Hobennan Sa Puntra . . .

Mi Mester Tin un Tarheta di Crédito?

“Mi a haña mi promé oferta pa tarheta di crédito via post ora mi tabatin 16 aña. . . . Ora mi a haci 18 aña, mi debe a subi te na 60.000 dollar.”—Kristin.

NA PROME instante, Kristin a planea pa usa su tarheta di crédito pa emergencia so, i kisas pa de bes en cuando cumpra un cos cu e tabata kier pero no por a pagu’é kèsh. Pero cos a sali for di man. “Mi a cuminsá cumpra cos descontrolá i bestèl pa loco for di catalog,” Kristin ta confesá. “Mi a cumpra cos cu mi no tabata ni gusta.” Awor Kristin tin un punto di bista diferente di tarheta di crédito. “Mi no tabatin e mínimo idea di cuantu e pida karchi di plestik ei lo a bruha mi bida,” e ta bisa.—Revista Teen.

Kristin su experencia no ta un caso único. Un cantidad creciente di hóben ta riba caminda pa peliger financiero dor di usa e pida plestik ei, esta, e tarheta di crédito. Den algun caso, companianan ta mik agresivamente riba hubentud. Probablemente nan sa cu pa hopi hende cu ta ansioso pa gasta cen, tarheta di crédito por bira “un droga financiero,” manera e consehero financiero Jane Bryant Quinn ta yam’é. Quinn ta bisa cu “mas un hende usa nan, mas difícil ta bira pa stop.”

Ta cierto cu un tarheta di crédito por ta bentahoso, por ehempel, ora surgi un emergencia of ora no ta sabí pa bo cana cu cen kèsh. Esei ta un motibu pakico tarhetanan di crédito a bira asina popular na Merca, i tambe den otro paisnan. Sin embargo, si no usa tarheta di crédito den un manera responsabel, e por benta su usadó den un pos financiero sin fondo. Pues, un informe publicá den e korant di Toronto Globe and Mail a mencioná un aumento tripel “den e cantidad di hóbennan entre 20 pa 23 aña cu ta yen-yen di debe i cu a acudí pa yudansa na e Servicio di Conseho di Crédito di Toronto.” E informe ta mencioná cu hopi di nan tabatin debe te cu 25.000 dollar canades, i cuentanan di tarheta di crédito tabata un dje causanan principal di debe.

Abo mester tin un tarheta di crédito? Esei ta algu cu bo mayornan tin cu dicidí. Si nan ta pensa cu bo mester warda, tene pacenshi. Si bo duna prueba di ta sabí den bo manera di gasta placa, kisas lo no tarda muchu pa bo mayornan duna bo mas responsabilidad financiero. (Compará cu Lucas 16:10.) Miéntras tantu, bo mester sa cu usa tarheta di crédito—casi mescos cu corementu di auto—tin tantu recompensa como riesgo.

Calculá e Gastu

Cumpra cu tarheta di crédito ta básicamente mescos cu fia placa. Mescos cu den tur caso  di fia placa, bo tin cu paga bek loke nan fia bo. (Proverbionan 22:7) Pero con bo ta paga artículonan cu bo cumpra cu un tarheta di crédito?

Normalmente, na fin di cada luna nan ta manda pa bo un statement cu ta mustra e compranan cu a haci cu e karchi i tambe e total cu bo debe. E statement ta indicá tambe cuantu nan ta verwagt pa bo paga mesora. Por lo general, e montante aki ta basta abou. P’esei bo por razoná: ‘Esaki no ta dje malu ei. Si tur luna mi paga e mínimo so cu nan ta rekerí, cu tempu mi debe ta pagá.’ Sin embargo, e problema ta cu despues di un periodo di gracia, nan ta cuminsá cobra bo interes riba e suma cu bo debe ainda. I e porcentahe di interes riba tarheta di crédito por ta basta haltu. *

Tuma por ehempel Joseph, kende su saldo riba e statement di un luna tabata $1.000. Claro cu Joseph mester a paga solamente e montante mínimo rekerí, cu tabata $20. Pero ora el a analisá su statement mas mihó, Joseph a ripará cu e saldo dje luna ei a incluí un interes di casi $17! Esaki a nificá cu asta si Joseph a paga e mínimo di $20, ta $3 so a kita for di su debe di $1.000!

Cuantu tempu lo tuma pa paga un cuenta di tarheta di crédito si bo ta paga solamente e suma mínimo? Citando un ehempel hipotético, un foyeto publicá dor dje Comision Federal di Negoshi i American Express ta bisa: “Si bo tin un debe di $2.000, cu 18,5% di interes i un pago mensual chikitu cu ta e mínimo, lo dura 11 aña pa paga e debe i lo costa bo un $1.934 mas na interes so, loke ta haci e costo total dje cos cu bo a cumpra casi dòbel dje prijs original.”

