Un Actitud Alegre Apesar di Malesa

SEGUN E RELATO DI KONSTANTIN MOROZOV

Ora mi a nace dia 20 di juli 1936, ningun wesu den mi curpa no tabata desaroyá cu excepcion di mi cráneo i wes’i lomba. Henter mi skelet tabata consistí di wesu moli cu no tabata mas duru cu wesu di orea di un hende adulto. Mi tabata pisa ménos cu un liber. E único señalnan di bida tabata un curason cu a bati swak, halamentu di rosea suave i un par di movecion.

MI TABATA e di shete den un famia di nuebe yu cu a biba den e pueblito Sara, na Ul’yanovsk Oblast, den curason di Rusia. Ora mi tabatin tres siman, mi mayornan a hiba mi misa pa bautisá. Purá-purá pastor a sprengu mi cu awa, anto a bisa mi mayornan pa hiba mi cas mas lihé posibel, ya cu e di cu den un par di ora lo mi muri.

Na januari 1937, mi mayornan a hiba mi n’e stad Kazan’, capital dje república ruso Tatarstan, pa algun specialista wak mi. P’e tempu ei mi por a bisa “mama,” “papa” i “babushka” (wela), i mi tabata sa nomber di mi rumannan. Despues cu e dokternan a saminá mi, nan a bisa mi mayornan cu lo mi muri denter di un aña. Nan a recomendá pa laga mata mi i conserbá mi den un botter di glas pa exhibí mi como un yudansa visual pa studiantenan di medicina. Esta gradicidu mi ta na mi mayornan stimá cu nan a nenga redondamente!

Un Infancia di Sufrimentu

Te asina leu cu mi por corda, semper mi curpa tabata yen-yen di dolor. Tog, asta na mucha, mi a purba mantené un actitud positivo, hari hopi i disfrutá di bida. Esaki ta e actitud cu mi a keda cuné. Poco-poco mi skelet a bira mas fuerte, i mi por a lanta sinta i gatia un poco. Mi no a crece manera muchanan normal i a keda tur deformá. Pero mi tabata siña bon, i cu cincu aña mi por a lesa i skirbi.

Na mei 1941, mi mama a hiba mi misa pa di dos biaha. Tabatin vários hende presente, i nan tur tabata resa na rudia. Un usher muher a bini cerca Mama i a puntr’é di con e no a hinca rudia. Ora Mama a lagu’e wak mi, el a bai papia cu pastor. Ora e usher a bin bek, el a escoltá nos hiba n’e salida i a sugerí Mama pa laga mi pafó di porta i e so bin paden. Segun e usher, debí na mi mayornan su picá, nan a haña mi for di “esun impuru.” Mama a bai cas cu awa na wowo. Pa hopi tempu mi a pensa riba esaki. Mi tabata puntra mi mes: ‘Ken ta “esun impuru” aki?’

 Na 1948, ora mi tabatin 12 aña, Mama a hiba mi e pueblito Merenki na República Chuvash, rond di 80 kilometer for di nos cas. Ei tabatin fonteinnan medicinal, i Mama a spera cu e awa lo a cura mi. Entre e condicionnan cu e pastornan a pone pa mi cura tabata cu mi no mag come pa tres dia. Tambe mi mester a ricibí comunion den misa. Aunke mi no tabatin masha confiansa den iglesia, mi a bai eens cu e condicionnan. Pa mi e biahe tabata largu i pisá, pero mi a wanta, i a purba ocupá mi mes cu e bunitesa dje paisahe.

Misa tabata yen di hende. Miéntras Mama tabata carga mi dor dje multitud, un muher bieu a duna mi un mangel. Mi a tum’é i hink’é den mi sacu. Ora a yega mi turno pa ricibí comunion, e muher bieu a grita: “Pader, no dun’é comunion! El a caba di come un mangel!” Mi a splica cu e mangel tabata den mi sacu, pero e pastor a grita: “Mucha hendikep insolente! Bo tin cu gaña tambe? Sak’é for di misa!” Sin embargo, e siguiente dia un otro pastor a duna mi comunion i a laba mi cu awa “milagroso.” Tog, ningun milager no a sosodé. Mi a keda inválido.

Logronan Intelectual

Aunke mi tabata físicamente hopi deformá, mi a sigui tras di hopi meta académico i intelectual durante mi hubentud. Na 1956, mi a djoin Komsomol (Liga Comunista Hóben) i cu tempu mi tabata duna les di historia di Komsomol na hóbennan. Mi tabata miembro dje Comision di Hogar i Cultura na un cas pa hende inválido, i tambe mi a traha como director di radio i locutor.

