Pioneronan den Medicina

NA EDAD di 61 aña, dokternan a bisa José, un belga dje pueblo chikitu di Oupeye, cu e mester haci un transplante di higra. Segun José: “Esei tabata e shok di mas grandi di mi bida.” Cuater década pasá so, transplante di higra tabata algu inconcebibel. Asta den añanan ’70, solamente 30 porciento di hende cu a hacié a sobrebibí. Sin embargo, awe operacion di transplante di higra ta algu rutinario, cu un porcentahe hopi mas haltu di éxito.

Pero te ainda tin un desbentaha grandi. Como cu hopi bes transplante di higra ta encerá masha hopi sangramentu, dokternan por lo general ta duna transfusion di sanger durante e operacion. Debí na José su conviccion religioso, e no tabata kier sanger. Pero sí e kier a haci e transplante. Imposibel? Tin hende kisas a pensa asina. Pero e ciruhano principal tabata di opinion cu e i su coleganan tabatin un bon chens di haci e operacion cu éxito sin usa sanger. I esei ta precis loke nan a haci! Binticincu dia so despues di su operacion, José tabata na cas bek huntu cu su casá i su yu muher. *

Danki na e abilidadnan di personanan cu e revista Time ta yama “héroenan di medicina,” medicina i cirugia sin sanger ta mas comun awe cu nunca. Pero di con tin un demanda asina grandi p’e? Pa contestá e pregunta, laga nos examiná e historia turbulento di transfusion di sanger.

[Nota]

[Plachi na página 3]

Rond mundu tin actualmente mas cu 90.000 dokter cu a duna di conocé cu nan ta dispuesto pa trata Testigonan di Jehova sin usa sanger