Un Bon Feitá

DJE CORESPONSAL DI SPIERTA! NA AUSTRALIA

SI UN homber dedicá cincu minuut pa dia na feita i e haci esei tur dia pa 50 aña, lo el a dedicá un poco mas cu 63 dia di su bida ta kita cabei for di su cara! Kico hombernan ta pensa dje ritual diario aki?

Un reciente encuesta informal a producí e comentarionan aki tocante feitamentu: “Mi no gust’é.” “Mi tin rabia riba dje.” “Un dje peligernan di bida.” “Algu pa evitá ki ora cu bo por hacié sin haña bo den problema.” Si algun homber tin opinion asina fuerte contra kita nan cabei di cara, di con nan ta hacié? Laga nos siña un poco mas tocante feitamentu. Kisas nos lo haña e contesta.

Di Cocolishi di Oester pa Nabaha Desechabel

Bo por imaginá bo ta feita cu cocolishi di oester? Cu djente di tribon? Kisas un splenter skerpi di piedra duru? Hende a demostrá un ingeniosidad remarcabel den scogementu di instrumentonan pa feita! Den antiguo Egipto hombernan a feita usando un nabaha di koper cu a parce cabes di un hacha chikitu. Mas recien, den siglonan 18 i 19, nan tabata traha, principalmente na Sheffield, Inglatera, un tipo di nabaha cu literalmente por a corta garganta di hende. E nabahanan aki, hopi bes tur dorná, tabatin un blet di staal hol cu tabata dobla bai bek den e man ora no tabata us’é, loke tabata mas safe. Mester a manehá e instrumentonan aki cu sumo cuido, i siña dominá nan sin duda a causa hopi cortá i sangramentu. Pa esnan ménos ábil, lo mester tabata traumático pa cuminsá usa nan. Sin embargo, siglo 20 a primintí alivio.

Na 1901 un homber na Merca cu tabata yama King Camp Gillette a patentá un nabaha di siguridad cu un blet desechabel. Su idea a inundá mundu i cu tempu a hiba na un variedad di diseño, entre nan nabaha cu man di plata of di oro. Ultimamente hende a bini cu nabahanan completamente desechabel, nabaha cu dos of asta tres blet, i nabaha cu cabes flexibel cu ta drei rond.

Claro cu no mester lubidá nabahanan eléctrico, cu a subi mercado na 1931. Nan eficiencia i popularidad a sigui aumentá, pero tog hopi homber cu kier ègt un bon feitá ta preferá e fila skerpi di un blet.

Durante Historia Barba A Bin i Bai for di Moda

For di hopi tempu pasá barba tabata bin i bai for di moda. Segun e buki Everyday Life in Ancient Egypt [Bida Diario den Antiguo Egipto], e egipcionan di antigwedad “no tabata renombrá pa nan cabei di curpa i tabata orguyoso di ta sin barba ni bigoti, i tabata usa nabaha bon trahá cu nan a warda den etuinan nèchi di cueru.” E custumber aki por splica di con e prezu hebreo Josef a feita promé cu el a presentá dilanti fárao.—Génesis 41:14.

Asirionan tabata un rasa di homber cu barba espléndido. Nan a duna asina tantu cuido i atencion na nan barba cu nan tabata banidoso. Nan tabata pone masha krul i flegtu i haci diseño elaborá cu nan barba.

Hombernan israelita di antigwedad tabatin barba di largura moderá, i nan tabata usa nabaha pa tene nan pareu. P’esei, kico e Ley di Dios tabata kier men ora el a manda homber israelita pa no ‘corta nan cabei tur rond na banda corticu’ ni “destruí e punta” di nan barba? Esaki no tabata un mandamentu pa no  corta cabei ni barba. Mas bien, esei a desanimá homber israelita di imitá e prácticanan religioso extremo dje nacionnan bisiña pagano. *—Levítico 19:27; Jeremías 9:25, 26; 25:23; 49:32.

Den e antiguo sociedad griego, tabata normal pa tur homber tin barba cu excepcion di hende di noblesa, kendenan hopi biaha tabata sin barba i sin bigoti. Na Roma ta parce cu e custumber di feita a cuminsá den siglo 2 P.E.C., i pa vários siglo despues di esei feita tur dia a keda un custumber.

