E Historia Dramático di un “Pais di Contraste”
E Historia Dramático di un “Pais di Contraste”
DJE CORESPONSAL DI SPIERTA! NA BRAZIL
NAN a yega di yam’é e “pais di contraste,” i cu bon motibu. Aunke Brazil ta principalmente un pais tropical, su clima ta varia for di subtropical den zuid pa un clima hopi cayente den e region di Amazona. Brazil su historia tambe ta marcá pa contraste. Atrabes di añanan, e inmenso pais aki—cu ta abarcá un área di 8.511.999 kilometer cuadrá, cu un costa di 7.400 kilometer largu—a bira e hogar pa hende di vários cultura.
Hospitalidad tabata un dje promé cualidadnan cu e portuguesnan a ripará ora nan a pone pia na Brazil 500 aña pasá. Sí, ora Pero Vaz de Caminha a skirbi e rey portugues Manuel I na aña 1500, el a describí e brazileñonan nativo andando libremente cu nan bishitantenan portugues i ta brasa nan. Pero ki mishi e portuguesnan na Brazil?
Dia 9 di mart 1500, Pedro Álvares Cabral a sali for di Portugal cu un flota di barcu. Su intencion tabata pa establecé un centro di comercio na Calicut, India. Pero, promé cu Cabral a yega su destinacion, el a baha na costa di loke awor ta e estado brazileño Bahia. E fecha tabata 23 di april 1500.
Algun investigadó ta bisa cu e portuguesnan tabata sa caba dje existencia di Brazil i cu Cabral su parada no tabata accidentalmente. * Di tur manera, a parce cu e único producto cu Brazil tabatin di ofrecé tabata brasia of brazil, un palu conocí pa e dai corá carmesí cu nan ta saca for di dje. Maske esaki tabatin un potencial obvio, specerei di India tabata bal mas.
Pues durante dies aña Portugal a huur Brazil cu Fernando de Noronha di Portugal, kende a recogé palu di brasia i a paga belasting na e gobiernu portugues. Pero otro paisnan europeo tambe kier a expandé nan comercio cu e Mundu Nobo, i Noronha no por a para e creciente comercio ilegal cu e nabegantenan frances, ingles i spañó tabata efectuá. Temiendo cu nan lo por perde Brazil, e portuguesnan a cuminsá colonisá e pais na aña 1532. Produccion di sucu a bira e promé negoshi lucrativo na Brazil.
Minamentu di oro i diamanta a bira negoshinan próspero durante siglo 18. Na comienso di siglo 19, e produccion di latex for dje palu di rubber a bira un actividad económico importante den e region di Amazona. * Mas despues, plantacion di kofi a hunga un papel den e urbanisacion di Brazil, dor di financiá construccion di rutanan di trein i modernisacion dje hafnan di Santos i Rio de Janeiro. Pa fin di siglo 19, mitar dje kofi na mundu tabata ser cosechá na Brazil, i São Paulo tabata Brazil su centro económico principal.
Lamentablemente, sclabitud a hunga un papel den historia di Brazil. Na principio, e colonisadónan portugues a usa e indjannan pa kap i transportá e palunan di brasia. Despues, nan a pone e indjannan traha den e plantacionnan di caña di sucu. Trágicamente, cantidad grandi di indjan a contraé malesanan europeo i a muri debí na nan. Pa remplasá e trahadónan aki, Portugal a trece catibu for di Africa.
Atrabes di añanan nan a trece miyones di africano Brazil como catibu, i nan a bini cu nan herencia cultural i genético. Por mira influencia di esei den música popular manera samba i den capoeira (un sistema di bringa) i tambe den cumindanan manera feijoada, un plato di bonchi pretu cu carni porco, worst i yorki. Finalmente, na 1888, nan a abolí sclabitud na Brazil. Rond di 750.000 hende a bira liber—di esakinan mayoria a traha den plantacion.
For di siglo 19 padilanti, miyones di stranhero a basha bini Brazil, entre nan, aleman, hapones, italiano, polaco i spañó i tambe hende di desendencia sirio-libanes i suiso. Brazil ta un dushi lugá pa biba. Su flora i fauna ta abundante. Por lo general, Brazil ta liber di desasternan natural. No tin guera, temblor, volcan, ciclon ni olanan devastador. Pues, pakico bo no ta bin cera conocí cu Brazil i bishitá algun di su atraccionnan bon conocí? Lo bo disfrutá dje mésun hospitalidad i beyesa natural cu a impresioná e portuguesnan 500 aña pasá.
[Nota]
^ par. 6 Ora e portugues cu e spañónan a firma e Tratado di Tordesillas na aña 1494, nan a parti e tera na west di Sur Atlántico. P’esei, tin hende ta bisa cu Cabral a sali cu intencion di tuma posesion dje tera cu ya caba tabata designá na Portugal.
^ par. 8 Mira Spierta! na spañó di 22 di mei 1997, página 14-17.
[Mapa/Plachinan na página 16, 17]
(Pa e teksto den su formato kompleto, wak e publikashon)
REGION DI AMAZONA
ESTADO BAHIA
Brasília
Rio de Janeiro
São Paulo
Santos
Waterval di Iguaçú
[Plachinan]
1. Pedro Álvares Cabral
2. Tratado di Tordesillas, 1494
3. Cargadónan di kofi
4. Waterval di Iguaçú, mirá for dje banda di Brazil
5. Indjan ipixuna
[Rekonosementu]
Culver Plachinan
Cortesia di Archivo General de Indias, Sevilla, Spaña
For dje buki Brazil and the Brazilians, 1857
FOTO: MOURA
[Plachinan na página 18]
1. Brazil tin puma na granèl
2. Orkidia den e selva di Amazona
3. Bistí tradicional di Salvador, Bahia
4. Un guacamaya
5. Playa Copacabana, Rio de Janeiro. Brazil tin mas cu 7.000 kilometer na costa bunita
[Rekonosementu]
Cortesia di São Paulo Zoo
[Plachi na página 19]
Brasília—capital di Brazil for di 1960
[Plachi na página 19]
São Paulo—e centro económico di Brazil
[Rekonosementu]
FOTO: MOURA
[Rekonosementu pa Potrèt na página 16]
© 1996 Visual Language