For di Nos Lectornan

Estilonan di Bida Insaludabel Durante e último lunanan, mi salú tabata hopi malu, pues tabata un animacion pa haña sa cu nos por mehorá nos salú dor di cambia nos estilo di bida. Lesando e seri “Bo Estilo di Bida Ta Matando Bo?” (8 di juli 1999) a laga mi mira cu mi mester baha man na comementu di cierto cumindanan i cu mi mester tin un dieta mas balansá cu mas fruta i berdura.

E.P.M., Brazil

Bofon Mi a gusta e artículo di 8 di juli 1999, “Hóbennan Sa Puntra . . . Kico Mi Por Haci Ora Hende Ta Haci Bofon di Mi?” For di kleuterklas, semper compañeronan di scol tabata puntra mi tocante mi creencianan. Tin biaha e manera cu nan tabata puntra tabata hùrt mi. Hopi biaha casi mi a perde pacenshi. Awor mi ta realisá cu esakinan ta solamente testnan di fe. Ademas, tin otro mucha na scol cu mi a duna testimonio cu éxito.

L. C., Merca

Di mi tambe nan a haci bofon pasobra mi no kier a celebrá cierto dianan di fiesta religioso of participá den ceremonianan patriótico. Tambe nan a molestiá mi pasobra mi ta onrado i pasobra mi ta tene n’e normanan moral di Bijbel. Gana conocimentu exacto a yuda mi presentá un defensa. Esaki a yuda mi papia libremente sin ta tímido pa revelá mi creencianan.

H. C., Zambia

Aunke ta hopi tempu pasá mi tabata tiener—mi tin mas cu 50 aña!—mi a apreciá e artículo. Tin ora e oposicion cu nos ta haña den e ministerio ta desconcertá nos i nos por sinti gana di tuma represaya. P’esei mi a apreciá e recordatorio cu “si bo insultá bek, no ta importá con pret e por parce, ta tira so bo ta tira mas palu den candela, loke lo por intensificá e tentamentu mas ainda.” Mi ta purba presentá un defensa sin parce di ta paga bek, i e recordatorio aki a convencé mi cu ta necesario pa sigui haci esei.

A. F., Merca

Sobrebibiente di Prizon Mi kier gradicí boso for di fondo di mi curason pa e artículo “Dios Tabata Nos Yudante.” (8 di juli 1999) Mi wowo a yena cu lágrima di goso segun mi tabata lesa dje manera cu Francisco Coana a siña e berdad i a haci sirbishi na Jehova un prioridad den su bida. Lesando tocante e pruebanan cu mi rumannan cristian a pasa aden na Mozambique a ègt fortalecé mi fe.

J. H., Merca

Mayornan Enfermo Boso artículo “Hóbennan Sa Puntra . . . Di Con Mama Ta Asina Malu?” (8 di augustus 1999) a conmové mi. Mi no a pensa cu tabatin asina tantu otro hóben cu, mescos cu mi, tin e privilegio di cuida un ser kerí enfermo. Mi wela ta keda cerca nos, i e tin cuater luna na cama. Mi a cuminsá sinti cargá i cansá di cuid’é. Mi a haña e fortalesa cu mi tabatin mester dor di lesa e artículo. El a duna mi e confiansa cu mi tin Jehova su apoyo.

J. P., Filipínas

E artículo tabata di gran consuelo pa mi, i a duna mi e fortalesa pa apoyá mi mama cu ta sufri di depresion. Mi por a usa e sugerencianan cu e artículo a presentá, pa mira e situacion mas realístico i pa mustra mas empatia, comprension i tacto.

G. L., Italia

E artículo a bini net na ora. Mi tin cancer, i mi yu homber ta biba cerca mi. Mi yu tabata sufri asina hopi cu mi no tabata sa mas con pa consol’é. E artículo a describí precis loke e ta sinti. E artículonan aki no ta pa hóbennan so. Nan ta trata tocante bida mes.

R. Z., Alemania

E artículo aki a yuda mi realisá con importante ta pa keda spiritualmente activo. Mi a realisá cu bo por yuda un persona enfermo solamente ora bo mantené bo mes bida enfocá riba e Reino di Dios.

P. E., Austria