Sclabitud Moderno—Su Fin Ta Cerca!

“Libertad di un hende ta un parti esencial di libertad universal. Bo no por mishi cu esun, sin peligrá e otro.”​—⁠Victor Schoelcher, Reportero I Politico Frances, 1848.

“KICO ta e aspecto malbado aki di hende cu semper a hib’é na despreciá, dominá i rebahá su próhimo?” e editornan di The UNESCO Courier a puntra. “I con por ta cu un crímen asina contra humanidad a keda sin castigu asta despues cu a cuminsá cu Derechonan Humano?”

E contesta ta complicá. Golosidad ta e motibu pakico hende ta usa trabou infantil barata i pa e fenómeno di sclabitud di debe. Nan ta culpa pobresa i falta di educacion ora mucha muher ta ser bendé pa traha den prostitucion of pa matrimonio di catibu. Normanan religioso i conceptonan cultural ta tras di sclabitud ritual. I den e caso di hombernan cu ta bishitá Bangkok of Manila pa haña mucha homber i mucha muher hóben, liber di AIDS, e motibu no ta nada otro sino perversion sexual i inmoralidad. Tur esaki ta parti di un mundu caminda hende ta “stimadó di nan mes, stimadó di placa, . . . sin cariño natural, . . . sin dominio propio, feros,” segun e palabranan di apostel Pablo, un studiante di ley di promé siglo. (2 Timoteo 3:1-5) Esaki ta parti di un mundu caminda “loke ta trocí, bo no por haci regt, i loke ta falta absolutamente no por conta,” pa usa e palabranan di Sálomon, un estadista di antigwedad.—Eclesiástes 1:15.

Un Cambio di Mente

Esaki kier men cu no por—ni lo no—haci nada pa pone un fin permanente na sclabitud, sea den su formanan tradicional of den su formanan mas recien? Absolutamente cu no!

E Oficina di Alto Comisionado pa Derechonan Humano di Nacionnan Uní (OACDH) ta declará cu sclabitud ta “un estado mental,” i ta agregá: “Asta ora abolí sclabitud, e ta laga rastro atras. E por persistí como un estado mental—entre su víctimanan i nan desendiente i entre e herederonan di esnan cu a practik’é—hopi tempu despues cu el a ser prohibí oficialmente.”

Pues un manera pa abolí sclabitud lo ta dor di trece un cambio den manera di pensa—un  cambio di curason—riba un escala mundial. I esei ta encerá un cambio di educacion, esta, siña hende stima otro i respetá dignidad di otro. Esei ta nificá yuda hende eliminá golosidad for di nan curason i biba segun normanan moral haltu. Ken por percurá tal educacion? OACDH ta bisa cu “tur hende tin cu contribuí pa trece un órden mundial cu no ta tolerá explotacion inhumano mas.”

Considerá un programa educativo cu e comunidad cristian di Testigonan di Jehova ta efectuá rond mundu. Cu éxito e programa aki a siña hende di curason onrado pa no tolerá ni aprobá explotacion inhumano. Mediante e programa aki, miyones di hende den mas cu 230 pais a siña trata tur nan próhimo cu dignidad. Con bini e programa aki tin éxito?

Pasobra e ta basá riba Bijbel, un buki inspirá dor dje Creador di hende. E ta un buki cu ta respaldá dignidad humano. Hende instruí den Bijbel via e programa educativo di Testigonan di Jehova ta siña cu nos Creador, Jehova, mes ta un Dios di dignidad. (1 Crónicanan 16:27) E ta otorgá dignidad na tur su creacion. Esaki ta incluí tantu hende homber como hende muher, di tur rasa, antecedente social i condicion económico.—Mira e cuadro “Libertad i Dignidad Humano—Di Ki Fuente?”

Igualdad i Respet pa Dignidad

Bijbel ta siña cu Dios “a traha for di un solo hende tur nacion di hende, pa nan biba riba henter e superficie dje tera.” (Echonan  17:26) Pues, niun hende no por pretendé di tin supremacia riba niun próhimo di dje ni di tin e derecho di oprimí of explotá otro hende. Hende cu ta dispuesto pa siña ta bin comprendé e echo cu “Dios no ta parcial, sino cu den tur nacion e hende cu ta tem’é i ta obra husticia ta aceptabel p’e.” (Echonan 10:34, 35) Nan ta realisá cu Dios su amor ta encerá tur hende, ya cu e privilegio di tin un relacion estrecho cuné ta habrí pa tur hende. De echo, “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.”—Juan 3:16.

E educacion aki basá riba Bijbel tin un efecto profundo riba personalidad di hende. Mediante dje, hende su curason i mente por ser “hací completamente nobo.” (Efesionan 4:22-24, Today’s English Version) E ta motivá hende pa trata nan próhimo cu dignidad i respet. Nan ta keda determiná pa “obra loke ta bon pa cu tur.” (Galationan 6:10) Un hende no por ta un berdadero cristian i na mes momento participá den explotacion inhumano i opresion di su próhimo. Testigonan di Jehova ta contentu di ta un comunidad cristian mescos cu e congregacion cristian di promé siglo, caminda ‘no tabatin ni hudiu ni griego, ni no tabatin esclabo ni liber. Tur tabata un solo persona den union cu Cristo Jesus.’—Galationan 3:28.

