E Punto di Bista Biblico

Ta Corecto pa Adorá Jesus?

ATRABES di siglonan, hopi hende den cristiandad a adorá Jesucristo como si fuera e tabata Dios Todopoderoso. Sin embargo, Jesus mes a dirigí atencion i adoracion na Jehova Dios so. Por ehempel, ora Diabel a urgié pa haci un acto di adoracion na dje, Jesus di: “Ta Jehova bo Dios bo tin cu adorá, i ta na dje so bo tin cu rindi sirbishi sagrado.” (Mateo 4:10) Mas despues Jesus a instruí su disipelnan: “No yama ningun hende boso tata riba tera, pasobra un so ta boso Tata, Esun celestial.”—Mateo 23:9.

Jesus a describí pa un muher samaritano e tipo di adoracion cu hende mester duna Dios. Nan adoracion mester ta basá riba spiritu i berdad. De echo, “e Tata ta busca hende asina pa ador’é.” (Juan 4:23, 24) Sí, nos mester expresá adoracion respetuoso na Dios so. Rindi adoracion na cualkier otro hende of cos ta un forma di idolatria, loke tantu e Scritura Hebreo como Griego ta condená.—Exodo 20:4, 5; Galationan 5:19, 20.

‘Pero,’ kisas tin hende ta bula respondé, ‘Bijbel no ta indicá cu nos tin cu adorá Jesus tambe? Pablo no a bisa na Hebreonan 1:6: “Tur Dios su angelnan mester ador’É [Jesus]”?’ (Beibel na papiamentu koriente) Con nos mester comprendé e texto aki en bista di loke Bijbel ta bisa tocante idolatria?

Loke Bijbel Kier Men cu Adorá

Promé, nos tin cu comprendé kico Pablo tabata kier men aki cu adorá. El a usa e palabra griego pro·sky·néo. Segun Unger’s Bible Dictionary e palabra aki literalmente kier men ‘sunchi man di un hende como muestra di respet profundo of pa haci homenahe.’ An Expository Dictionary of New Testament Words, di W. E. Vine, ta bisa cu e palabra aki “ta indicá un acto di respet profundo, sea na hende . . . of na Dios.” Den tempu bíblico pro·sky·néo hopi bes a encerá buig literalmente dilanti un hende di posicion haltu.

Considerá e comparacion cu Jesus a duna dje catibu cu no por a paga un suma grandi bek na su doño. Un forma dje palabra griego aki ta aparecé den e comparacion aki, i King James Version ta bisa cu “e criá e ora ei a cai abou, i a adorá [un forma di pro·sky·néo] e  [rey], bisando, Señor, tene pacenshi cu mi, i lo mi paga bo tur.” (Mateo 18:26; letra cursivo ta di nos.) E homber aki a cometé un acto di idolatria? Absolutamente cu no! Simplemente e tabata expresá e debido respet profundo n’e rey, cu tabata su doño i superior.

Den tempu bíblico tal actonan di homenahe, of expresionnan di respet, tabata basta comun den Oriente. Jacob a buig shete biaha ora el a topa su ruman homber Esau. (Génesis 33:3) Josef su ruman hombernan a cai na suela, esta a duna homenahe, dilanti dje como onor pa su posicion den e palacio di Egipto. (Génesis 42:6) Tumando e echonan aki na cuenta, nos por comprendé mihó loke a sosodé ora e astrólogonan a haña e mucha Jesus, kende nan a reconocé como “esun cu a nace como rey dje hudiunan.” Segun e Testament Nobo, e relato ta conta nos cu “nan a cai abao, nan a ador’é [pro·sky·néo].”—Mateo 2:2, 11.

Ta bisto anto cu e palabra pro·sky·néo, traducí “adorá” den algun Bijbel, no ta reservá exclusivamente pa e tipo di adoracion cu nos debe na Jehova Dios. E por referí tambe na e respet i onor cu ta mustra na un otro persona. Den un esfuerso pa evitá cualkier malcomprendimentu, algun Bijbel ta traducí e palabra pro·sky·néo na Hebreonan 1:6 como “paga homenahe na dje” (New Jerusalem Bible), “onr’é” (The Complete Bible in Modern English), “hinca rudía su dilanti” (Testament Nobo), of “rindi homenahe na dje” (Traduccion di Mundu Nobo).

Jesus Ta Digno di Homenahe

Jesus ta digno di tal homenahe? Sigur cu sí! Apostel Pablo, den su carta na e hebreonan, ta splica cu como e “heredero di tur cos,” Jesus “a sinta na man drechi dje Mahestad den lugánan haltu.” (Hebreonan 1:2-4) Pues, “den e nomber di Jesus tur rudia mester dobla, di esnan den shelu i di esnan cu ta riba tera i di esnan bou di suela, i tur lenga mester reconocé abiertamente cu Jesucristo ta Señor p’e gloria di Dios e Tata.”—Filipensenan 2:10, 11.

Ta remarcabel cu Cristo djis akí lo usa su posicion elevá i e poder ehecutivo extenso cu ta compañá e posicion ei, pa transformá e tera aki den un paradijs mundial. Bou di guia di Dios, i como resultado di su sacrificio di rescate, Jesus lo eliminá tur tristesa, dolor i pena for di mundu na beneficio di esnan cu someté nan mes na su mando hustu. P’esei, e no ta digno di nos onor, respet i obedencia?—Salmo 2:12; Isaías 9:6; Lucas 23:43; Revelacion 21:3, 4.

“Un Dios Cu Ta Exigí Debocion Exclusivo”

Sin embargo, Bijbel ta indicá bon cla cu nos adoracion—den e sentido di profundo respet i debocion religioso—mester ta dirigí na Dios so. Moises a describí Jehova como “un Dios cu ta exigí debocion exclusivo.” I Bijbel ta exhortá nos pa “adorá Esun cu a traha e shelu i tera i laman i fontein di awa.”—Deuteronomio 4:24; Revelacion 14:7.

Jesus sigur ta ocupá un papel crucial den adoracion berdadero, unu digno di onor i respet. (2 Corintionan 1:20, 21; 1 Timoteo 2:5) E ta e único caminda mediante cua nos por acercá Jehova Dios. (Juan 14:6) Na armonia cu esei, cristiannan berdadero ta haci bon di dirigí nan adoracion solamente na Jehova Dios, e Todopoderoso.