Hobennan Sa Puntra . . .

Bira Tata di Yu Ta Haci Bo Homber?

“Mi conocé basta un par [di gai] cu ta bisa: ‘Mi tin un yu muher cu ta biba aki i un yu homber cu ta biba aya banda,’ i e manera cu nan ta bis’é, ta parce manera cos cu nan no tin cunes.”—Harold.

TUR aña casi un miyon mucha muher tiener na Merca ta sali na estado. E gran mayoria di yu cu nace di mamanan asina ta nace pafó di matrimonio. Dje mamanan tiener aki, 1 di cada 4 lo bolbe haña un yu denter dje siguiente dos añanan. E revista Atlantic Monthly ta bisa: “Si e tendencianan actual sigui, ménos cu mitar di tur yu cu nace awe lo biba continuamente cu nan mes mama i tata atrabes di nan infancia. Mayoria mucha mericano lo pasa vários aña como parti di un famia di mama soltero.”

Aunke Merca tin un porcentahe hopi mas haltu di tiener cu ta sali na estado compará cu otro nacionnan desaroyá, e problema di yunan cu ta nace pafó di matrimonio ta un problema mundial. Den algun pais europeo, manera Inglatera i Francia, e cifranan di natalidad ei ta casi igual cu na Merca. Den algun pais africano i di Sur América, e cifra di natalidad cerca mucha muhernan tiener ta casi dòbel esun di Merca. Kico ta causando e epidemia aki?

Loke Tin Tras dje Epidemia

Pa gran parti, e situacion aki ta reflehá e degeneracion moral dje “tempu crítico” den cua nos ta biba. (2 Timoteo 3:1-5) Den décadanan recien e cantidad di divorcio a aumentá drásticamente. Estilonan di bida homosexual of alternativo a bira parti dje areglo social establecí. Hóbennan a bira e blanco di un avalancha di propaganda di medionan di comunicacion: música i videonan musical provocativo, artículonan di revista i propagandanan cu temanan sexual escandaloso, programanan di television i películanan cu ta glorificá sex pa loco. E manera fácil pa haña servicionan di aborto i medionan pa controlá natalidad tambe a contribuí n’e creencia cu ta prevalecé cerca hóbennan cu sex no tin ningun consecuencia. Un tata soltero ta bisa: “Mi kier sex sin responsabilidad.” I un otro di: “Sex ta diberticion.”

Por haña actitudnan asina foral cerca hóbennan pober. Investigadó Elijah Anderson a tene entrevistanan extenso cu hóbennan den e partinan mas pober di stad i a observá: “Pa hopi mucha homber, sex ta un símbolo importante di státus social local; cada conkista  sexual ta un logro.” Sí, un tata soltero a conta Spierta! cu en general mucha hombernan ta mira conkistanan sexual manera “trofeo pa show den wandmeubel.” Kico ta e motibu di un actitud asina sin heful? Anderson ta splica cu den hopi caso e hendenan mas importante den bida di un hóben dje parti mas pober di stad “ta miembronan dje grupo di su pareunan. Nan ta fiha e normanan pa su comportacion, i p’e cumpli cu e normanan ei ta importante.”

Pues Anderson ta observá cu pa hopi yoncuman, conkista sexual no ta nada mas cu un wega, “cua su meta ta pa nek e otro persona, foral e mucha muher.” E ta agregá cu “e wega ta consistí di henter e manera cu e mucha homber ta presentá su mes, entre otro su bistí, areglo personal, su tipo, abilidad di baila i combersacion.” Hopi mucha homber ta hopi bon den gana e “wega” aki. Pero Anderson ta remarcá: “Ora e mucha muher sali na estado, e mucha homber tin tendencia di hala pia for di dje.”—Young Unwed Fathers—Changing Roles and Emerging Policies, redactá pa Robert Lerman i Theodora Ooms.

Dios Su Punto di Bista

Pero procreá yu realmente ta haci bo homber? Sex ta djis un wega? No segun nos Creador, Jehova Dios. Den su Palabra, Bijbel, Dios ta mustra bon cla cu sex tin un propósito elevá. Despues di conta tocante e creacion dje promé homber i muher, Bijbel ta bisa: “Dios a bendicioná nan i Dios a bisa nan: ‘Sea fructífero i bira hopi i yena e tera.’ ” (Génesis 1:27, 28) Nunca no tabata Dios su intencion pa yu ser bandoná dor di nan tata. El a uni e promé homber i muher den e laso permanente di matrimonio. (Génesis 2:24) Pues, tabata su boluntad pa tur yu tin tantu un mama como un tata.

Pero, no a tarda hopi cu hombernan a cuminsá tuma vários esposa. (Génesis 4:19) Génesis 6:2 ta conta nos cu asta algun criatura angelical “a cuminsá ripará yu muher di homber, cu nan tabatin bunita aparencia.” Despues di a bisti curpa humano, e angelnan aki “a cuminsá tuma esposa pa nan mes,” den un manera golos nan a tuma “tur loke nan a scoge.” E Diluvio den tempu di Noe a forsa e demoñonan aki bolbe bek n’e region di spiritu. Sin embargo, Bijbel ta indicá cu awor nan ta restringí n’e becindario di tera. (Revelacion 12:9-12) Pues, Satanas i su demoñonan ta ehercé un influencia masha poderoso riba hende awe. (Efesionan 2:2) Yoncumannan cu ta procreá yu indeseá i cu niun hende no ta stima, ta entregando nan mes inconcientemente na e influencia malbado ei.

