Ken Ta e Catibunan Djawe?

DJIS pensa riba e cantidad. Segun cálculo, entre 200 pa 250 miyon mucha bou di 15 aña ta pasa mayor parti di ora cu nan ta lantá na trabou. Durante 1995 pa 1996 so, nan a reclutá un cuart miyon mucha, tin di nan for di shete aña, den combatenan armá, pues asina algun di nan a bira catibu di guera. Nan ta calculá cu e cantidad di hende muher i mucha cu nan ta bende como catibu pa aña ta mas cu un miyon.

Pero cifra so nunca no por revelá e desesperacion dje individuonan aki. Por ehempel, den un pais di Nort Africa, escritora Elinor Burkett a topa Fatma, un mucha muher hóben cu a logra hui di su doño cruel. Sin embargo, despues di a papia cuné, Burkett a realisá cu Fatma “lo keda un catibu pa semper, den su mes bista.” Fatma por sikiera imaginá un mihó futuro? Segun Burkett, “e no por planea pa mas leu cu manisé. Futuro ta un dje hopi conceptonan abstracto cu e no conocé.”

Sí, na e momento aki mes, miyones di nos próhimo ta catibunan desesperá. Pakico i con tur e hendenan aki ta bira catibu? Den ki forma di sclabitud nan ta ser bentá?

Negoshante di Hende

E foyeto pa turista cu a circulá na Merca no por tabata mas directo: “Tour di sex pa Tailandia. Mucha muher auténtico. Sex auténtico. Barata-barata. . . . Bo tabata sa cu bo por ègt cumpra un mucha muher bírgen pa 360 florin so?” Loke e foyeto no a bisa ta cu probablemente a secuestrá of bende e “bírgennan” aki contra nan boluntad cu casnan di prostitucion, caminda nan tin cu traha pa un 10 pa 20 cliente pa dia. Si nan no duna servicio sexual, ta bati nan. Ora tabatin un candela den un cas di prostitucion na Isla Phuket, un resort na zuid di Tailandia, cincu prostituta a muri kimá. Di con? Pasobra e doñonan a mara nan na nan cama pa stroba nan di hui for di nan cautiverio.

Di unda e mucha muhernan aki ta bini? Segun informe, e sector aki dje industria  di sex ta haña miyones di mucha muher i hende muher for di rond mundu cu a ser secuestrá, obligá i bendé den prostitucion. E negoshi internacional di sex ta florecé dor di un combinacion di pobresa den paisnan den desaroyo, rikesa abundante den paisnan ricu i leynan cu ta ignorá traficacion internacional i sclabitud via contract.

Organisacionnan di hende muher na zuidoost Asia a calculá cu for di meimei di añanan ’70 pa principio di añanan ’90, nan a bende 30 miyon muher rond mundu. Traficantenan di hende ta recoré stacionnan di trein, pueblitonan pober i cayanan den stad en busca di mucha muher i hende muher cu ta parce vulnerabel. Por lo general e víctimanan ta ineducá, huérfano, bandoná of desampará. Ta haci nan promesanan falsu di trabou, ta transportá nan atrabes di frontera i despues ta bende nan cu casnan di prostitucion.

Desde e kiebro dje bloke comunista na 1991, henter un poblacion nobo di mucha muher i hende muher pober a ser creá. Eliminacion di restriccion, privatisacion i un creciente desigualdad di clase social a resultá den aumento di crímen, pobresa i desempleo. Hopi mucha muher i hende muher ruso i di paisnan oost europeo a bira awor maishi pa e mulina internacional di prostitucion organisá. Segun Anita Gradin, ex-comisionado di Husticia Europeo: “Ora bo ta traficá hende, tin ménos riesgo cu ora bo ta traficá droga.”

Infancia Perdí

Den un fábrica chikitu di tapijt na Asia, mucha chikitu, algun di cincu aña so, ta traha for di 4’or di mainta te 11 or djanochi sin salario. Den hopi caso obreronan infantil manera esakinan ta confrontá peligernan serio di salú: mashinnan insigur, oranan largu den un ambiente cu tiki lus i tiki ventilacion, i nan ta ser exponé na kímiconan peligroso cu ta ser usá den fábrica. *

 Di con mucha ta asina tantu buscá como obrero? Pasobra labor infantil ta barata i pasobra mucha di naturalesa ta mansu, fácil pa disipliná i muchu spantá pa reclamá. Doñonan di trabou sin escrúpulo ta mira nan curpa chikitu i nan dedenan ábil como un bentaha pa haci cierto tipo di trabou, manera por ehempel, traha tapijt. Hopi bes nan ta duna muchanan asina trabou, miéntras cu nan mayornan ta sinta na cas sin trabou.

Pa haci e miseria di obreronan infantil mas pió, esnan cu ta traha den cas di famia tin hopi mas chens di sufri di abusu sexual i físico tambe. Hopi mucha ta ser secuestrá i tené den camponan remoto i anochi ta mara nan na cadena pa nan no hui. Den dia, kisas ta pone nan traha den construccion di caretera i coba piedra.

Un otro manera cu infancia ta bai perdí ta dor di matrimonio pa traha como catibu. Anti-Sclabitud Internacional ta splica un caso típico: “Un mucha muher di 12 aña ta tende cu su famia a haci areglo p’e casa cu un homber di 60 aña. Aparentemente e tin derecho di nenga, pero den práctica e no tin niun chens di ehercé e derecho ei i no sa mes cu e por haci esei.”