Ademas, mi tabata bibliotecario di un biblioteca móbil di bukinan riba caset pa hende ciegu, i nan a eligí mi como miembro dje Comision di Hues pa Lucha Contra Abusu di Alcohol. Mi a participá tambe den un club di artista amateur, mi tabata canta i toca vários instrumento musical.

Den Cas pa Hende Inválido

Na 1957, ora mi a haci 21 aña, mi problemanan físico a obligá mi drenta un cas pa hende inválido. Sin embargo, mi no tabatin pensá di entregá. Na october 1963, mi a sali for di einan pa bai e Instituto di Investigacion di Ciencia Prostético di Moscú. Ei nan a operá mi 18 biaha pa stret mi pianan.

Promé, nan a rek mi pianan. Anto, despues di ocho dia, nan a operá mi. Despues di esei, nan a pone mi pianan den yesu pa tene nan na lugá te n’e siguiente operacion. E verpleegster tabata yora ora e mira cuantu mi tabata sufri.

Durante e siguiente cuater lunanan, mi a siña cana cu kruk. Cu kruk mi por hisa mi mes lanta para te cu mi ta midi casi 110 centimeter. Mi ta pisa un tiki mas cu 25 kilo. Una bes mi a siña cana cu kruk, mi a bolbe n’e cas pa hende inválido na 1964. Desafortunadamente, mi wesunan di pia cu tabata swak no por a carga e peso di mi curpa, i poco tempu despues mi a haña mi obligá atrobe ta move rond dor di gatia of cu yudansa di rolstoel. Te cu awe rolstoel ta e medio principal cu mi ta move cuné.

Nunca mas mi no a bai misa. E pretension di cu mi a nace di “esun impuru” a sigui tormentá mi alma mashá. Mi tabata stima mi tata cu mama masha hopi, i simplemente mi no por a aceptá cu mi condicion tabata debí na nan falta of di Dios. Mi a sigui purba di tin un actitud alegre apesar di contratempu. Mi kier a haci bon pa otro hende, i mas cu tur cos, proba pa mi mes cu asta ami por a haci esei.

Hibando un Bida Independiente

Na 1970, mi a casa cu Lidia, kende ta parcialmente paralisá for di mucha. Nos a haña un cas chikitu, caminda nos a biba pa  15 aña. Durante e tempu ei, nos tur dos tabata traha pa nos pan di cada dia. Mi a siña drecha oloshi i otro artefactonan chikitu i delicado.

Pa un tempu mi a usa un cachó entrená pa haci vários servicio balioso. De echo, ami cu un entrenadó di cachó a inventá un harnas special. Mi tabatin dos cachó, un cu a yama Vulcan i e otro Palma. Palma tabata un compañera fiel pa hopi aña. Na tienda e tabata coge artículonan di cuminda pa mi. E único cos cu e no tabata gusta ta para den rij pa paga. E tabata carga mi potmoni den su boca i e tabatin un hak chikitu na su banchi pa carga mi sacu di cómpras.

Na 1973 mi mama a bira hopi malu. Como cu semper mi tabata na cas, ami cu mi casá a dicidí di trec’é bin biba cerca nos. Pa e tempu ei, mi tata i cincu di mi rumannan tabata morto, i mi tres otro rumannan tabata biba den otro parti di Rusia. Tempu Mama a biba cerca nos, mi a purba haci loke mi tabata por p’e. Despues el a muri na edad di 85 aña.

Na 1978, mi a dicidí di construí un vehículo pa mi mes. Despues di traha riba vários vehículo experimental, mi a haña un apropiado. E departamento local di Inspeccion Estatal di Auto a laga mi pasa un examen di core auto i registrá mi vehículo. Mi a yam’é Osa (Maribomba). Ami cu mi casá a traha un trailer chikitu p’e cu por a carga te 300 kilo. Nos dos por a core rond den dje i carga cos den dje. E vehículo aki di motor a sirbi nos te cu 1985.

Rond dje tempu ei mi a bira ciegu na mi wowo robes, i e bista di mi wowo drechi a cuminsá bai atras. Anto Lidia a bira malu cu problema di curason. Na mei 1985, debí na nos limitacionnan, nos a haña nos obligá di bai biba den un cas pa hende inválido n’e stad di Dimitrovgrad.

