Observando Mundu

Rusia Ta Nenga di Registrá Jesuitanan

E Ministerio di Husticia ruso a nenga e solicitud dje Sociedad di Jesus pa registrá nan como un organisacion religioso independiente, segun informe di National Catholic Reporter. E Sociedad di Jesus, mihó conocí como e jesuitanan, a ser establecé na aña 1540. Bou di Rusia su ley nobo di religion, mayoria organisacion religioso tin cu bolbe registrá pa nan ricibí reconocimentu legal. Gruponan cu nan nenga di registrá no por imprimí ni distribuí literatura religioso, ni invitá ciudadanonan stranhero pa actividadnan religioso, ni establecé facilidadnan educativo. Rusia a bolbe registrá Testigonan di Jehova riba nivel nacional dia 29 di april 1999.

Aumento Drástico di Suicidio na Hapon

Na Hapon mas hende a cometé suicidio na 1998 cu den cualkier aña anterior, e korant The Daily Yomiuri ta informá. Segun e Agencia Policial Nacional di Hapon, 32.863 persona a mata nan curpa na 1998, mas cu tres biaha e cantidad cu a muri den accidente di tráfico na Hapon. A atribuí gran parti dje aumento na problemanan financiero causá dor dje desempleo cu a coge e nacion den su gara despues di un crísis económico recien. Suicidio ta e di seis causa principal di morto na Hapon.

Polucion di Aire Mortal

“Tráfico riba caminda ta e fuente di polucion cu ta aumentá mas lihé na Europa, i den algun pais e polucion di aire aki ta mata mas hende cu accidente [di tráfico],” e servicio di noticia Reuters ta informá. Segun un estudio di Organisacion Mundial di Salú, tur aña 21.000 hende na Austria, Francia i Suisa ta muri prematuramente di malesanan respiratorio of di curason cu ta ser iniciá dor di polucion di aire. Den un otro informe, ta ser calculá cu den 36 stad di India, 110 hende ta muri tur dia prematuramente como resultado di polucion di aire.

Datonan Digital Disparciendo Lihé

Pa años científiconan di computer a bisa cu warda informacion den forma digital ta mas confiabel cu ward’é riba papel. Pero awor, bibliotecario i archivarionan ta bin cu un otro version. Segun e revista Newsweek: “Nos ta perdiendo inmenso cantidad di informacion científico i histórico importante debí na desintegracion of dor cu [aparatonan] a bira anticuá.” Sistemanan digital di warda informacion, manera ‘disk drives,’ no por cu cayente, humedad, oxidacion ni camponan magnético variabel. I dependiendo dje condicion caminda warda nan, cintanan magnético usá pa almacená datonan digital lo por dura solamente un década, segun e revista. Un otro desafio pa esnan cu ta purba conserbá informacion digital ta e cambio rápido den tecnologia. E computernan cu ta ser usá pa warda datonan ta cambia asina lihé cu sistemanan ta bira anticuá rápidamente. Segun Abby Smith, dje Conseho di Recursonan di Biblioteca i Informacion: “Informacion no tin masha chens di scapa, a ménos cu bo tin na banda tambe un museo di ‘tape player’ i PC [computernan personal].”

Poblacion di India Ta Pasa Un Mil Miyon

Segun e Division di Poblacion di Nacionnan Uní, e poblacion di India a pasa e cantidad di un mil miyon na augustus 1999. Un poco mas cu 50 aña pasá, e poblacion di India tabata un tercer parti di loke e ta awor. Si e sigui crece n’e velocidad actual di 1,6 porciento pa aña, den un 40 aña asina, India lo pasa China como e nacion mas poblá na mundu. The New York Times ta informá cu “ya caba India cu China ta responsabel pa mas di un tercer parti dje hendenan na mundu.” Den ménos cu mei siglo, expectativa di duracion di bida na India a subi di 39 aña pa 63 aña.

Ménos Hende Ta Casa na Merca

Un estudio realisá dor dje Universidad di Rutgers su Proyecto Nacional di Matrimonio a descubrí cu e cantidad di matrimonio a baha na su porcentahe mas abou den historia skirbí, segun The Washington Post riba su Web site. Tambe e estudio a ripará cu djis despues di Guera Mundial II, 80 porciento dje muchanan dje nacion tabata lanta den un famia cu ámbos mayor biológico. Sin embargo, awe e cifra a baha te na 60 porciento. “E porcentahe di mucha  muher tiener cu a bisa cu haña un yu fuera di matrimonio ta un ‘estilo di bida digno’ a aumentá di 33 porciento pa 53 porciento den e último dos décadanan,” segun e informe. Nada straño anto cu e informe a bisa: “E areglo di matrimonio ta den problema serio”!

