Kofi Ta Subiendo Bo Colesterol?

DJE CORESPONSAL DI SPIERTA! NA BRAZIL

INVESTIGADONAN n’e Universidad Agrícola di Wageningen, Hulanda, ta bisa cu si bo bebe kofi no-filtrá lo e subi bo nivel di colesterol.

E palabra crucial ta “no-filtrá.” Di con? Research Reports, un boletin dje Organisacion pa Investigacion Científico di Hulanda, ta bisa cu bonchi di kofi ta contené un substancia cu ta hisa colesterol cu yama cafestol. Ora basha awa cayente direct riba e kofi mulá, e ta extraé e cafestol. Mescos ta cierto ora herebé kofi fini mulá vários bes den awa, manera ta haci cu kofi turco, of ora ta usa un filter di metal en bes di filter di papel, manera den pochi frances cu ta primi e kofi mulá despues di hereb’é. Sin filter di papel, e cafestol ta keda den e kofi trahá.

Un cup di kofi no-filtrá, cu por contené te cu cuater miligram di cafestol, por subi e nivel di colesterol cu 1 porciento. Kofi espresso tambe ta contené cafestol, ya cu ta trah’é sin filter di papel. Sin embargo, si bo bebe un kopi chikitu esei por limitá cuantu bo colesterol ta subi. Ménos espresso, ménos cafestol, kisas un of dos miligram so pa cada kopi. Sin embargo, Research Reports ta advertí cu cincu kopi chikitu di espresso pa dia por subi e nivel di colesterol dje curpa cu 2 porciento.

E punto esencial ta cu kofi trahá cu filter di papel no tin cafestol.