Kico A Para dje Mucha Peter?

DJE CORESPONSAL DI SPIERTA! NA ECUADOR

ESpierta! na spañó di 8 di december 1970 (na ingles, 22 di augustus 1970) tabatin un artículo titulá “Operacion di Curason sin Transfusion di Sanger.” E artículo a conta e relato di Peter, un mucha homber canades di shete aña, cu na aña 1963 mester a operá pa salba su bida.

Peter su dokter di cas a bisa cu tabatin un procedura disponibel cu por a drecha e klep dañá di su curason. Pero ora Peter su mayornan a hiba nan yu cerca un specialista i a puntra si por a haci e operacion sin sanger, e dokter a contestá: “No. Esei ta absolutamente imposibel. Mi sa di kico mi ta papia.”

Sin ser descurashá, Peter su mayornan a sigui busca i cu tempu a haña un ciruhano cu tabata dispuesto pa haci e operacion sin usa sanger. Cu ki resultado? Maske Peter a sobrebibí e operacion, dokternan a bisa su mayornan cu ta solamente tempu lo mustra con exitoso e procedura tabata. Pues, kico a para dje mucha Peter?

Ora Peter tabatin 13 aña, e cu su famia a muda pa Ecuador, Sur América, pa sirbi caminda tabatin mas mester di predicadónan dje bon nobo dje Reino di Dios. (Mateo 24:14) Peter a bautisá cu 15 aña i a bira pionero regular (evangelisadó di tempu completo) na edad di 18 aña. Cu 26 aña el a bira pionero special, i a sirbi na un pueblo den Andes, situá 3.000 meter riba nivel di laman. Na 1988, na edad di 31 aña, Peter huntu cu su casá Isabel, a cuminsá sirbi como un representante biahero di Sociedad Watch Tower. Te awe e ta sirbi den e capacidad ei, bishitando un congregacion distinto cada siman pa por animá nan.

Sí, Peter ta hiba un bida masha activo, sin tabatin mester di ningun otro cirugia. Ki gradicidu e i miles di otro Testigo ta pa e cooperacion cu nan a haña di ciruhanonan ábil cu a respetá e derecho di nan pashentnan!

[Plachi na página 23]

Peter di shete aña, djis despues dje operacion

[Plachi na página 23]

Peter cu Isabel Johnston awe