Traha Mapa di Shelu Antes i Awor

TOKA NA

Traha Mapa di Shelu Antes i Awor

DJE CORESPONSAL DI SPIERTA! NA HULANDA

HOPI bes e bista di un shelu pretu manera felpa yen di strea plamá a impresioná hende, i den transcurso di historia esei a impuls’é pa expresá su admiracion pa e Creador di tal beyesa. Hopi tempu pasá, un poëta a sclama: “Shelunan ta declarando e gloria di Dios; i dje obra di su mannan e expansion ta informá.” (Salmo 19:1) Sin embargo, antiguo observadónan dje shelu di anochi a mira mas cu bunitesa.

Nan Ta Mira Figura den Shelu

Astrónomonan di pasado a ripará cu henter e cuerpo di strea a parce di ta move den un sistema ordená. Maske e streanan tabata move den shelu for di oost bai west, nan posicion un pa cu otro no tabata cambia. * Cu otro palabra, tur anochi bo por a mira e mésun gruponan specífico di strea. Como cu hende kier a pone un cierto órden den e cantidad incontabel di puntanan di lus, el a conectá streanan den grupo. Cu un poco imaginacion, e gruponan aki a parce bestia, hende of obheto. Asina e práctica di considerá configuracionnan fiho di strea como constelacion a bini na existencia.

Algun dje constelacionnan cu nos conocé awe a ser describí pa promé bes na antiguo Babilonia. Entre nan tin e 12 constelacionnan cu ta representá e signonan di zodiac. Esakinan a hunga—i ta hunga ainda—un papel importante den astrologia, cu ta divinacion dje supuesto influencia dje streanan riba asuntunan humano. Pero, Bijbel ta condená buscamentu di señal den strea. (Deuteronomio 18:10-12) Sin embargo, adoradónan di Jehova Dios tabata conciente cu e constelacionnan ta existí. Por ehempel, e buki bíblico di Job ta papia di Jehova como esun cu “ta traha e constelacion Ash, e constelacion Kesil i e constelacion Kimá.”—Job 9:9.

Nomber di hopi dje constelacionnan cu nos conocé awe ta di mitologia griego. Ainda bo por haña nombernan manera Cefeus, Casiopea, Andromeda i Hércules riba mapanan moderno di strea.

Mapanan di Strea di Pasado

Rond di aña 150 E.C., e astrónomo griego Tolomeo a producí un resúmen dje conocimentu astronómico di su tempu. E resúmen aki, titulá Almagest, ta contené un lista di 48 constelacion. Mapa i atlasnan di shelu cu hende a traha siglonan despues di Tolomeo, por lo general tabatin e mésun 48 constelacionnan. De echo, te cu rond di siglo 16, e cantidad di constelacionnan no a cambia. * Mas despues, nan a agregá 40 otro constelacion. Na 1922 e Union Astronómico Internacional a adoptá oficialmente e lista dje 88 constelacionnan aki.

Fuera dje constelacionnan, e publicacion di Tolomeo tabatin un lista di mas cu mil strea, cu informacion tocante nan briyo i nan posicion den shelu. Tolomeo no a duna solamente e posicion di un strea den longitud i latitud celestial, sino tambe a agregá mas detaye. Por ehempel, un strea den e constelacion Ursa Major, esta Grote Beer, ta ser describí como “e strea na cuminsamentu dje rabu,” i e ubicacion di un cometa ta ser duná como “na banda robes di Andromeda su rudia drechi.” Pues, segun un buki di instruccion, “tur bon astrónomo mester a conocé su anatomia celestial!”

Pero di con mayoria constelacion di antigwedad ta ubicá den e parti nort di shelu? Pasobra e práctica di considerá cierto grupo di strea como constelacion a originá den e área Mediteráneo, caminda e parti nort di shelu ta visibel, segun un trahadó di mapa di shelu. Ta te mas despues numa, ora hende a cuminsá explorá e parti zuid di shelu, nan a identificá constelacionnan nobo. Algun dje constelacionnan mas nobo aki tin nombernan manera Fornu Kímico, Oloshi Péndulo, Microscop i Telescop.

“E Shelu Cristian Yen di Strea”

Na 1627, e erudito aleman Julius Schiller a publicá un atlas di strea cu e título Coelum Stellatum Christianum (E Shelu Cristian Yen di Strea). El a haña cu tabata tempu pa saca paganismo for di shelu. Pues, el a cuminsá kita e figuranan pagano for di shelu i a remplasá nan cu figuranan for di Bijbel. E buki The Mapping of the Heavens (Trahando Mapa di Shelu) ta splica cu Schiller a asigná “e shelu nort na e Testament Nobo i e parti zuid na e Testament Bieu.” “Schiller su hemisferio zuid a ser transformá den un desfile di personahenan di Testament Bieu, Job ta tuma lugá dje Indjan i e Pouwis, e Centauro ta ser transformá den Abraham cu Isaac.” Den e Hemisferio Nort, “Casiopea ta bira Maria Magdalena, Perseus ta bira San Pablo, miéntras cu ta remplasá e diesdos signonan di Zodiac fácilmente cu e diesdos apostelnan.”

