E Punto di Bista Biblico

Con pa Trata cu Desesperacion

DESESPERACION ta comun cerca tur hende, por lo ménos te na cierto grado. Sin embargo, pa algun hende sintimentunan di desesperacion ta bira asina severo cu nan ta preferá di muri cu keda na bida.

Bijbel ta mustra cu asta sirbidónan fiel di Dios no ta inmuno pa problema i preshonnan cu ta hiba na desesperacion. Tuma por ehempel, Elías i Job, kendenan tur dos a disfrutá di un bon relacion cu Dios. Despues di hui pa scapa su bida for dje reina malbado Jezabel, Elías “a cuminsá pidi [Jehova] pa su alma muri.” (1 Reynan 19:1-4) E homber hustu Job a experenciá un seri di tragedia, entre nan un malesa repugnante i morto di dies yu. (Job 1:13-19; 2:7, 8) Su desesperacion a pon’é declará: “Mihó choka mi mata, ku laga mi keda biba asina mizerablemente.” (Job 7:15, Beibel na papiamentu koriente) Ta bisto anto cu e ansiedad dje hombernan fiel aki di Dios tabata basta intenso.

Algun hende awe ta desesperá kisas debí n’e efectonan doloroso di behes, e morto di un casá of problemanan financiero serio. Otro hende ta haña cu stres persistente, e efectonan cu ta keda atras di un experencia traumático of problemanan familiar, ta laga nan sinti como si fuera nan ta luchando meimei di laman grandi, i cada ola ta hacié mas difícil pa nan yega cantu. Un homber a bisa: “Bo ta haña un sintimentu di no ta bal nada, como si fuera niun hende lo no sinti bo falta una bes bo no t’ei mas. E soledad cu bo ta sinti tin biaha ta insoportabel.”

Den algun caso, circunstancianan ta drecha, aliviando e preshon intenso aki. Pero kico si nos circunstancianan no ta cambia?  Con Bijbel por yuda nos trata cu desesperacion?

Bijbel Por Yuda

Jehova tabatin e abilidad i poder pa sostené Elías i Job atrabes di nan dificultadnan. (1 Reynan 19:10-12; Job 42:1-6) Esta un consuelo e realisacion ei ta pa nos awe! Bijbel ta declará: “Dios ta pa nos un refugio i fortalesa, un yudansa cu por haña fácilmente durante angustia.” (Salmo 46:1; 55:22) Apesar cu por parce cu sintimentunan di desesperacion ta hoga nos, Jehova ta primintí cu lo e tene nos duru gará cu su man drechi di husticia. (Isaías 41:10) Con nos por beneficiá dje yudansa aki?

Bijbel ta splica cu mediante oracion “e pas di Dios cu ta surpasá tur pensamentu lo warda [nos] curason i [nos] facultad mental pa medio di Cristo Jesus.” (Filipensenan 4:6, 7) Debí na nos angustia, kisas nos no ta mira ningun salida pa nos problema. Sin embargo, si nos “perseverá den oracion,” Jehova por protehá nos curason i mente, i duna nos asina e fortalesa necesario pa wanta.—Romanonan 12:12; Isaías 40:28-31; 2 Corintionan 1:3, 4; Filipensenan 4:13.

Nos lo beneficiá dor di ta specífico den nos oracionnan. Maske por ta difícil pa pone nos pensamentunan den palabra, nos mester sinti nos liber pa papia cu Jehova tocante loke nos ta sinti, i loke nos ta mira como e rais dje problema. Nos tin cu pidié forsa pa sostené nos pa pasa dor di cada dia. Nos tin e garantia aki: “Lo e [Jehova] cumpli cu e deseo di hende cu ta tem’é, i lo e tende nan sclamacion pa yudansa, i lo e salba nan.”—Salmo 145:19.

Ademas di haci oracion, nos tin cu resistí isolacion. (Proverbionan 18:1) Tin hende a haña forsa dor di usa nan tempu i energia pa yuda otronan. (Proverbionan 19:17; Lucas 6:38) Considerá un señora cu yama Maria, * kende no solamente a lucha contra cancer sino tambe a perde ocho miembro di famia den un solo aña. Maria tabatin cu forsa su mes pa lanta for di cama i bai bek den un rutina. Casi tur dia e tabata sali bai siña otro hende tocante Bijbel, i a asistí regularmente na reunionnan cristian. Pero, ora Maria bai cas, su sintimentunan di desesperacion tabata bin bek cu un intensidad. Sin embargo, dor di enfocá riba con e por yuda otro hende, Maria ta logra wanta.

Pero kico si nos ripará cu ta difícil pa haci oracion of ta parce cu nos no por saca nos mes for di isolacion? Den tal caso nos tin cu busca yudansa. Bijbel ta animá nos pa acudí na “e ancianonan dje congregacion.” (Santiago 5:13-16) Un homber cu ta tratando cu depresion severo i continuo a bisa: “Tin biaha papia cu un hende cu bo ta confia ta yuda trankilisá e mente i calma e spiritu, di manera cu pensamentu racional ta prevalecé.” (Proverbionan 17:17) Claro cu ora desesperacion prolongá i intenso ta indicá un problema médico, kisas ta necesario tambe pa busca yudansa profesional apropiado. *—Mateo 9:12.

Maske no tin solucionnan fácil, nos no mester balotá Dios su abilidad di yuda nos trata cu nos problemanan. (2 Corintionan 4:8) Persistí den oracion, evitá isolacion i busca yudansa cualificá, lo yuda nos recobrá stabilidad. Bijbel ta primintí cu Dios lo trece un fin completo na e causanan fundamental di nos desesperacion intenso. Cristiannan ta decididu pa dependé riba dje miéntras nan ta spera e dia ora cu “e cosnan anterior lo no ser recordá.”—Isaías 65:17; Revelacion 21:4.

[Nota]