Kico Ta El Niño?
Kico Ta El Niño?
Ora cu cerca di Lima, Perú, e riu Apurímac, cu normalmente ta secu, a bari casi tur cos cu Carmen tabatin bai cuné, el a lamentá: “Ta hopi di nos a pasa den mésun cos, asina hopi. Mi no ta e único.” Mas pa nort, awaceru torencial a transformá un seccion di Sechura, e desierto cantu di costa, temporalmente den e di dos lago mas grandi na Perú, abarcando rond di 5.000 kilometer cuadrá. Na un otro punta di mundu, inundacion extraordinario, ciclon intenso i secura severo a hiba na hamber, pestilencia, candela extenso, i daño na cosecha, propiedad i medio ambiente. Kico tabata e causa di tur esaki? Hopi hende ta culpa El Niño, cu a desaroyá den océano Pacífico tropical, of ecuatorial, na fin di 1997 i cu a dura un ocho luna asina.
Kico precis ta El Niño? Con e ta desaroyá? Di con su efectonan ta asina extenso? Hende por pronosticá cu exactitud e siguiente biaha cu lo e sosodé, i asina kisas reducí su daño na bida i propiedad?
E Ta Cuminsá cu Keintamentu di Laman
“El Niño ta, den e sentido estricto di palabra, solamente e coriente di awa cayente cu ta aparecé cerca di costa di Perú cada dos pa shete aña,” segun e revista Newsweek. Pa mas cu shen aña, nabegantenan a lo largu dje costa di Perú a ripará e keintamentu ei. Como cu por lo general e coriente di awa cayente ta yega rond di Pascu, nan a yam’é El Niño, refiriendo na niño Jesus.
Keintamentu di laman cerca dje costa di Perú ta nificá mas awaceru pa e pais ei. E awaceru ta pone desierto florecé i cu bestianan ta rende. Ora e awaceru ta pisá, e ta causa inundacion tambe n’e region. Ademas, e capa cayente di awa di laman ta stroba e awa mas friu den fondo, yen di substancianan nutritivo, di bini ariba. Consecuentemente, hopi bestia di laman i asta algun para ta migra bai en busca di cuminda. Despues ta sinti e efectonan di El Niño den otro lugánan leu for dje costa di Perú. *
Causá dor di Bientu cu Awa
Kico ta causa e subimentu inusual dje temperatura di océano cerca dje costa di Perú? Pa comprendé esaki, considerá promé e buelta circulatorio gigante, conocí como Circulacion di Walker, cu ta existí den atmósfera entre e océano Pacífico tropical oost cu * Segun cu solo ta keinta e capa ariba di laman den west, cerca di Indonesia cu Australia, e aire cayente i húmedo ta subi den atmósfera, causando un sistema di preshon abou pegá cu superficie di laman. E aire cu bai laira ta fria i ta perde su humedad, i ta pone awaceru cai den e área ei. E bientunan mas haltu den atmósfera ta pusha e aire secu den direccion oost. Segun cu e aire ta supla bai oost, e ta bira mas friu i pisá i ta cuminsá sak abou ora e yega banda di Perú cu Ecuador. Esaki ta causa un sistema di preshon haltu pegá cu superficie di océano. I, na altitudnan abou, e coriente di aire conocí como bientu di pasat (bientu cu ta supla den un solo direccion) ta bai bek west den direccion di Indonesia, i asina ta completá e buelta.
west.Con e bientu di pasat ta afectá e temperatura di superficie di océano Pacífico tropical? Segun Newsweek: “Normalmente e bientunan aki ta actua manera brisa den un lagun chikitu. Nan ta pusha e superficie di awa cayente bai cuné na océano Pacífico west, di manera cu einan e superficie di laman por yega te 60 centimeter mas haltu i 8° Celsius mas cayente cu, por ehempel, na Ecuador.” Den océano Pacífico oost, awa mas friu yen di substancianan nutritivo ta subi bini ariba for di den fondo, loke ta rende bida den laman. Pues, durante añanan normal, es decir sin El Niño, e temperatura di superficie di laman ta mas friu den oost cu e ta den west.
Ki cambionan den atmósfera ta causa El Niño? Segun National Geographic: “Pa motibunan cu te ainda científiconan no por comprendé, cada un par di aña e bientunan di pasat ta mengua of asta disparcé.” Segun cu e bientunan aki ta baha, e awa cayente cu a acumulá banda dje costa di Indonesia ta laba bai bek oost, i asina ta subi e temperatura di superficie di laman na Perú i otro paisnan den oost. E movementu aki na su turno tin un efecto riba e sistema di atmósfera. Segun un buki di referencia: “Keintamentu dje océano Pacífico tropical di oost ta debilitá e Circulacion di Walker
i ta causa e zona di convergencia di awaceru pisá move bai den direccion oost, for dje océano Pacífico tropical di west i drenta e parti central i oost.” Pues, esei ta afectá patronchinan di clima a lo largu di henter e océano Pacífico ecuatorial.Manera un Baranca Meimei di un Riu
Tambe El Niño por cambia patronchi di clima cu ta leu for dje coriente di laman di océano Pacífico tropical. Con asina? Dor di usa e sistema di circulacion di atmósfera como un agente. Por compará e efectonan di largu alcanse di un disturbio local den e circulacion di atmósfera cu e manera cu un baranca meimei di un riu por causa olanan chikitu atrabes di henter e riu. E nubianan diki di awaceru cu ta subi riba e awa dje océano tropical cayente ta forma un obstáculo manera un baranca den atmósfera, loke ta afectá e patronchi di climanan miles di kilometer leu.
