con Mi No Por Haña e Cosnan Cu Mi Kier?” (8 di april 1999) Tin cos cu mi kier, por ehempel un baiskel i un guitara. Pero mi tata no por cumpra nan pa mi. Esaki ta desapuntá mi. Pero tog, boso artículo a ègt animá mi. Danki pa publicá e conseho aki manera di un tata.

C. U., Nigeria

Peso Mi tin dies aña. Danki pa boso artículo “Hóbennan Sa Puntra . . . Con Mi Por Vence Mi Obsesion cu Peso?” (8 di juni 1999) Semper mi a pensa cu mi ta muchu pisá. Dor di lesa e artículo aki, mi a bin comprendé cu un persona su figura no ta e cos mas importante. Mas importante ta un persona su cualidadnan.

M. S., Rusia