Ta un constelacion chikitu so a sobrebibí e limpiesa aki. Esei tabata Columba (Palomba), cu supuestamente a representá e palomba cu Noe a manda pa haña tera secu.

Mapanan den Transicion

Cu tempu, e aparencia dje mapanan di strea a cambia. Den siglo 17, despues cu a inventá telescop, a bira necesario pa tin mapanan cu a duna un posicion mas exacto dje streanan. Ademas, e decoracionnan elaborá cu a yena e mapanan di ántes a bira ménos prominente i cu tempu a disparcé. Awe, mayoria atlas di strea ta contené solamente strea, grupo di strea, nébula, galaxia i otro obhetonan di interes p’e observadó dje shelu di anochi.

Meimei di siglo 19, nan a cuminsá traha catalognan cu tabata mas amplio. Un dje pioneronan riba e tereno aki tabata e astrónomo aleman Friedrich Wilhelm Argelander. Huntu cu vários asistente, el a cuminsá e proyecto inmenso di traha un catalog dje streanan den e shelu di nort. Cu telescop, nan a localisá rond di 325.000 strea i a midi e posicion i e grado di briyo di cada un di nan. Como cu e observatorio unda nan a traha tabata situá den e stad aleman di Bonn, e catalog a bira conocí como e Bonner Durchmusterung (Estudio General di Bonn). A publik’é na 1863. Despues cu Argelander a muri, un di su asistentenan a sigui cu su trabou. El a traha mapa dje streanan dje shelu di zuid i a publicá su obra como Südliche Bonner Durchmusterung (Estudio General di Bonn Parti Zuid). E último estudio a ser publicá na 1930. Nan a emitié na Cordoba, Argentina. E catalognan aki a keda cu nan balor te cu awe.

Awe i Mañan

Despues dje obra di Argelander i su sucesornan a bini catalognan asta mas mihó. Sin embargo, den añanan mas recien, despues di yegada di telescopnan espacial, hazañanan riba tereno di traha mapa cu hende nunca no a tende di dje a bira posibel. Cu yudansa dje Telescop Espacial Hubble, astrónomonan a logra compilá awor un catalog cu ta contené rond di 15 miyon strea!

Un desaroyo recien den trahamentu di mapa di shelu ta publicacion di dos catalog nobo dje Agencia Espacial Europeo. E catalognan aki ta basá riba observacionnan cu hende a haci cu e telescop espacial dje satélite Hipparcos. Te ainda exactitud dje catalognan aki ta inigualabel. Basá riba nan, hende a crea atlasnan nobo di strea. Un di nan ta un atlas amplio di tres volúmen cu yama Millennium Star Atlas (Atlas di Strea di Milenio).

Kisas e título ei ta recordá lectornan di Bijbel dje Milenio, esta, Cristo su Reinado di Mil Aña di pas, mencioná den Bijbel. (Revelacion 20:4) Durante e tempu ei hende sin duda lo siña hopi mas tocante e impresionante universo, di cua asta e atlasnan di mas grandi awe por pone solamente un parti chikitu riba mapa.

[Nota]

^ par. 5 Loke hende di pasado no tabata sa, ta cu e aparente movecion di strea ta tuma lugá pasobra tera ta drei rond di su as. Pa mésun motibu, ta parce cu solo ta sali i baha.

^ par. 9 E 48 constelacionnan aki tabata conocí na Mesopotamia, Mediteráneo i Europa. Mas despues, hende cu a imigrá pa Norteamérica i Australia tambe a conocé nan. Sin embargo, otro pueblonan, manera chines i indjannan norteamericano, a parti shelu den otro manera.

[Plachi na página 25]

Mapa di Strea di Apio, 1540

[Rekonosementu]

Cu permiso di Biblioteca Británico (Mapanan C.6.d.5.: Apian’s Star Tabèl)

[Plachi na página 26]

Hemisferio Zuid segun mapa di siglo 19

[Rekonosementu]

[Plachi na página 27]

Constelacion Orion manera e ta aparecé riba un mapa moderno di strea

[Rekonosementu pa Potrèt na página 27]

Fondo di página 25-7: Cortesia di ROE/Anglo-Australian Observatory, potret di David Malin

SPIÈRTA!