Na altitudnan mas haltu, El Niño ta fortalecé i desplasá e corientenan di bientu cu ta bai den direccion oost i cu ta move lihé, conocí como bientu di djet. E bientunan di djet aki ta dirigí e fluho di mayoria sistema di tormenta n’e altitudnan ei. Bientunan di djet cu ta bira mas fuerte of ta cambia di ruta tambe por intensificá of mengua condicionnan di clima di cierto temporada. Por ehempel, winternan di El Niño ta por lo general mas suave cu normal den partinan nort di Merca, miéntras cu nan ta mas friu i cu mas awaceru den algun estado den zuid.
Te Con Leu Por Pronostik’é?
Por pronosticá tormentanan individual solamente un par di dia di antemano. Esei ta e caso tambe cu intentonan pa pronosticá El Niño? No. Na lugá di trata cu sucesonan di clima di corto plaso, pronósticonan di El Niño ta encerá condicionnan abnormal di clima riba áreanan grandi pa lunanan largu. I investigadónan di clima tabatin un grado di éxito cu nan pronósticonan di El Niño.
Por ehempel, nan a saca e pronóstico di El Niño pa 1997-98 den mei 1997, casi seis luna promé cu el a presentá. Plamá den henter e océano Pacífico tropical tin awor 70 bui cu ta midi condicion di bientu riba superficie i temperatura di océano den fondo na un profundidad di 500 meter. Ora hinca tur e informacionnan aki den programanan di computer relacioná cu clima, nan ta producí pronósticonan di clima.
En berdad advertencianan trempan di El Niño por yuda hende prepará pa e cambionan cu ta ser verwagt. Por ehempel, desde 1983 na Perú, pronósticonan di El Niño a stimulá hopi cunukero pa cria baca i planta cosecha cu por cu mas awaceru, miéntras cu piscadónan a cambia di coge piscá pa coge cabaron cu ta bini cu e laman mas cayente. Sí, pronósticonan exacto huntu cu preparacion di antemano por reducí e daño di El Niño na hende i economia.
Investigacion científico den e procesonan cu ta goberná clima di nos tera ta duna testimonio dje exactitud dje palabranan inspirá registrá dor di rey Sálomon di antiguo Israel un 3.000 aña pasá. El a skirbi: “Bientu ta supla pa sùit i bira pa nort, lora, lora, pa bolbe kuminsá di nobo.” (Eclesiástes 1:6, Beibel na papiamentu koriente) Hende moderno a siña hopi tocante patronchinan di clima dor di studia coriente di bientu i coriente di océano. Laga nos beneficiá dje conocimentu ei dor di haci caso di spiertamentunan relacioná cu sucesonan manera El Niño.
[Nota]
^ par. 6 Na contraste, La Niña ta un friamentu periódico di temperatura di laman cerca dje costa west di Sur América. La Niña tambe tin efectonan di largu alcanse riba e clima.
^ par. 8 Nan a duna e circulacion aki e nomber di Sir Gilbert Walker, e científico británico cu a studia e proceso den añanan 1920.
[Kuadro na página 27]
EL NIÑO SU REGISTRO DI DESTRUCCION
■ 1525: Promé registro histórico di El Niño na Perú.
■ 1789-93: El Niño tabata responsabel pa mas cu 600.000 morto na India i a causa un hamber severo den zuid di Africa.
■ 1982-83: E suceso aki tabata e causa di mas cu 2.000 morto i mas cu 23 mil miyon florin di daño na propiedad, principalmente den regionnan tropical.
■ 1990-95: Tres ocurencia tras di otro a combiná pa forma e periodo mas largu di El Niño cu tin registrá.
■ 1997-98: Apesar cu pa promé bes a logra cu basta éxito haci pronósticonan regional di inundacion i secura di un El Niño, tog rond di 2.100 hende a perde nan bida, i tabatin dañonan cu a suma na casi 60 mil miyon florin na tur parti mundu.
[Diagramnan/Mapanan na página 24, 25]
(Pa e teksto den su formato kompleto, wak e publikashon)
NORMAL
Patronchi di Circulacion di Walker
Bientunan fuerte di pasat
Awa cayente di océano
Awa friu di océano
EL NIÑO
Bientunan di djet ta cambia di ruta
Bientunan swak di pasat
Laman cayente ta move bai oost
Mas cayente of mas secu cu normal
Mas friu of mas awaceru cu normal
[Diagramnan/Plachinan na página 26]
(Pa e teksto den su formato kompleto, wak e publikashon)
EL NIÑO
Color corá riba e globo ariba ta representá temperatura di laman hopi mas cayente cu normal
NORMAL
Laman cayente ta acumulá den océano Pacífico west, loke ta permití awa mas friu yen di substancianan nutritivo bini ariba den oost
EL NIÑO
Bientunan swak di pasat ta permití laman cayente bai bek oost, loke ta blokea awa mas friu di bini ariba
[Plachinan na página 24, 25]
PERU
Desierto Sechura inundá
MEXICO
Horcan Linda
CALIFORNIA
Avalancha di lodo
[Rekonosementu]
Páginanan 24 i 25 di robes pa drechi: Fotografía por Beatrice Velarde; Imágen producí dor di Laboratorio pa Atmósfera, NASA Goddard Space Flight Center; FEMA potret di Dave Gatley