Gladiola​—⁠Un Flor Remarcabel cu un Beyesa Delicado

Casi tur hende ta keda impresioná cu e beyesa delicado di mata cu ta saca flor, di cua un ehempel sobresaliente ta gladiola. Como cu gladiola ta asina popular, nan ta cultiv’é comercialmente den hopi pais, entre otro na Israel i Hulanda. Na Merca tambe tin plantacion di gladiola cu ta manda nan productonan rond mundu pa hende cu ta gusta planta flor.

E maraviyoso famia di gladiola a aumentá te na mas cu 2.000 variedad, cu ta bini den tur color i textura imaginabel. Con cultivadónan di flor a logra desaroyá e aparente sinfin di variedad dje mésun flor?

Con Ta Crea Variedadnan Nobo

E cultivadónan ta usa un herment, manera un skeiru di cabei di camel, pa kita pollen for dje meeldraad, e parti masculino, di un flor i ta transfirié n’e stempel, e parti femenino, di un flor diferente. Por lo general nan ta pone e pollen te na e flornan di mas abou dje mata anfitrion. Una bes haci esaki, ta mara e flor cera pa stroba polinisadornan natural, manera abeha of muskita, di cambia e resultado. Pa obtené un color of aparencia en particular, nan ta crusa un tipo di gladiola cu un otro cu tin e rasgonan deseá.

Esaki no kier men cu e variedad nobo, ta un tipo di flor nobo. E potencial pa tal variedad tabat’ei caba, cerá den e código genético complicá di gladiola. Mediante crusamentu selectivo, por logra gladiola di colornan cu ta varia di blancu briyante pa corá scur of lila scur. Tambe tin gladiola pintá-pintá, cu falchi i gladiola dòbel. Algun di nan tin asta un poco fragancia.

Beyesa Delicado

Wak e flornan riba e potretnan aki bon, i tuma nota dje hopi variedad di gladiola. Esun cu bo ta mira aki cu yama Hermosura, ta un deleite! Segun cu e pétalonan ta rek, nan ta revelá randnan suave, color lila cla tur na falchi i cu lila mas scur na nan punta. E pétalonan abou, cu ta bai paden na e garganta di cada flor, tin un bunita mancha di ros scur i lila.

Un otro variedad, cu yama Kanchi di Orkidia, cu tambe bo ta mira aki, ta duna e impresion cu e ta asina delicado cu e toke di mas suave lo dañ’é. Su flornan ta lèn contra e stengel, miéntras cu meeldraadnan largu ta sali for di meimei di cada garganta colorido. Otro variedadnan tin nombernan evocativo manera Strea Briyante, Fin di Ilusion, Alerta Corá, Incomparabel i Luna di Plata.

Con pa Cultivá Gladiola

Ademas di haña simia for dje flornan, cultivadónan di gladiola ta cosechá e batata, e parti abou dje stengel dje flor, cu parce un pera di lus. Tambe nan ta cosechá e batatanan chikitu cu ta crece riba e batata principal.

A desaroyá mayoria gladiola cultivá for di especienan africano. Pues, nan rais ta den Trópico, na moda di papia, i nan ta masha sensitivo na clima. Kisas nan no ta sobrebibí e winternan  friu di algun pais, pero nan ta crece bon durante e lunanan cayente di zomer.

Den climanan mas friu mester coba saca e batata na fin dje temporada di cultivo i limpi’é cu cuidou. Un batata nobo lo a forma i dor di kita e batata bieu i morto cu ta te n’e parti abou dje stengel lo haci mas fácil pa e batata nobo saca rais. Ademas, mester kita tur e batata chikitunan tamaño di pitipuá, cu tin pegá riba cada batata. Durante weer friu mester warda tantu e batata grandi como e chikitunan den un lugá secu, frescu cu temperatura mas haltu cu vriespunt.

Ora planta e batata chikitunan, cada un lo saca blachi fini, i pa fin dje temporada di cultivo, e batata chikitu lo a bira un batata maduro. Ora planta nan e siguiente temporada, nan lo crece bira matanan adulto berde cu ta saca flor.

Den climanan moderá, por cuminsá planta na comienso di primavera. Den clima calor no ta dje importante ei ki ora planta nan. Lo ideal ta pa planta e batatanan grandi i chikitu den tera humédo i un poco ácido. Tambe mester pone nan caminda nan lo haña hopi claridad di solo, ya cu gladiola no ta bai bon den sombra.

Por plama e batata chikitunan den un buracu di 8 centimeter hundu anto tapa nan cu tera. Pero, batata grandi mester ta plantá na un profundidad di 13 centimeter. Pa evitá cu nan ta crece muchu riba otro den bo hardin na cas, mester planta batata tamaño mediano rond di 8 centimeter for di otro i esnan tamaño grandi 10 pa 13 centimeter for di otro. Si bo limpia i planta bo batatanan di gladiola cu cuidou, despues di un par di luna lo bo ser recompensá cu un exhibicion indescriptibel: e beyesa ricu i delicado di gladiola.

[Plachi na página 16]

Kanchi di Orkidia

[Plachi na página 16, 17]

Soño di Coral

Monet

Fin di Ilusion

Wega di Solo

[Plachi na página 17]

Hermosura