Famianan sin Tata—Con pa Kibra e Ciclo

SI E tendencia actual sigui, famianan sin tata lo bira djis akí e norma. Segun un raport dje Departamento di Salubridad i Servicionan Humano di Merca: “Yunan cu lanta cu un solo mayor tin tendencia di haña punto mas abou na scol, tin mas problema di comportacion i tin mas caso di problemanan crónico di salú i sikiátrico. . . . Lanta den un famia di mama soltero ta ser asociá cu mayor riesgo di haña yu como tiener, di stop di bai scol, [i] di cai cerá.”

Nada straño anto cu científiconan social, conseheronan di famia, educadónan i asta políticonan ta desesperadamente en busca di maneranan pa pone un paro na e tendencia devastador aki. Nan a tene manifestacionnan masal pa hende homber pa stimulá orguyo den paternidad i pa confirmá homber su compromiso pa cu e famia. Bukinan tocante paternidad a inundá mercado. Hende a haci esfuerso pa forsa tatanan atendé nan responsabilidad. Na Merca, “tatanan mal pagadó,” esta, cu no ta duna cen pa cria nan yunan, a ser castigá dor di huesnan, atacá den talk shownan na television i asta someté na humiyacion público. Sin embargo, e esfuersonan ei a producí masha tiki resultado.

Solucionnan Purá Pero Inadecuá

Drecha cos den purá tambe por producí resultadonan dudoso. Por ehempel, un muher divorciá kisas ta bolbe casa purá, cu e speransa di duna su yunan un tata nobo. Pero maske casa di nobo por tin su bentahanan, lo e por trece problema tambe. Tin biaha muchanan ta resistí di aceptá un otro hende como nan tata. Tin biaha nan no ta acept’é nunca. Un estudio a revelá cu “casi dos tercer parti di mucha muher cu a biba huntu cu un mayor di criansa, a bandoná cas promé cu 19 aña . . . , compará cu 50% di mucha muher di hogarnan intacto.” Asta den famianan di criansa exitoso, tin biaha ta dura vários aña promé cu e muchanan ta aceptá e padraso. *

Mescos tambe, no tin un solucion purá pa e problema di tienernan na estado. Por ehempel, aborto ta violá e ley di Dios i ta exigí pa un muher hóben cera e porta di su tierno compasion pa cu e bida chikitu cu ta desaroyando den dje. (Exodo 20:13; 21:22, 23; Salmo 139:14-16; compará cu 1 Juan 3:17.) Con esei por keda sin laga sicatrisnan emocional? Hopi hende ta considerá duna e yu pa adopcion como un solucion mas humano, pero esei tambe por laga sicatrisnan emocional, tantu cerca e mama como e yu.

 No, solucionnan purá lo no kibra e ciclo di famianan sin tata. Lo bin un paro na e tendencianan actual den famia solamente si hende ta dispuesto pa haci cambionan profundo den nan manera di pensa, nan actitud, nan comportacion i nan moralidad. Mester di algu mas cu papiamentu di palabranan grandi i sicologia popular pa por motivá hende haci tal cambionan extenso. E “algu mas” ei ta ser hañá den e Palabra di Dios, Bijbel. Al fin i al cabo, ta Dios mes ta esun cu a instituí e areglo di famia. (Efesionan 3:14, 15) E sa mihó cu cualkier hende kico yunan tin mester.

Principionan Bíblico Ta Yuda Famianan Trata cu e Situacion

Pero di berdad Bijbel por yuda yunan cu falta un mayor? Yunan asina no a ricibí daño cu no por drecha mas? No, no ta asina. Na principio dje artículo aki, nos a cita un raport gubernamental di Merca cu a mencioná hopi dje riesgonan cu e muchanan aki ta enfrentá. Apesar dje palabranan cu ta spierta pa problema, e raport a concluí: “Maske tin evidencia consistente di mayor riesgo, e investigacion ta mustra tambe cu mayoria mucha den famianan di un solo mayor ta desaroyá normal.” Sí, e consecuencianan di lanta sin tata por ser eliminá of por lo ménos minimisá. Foral si aplicá principionan bíblico den criamentu di yu.

Esaki ta exigí trabou duru di parti di un mayor soltero, algu cu na promé instante por parce aplastante. Pero si bo ta den e situacion aki, bo por siña dependé plenamente riba Jehova Dios. (Proverbionan 3:1, 2) Algun muher cristian den tempu bíblico a enfrentá situacionnan penoso, manera bira biuda. En cuanto muhernan asina Bijbel ta bisa: “E hende muher cu realmente ta biuda i cu a ser lagá desampará a pone su speransa den Dios i ta persistí den súplica i oracion anochi i di dia.” (1 Timoteo 5:5) Corda cu Jehova ta yama su mes “un tata di huérfanonan di tata.” (Salmo 68:5) Bo por tin sigur cu lo e apoyá un muher temeroso di Dios den su esfuersonan pa cria su yunan.

