Hobennan Sa Puntra . . .

Kico di ‘Body Piercing’?

‘Ora cu pa promé bes mi a mira hende cu renchi na nan lip i na otro partinan di nan curpa, mi a pensa: “Wauw! Esei sí ta algu special.” ’—Lisa.

LISA no ta e único. Cantidad creciente di hóben ta bisti renchi i stenchi na vários parti di nan curpa, asta na nan wenkbrou, lenga, lip i lombrishi. Esei ta un práctica cu yama ‘body piercing’ esta, boramentu di curpa. *

Un hobencita di 16 aña cu yama Heather ta ansioso pa sigui e moda ei. E ta convencí cu un renchi na su lombrishi lo ta “absolutamente great.” Sin embargo, Joe di 19 aña, ya caba ta broma cu un barbèl chikitu di oro pasá dor di su lenga. I un otro hobencita a scoge pa pone un renchi na su wenkbrou pasobra e tabata kier algu “sumamente yamativo” cu lo a “shok hende.”

E idea di pone hoya na curpa no ta nada nobo. Aya den tempu bíblico, un muher deboto na Dios cu yama Rebeca tabatin un renchi di nanishi bistí. (Génesis 24:22, 47) Ora e israelitanan a sali for di Egipto, nan tabatin renchi di orea bistí. (Exodo 32:2) Pero, no ta conocí si nan a bisti e hoyanan ei dor di a bora nan orea of nan nanishi. Pero catibunan fiel sí tabata laga bora nan orea, como un símbolo di nan lealtad na nan doño. (Exodo 21:6) Den otro culturanan antiguo tambe bora curpa pa bisti adorno tabata algu prominente. Indjannan azteca i maya a bora nan lenga pa motibunan spiritual. Bora lenga pa bisti adorno ta hopi comun te ainda na Africa i entre indjannan di Sur América. Entre e habitantenan di Melanesia i di India i Pakistan ta comun pa pasa obhetonan di decoracion dor di nanishi.

Te cu un par di aña pasá, den mundu Occidental bora curpa pa bisti adorno tabata por lo general limitá na klep di orea di hende muher. Pero awor tiener i adulto hóben di ámbos sexo ta bisti hoya na casi delaster un parti di curpa cu por pegu’é.

Di Con Nan Ta Haci Body Piercing

Hopi hóben ta bora nan curpa pa bisti hoya pasobra nan ta haña cu ta esei ta moda. Otronan ta haña cu esei lo mehorá nan aparencia. Un cos ta sigur, e moda a ser promové dor cu modelonan importante, streanan di deporte i músiconan popular ta usa hoya na nan curpa. I pa algun hóben, ta parce cu piercing ta sirbi  tambe como un expresion di nan independencia, un búskeda pa ta diferente, un manera pa nan bisa cu nan no ta manera tur otro hende. Columnista John Leo ta comentá: “Ta parce cu un dje motibunan principal pa bora nan curpa cada bes, ta e anhelo pa iritá mayornan i shok hende di clase medio.” Malcontentu, inconformidad cu cosnan convencional, un disposicion pa bai contra, i rebelion, ta parce di ta e motor tras dje necesidad aki di expresion propio.

Tin asta hóbennan cu ta haci body piercing pa satisfacé necesidadnan sicológico i emocional profundo. Por ehempel, tin hóben ta haña cu esei lo aumentá nan respet propio. Tin víctimanan di abusu sexual na mucha cu a mira esei como un medio pa tuma control riba nan curpa.

Riesgonan di Salú

Pero tur e boramentu di curpa ei ta sin riesgo? Hopi hende den e profesion médico ta bisa cu algun di nan no ta. Bo mes bora bo curpa pa bisti hoya sigur ta peligroso. I bai cerca un asina yamá boradó profesional por tin su riesgonan. Hopi di nan no tin bon entrenamentu, ya cu nan a siña nan arte cerca amigu, for di revista of video. Como resultado, kisas nan no ta usa técnicanan higiénico of ni sikiera ta comprendé e riesgonan di piercing. Tambe, hopi boradó no conocé e anatomia di curpa. Esaki no ta djis un problema chikitu, ya cu si nan bora n’e lugá robes esei por causa sangramentu di mas. Si nan bora un nervio esei por causa daño permanente.

Un otro riesgo serio ta infeccion. Ekipo no sterilisá por transmití malesanan mortal manera hepatítis, AIDS, tuberculósis i tétano. Asta ora usa técnicanan steril, e cuido despues dje procedura ainda ta importante. Por ehempel, si bora lombrishi, esei tin chens di causa iritacion dor cu paña ta frega riba dje constant. Pues por dura te cu nuebe luna pa e cura.