Problema di Educacion na Africa

All Africa News Agency ta informá cu mas cu 40 miyon mucha di edad escolar na Africa parti zuid di Sahara no ta bai scol. Un cantidad di problema a atacá e sistema escolar dje region ei. Por ehempel, como resultado di problemanan económico, hopi scol no tin awa i tiki of ningun baño. Tin scarcedad di buki di scol, i maestronan ta mal entrená. Ademas dje problemanan económico, tin hopi caso di mucha muher tiener cu ta sali na estado, loke ta e causa principal cu asina tantu di nan ta stop di bai scol. AIDS tambe tabatin un impacto negativo riba asistencia na scol. “Actividad sexual for di trempan entre adolesentenan a hiba na mas casonan di infeccion di AIDS entre adolesentenan,” segun Africa News. Den algun caso mucha muhernan cu no a haña AIDS mester keda cas pa cuida famianan cu sí tin e malesa. Segun dr. Edward Fiske, un specialista di educacion básico pa UNESCO: “Sin educacion, e futuro pa mayoria pais di Africa n’e parti zuid di Sahara ta insigur.”

Momia cu Dede di Pia Falsu

“Un dede di pia falsu cu nan a haña pegá na un momia ta parce di a ser usá na bida promé cu a dera e doño cuné 2.500 aña pasá,” The Sunday Times di Londen ta informá. Dr. Nicholas Reeves ta describí e dede falsu, trahá di linen saturá cu lijm di bestia i yesu, como “un produccion sofisticá, bunita diseñá, bon trahá i fuerte, i claramente un pedido special.” E dede di pia a bini ekipá cu uña i un capa di color di cueru. Tabatin un seri di ocho buracu den e dede di pia pa pegu’é. E buracunan ta sigui cuidadosamente e liña Y di un strèp di sandalia, di manera cu ora e dede tabata na su lugá, e strèp di sandalia lo a tapa e buracunan.

Dolor di Cabes Debí na Remedi pa Dolor!

Hende cu tres of mas bes pa siman ta bebe remedi pa dolor di cabes por ta sufri di dolor di cabes debí na maluso di remedi (na ingles MMH). Dokternan ta pensa cu e ta afectá 1 den cada 50 persona. Remedinan simpel, manera aspirin i tambe remedi pa pasa dolor cu bo ta haña riba recept, ta causa MMH. Ora e efecto analgésico pasa, e remedi por causa dolor di cabes cu e pashent ekibocadamente ta kere ta dolor di cabes normal of un migraine. E pashent ta bebe mas remedi pa pasa dolor, i asina ta ripití e ciclo. Dr. Tim Steiner, di Colegio Imperial, Londen, ta splica cu “mester asumí cu tur pashent cu ta keha di dolor di cabes crónico i diario, tin MMH.” Tambe el a comentá cu aunke tin algun aña caba cu nan sa dje problema aki, mayoria dokter di cas no ta familiarisá cuné i nan ta gewoon skirbi recept pa remedi mas fuerte pa pasa dolor, ora cu tur loke e pashentnan mester haci ta stop di bebe e remedinan ei, segun The Sunday Telegraph di Londen.

Cuido di Lenga

Bacteria cu ta sconde riba e parti patras di bo lenga por producí gas di sulfur cu ta causa mal aliento, segun un informe den e korant Prince George Citizen. “Bacteria ta bona den un ambiente secu, liber di oxígeno, i ta p’esei nan ta biba den e gleuf i buracunan cu ta leu dje aire cu nos ta manda abou na nos pulmon,” segun e informe. Skeiru i flos djente lo yuda, pero bo ta eliminá solamente 25 porciento di bacteria dor di skeiru djente. Dentista Allan Grove ta kere cu raspa lenga, un antiguo tradicion na Europa, ta “e cos principal mas importante cu bo por haci pa prevení mal aliento.” Un raspu di plestik “ta hopi mas mihó cu un skeiru di djente pa tene e lenga limpi i ros,” e korant Citizen ta bisa.

Un Wowo Nobo Ta Wak Universo

E telescop Gemini North, cu su base na Mauna Kea, Hawai, a habri su wowo pa wak universo na juni 1999. Su spiel cu ta colectá lus, cu un diameter di 8,1 meter, lo capacitá astrónomonan pa mira e obhetonan di mas vago den e skinanan mas profundo di espacio, segun e korant Independent di Londen. Tantu e telescop Gemini North como esun Hubble den espacio ta yuda astrónomonan mira eventonan cu a sosodé hopi tempu pasá i pues “mira bek den tempu.” E bentaha dje telescop Hubble ta cu e ta ubicá den espacio. Aunke Gemini ta riba tera, e ta dependé di ekipo di computer pa eliminá deformacion cu disturbionan atmosférico ta causa, i ta producí imágennan mes cla cu esnan di Hubble, si no ta mas cla.