Manera bo por mira, si bo no tene cuidou, bo por hinca bo mes den un buracu financiero hopi hundu cu un tarheta di crédito. Segun Kristin: “Bon mirá, mi tabata paga casi dòbel pa tur cos. Ora mi a cuminsá haña mi cu problema pa paga, e companianan di crédito a agregá boet pa pago lat. Mi no tabata sa kico pa haci.”

Uso Responsabel di un Tarheta di Crédito

Kristin a siña dor di un experencia amargo cu e sistema di “cumpra awor, paga despues,” por ta peligroso. Debenan por aumentá lihé, i  promé cu bo sa, bo pago mensual mínimo kisas ta paga casi solamente bo interes. Con usadónan responsabel di tarheta di crédito ta evitá di cai den e trampa financiero ei?

● Nan ta tene registro di loke nan ta cumpra i ta examiná nan statement mensual cuidadosamente pa haci sigur cu ta cobra nan solamente pa compranan cu nan a haci.

● Nan ta paga nan recibu unbes, i ta realisá cu un bon registro di crédito probablemente lo ta útil despues, kisas ora nan solicitá pa un trabou of seguro of ora di financiá un auto of un cas.

● Si ta posibel, nan ta paga e suma completo cu nan debe pa asina evitá cu ta cobra nan un interes haltu riba e saldo.

● Nan no ta duna hende nan number di tarheta di crédito ni su fecha di vencementu via telefon, a ménos cu nan conocé e persona of e compania cu cua nan ta trata.

● Nunca nan no ta fia niun hende nan tarheta di crédito, ni sikiera un amigu. Al fin i al cabo, ta e registro di crédito di e doño dje karchi lo ser afectá si malusá e karchi.

● Nan ta evitá di usa tarheta di crédito como un manera pa lanta placa lihé, como si fuera e ta un karchi di banco. Corda, por lo general tin interes mas haltu ora bo usa e karchi pa lanta cen cu ora bo cumpra cos cuné.

● Nan no ta yena i manda tur aplicacion pa tarheta di crédito cu nan haña. Pa mayoria hóben, un karchi ta basta.

● Nan ta usa nan tarheta di crédito cu respet, plenamente conciente cu ora nan cumpra cos cuné, ta cen mes nan ta gasta tog, maske nan no ta usa cen di papel ni moneda.

Disfrutá dje Beneficionan

Sea bo tin un tarheta di crédito awor aki of bo ta pensa pa busca un den futuro cercano, familiarisá bo mes bon cu tantu e beneficio como e riesgonan. Haci bo mes e siguiente preguntanan: Di con mi ta sinti cu mi mester di un tarheta di crédito? E ta djis pa mi cumpra cos material cuné, pa mi por tin e último gritu di moda, pa impresioná mi amigunan? Mi mester siña keda mas contentu cu cosnan básico, esta, cu loke apostel cristian Pablo a yama “paña i dak”? (1 Timoteo 6:8) Debe di tarheta di crédito lo causa carganan financiero aplastante cu lo pone mi perde bista dje cosnan mas importante den bida?—Mateo 6:33; Filipensenan 1:8-11.

Refleccioná riba e preguntanan aki i combersá riba nan cu bo mayornan. Si bo haci esei, anto sea bo tin un tarheta di crédito of no, lo bo evitá e dolor di curason financiero cu hopi hende a hinca nan mes aden.—Proverbionan 22:3.

[Nota]

[Kuadro na página 19]

E Balor di Consentimentu di Mayor

Hopi hóben ta haña nan promé chens di tin nan mes tarheta di crédito ora nan haña un aplicacion via post. De facto, tin ta ricibí vários aplicacion durante un periodo di tempu. Jane Bryant Quinn ta splica: “Tin un competencia intenso entre companianan di karchi pa pone tarheta di crédito den man di hóbennan, pasobra segun estudionan nos tin tendencia di keda cu e karchi cu nos a cuminsá cuné.”

Por lo general un mayor of un otro adulto cu tin un registro di crédito establecí tin cu firma e aplicacion pa tarheta di crédito pa asina e compania dje karchi tin cierto siguransa cu lo paga e compranan hací cu e karchi. Lamentablemente, hopi hóben ta recurí na engaño pa evitá e paso aki. Un hóben a firma nomber di su wela como e aplicante principal i su mes nomber como co-aplicante, sin cu su wela tabata sa. Imaginá bo e wela su sorpresa ora el a haña sa cu el a debe dies di miles di dollar!

Falsificá firma di un mayor of un otro adulto riba un aplicacion di tarheta di crédito ta algu desonrado i Dios ta condená desonrades. (Proverbionan 11:1; Hebreonan 13:18) Pues, si bo kier un tarheta di crédito, papia cu bo mayornan tocante esei. Riba plaso largu ta cumbiní mashá pa bo tin nan consentimentu. Corda, probablemente bo mayornan tin experencia den paga debe, i nan por duna bo bon conseho. Pues papia cu nan, i no recurí nunca na medionan desonrado pa haña un tarheta di crédito.

[Plachi na página 18]

Uso pa loco di tarheta di crédito por hiba na desaster financiero