Un Cambio di Gobiernu

Sin embargo, pa por tin un fin permanente na tur forma di sclabitud, mester di un cambio drástico den sociedad humano. E Organisacion Internacional di Trabou ta bisa cu pa pone fin na explotacion humano, mester “cambia e ambiente cu ta permití i aprobá” e prácticanan ei. Accionnan internacional, cooperacion internacional i determinacion dje comunidad mundial ta entre e otro sugerencianan cu e agencia ei a duna.

Lógicamente esaki lo rekerí un poder cu por ehercé control amplio riba nos planeta, un poder cu por sigurá libertad universal. Boutros Boutros-Ghali, ex-secretario general di ONU, a bisa cu e berdadero problemanan cu ta afligí nos planeta tin cu ser solucioná “riba un nivel mundial.” Pero no ta tur hende ta asina sigur cu esaki lo sosodé un dia. Experencia di pasado ta mustra cu hopi hende na poder ta muchu egoista i preocupá cu nan mes interes i metanan pa logra un cooperacion internacional asina.

Pero Bijbel—e mésun buki cu a siña miyones di hende respetá dignidad di nan próhimo—ta mustra cu Dios su propósito ta pa establecé un gobiernu mundial asina. Den Bijbel lo bo haña hopi promesa di un mundu nobo di husticia. (Isaías 65:17; 2 Pedro 3:13) Ta Dios su propósito pa kita for di tera ken cu no ta stima Dios ni próhimo. Dios a revelá su propósito di establecé un gobiernu mundial riba humanidad pa goberná e tera den husticia. Jesus a bisa nos pidi den oracion p’e gobiernu ei den loke comunmente hende ta yama e oracion di Nos Tata.—Mateo 6:9, 10.

Explotacion humano i tur forma di sclabitud lo disparcé bou di mando dje gobiernu aki pasobra Cristo e Rey lo reina “pa medio di husticia i pa medio di rectitud.” (Isaías 9:7) Hende oprimí lo haña alivio bou di su mando hustu, pasobra Bijbel ta bisa: “Lo e libra esun pober cu ta sclama pa yudansa, tambe esun afligí i ken cu no tin yudante. Lo e sinti duele di esun di condicion humilde i esun pober, i e alma di esnan pober lo e salba. For di opresion i for di violencia lo e rescatá nan alma.”—Salmo 72:12-14.

Si bo ta anhelá pa mira e fin di sclabitud—tur forma di sclabitud—nos ta invitá bo pa siña mas tocante Dios su propósito di establecé e gobiernu mundial aki cu lo trece liberacion. Testigonan di Jehova den bo área gustosamente lo yuda bo cu esaki.

[Kuadro/Plachi na página 11]

LIBERTAD I DIGNIDAD HUMANO​—⁠DI KI FUENTE?

Nos tur a nace cu un necesidad i deseo pa dignidad i libertad. Kofi Annan, secretario general di ONU, a expresá sintimentunan universal ora el a puntra: “Ken por nenga cu nos tur ta busca un bida liber di miedu, tortura i discriminacion? . . . Ki dia bo a tende un stem liber exigí pa pone fin na libertad? Unda bo a tende un catibu boga na fabor di sclabitud?”

Ideanan asina no ta nada nobo. Rechasando e idea cu tin hende ta nacé pa ta catibu, Seneca, filósofo romano di promé siglo, a skirbi den su Cartanan na Lucilio: “Por fabor, refleccioná riba e echo cu e homber cu bo ta yama bo catibu a nace di mésun simia, tin mésun bon shelu riba dje, ta hala rosea mescos cu bo, ta biba mescos cu bo, ta muri mescos cu bo!”

Imam ʽAlí, cu ta ser venerá como e di cuater califa despues di Mohamed, a bisa cu tur hende ta “igual den creacion.” Saʽdí, un poëta perso di siglo 13, a declará: “E yunan di Adam ta miembro di otro i nan ta creá for di un solo substancia. Ora mundu causa dolor na un miembro, e otro miembronan no tin sosiegu.”

E registro histórico inspirá pa Dios cu nos ta haña den Bijbel ta resaltá e dignidad di tur hende. Por ehempel, Génesis 1:27 ta describí hende su creacion, bisando: “Dios a procedé na crea hende den su imágen, den imágen di Dios el a cre’é; machu i hembra el a crea nan.” Nos Creador ta un Dios di libertad. “Caminda e spiritu di Jehova ta, tin libertad,” segun apostel Pablo. (2 Corintionan 3:17) Dor di crea hende den su imágen i semehansa, Jehova a otorgá hende un midí di balor, respet propio i dignidad. Dor di libra su creacion di “sclabitud na corupcion,” lo e sigurá cu hende lo disfrutá di tal libertad i dignidad pa semper.​—⁠Romanonan 8:21.

[Plachi na página 9]

Tur hende tin derecho riba dignidad i libertad

 [Plachinan na página 10]

EDUCACION BIBLICO TA ENFATISA RESPET PA DIGNIDAD HUMANO I TA DUNA SPERANSA PA UN FUTURO MUNDU NOBO

Un studio di Bijbel di famia na Benin

E beyesa dje watervalnan aki di Nilo Blou na Etiopia ta duna un idea con e paradijs restorá lo ta