Con Bini Mi Bida Ta Asina Felis Awor

Den zomer di 1990, Testigonan di Jehova a bishitá nos cas pa hende inválido. Mi a haña loke nan tabata bisa masha interesante. Nan a mustra mi e pasashi den e Evangelio di Juan tocante e homber cu a nace ciegu. Jesus a bisa tocante e homber ei: “Ni e homber aki ni su mayornan no a peca.” (Juan 9:1-3) Nan a splica mi cu nos a heredá picá i malesa for di nos antepasado Adam.—Romanonan 5:12.

Sin embargo, loke a impresioná mi mas cu tur cos ta e echo cu Dios cu tempu lo cura tur hende cu haña bida bou dje gobernacion di Reino di su Yu Jesucristo, ora Paradijs lo ta restorá riba tera. (Salmo 37:11, 29; Lucas 23:43; Revelacion 21:3, 4) Lágrima di goso a basha for di mi wowo, i mi a fluister: “Mi a haña e berdad, e berdad, e berdad!” Mi a studia Bijbel cu Testigonan di  Jehova pa un aña, i na 1991, mi a bautisá bou di awa como símbolo di mi dedicacion na Jehova Dios.

Aunke mi a desaroyá un deseo fuerte pa sirbi Jehova i predicá tocante su propósitonan maraviyoso, mi a confrontá vários obstáculo. Anteriormente, mi no tabatin masha necesidad di sali, pero awor mi mester a sali pa compartí mi fe cu otronan. Mi promé teritorio pa predicá tabata nos cas pa hende inválido, caminda mas cu 300 hende tabata biba. Pa mi por a bini den contacto cu mas tantu hende posibel, mi a pidi nan asigná mi pa sirbi den e cuarto pa asuntunan di cas.

Tur mainta mi tabata bai sinta na mi trabou i atendé mi asignacionnan. Den transcurso di mi trabou, mi a cera hopi amistad nobo cu ken mi tin combersacionnan interesante riba temanan bíblico. Vários di nan a aceptá buki i revista cu a yuda nan comprendé Bijbel. Bishitantenan a custumbrá cu mi ta lesa pa nan for di Bijbel i di publicacionnan basá riba Bijbel. Na ora di cuminda di merdia, hopi bes tin asina tantu hende den e cuarto caminda ami cu mi casá ta biba cu tin biaha niun hende mas no por drenta.

Mi rumannan cristian dje congregacion di Testigonan di Jehova a yuda mi hopi den e trabou di predicá. Nan ta trece literatura bíblico pa mi i ta pasa tempu huntu cu mi i mi casá. Tambe nan ta yuda mi bai Salon di Reino pa reunionnan di congregacion. Un Testigo a cumpra un motosaikel cu un asiento na banda djis pa transportá mi. Otronan cu tin auto, gustosamente ta bin busca mi durante e lunanan friu di winter.

Debí na tal cuido amoroso, mi por a asistí na mas cu dies congreso, esta, seminarionan educativo, di Testigonan di Jehova. E promé cu mi a bai tabata e congreso internacional grandi na Moscú na juli 1993, caminda tabatin un asistencia máximo di 23.743 hende, di mas cu 30 pais. Pa mi por a asistí n’e reunion ei mi mester a haci un biahe di aproximadamente 1.000 kilometer. For dje dia ei mi no a falta ni un congreso dje pueblo di Jehova.

Gerente di nos cas pa hende inválido tin hopi respet pa mi, pa cua mi ta masha gradicidu. Mi casá Lidia, cu ken mi a biba den armonia pa 30 aña, tambe ta apoyá mi i yuda mi, maske e no ta compartí mi punto di bista religioso. Pero mas cu tur, ta Jehova ta apoyá mi cu su man fuerte i ta otorgá mi su bendicionnan magnífico. No muchu tempu pasá, dia 1 di september 1997, mi a ser nombrá como pionero, manera ta yama ministernan di tempu completo di Testigonan di Jehova.

Den mi bida tabatin hopi ocasion cu mi curason por a para i lo mi a muri. Esta contentu mi ta awor cu esei no a sosodé i cu mi a bin conocé i stima e Fuente di bida, Jehova Dios! Tanten cu mi curason ta sigui bati, mi kier sigui sirbié huntu cu mi rumannan spiritual rond mundu.

[Plachi na página 20]

Cu mi casá Lidia

[Plachi na página 21]

Siñando un studiante den nos cas pa hende inválido