Dokternan ta bisa cu bora e wesu moli di un hende su nanishi of orea ta mas peligroso cu bora e klep di orea. Un boletin dje Academia Mericano di Cirugia Plástico i Reconstructivo na Cara ta splica: “Vários buracu pa renchi di orea n’e parti ariba dje orea ta un causa special di preocupacion, infeccionnan serio por causa pérdida di henter e parti ariba dje orea. Stenchi pa nanishi tambe ta riscante, un infeccion den e área aki por coge adernan rond di dje i plama bai n’e celebro.” E boletin ta concluí:  “Idealmente, [piercing] mester ta limitá n’e área dje klep di orea.”

Otro peligernan ta sicatrisnan mahos, i reaccionnan alérgico riba hoya cu ta pasa dor di buracu. Si renchi na áreanan masha delicado, manera pechu, pega den paña, e por sker e cueru fácilmente. E sicatrisnan cu forma na pechu di un mucha muher por blokea e canalnan di lechi, i si e no busca tratamentu, den futuro lo e ripará cu ta difícil of asta imposibel pa duna baby pechu.

Recientemente e Asociacion Dental Mericano a yama piercing den boca un peliger pa salubridad público. Riesgonan adicional di pega hoya den área di boca ta incluí stikmentu despues di a guli hoya, lenga cu ta bira doof i no por sinti smak mas, sangramentu prolongá, djente bulá of fracturá, mas fluho di scupi, babamentu descontrolá, daño na encia, impedimentu di abla i problema pa hala rosea, kou i guli. Ora un mucha muher cu yama Kendra a laga bora su lenga, e lenga “a hincha manera un blas.” Pa empeorá asuntu, e boradó a usa un stenchi diseñá pa cachete, i esei a corta Kendra su lenga i bora pasa dor dje tehido bou dje lenga. Casi Kendra a perde su abilidad di papia.

Dios a siña su pueblo Israel pa respetá nan curpa i pa no desfigur’é. (Levítico 19:28; 21:5; Deuteronomio 14:1) I aunke cristiannan awe no ta bou dje Ley di Moises, tog nan ta ser animá pa trata nan curpa cu respet. (Romanonan 12:1) No ta lógico anto pa evitá di risca bo salú innecesariamente? No obstante, fuera di bo salú tin otro factornan cu bo tin cu considerá.

Ki Mensahe E Ta Transmití?

Bijbel no ta duna un mandamentu specífico tocante body piercing. Pero sí e ta animá nos pa dorna nos mes cu “modestia i sano huicio.” (1 Timoteo 2:9) I aunke den cierto parti di mundu nan por ta considerá algu como modesto, e berdadero cuestion ta con hende ta consider’é caminda abo ta biba. Por ehempel, den cierto parti di mundu nan ta considerá klep di orea borá cerca hende muher como aceptabel. Pero den un otro pais of cultura, e por ta ofensivo pa cierto hende.

Apesar cu body piercing i hende homber cu renchi di orea ta masha popular cerca hendenan famoso, den mundu Occidental te ainda esei no a haña aceptacion general. Un motibu por ta cu pa hopi tempu hende a considerá esakinan como e característica di prezunan, gèngnan di motosaikel, hende di ‘punk rock’ i miembronan di grupo homosexual sado-masokista. Pa hopi hende, body piercing tin e conotacion di rebelion i algu abnormal. Un cantidad di hende ta consider’é escandaloso i repugnante. Un mucha muher cristian cu yama Ashley ta bisa: “Den mi klas tin e mucha homber aki cu a caba di pone renchi den su nanishi. E kier sa cu e ta great. Ami ta hañ’é repugnante!”

Nada straño anto cu un negoshi mericano bon conocí tin como regla cu empleadonan cu tin contacto direct cu cliente tin mag di tin un solo renchi na cada orea i cu tur otro piercing visibel ta prohibí. Un bocero dje compania a splica: “Bo no por predicí con clientenan kisas lo reaccioná.” Asina tambe conseheronan di carera ta recomendá studiantenan masculino di universidad cu ta bai solicitá pa trabou, pa no bisti ‘renchi di orea ni otro hoya di body piercing; hende muher no mester bisti renchi di nanishi.’

Foral hóbennan cristian mester ta interesá pa nan duna e impresion corecto na otro hende, entre otro, ora nan ta participá den e trabou di evangelisá. Nan no kier ‘duna un motibu pa tropieso, pa hende no haña falta den nan ministerio.’ (2 Corintionan 6:3, 4) Loke sea ta bo opinion personal di piercing, bo aparencia inevitablemente ta expresá kico ta bo actitud i estilo di bida. Kico precis bo kier expresá?

Al final, abo—i, naturalmente bo mayornan—tin cu dicidí kico lo bo haci relacioná cu esaki. Bijbel su conseho sano ta: “No laga e mundu rond di bo primi bo den su propio malchi.” (Romanonan 12:2, Phillips) Al fin i al cabo, abo ta esun cu lo tin cu biba cu e consecuencianan.

[Nota]

[Plachinan na página 16]

Body piercing ta masha popular mes cerca hóbennan