‘Nan Tabata Asina Refrescante!’

RECIENTEMENTE e general manager di un hotel situá cerca di un dje aeropuertonan internacional di Hapon a bishitá e oficina di sucursal di Testigonan di Jehova na Ebina. El a parce hopi excitá. Di con?

Durante 1998, mas cu 200 Testigo a keda na hotel dje manager ei, riba nan caminda pa bai i bini dje congresonan internacional na Africa, Australia, Korea i Norteamérica. Ora e personal di servicio dje hotel tabatin un reunion pa repasá e actividadnan dje aña cu a pasa, nan a comentá cu dje 30.000 huéspednan anual dje hotel, e delegadonan aki di congreso tabata esnan mas impresionante cu nan a sirbi.

P’esei, e manager di hotel a biaha pa Ebina pa expresá su aprecio. El a bisa: ‘E huéspednan ei tabatin masha bon manera i nan a laga nan kambernan limpi i na ordu. Hopi bes nan a expresá nan aprecio. Ademas, nan a duna palabranan di animacion for di Bijbel. Nan tabata asina refrescante!’

E manager a sigui bisa: ‘Nos ta haña hopi huésped cu tin preocupacion. P’esei nos tabata busca algun informacion útil pa nan. Nos lo tin gana pa nan beneficiá dje siñansa di Bijbel pasobra e ta ehercé un influencia positivo riba bida di hende.’

Como resultado, e manager a pidi 80 ehemplar di vários publicacion di Testigonan di Jehova pa asina e por pone nan den e kambernan dje hotel. Entre e publicacionnan cu el a pidi tabatin e buki di 192 página E Secreto pa Felicidad den Famia. Si abo lo kier un ehemplar, por fabor, yena e cupon aki bou i mand’é n’e adres riba e cupon of na un adres mas cumbiniente mencioná na página 5 dje revista aki.

□ Manda mi e buki E Secreto pa Felicidad den Famia.

□ Por fabor, tuma contacto cu mi pa un studio di Bijbel grátis na cas.