‘Nos Mundu Lo Tabata Otro’

Aña pasá augustus e intento pa cancelá un congreso di Testigonan di Jehova na Moscú a hala bastante atencion. (Pa mas detaye mira página 27 cu 28 di nos edicion di 8 di mart 2000, na spañó.) Andrei Zolotov, Jr., a informá den The Moscow Times di 21 di augustus 1999, cu “Vladimir Kozyrev, subdirector dje compleho deportivo, a bisa cu e gerencia no tabata contra pa tene e congreso di Testigonan di Jehova. El a bisa cu e no sa ta di unda e ordu [pa cancel’é] a sali.”

Den un carta publicá den The Moscow Times un siman despues, un lector a encomendá e korant pa a publicá e artículo “berdaderamente imparcial” i a bisa cu e artículo “realmente a merecé atencion dje lectornan.” E lector a comentá: “Boso relato tocante e tremendo dificultadnan cu Testigonan di Jehova a confrontá den preparacion di nan congreso anual [a exponé] trato inhustu cu nan a haña.”

Anto e escritor dje carta a remarcá cu Testigonan di Jehova “ta bon conocí na mundu (i awor tambe na Rusia) . . . Nan ta . . . bon conocí como hendenan masha simpático, amabel i mansu cu ta masha fácil pa trata cuné, cu nunca no ta pone ningun preshon riba otro hende i cu semper ta busca pas den nan relacion cu otronan sin importá nan creencianan religioso, sea ta cristiannan ortodox, moslim of budista. Entre nan no tin tumadó di soborno, buraché of drogadicto, i e motibu ta masha simpel: Nan ta djis purba laga nan conviccionnan basá riba Bijbel guia nan den tur loke nan ta bisa of haci. Si tur hende na mundu por lo ménos a purba biba segun Bijbel, manera Testigonan di Jehova ta haci, nos mundu cruel lo tabata absolutamente otro.”

Autoridadnan cu a investigá Testigonan di Jehova i a trata cu nan directamente, ta confirmá e descripcion duná ariba. Por ehempel, e autoridadnan ei a otorgá e Testigonan permit pa construí e bunita Salon di Asamblea nobo aki na St. Petersburg, Rusia. Dia 18 di september aña pasá, ora a dedik’é, e sala tabata yen cu 2.257 observadó gososo, i 2.228 mas a scucha e programa na Salonnan di Reino na St. Petersburg i na e oficina di sucursal di Testigonan di Jehova djis ei pegá na Solnechnoye.