E Punto di Bista Biblico

Berdadero Fe—Kico E Ta?

“SIN FE TA IMPOSIBEL PA AGRAD’E BON, PASOBRA ESUN CU TA ACUDI NA DIOS MESTER KERE CU E TA EXISTI I CU E TA BIRA E RECOMPENSADOR DI ESNAN CU TA BUSK’E CU EMPEÑO.”—HEBREONAN 11:6.

KICO ta fe? Tin hende ta describí fe como un creencia religioso den Dios sin prueba sólido di su existencia. H. L. Mencken, un periodista mericano, a definí fe como “un creencia ilógico di cu cosnan improbabel ta sosodé.” Esaki ta berdadero fe manera Bijbel ta describié? Ta vital pa nos comprendé bon cla kico fe ta, pasobra manera ta citá ariba, ‘sin fe ta imposibel pa agradá Dios.’

Bijbel ta bisa: “Fe ke men ku nos ta sigur di e kosnan ku nos ta spera di risibí.” (Hebreonan 11:1, Beibel na papiamentu koriente) Pues, fe ta fundá riba conocimentu exacto, echonan a base di cua nos por tuma decisionnan corecto. E ta rekerí no solamente pa bo kere algu, sino un motibu pakico bo ta kere.

Un ehempel: Kisas bo tin un amigu di ken bo por bisa: “Mi ta confia e homber ei. Mi por conta cu e ta cumpli cu su palabra. Mi sa cu si mi tin un problema, lo e yuda mi.” No ta probabel cu lo bo bisa esei di un hende cu bo conocé pa un of dos dia so, no ta berdad? E mester ta un hende cu bes tras bes a duna prueba di ta confiabel. Mescos ta conta pa fe religioso. E mester producí speransa i conviccion basá riba evidencia sólido i confiabel.

Fe of Credulidad?

Hopi di loke hende ta considerá como fe awendia ta en realidad credulidad, esta, ser dispuesto pa kere sin un base of motibu válido. Hopi bes credulidad su base instabil ta emocion i supersticion. Esaki no ta fe bon fundá ya cu e no tin ningun base confiabel pa creencia.

Credulidad por pone un hende core saca cierto conclusionnan  cu kisas no ta na armonia cu berdad bíblico. P’esei mes Bijbel ta spierta contra fe infundá: “Cualkier persona sin experencia ta pone fe den tur palabra, pero esun spiertu ta considerá su pasonan.” (Proverbionan 14:15) Apostel Pablo a skirbi: “Haci sigur di tur cos; tene duru na loke ta excelente.” (1 Tesalonicensenan 5:21) Bijbel no ta promové credulidad. E ta animá fe basá riba evidencia.

Ta un asuntu serio pa por distinguí berdadero fe for di credulidad. Un persona por ta religioso i tog e no tin berdadero fe. Pablo a remarcá: “No ta tur hende tin fe.” (2 Tesalonicensenan 3:2) Pero algun hende tin fe basá riba Bijbel, i e ta influenciá nan bida.

Berdadero Fe Ta Mara Hende na Dios

Nos por compará fe cu un cadena. Siguransa i confiansa ta wowonan dje cadena cu ta mara hende na Dios. Pero e clase di fe aki ta algu cu ta ser cultivá; e no ta algu cu nos ta nace cuné. Con bo por desaroyá berdadero fe? Bijbel ta splica: “Fe ta sigui loke a tende. En buelta, loke a tende ta mediante e palabra tocante Cristo.”—Romanonan 10:17.

P’esei, bo tin cu tuma tempu pa siña conocé Dios i e siñansanan di su Yu, Jesucristo. Bo no ta gana e conocimentu aki sin haci esfuerso. (Proverbionan 2:1-9) Bo tin cu haci esfuerso pa haña sa loke Bijbel ta bisa pa asina bo keda convencí dje echo cu e ta confiabel.

Sin embargo, berdadero fe ta encerá mas cu djis tin conocimentu of kere cu algu ta berdad. E tin di haber tambe cu e curason, e centro di motivacion. Romanonan 10:10 ta bisa: “Cu curason hende ta ehercé fe.” Kico esei kier men? Segun bo ta meditá riba cosnan di Dios i ta desaroyá aprecio pa nan, bo ta permití Bijbel su mensahe baha den profundidad di bo curason. Fe ta crece i ta bira mas fuerte segun bo ta ser motivá pa actua riba e promesanan di Dios i bo ta mira evidencia di su bendicion.—2 Tesalonicensenan 1:3.

Esta un posesion precioso berdadero fe ta! Nos ta beneficiá dor cu fe ta capacitá nos pa enfrentá situacionnan difícil cu confiansa den Dios, confiando den su abilidad di guia nos pasonan i cu e ta dispuesto pa percurá pa nos necesidadnan. Ademas, Dios su Yu, Jesucristo, a señalá na un beneficio di largu plaso di fe: “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” (Juan 3:16) Bida eterno. Esta un regalo maraviyoso pa esnan cu tin fe!

Fe den Dios su promesa di recompensá su sirbidónan ta laga nos wak bida for di un perspectiva nobo. Hebreonan 11:6 ta bisa cu berdadero fe ta encerá kere den Dios su abilidad di recompensá “esnan cu ta busk’é cu empeño.” Ta bisto anto cu berdadero fe no ta credulidad, i cu e ta muchu mas cu djis kere cu Dios ta existí. E ta encerá aceptá Dios su abilidad di actua como un recompensador di esnan cu ta busk’é cu empeño. Sinceramente i di berdad bo kier siña conocé Dios? Si ta asina, anto adkerí conocimentu exacto for di su Palabra, Bijbel, i bo fe lo ser recompensá.—Colosensenan 1:9, 10.

[Rekonosementu pa Potrèt na página 26]

Pinturanan di Albrecht Dürer/Dover Publications, Inc.