Cu bon motibu anto, e Scritura ta bisa: “Esaki ta e boluntad di Dios, boso santificacion, pa boso abstené di fornicacion; pa cada un di boso sa con pa haña posesion di su mes wea den santificacion i onor, no den apetit sexual cudicioso manera e nacionnan tambe tin cu no ta conocé Dios; pa ningun hende yega te n’e punto di perhudicá i abusá dje derechonan di su ruman den e asuntu aki, pasobra Jehova ta esun cu ta exigí castigu pa tur e cosnan aki.”—1 Tesalonicensenan 4:3-6.

“Abstené di fornicacion”? Hopi yoncuman kisas ta cherche e idea aki. Al fin i al cabo, nan ta yong, i nan tin deseonan fuerte! Pero ripará cu fornicacion ta encerá “perhudicá i abusá dje derechonan” di otro hende. Un mucha muher no ta ser perhudicá ora bai lagu’é cu un baby pero sin e sosten di un casá? I kico dje riesgonan di pegu’é cu un malesa transmití sexualmente, manera herpes genital, sífilis, gonorea of AIDS? Ta berdad cu tin biaha ta posibel pa evitá e consecuencianan ei. Pero asina mes, sex promé cu matrimonio tog ta abusá di un mucha muher su derecho di conserbá un bon reputacion i drenta matrimonio como bírgen. Pues abstené for di fornicacion tin sentido, i e ta desplegá madures. Ta berdad cu esei ta exigí dominio propio i determinacion pa ‘haña posesion di bo mes wea’ i abstené for di sex promé cu matrimonio. Pero manera Isaías 48:17 i 18 ta bisa nos, mediante su leynan, Dios ta ‘siña nos beneficiá nos mes.’

 “Comportá Boso Manera Homber”

Pero con un yoncuman por duna prueba cu e ta ègt un homber? Sigur no dor di procreá yu ilegítimo. Bijbel ta urgi: “Keda lantá, para firme den e fe, comportá boso manera homber, bira poderoso. Laga tur boso asuntunan tuma lugá cu amor.”—1 Corintionan 16:13, 14.

Tuma nota cu “comportá boso manera homber” ta encerá ser alerto, firme den e fe, tene curashi i ser amoroso. Claro cu e principionan aki ta aplicá mes tantu pa hende homber como pa hende muher. Pero si bo desaroyá cualidad spiritual manera esakinan, hende lo tin bon motibu pa respetá bo i admirá bo como un berdadero homber! Siña un les for dje homber mas importante cu hamas a yega di biba: Jesucristo. Djis pensa riba su comportacion baronil i cu curashi ora el a confrontá tortura i asta morto. Pero con Jesus a comportá su mes cu e sexo opuesto?

Jesus sigur tabatin oportunidad pa disfrutá dje compania di hende muher. E tabatin hopi siguidó femenino, di cua algun “tabata sirbi [e cu su apostelnan] di nan pertenencianan.” (Lucas 8:3) Jesus tabata masha cerá foral cu e dos ruman muhernan di Lázaro. De echo, Bijbel ta bisa cu “Jesus a stima Marta i su ruman muher.” (Juan 11:5) Jesus a usa su sentido di humor, su encanto of aparencia físico atractivo, cu como un homber perfecto sin duda e tabatin, pa seducí e muhernan aki den actonan inmoral? Al contrario, Bijbel ta bisa di Jesus cu e “no a cometé picá.” (1 Pedro 2:22) E no a comportá su mes indecentemente ni sikiera ora un muher bon conocí como un pecadó, kisas un prostituta, “a yora i a cuminsá muha [Jesus] su pianan cu su lágrimanan i seca nan cu e cabei di su cabes.” (Lucas 7:37, 38) Jesus no a ni pensa di probechá dje muher vulnerabel aki! El a demostrá e abilidad di controlá su sintimentunan, loke ta e marca di un berdadero homber. El a trata hende muher, no como djis un obheto sexual, sino como personanan individual cu ta digno di amor i respet.

Como un mucha homber cristian, sigui e ehempel di Cristo—no di algun di bo pareunan—lo prevení bo di “perhudicá i abusá dje derechonan” di un persona. Tambe esei lo protehá bo di experenciá e tragedia tristu di procreá un yu ilegítimo. Ta berdad cu otro hende kisas ta tenta bo pasobra bo ta abstené di fornicacion. Pero a lo largu, gana Dios su fabor lo beneficiá bo mas cu gana e fabor temporal di bo pareunan.—Proverbionan 27:11.

Sin embargo, kico si un hóben a hiba un bida inmoral den pasado pero ya caba el a cambia di su rumbo inmoral i di berdad a repentí? Si ta asina, mescos cu rey David arepentí, kende tambe a participá den mal comportacion sexual, e hóben por tin sigur di Dios su pordon. (2 Samuel 11:2-5; 12:13; Salmo 51:1, 2) Pero si resultá cu e mucha muher sali na estado i boso no ta casá, ainda e yoncuman tin cu tuma algun decision serio. E mester casa cu e mucha muher? E tin cualkier responsabilidad pa cu su yu? Un otro artículo lo trata e preguntanan aki.

[Plachinan na página 15]

Hopi hóben ta kere ekibocadamente cu sex no tin ningun consecuencia