Catibu Debí na Debe

Cientos di miles di obrero ta catibu di nan doño di trabou i nan lugá di empleo debí na fiansanan cu nan of nan mayornan a ricibí. Tradicionalmente, ta principalmente den áreanan di agricultura, caminda obreronan ta traha como criá general of como cunukero, bo ta haña labor mará na debe. Den algun caso, debenan ta pasa di un generacion pa otro, i asina ta haci sigur cu miembronan di un famia ta keda den sclabitud permanente. Den otro casonan, doñonan cu tin cu ricibí placa di debe ta bende e debe cu un doño di trabou nobo. Den casonan extremo, obreronan mará na debe no ta ricibí ningun pago p’e trabou cu nan ta haci. Of ta tene nan mará den sclabitud debí na voorschotnan relativamente chikitu riba nan salario, pero cu ta ser ripití constantemente, di manera cu nan ta keda mará na nan doño di trabou.

Sclabitud Ritual

Binti, di West Africa, tin 12 aña i ta un di miles di mucha muher cu ta sirbi como trocosi, cu den idioma ewe ta nificá “catibu dje diosnan.” Obligatoriamente Binti ta hiba un bida di sclabitud i ta paga pa un crímen cu e no a cometé: e violacion cu a hiba  na su nacementu! Actualmente su responsabilidadnan ta limitá na trabou di cas pa un sacerdote local di fetichi. Despues Binti su debernan lo expandé pa incluí rindi servicio sexual na e sacerdote, cu ta su doño. Anto ora Binti tin rond di 40 aña e sacerdote lo remplas’é. Lo e busca otro mucha muhernan atractivo pa sirbié como trocosi.

Mescos cu Binti, miles di víctima di sclabitud ritual ta ser ofrecé dor di nan famia pa traha prácticamente como catibu den un intento pa expiá pa un acto cu ta ser interpretá como un picá of ofensa contra decreto santu. Den vários parti di mundu, nan ta obligá mucha muher of hende muher pa efectuá debernan religioso i rindi servicio sexual na sacerdote i otronan, bou dje pretexto cu e muhernan ei ta casá cu un dios. Den hopi caso e muhernan ta rindi otro servicionan sin ricibí pago. Nan no ta liber pa cambia nan lugá di biba ni nan trabou i hopi bes ta sirbi como catibu pa hopi aña.

Sclabitud Tradicional

Aunke mayoria pais ta pretendé cu nan a abolí sclabitud legalmente, recientemente sclabitud tradicional a bolbe surgi den algun área. Por lo general esaki ta tuma lugá den regionnan asotá pa guera civil of conflictonan armá. Anti-Sclabitud Internacional ta informá: “Den áreanan di conflicto hende a suspendé forsa di ley eficasmente, i soldá of miembronan armá di milicia ta logra forsa hende traha pa nan sin paga nan . . . sin miedu di ser castigá; tabatin informe dje prácticanan ei principalmente den áreanan controlá dor di gruponan armá cu no a logra reconocimentu internacional.” Sin embargo, segun e mésun organisacion, “tabatin tambe informenan recien di soldánan di gobiernu cu a forsa civilnan traha como catibu, fuera di cualkier areglo legal. Ademas tin informe cu soldá i miembronan di milicia ta participá den traficacion di catibu, bendiendo hende cu nan a capturá pa traha pa otronan.”

Lamentablemente, e maldicion di sclabitud ainda ta terorisá humanidad den hopi forma i disfras. Para i pensa un biaha mas riba e cantidad enbolbí, e miyones di hendenan cu ta sufri como catibu rond mundu. Anto pensa riba un of dos dje catibunan moderno cu bo a lesa di dje den e revista aki, kisas Lin-Lin of Binti. Bo kier mira un fin n’e crímen di sclabitud moderno? Abolicion di sclabitud lo bira realidad un dia? Promé cu esei por sosodé, cambionan radical tin cu tuma lugá. Por fabor, lesa tocante nan den e siguiente artículo.

[Nota]

[Kuadro/Plachi na página 6]

BUSCANDO SOLUCION

Vários agencia oficial, manera UNICEF i Organisacion Internacional di Trabou, diligentemente ta instituí i implementá estrategianan pa eliminá sclabitud moderno. Ademas, tin un cantidad di organisacion no-gubernamental, manera Anti-Sclabitud Internacional i Vigilancia di Derechonan Humano, cu ta traha duru pa haci e público mas conciente di sclabitud moderno i pa libra su víctimanan. Algun dje organisacionnan aki ta purba pa introducí etiketnan special cu lo indicá artículonan cu no ta ser producí mediante trabou di catibu of trabou infantil. Pa por hiba hende cu haci sex cu mucha dilanti corte ora nan regresá nan pais bek, otro agencianan ta exigí pa bini cu leynan den paisnan caminda “tour di sex” ta originá. Tin algun activista di derechonan humano cu a bai asina leu di paga traficante i doñonan di catibu sumanan grandi pa por libra mas tantu catibu posibel. Esaki a causa poco controversia, ya cu prácticanan asina por crea un mercado lucrativo di catibu i subi nan prijs.

[Plachi na página 7]

Hopi mucha muher ta ser forsá pa casa

[Rekonosementu]

UNITED NATIONS/J.P. LAFFONT

[Plachi na página 8]

Rij di cuminda pa catibunan di debe

[Rekonosementu]

Ricardo Funari

[Plachi na página 8]

Tin biaha nan ta forsa mucha chikitu drenta servicio militar

[Rekonosementu]

UNITED NATIONS/J.P. LAFFONT