Un manera esencial pa yuda bo yunan crece bira adultonan balansá i maduro ta dor di conducí un studio di Bijbel regular cu nan na cas. (Deuteronomio 6:6-9) Entre Testigonan di Jehova, hopi mayor soltero ta usa publicacionnan basá riba Bijbel cu a ser trahá specíficamente pa hóbennan, manera e buki Loke hovenan sa puntra—Contesta práctica. * E informacion den dje ta yuda hóbennan desaroyá normanan moral cu por yuda nan evitá di cometé mésun eror cu nan mayornan. Segun cu e muchanan ta siña conocé Jehova Dios, nan por cuminsá ripará cu nan tin un Tata celestial cu ta profundamente interesá den nan. (Salmo 27:10) Esaki por yuda nan trata cu e sintimentu di a ser bandoná. Un mucha muher británico cu a experenciá e divorcio di su mayornan ta corda: “Atrabes di henter e situacion, Mama a inculcá den mi e necesidad di  haci oracion i di dependé completamente riba Jehova. Esei a yuda nos trata cu e situacion.”

Con pa Mantené e Banchi Entre Mayor i Yu

Bijbel ta mustra bon cla cu un yu tin cu onra su mama i su tata. (Exodo 20:12) I divorcio no ta kibra e banchi entre tata cu yu. Maske e ex-esposo kisas no ta biba na cas mas, tog e yunan por beneficiá ainda di tin un relacion caluroso cuné. * E problema ta cu e mama kisas ta rabiá cu e tata i no ta gusta cu e ta atendé cu e muchanan. Con e mama por trata cu e sintimentunan aki?

Bijbel ta duna bon conseho ora e ta spierta: “Tene cuidou pa furia no atraé bo pa [cometé actonan] cu rencor . . . Vigilá pa bo no dirigí bo mes na loke ta perhudicial.” (Job 36:18-21) Ta cierto cu no ta fácil pa papia amablemente di un hende cu a hùrt bo of bandoná bo. Pero puntra bo mes: ‘Un mucha muher por siña confia un hende homber si constant e tin cu tende con mal hende su tata ta? Un mucha homber por desaroyá un personalidad stabil i baronil si ta castigu’é cu e palabranan: “Bo ta mescos cu bo tata”? Yunan por tin un punto di bista sano di autoridad si ta siña nan despreciá nan tata of ta desanimá nan pa mir’é mes?’ Ta claro cu ta perhudicial pa saboteá bo yunan su relacion cu nan tata.

Kisas pa bo ta un sorpresa pa sa cu Bijbel no ta condená indignacion hustu. Bijbel ta bisa: “Rabia, i tog no peca.” (Efesionan 4:26) E picá no ta cu bo ta rabiá, pero sí cu bo ta ser controlá dor di “rabia, furia, maldad, abla ofensivo.” (Colosensenan 3:8) P’esei, evitá di zundra e muchanan su tata nan dilanti. Si bo ta sinti necesidad di expresá bo frustracion, sigui e sugerencia di Bijbel pa compartí bo “preocupacion ansioso,” pero hacié cerca un otro hende—no bo yunan—por ta un amiga di confiansa. (Proverbionan 12:25) Purba mantené un actitud positivo i evitá di meditá riba pasado. (Eclesiástes 7:10) E cosnan ei por contribuí hopi na calma bo rabia.

Por último, corda cu Bijbel ta manda un yu respetá su tata, asta si e tata su conducta no tabata ehemplar. (Efesionan 6:2, 3) Pues, purba yuda bo yunan mira e erornan di nan tata obhetivamente. Un mucha muher cu a lanta den un famia kibrá ta bisa: “Dor di mira mi tata obhetivamente—como un hende imperfecto cu ta faya—mi a bin acept’é finalmente.” Dor di animá bo yunan pa respetá nan tata, bo ta yuda nan desaroyá un punto di bista sano di bo autoridad como mayor!

Tambe ta importante pa bo no obscurecé e distincion entre bo papel como mayor i di nan como yu. Yunan ta bou di ‘e ley di nan mama’ ainda. (Proverbionan 1:8) Yu hombernan por sinti nan demasiado cargá si verwagt di nan pa ta ‘e homber di cas.’ Di igual manera yunan muher por sinti nan aplastá si nan tin cu sirbi como confidente di nan mama. Bo mester duna bo yunan e siguransa cu abo como mayor  lo soru pa nan, no vise versa. (Compará cu 2 Corintionan 12:14.) Tal siguransa por laga nan sinti nan safe, maske e situacion di famia no ta ideal.