Sin embargo, cu caida dje Imperio Romano, barba a bolbe prevalecé un biaha mas, i esei a sigui asina pa un 1.000 aña te na di dos mitar di siglo 17, ora cu feitamentu a bini na moda. E aparencia bon feitá, sin barba ni bigoti, a sigui durante henter siglo 18. Anto durante e di dos mitar pa fin di siglo 19, barba a bolbe bin na moda. P’esei, potretnan di C. T. Russell, e promé presidente di Sociedad Watch Tower, i su compañero cristian W. E. Van Amburgh, ta mustra nan tur dos cu barba elegante i pareu cu tabata dignificá i apropiado pa nan tempu. Sin embargo, na principio di siglo 20, feitamentu a bolbe gana un popularidad cu a keda den mayoria pais te awe.

Abo ta un dje miyones di hombernan cu ta usa un blet pa haci e ritual diario ei dilanti spiel? Si ta asina, sin duda lo bo kier hacié mas eficas i ménos doloroso i sangriente posibel. Pa logra esei, por ta bo kier considerá e sugerencianan den e cuadro “Tipnan pa Feita cu Blet.” Probablemente bo ta usa algun dje sugerencianan aki caba. Loke sea e caso, disfrutá di un bon feitá!

[Nota]

 [Kuadro/Plachinan na página 23]

Tipnan pa Feita cu Blet

E buki Men’s Hair [Cabei di Homber] ta duna e siguiente sugerencianan pa un bon feitá cu blet. *

1. Suavisá bo barba i bigoti: E único manera pa suavisá cabei di cara ègt bon ta dor di aplicá hopi awa cayente. Si ta posibel, feita despues di baña, ya cu esaki ta duna e awa mas tempu pa suavisá e barba i bigoti.

2. Hunta productonan pa promé cu feita: Tur e vários habon, scuma, crema i djelnan ta logra esencialmente tres cos. (1) Nan ta haci e cabei i bigoti mas manehabel dor dje humedad, (2) nan ta tene e cabei regt i (3) nan ta zeta e cútis di manera cu e nabaha ta pasa riba dje mas fácil. Scoge e producto cu ta duna abo e mihó resultado. Am, bo a yega di purba conditioner di cabei? E tambe ta diseñá pa suavisá cabei.

3. Usa e nabaha corecto n’e manera corecto: E nabaha corecto ta un nabaha skerpi. Nabaha stompi por daña bo cútis. Feita den e direccion cu e cabei ta crece. Feita den direccion contrali por duna bo un bon feitá, pero e por corta e barba bou di nivel dje cueru i ta pone cu na lugá dje cabei sali dor dje porionan di cueru e ta crece den e tehido rondó di dje. Segun algun fuente, custumber slordig di feita, di hende homber i muher, por causa infeccion di vírus cu ta duna bo fret.

4. Protehá cútis despues di feita: Cada bes cu bo feita, bo ta kita un capa microscópico di cueru, loke ta laga bo cútis keda vulnerabel. P’esei, ta importante pa hawa tur resto di producto kita for di bo cara cu awa limpi, usa promé awa lou i despues awa frescu pa cera bo porionan i seya e humedad den dje. Si bo kier, bo por aplicá un locion humectante di after-shave pa protehá i refrescá bo cútis.

[Nota]

[Kuadro/Plachi na página 24]

Barba cu Bigoti

Barba cu bigoti ta cabei cu ta crece na cara. Nan ta trahá di keratina i di proteinanan relacioná cuné. Keratina ta un proteina yen di fibra cu ta contené sulfur cu e curpa di hende i bestia ta producí i e ta e bloki básico di construccion di cabei, uña, pluma, pata i cachu. Di tur e cabeinan riba e curpa humano, barba cu bigoti ta esnan mas fuerte i mas resistente. Nan ta mes duru pa corta cu un waya di koper mésun diki. Un homber comun i coriente tin te cu 25.000 cabei riba su cara, i nan ta crece na un velocidad di mei milimeter cada 24 ora.

[Rekonosementu]

Homber: A Pictorial Archive from Nineteenth-Century Sources/

Dover Publications, Inc.

[Plachinan na página 24]

Durante historia feitamentu a bin i bai for di moda

[Komentario di e plachi na página 24]

Egipcio

Asirio

Romano

[Rekonosementu]

Museo Egizio di Torino

Potretnan sacá pa cortesia di Museo Británico