For di Nos Lectornan

Ex-Criminal Mi tin cu skirbi pa bisa cuantu mi a apreciá e experencia di Enrique Torres, Jr., titulá “Mi A Cambia di un Leon Brabu pa un Lamchi Mansu.” (8 di september 1999) E artículo a resaltá e amor i misericordia di nos Dios Jehova, i cuantu pacenshi e tin cu nos. Tambe el a mustra cu como mayor, sin importá con leu for dje normanan di Dios nos yunan a desviá, nunca nos no mester entregá relacioná cu nan.

J. F., Inglatera

Mi a lanta como un cristian, pero debí na mal asociacion, mi a bira enbolbí den droga i violencia. Na edad di 18 aña, mi a ricibí un castigu di prizon di 25 aña. Aunke mi a ser restorá den e congregacion cristian, hopi bes mi ta sinti mi indigno. Pero, despues di lesa e artículo aki, mi por a comprendé cu Jehova no ta masha leu for di esnan cu ta busk’é. Aunke ainda mi ta den prizon, e experencia aki a animá mi pa para firme.

R. B., Merca

Blenchi E artículo “E Para Cu Ta Sunchi Flor” (8 di augustus 1999) tabata tremendo. Den pasado, mi a yega di observá blenchi, pero mi no a realisá cu tin asina chikitu. Via palabra i plachi, boso a lanta mi interes den e criaturanan fasinante aki.

R. H., Alemania

Mi a keda impresioná cu e informacion i e bunita plachinan. Den zomer, hopi bes blenchi ta bishitá mi hardin. Ta ègt un goso pa wak e paranan maraviyoso aki. Hopi biaha, djis wak nan ta suficiente pa lanta mi ánimo.

C.S.S., Brazil

Stacion Espacial Mi tin 16 aña, i exploracion di espacio semper a fasiná mi. P’esei mi kier yama danki p’e artículo “E Stacion Espacial Internacional—Un Laboratorio den Espacio.” (8 di september 1999) Artículonan manera esaki ta interesá mi mashá!

K. E., Merca

Boso ta duna gloria n’e stacion espacial aki sin un solo palabra di condenacion. Dios no a mencioná esaki como parti di su plan pa hende. I ta un bergwensa cuantu un solo lansamentu ta costa, miéntras cu miyones di hende ta muri di hamber. Boso ta desacreditá Dios ora boso ta duna gloria na cosnan asina.

P.N.M., Inglatera

Bijbel ta bisa cu ‘e tera a ser duná n’e yunan di hende.’ (Salmo 115:16) Sin embargo, no tin ningun base bíblico pa bisa cu ta malu pa hende ta interesá den espacio. De echo, Bijbel ta animá hende di fe pa observá shelu como un medio pa observá Dios su sabiduria i su poder di creacion. (Salmo 8:3, 4; 19:1) Di tur manera, no tabata nos intencion pa duna gloria n’e stacion espacial cu hende ta proponé; nos a djis informá tocante e plannan cu tin pa trah’é. Si e stacion espacial lo producí investigacion cu ta hustificá su tremendo costo of no, nos tin cu mira ainda.—RED.