Tatanan Substituto

Pero kico si e tata no tin nada di haci cu e famia? Expertonan ta bisa cu yunan por beneficiá di asociacion masculino. Aunke ta asina cu e interes bondadoso cu un tio of un bisiña ta mustra den un mucha por contribuí na bon, lo e beneficiá foral dje asociacion masculino sano cu ta existí den e congregacion cristian. Jesus a primintí cu e congregacion lo tabata manera un famia cu ta duna sosten.—Marco 10:29, 30.

Den tempu bíblico, e hóben Timoteo a crece bira un homber di Dios sobresaliente, sin e apoyo di un tata creyente. Bijbel ta duna hopi dje crédito pa esaki na su mama i wela amoroso. (Echonan 16:1; 2 Timoteo 1:1-5) Sin embargo, Timoteo a beneficiá tambe di asociacion cu un homber cristian: apostel Pablo. Pablo a yama Timoteo su “yu stimá i fiel den Señor.” (1 Corintionan 4:17) Mescos awe, Testigonan di Jehova ta ser animá pa haci caso dje conseho bíblico “cuida huérfanonan i biudanan.” (Santiago 1:27) Ta urgi nan pa ‘rescatá huérfanonan di tata’ dor di mustra un interes sincero i balansá den muchanan asina. (Job 29:12) Un muher hóben, Annette, ta corda e interes sano cu un anciano cristian a mustra den dje tempu e tabata yong, i a bisa: “E tabata e único persona cu a ègt yega di sirbi pa mi como un substituto emocional di un tata.”

Kibra e Ciclo

E principionan aki por yuda yunan sin tata logra éxito. Apesar di tabatin un infancia cu desbentaha, nan por bira adultonan balansá i productivo, i tambe mayornan amoroso, fiel i dedicá. No obstante, prevení ta hopi mas mihó cu cura. I al final, ta solamente ora hende homber i hende muher comprometé nan mes pa aplicá Bijbel den nan bida, por kibra e ciclo di famianan sin tata. Por ehempel, dor di pega na e prohibicion di Bijbel en cuanto sex promé cu matrimonio i dor di sigui e normanan cu Bijbel ta pone pa esposo i esposa.—1 Corintionan 6:9; Efesionan 5:21-33.

Awendia, aunke hopi mucha tin tata na cas, tog por yama nan yu sin tata. Segun un experto den asuntunan di famia: “E problema mas grandi cu muchanan . . . ta enfrentá awe ta falta di atencion di nan mayornan i di pasa tempu cu nan.” E Palabra di Dios ta trata e cuestion aki stret. Relacioná cu nan yunan e ta manda tatanan: “Duna nan e instruccion, i e coreccion, cu ta pertenecé na un criansa cristian.” (Efesionan 6:4, New English Bible; Proverbionan 24:27) Ora tatanan ta sigui e conseho bíblico, yunan no tin miedu di ser bandoná.

Pero, ta realístico pa kere cu hende lo acudí na Bijbel masalmente? No. (Mateo 7:14) Pero Testigonan di Jehova a yuda miyones di hende haña felicidad den nan famia mediante un programa di studio di Bijbel na cas. * Claro cu Bijbel ta spierta cu tur pareha casá lo sufri “tribulacion den nan carni” debí na imperfeccion. (1 Corintionan 7:28) Pero esnan cu di berdad ta respetá e Palabra di Dios ta busca pa resolvé nan problemanan, i no ta divorciá asina nan haña nan cu problema. Ta cierto sí cu tin biaha ta na su lugá pa un cristian considerá separacion of asta divorcio. (Mateo 5:32) Sin embargo, sabiendo e posibel impacto cu esaki lo por tin riba su yunan lo impulsá un cristian pa scapa su matrimonio cuantu cu ta posibel.

Sigui conseho di Bijbel lo haci mas cu salba bo famia awor aki. Esei por haci posibel cu boso tur lo biba pa semper! Jesus a bisa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun cu bo a manda, Jesucristo.” (Juan 17:3) Lesa i aplicá e conseho hañá den e Palabra di Dios ta un dje mihó maneranan pa haci sigur cu bo famia lo keda intacto pa semper.

[Nota]

[Plachi na página 8, 9]

Un mayor soltero por tin éxito den cria yu dor di sigui principionan bíblico

[Plachi na página 10]

Hopi bes hombernan cristian por ‘rescatá un huérfano di tata’ dor di mustra un interes sincero i sano den dje